ការអភិវឌ្ឍធនធានមនុស្សគឺជាការវិនិយោគទៅលើមនុស្ស ដើម្បីសមធម៌សង្គម និងកំណើនសេដ្ឋកិច្ច។ នៅពេលដែលប្រទេសកម្ពុជាផ្លាស់ប្តូរពីស្រមោលនៃសង្គ្រាមស៊ីវិលជិត ៤ ទសវត្សរ៍ ការកសាង និងការអភិវឌ្ឍសេដ្ឋកិច្ចជាតិត្រូវបានគេសម្លឹងឃើញថាស្ថិតនៅក្នុងចំណោមវិស័យអាទិភាពកំពូលៗ សម្រាប់ព្រះរាជាណាចក្រមួយនេះ។ ក្នុងនាមជាប្រទេសជិតខាង ប្រទេសថៃជឿជាក់ថាការអភិវឌ្ឍប្រទេសកម្ពុជាមិនត្រឹមតែផ្តល់អត្ថប្រយោជន៍ដល់ប្រទេសនេះប៉ុណ្ណោះទេ ប៉ុន្តែថែមទាំងបានរួមចំណែកដល់ស្ថិរភាព សន្តិសុខក្នុងតំបន់ និងសុខុមាលភាពរបស់ប្រជាជនរវាងប្រទេសទាំង ២ ផងដែរ។
ក្រៅពីកំណើនពាណិជ្ជកម្ម និងការវិនិយោគរវាងកម្ពុជា និងថៃក្នុងរយៈពេលជាច្រើនឆ្នាំកន្លងមកនេះ កិច្ចសហប្រតិបត្តិការអភិវឌ្ឍលើវិស័យផ្សេងៗ ដូចជាធនធានមនុស្ស និងសុខសុវត្ថិភាពរបស់ប្រជាជន គឺពិតជាមានសារៈសំខាន់ខ្លាំងណាស់ ខណៈដែលប្រទេសទាំង ២ អបអរខួបលើកទី ៧០ ការបង្កើតទំនាក់ទំនងការទូតរវាងកម្ពុជា-ថៃដែលត្រូវបានបង្កើតឡើងចាប់តាំងពីខែធ្នូ ឆ្នាំ ១៩៥០។
ការកសាងសមត្ថភាពធនធានមនុស្ស
វាមិនមែនជាអាថ៌កំបាំងនោះទេដែលថា ការអប់រំប្រកបដោយគុណភាពគឺជួយពង្រឹងអំណាចប្រជាជន និងរួមចំណែកក្នុងការបង្កើតមូលដ្ឋានគ្រឹះដ៏រឹងមាំ សម្រាប់ការអភិវឌ្ឍប្រទេសជាតិមួយ។
គិតចាប់តាំងពីឆ្នាំ ២០១១ មកទីភ្នាក់ងារសហប្រតិបត្តិការអន្តរជាតិថៃ (TICA) បានទំនាក់ទំនងជាមួយក្រុមប្រឹក្សាអភិវឌ្ឍន៍កម្ពុជា (EDC) ដើម្បីផ្តល់អាហារូបករណ៍រយៈពេលខ្លី និងវែងដល់សិស្សនិស្សិតកម្ពុជាជាង ២,៤០០ នាក់សម្រាប់សិក្សាថ្នាក់អាហារូបករណ៍ និងវគ្គបណ្តុះបណ្តាលវិជ្ជាជីវៈនៅប្រទេសថៃ។
ការផ្តល់អាហារូបករណ៍នេះ គឺជាការចូលរួមចំណែកមួយដ៏ធំរបស់ប្រទេសថៃក្នុងការអភិវឌ្ឍធនធានមនុស្សរួមជាមួយប្រទេសជិតខាងដោយអាហារូបករណ៍ភាគច្រើនត្រូវបានផ្តល់ជូនក្រោមគម្រោងព្រះរាជឧបត្ថម្ភរបស់ព្រះអង្គម្ចាស់ក្សត្រិយ៍ Maha Chakri Sirindhorn ដែលទ្រង់ត្រូវបានគេផ្តល់គោរមងារជា «Educator Princess» សម្រាប់ទឹកព្រះទ័យយកចិត្តទុកដាក់របស់ទ្រង់ចំពោះការអភិវឌ្ឍវិស័យអប់រំទាំងនៅក្នុងប្រទេស និងតំបន់។
គម្រោងនេះគឺដើម្បីផ្តល់ជូនប្រជាជនកម្ពុជាទាំងក្នុងពេលបច្ចុប្បន្ន និងអនាគតនូវចំណេះដឹង និងជំនាញដើម្បីទទួលបានសក្តានុពលពេញលេញនៅក្នុងអាជីពរបស់ពួកគេ ដើម្បីរួមចំណែកដល់ការរីកចម្រើន និងការអភិវឌ្ឍជាទូទៅរបស់ប្រទេសកម្ពុជា។
ក្រៅពីការផ្តល់អាហារូបករណ៍របស់ព្រះអង្គម្ចាស់ក្សត្រិយ៍ហើយនោះ គម្រោងនេះក៏ពាក់ព័ន្ធនឹងការផ្តល់ព្រះរាជឧបត្ថម្ភហិរញ្ញវត្ថុ និងការគាំទ្រដល់ការបង្កើតស្ថាប័នឧត្តមសិក្សានៅកម្ពុជាផងដែរ គឺវិទ្យាស្ថានបច្ចេកវិទ្យាកំពង់ឈើទាល និងកំពង់ស្ពឺ និងវិទ្យាស្ថានអភិវឌ្ឍន៍មុខជំនាញកម្ពុជា-ថៃដែលស្ថិតនៅក្នុងរាជធានីភ្នំពេញ ដោយបានសហការជាមួយក្រសួងការងារថៃ។
ការផ្តល់អាហារូបករណ៍របស់ព្រះអង្គម្ចាស់ក្សត្រិយ៍ និងការផ្តល់ជំនួយលើវិស័យអប់រំនេះបានផ្តល់ឱកាសដល់ប្រជាជនកម្ពុជាក្នុងការក្រេបយកចំណេះដឹង និងកសាងវិថីឆ្ពោះទៅរកភាពជោគជ័យ។ ហើយវាគឺជាការរួមចំណែកប្រកបដោយអត្ថន័យរបស់ប្រទេសថៃដែលមានជាយូរមកហើយ និងមានឥទ្ធិពលដ៏រឹងមាំទាំងសម្រាប់ប្រជាជន និងថ្នាក់ជាតិ។
កាលពីពេលថ្មីៗនេះ គម្រោងនេះត្រូវបានបន្តជាថ្មីក្នុងរយៈពេល ៥ ឆ្នាំទៀត ដោយមានការចុះហត្ថលេខាលើកិច្ចព្រមព្រៀងថ្មីមួយនៅក្នុងទីក្រុងបាងកក កាលពីថ្ងៃទី ១ ខែកញ្ញា ឆ្នាំ ២០២០។ ការប្តេជ្ញាចិត្តបន្តនេះត្រូវបានគេរំពឹងថានឹងជំរុញបន្ថែមទៀតដល់កេរដំណែលនៃកិច្ចសហប្រតិបត្តិការអភិវឌ្ឍន៍ក្នុងវិស័យអប់រំ ដែលអាហារូបករណ៍របស់ព្រះអង្គម្ចាស់ក្សត្រិយ៍ជាង ២០០០ កន្លែងត្រូវបានផ្តល់ជូនសិស្សនិស្សិតកម្ពុជាឱ្យបានទៅសិក្សានៅប្រទេសថៃ គិតចាប់តាំងពីឆ្នាំ ២០០៥ ដល់ ២០១៩។
ប្រព័ន្ធអប់រំដ៏រឹងមាំ
នៅក្នុងបទសម្ភាសកាលពីពេលថ្មីៗនេះជាមួយរដ្ឋមន្ត្រីក្រសួងអប់រំ យុវជន និងកីឡា ឯកឧត្ដមបណ្ឌិតសភាចារ្យ ហង់ជួន ណារ៉ុន ដែលជាកម្លាំងចលករមួយដ៏សំខាន់ក្នុងការជំរុញកិច្ចសហប្រតិបត្តិការរបស់ប្រទេសទាំង ២ ដើម្បីកសាងធនធានមនុស្សនៅកម្ពុជា។ សារៈសំខាន់នៃប្រព័ន្ធអប់រំល្អសម្រាប់កំណើន និងការអភិវឌ្ឍត្រូវបានផ្តោតជាសំខាន់។
«ខ្ញុំជឿជាក់ថា ការអប់រំពិតជាមានសារៈសំខាន់ណាស់។ បើគ្មានប្រព័ន្ធអប់រំដ៏រឹងមាំទេនោះ យើងក៏នឹងមិនអាចកសាងប្រទេសជាតិឱ្យរឹងមាំបានដែរ»។
«សមិទ្ធផលដ៏អស្ចារ្យនៃអាណាចក្រខ្មែរចន្លោះពីសតវត្សរ៍ទី ៩ និងទី ១៥ ត្រូវបានកសាងឡើងនៅលើមូលដ្ឋានគ្រឹះនៃប្រព័ន្ធអប់រំដ៏រឹងមាំដែលរដ្ឋបាលសាធារណៈ កសិកម្ម ស្ថាបត្យកម្ម ជលវិទ្យា ភ័ស្តុភារ នគរូបនីយកម្ម និងសិល្បៈ គឺជាសក្ខីភាពនៃអរិយធម៌ដ៏រុងរឿងដែលត្រូវបានកសាងដោយធនធានមនុស្សដែលមានកម្រិតចំណេះវិជ្ជាខ្ពស់»។
ឯកឧត្ដម ហង់ជួន ណារ៉ុន មានប្រសាសន៍ថា៖ «ជម្លោះ និងសង្គ្រាមស៊ីវិលនៅក្នុងប្រទេសជាបន្តបន្ទាប់អស់រយៈពេលជាច្រើនឆ្នាំបានធ្វើឱ្យប្រព័ន្ធអប់រំត្រូវបានគេបំភ្លេចចោល ឬចាត់ទុកជាអរិភាព ហើយវិបត្តិសេដ្ឋកិច្ចកើតឡើង។ មេរៀនដែលយើងបានរៀនសូត្រពីការសង្កេតរឿងរ៉ាវប្រវត្តិសាស្ត្រទាំងនេះ បានប្រាប់យើងថា ប្រព័ន្ធអប់រំនៃប្រទេសមួយគឺមានសារៈសំខាន់ណាស់ ក្នុងការកំណត់ជោគជ័យ ឬបរាជ័យរបស់ប្រទេសនោះ»។
ដើម្បីឆ្លើយតបទៅនឹងតម្រូវការចាំបាច់នៃការអភិវឌ្ឍធនធានមនុស្សបន្ថែមសម្រាប់ការអភិវឌ្ឍសង្គម និងសេដ្ឋកិច្ចរបស់ព្រះរាជាណាចក្រកម្ពុជា ឯកឧត្តមមានជំនឿចិត្តថា ដើម្បីឱ្យប្រទេសជាតិធ្វើដំណើរឆ្ពោះទៅមុខ គឺត្រូវមានកិច្ចខិតខំប្រឹងប្រែងធ្វើកំណែទម្រង់ និងផ្លាស់ប្តូរប្រព័ន្ធអប់រំ។
ហើយគន្លឹះក្នុងការផ្លាស់ប្តូរ ឯកឧត្តម ហង់ជួន ណារ៉ុន សង្កត់ធ្ងន់លើការបណ្តុះបណ្តាលយុវជនកម្ពុជាជំនាន់ក្រោយ ពោលគឺមិនត្រឹមតែសម្រាប់ចំណេះដឹង និងជំនាញបច្ចេកទេសប៉ុណ្ណោះទេ ថែមទាំងរៀបចំជូនពួកគេនូវជំនាញនៃការគិតវិភាគ និងជំនាញដោះស្រាយបញ្ហាផងដែរ។ ប្រការនេះនឹងជួយពង្រឹងទាំងផ្នែកសេវាសាធារណៈ និងវិស័យធុរកិច្ចឯកជននៅកម្ពុជានាពេលអនាគត។
លើសពីនេះទៀត ជាមួយនឹងការជំរុញរបស់រដ្ឋាភិបាលកម្ពុជាដើម្បីឆ្ពោះទៅរកការត្រៀមរៀបចំប្រទេសជាតិសម្រាប់ «បដិវត្តន៍ឧស្សាហកម្មទី ៤» គឺតម្រូវឱ្យមានការអភិវឌ្ឍធនធានមនុស្ស ជាពិសេសក្នុងវិស័យហិរញ្ញវត្ថុ និងបច្ចេកវិទ្យាព័ត៌មាន។
សម្រាប់ឱកាសដែលសិស្សនិស្សិតកម្ពុជាអាចទទួលបានអាហារូបករណ៍ពីព្រះអង្គម្ចាស់ក្សត្រិយ៍ Maha Chakri Sirindhorn ឯកឧត្តម ហង់ជួន ណារ៉ុន បានមើលឃើញរួចហើយអំពីផលវិជ្ជមាន ដែលមាននៅលើការផ្លាស់ប្តូរប្រព័ន្ធអប់រំថ្នាក់ជាតិ។
ឯកឧត្តមបានមានប្រសាសន៍ថា៖ «កាលពីអតីតកាលមានសិស្សតែ ៣០ ភាគរយប៉ុណ្ណោះដែលបានចូលរៀនពីថ្នាក់បឋមសិក្សា រហូតដល់ថ្នាក់អនុវិទ្យាល័យ និងបានបញ្ចប់ថ្នាក់ទី ១២ ហើយមានតែ ១ ភាគរយប៉ុណ្ណោះដែលបន្តការសិក្សានៅថ្នាក់ឧត្តមសិក្សា និងបញ្ចប់ការសិក្សានៅថ្នាក់ឧត្តមសិក្សា ឬសាកលវិទ្យាល័យ»។
ប៉ុន្តែបច្ចុប្បន្នស្ថិតិបានបង្ហាញថាមានសិស្សកាន់តែច្រើនបានបញ្ចប់ការសិក្សាថ្នាក់ទី ១២ ហើយចំនួននិស្សិតបញ្ចប់ការសិក្សានៅថ្នាក់ស្ថាប័នឧត្តមសិក្សា ឬសាកលវិទ្យាល័យបានកើនឡើងជាលំដាប់ជារួមគឺកើនឡើង ១០ ភាគរយ។
«ជារៀងរាល់ឆ្នាំអាហារូបករណ៍របស់ម្ចាស់ក្សត្រិយ៍ជិត ២០០ កន្លែងត្រូវបានផ្តល់ជូនសិស្សនិស្សិតកម្ពុជាសម្រាប់សិក្សានៅប្រទេសថៃ។ សិស្សនិស្សិតដែលដាក់ពាក្យស្នើសុំអាហារូបករណ៍បានសម្លឹងឃើញឱកាសទៅសិក្សានៅក្នុងប្រទេសថៃ គឺជាតម្លៃបន្ថែមដែលមានមុខជំនាញជាច្រើនសម្រាប់ជ្រើសរើស និងមានកេរ្តិ៍ឈ្មោះល្បីល្បាញនៅទូទាំងពិភពលោក និងដើម្បីទទួលបានបទពិសោធដ៏មានតម្លៃទាំងនៅក្នុងថ្នាក់តំបន់ និងអន្តរជាតិ។
«ខណៈអ្នកដែលទទួលបានអាហារូបករណ៍ភាគច្រើនគឺជាសិស្ស-និស្សិតឆ្នើមមកពីព្រះរាជាណាចក្រកម្ពុជា។ ពួកគេភាគច្រើនបានបញ្ចប់ការសិក្សា និងទទួលបានចំណាត់ថ្នាក់កំពូល ហើយមួយចំនួនទៀតទទួលបានមេដាយមាសពីស្ថាប័នឧត្តមសិក្សានៅប្រទេសថៃថែមទៀតផង»។
នៅពេលបញ្ចប់ការសិក្សានៅប្រទេសថៃ ពួកគេបានវិលត្រឡប់មកប្រទេសកម្ពុជាវិញដោយមិនត្រឹមតែទទួលបានសញ្ញាបត្រប៉ុណ្ណោះទេ ប៉ុន្តែថែមទាំងមានបទពិសោធសំខាន់ៗ ដែលរួមចំណែកជួយដល់ក្រុមហ៊ុននានា និងប្រទេសជាតិឱ្យរីកចម្រើនថែមទៀតផង»។
ក្នុងនាមជាអ្នកទទួលបានកិត្តិយស និងបានបញ្ចប់ការសិក្សាពីស្ថាប័នឧត្តមសិក្សា រួមទាំងសាកលវិទ្យាល័យឈានមុខគេមួយរបស់ប្រទេសថៃ ឯកឧត្តម ហង់ជួន ណារ៉ុន បានឱ្យដឹងថានេះគឺជាគុណតម្លៃបន្ថែមនៃការសិក្សានៅបរទេស។
តាមរយៈការចែករំលែកបទពិសោធរបស់ឯកឧត្តម ខណៈបានបន្តការសិក្សាថ្នាក់បណ្ឌិតនៅសាកលវិទ្យាល័យ Chulalongkorn University ឯកឧត្តមបានលើកឡើងថា៖ «មុនពេលដែលខ្ញុំត្រូវបានតែងតាំងជារដ្ឋមន្ត្រីក្រសួងអប់រំ យុវជន និងកីឡាក្នុងឆ្នាំ ២០១៣ ខ្ញុំគឺជាសេដ្ឋវិទូ ១ រូបដែលកាន់មុខតំណែងជាមន្ត្រីជាន់ខ្ពស់ និងមុខតំណែងសំខាន់ៗជាច្រើននៅក្រសួងសេដ្ឋកិច្ច និងហិរញ្ញវត្ថុអស់រយៈពេល ១៥ ឆ្នាំ»។
«ប្រវត្តិការងាររបស់ខ្ញុំ កើតចេញពីជំនាញហិរញ្ញវត្ថុ និងសេដ្ឋកិច្ចទាំងក្នុងកម្រិតបច្ចេកទេស និងវិជ្ជាជីវៈ ប៉ុន្តែខ្ញុំបានប្តូរផ្នត់គំនិតរបស់ខ្ញុំ ហើយផ្តោតលើការរៀនសូត្រអំពីប្រព័ន្ធអប់រំនៅកម្ពុជា ដើម្បីអភិវឌ្ឍន៍ និងបង្កើតគោលនយោបាយធ្វើកំណែទម្រង់ដែលត្រូវការចាំបាច់ដើម្បីជំរុញប្រទេសជាតិយើងឱ្យឆ្ពោះទៅមុខ»។
«ដូច្នេះក្នុងឆ្នាំ ២០១៦ បន្ទាប់ពីខ្ញុំបានសិក្សាអស់រយៈពេល ៣ ឆ្នាំ ដើម្បីពិនិត្យឡើងវិញយ៉ាងទូលំទូលាយនៃប្រព័ន្ធអប់រំជាតិ ខ្ញុំបានសម្រេចចិត្តបន្តការសិក្សាថ្នាក់បណ្ឌិតនៅសាកលវិទ្យាល័យ Chulalongkorn University ដើម្បីជួយខ្ញុំឱ្យមានជំនាញ ចំណេះដឹង និងបទពិសោធកាន់តែប្រសើរ ដើម្បីដោះស្រាយបញ្ហាប្រឈមក្នុងការគ្រប់គ្រងមុខតំណែងអប់រំថ្នាក់ជាតិ»។
«ទោះជាយ៉ាងណាដោយសារតែការប្តេជ្ញាចិត្តចំពោះការបំពេញការងារ ខ្ញុំបានស្នើសុំសាកលវិទ្យាល័យឱ្យអនុញ្ញាតឱ្យខ្ញុំសិក្សាដោយមិនចាំបាច់ចូលរៀននៅក្នុងសាលាដោយផ្ទាល់ ហើយសាលាក៏យល់ព្រម។ ពេលនោះធ្វើឱ្យខ្ញុំក្លាយជាមនុស្សដំបូងគេ ដែលបានចុះឈ្មោះចូលរៀនថ្នាក់បណ្ឌិតនៅសាកលវិទ្យាល័យនេះតាមរយៈការសិក្សាពីចម្ងាយ»។
«អ្វីដែលធ្វើឱ្យខ្ញុំចាប់អារម្មណ៍បំផុតនៅពេលសិក្សាថ្នាក់បណ្ឌិតរបស់ខ្ញុំ គឺការស្វាគមន៍ដ៏កក់ក្តៅ និងទទួលបានការគាំទ្រយ៉ាងខ្លាំងពីសាស្ត្រាចារ្យ និងបុគ្គលិកខាងវិស័យអប់រំនៃសាកលវិទ្យាល័យ Chulalongkorn University ដែលពោរពេញដោយសមត្ថភាព ជាសាកលវិទ្យាល័យដែលមានសាស្ត្រាចារ្យល្បីៗ និងបានផ្តល់សៀវភៅ ឯកសារផ្សេងៗ។
ពេលខ្លះពួកគេបានមកជួបខ្ញុំដើម្បីផ្តល់យោបល់សម្រាប់ការសិក្សា រួមទាំងពួកគាត់បានមកបំពេញបេសសកម្មបង្រៀនដែលបានចាប់ដៃគូជាមួយស្ថាប័នឧត្តមសិក្សានៅកម្ពុជា។ ទាំងនេះបានធ្វើឱ្យខ្ញុំរៀបចំខ្លួនសម្រាប់ការប្រឡង រៀបចំផែនការ សរសេរនិក្ខេបបទ និងបញ្ចប់ការសិក្សាដោយជោគជ័យ និងប្រកបដោយកិត្តិយសបំផុត»។
«ក្នុងអំឡុងពេលសិក្សា ខ្ញុំក៏ត្រូវបានជំរុញឱ្យចាប់ផ្តើមគម្រោងសាកល្បងមួយនៅកម្ពុជា ដើម្បីបង្កើតសាលាថ្មីមួយសម្រាប់ពេលអនាគត សាលារៀនដែលបំពាក់ដោយប្រព័ន្ធគ្រប់គ្រងទំនើប ដើម្បីបណ្តុះបណ្តាល សិស្សានុសិស្ស នូវចំណេះដឹងសំខាន់ៗ ជំនាញ និងការប្តេជ្ញាចិត្តដើម្បីក្លាយជាពលរដ្ឋល្អសម្រាប់សង្គមជាតិ និងសកលលោក»។
លើកកម្ពស់សុខសុវត្ថិភាពសម្រាប់ប្រជាជន
ខណៈវិស័យអប់រំគឺជាសមាសធាតុដ៏សំខាន់ក្នុងការកសាងប្រទេសជាតិឆ្ពោះទៅរកការរីកចម្រើនដ៏រឹងមាំ និងប្រកបដោយចីរភាព វាក៏មានសារៈសំខាន់ដូចគ្នាក្នុងការដោះស្រាយតម្រូវការរបស់ប្រជាជនកម្ពុជាសម្រាប់អ្នកដែលនៅតែរងផលប៉ះពាល់ដោយបញ្ហាសុខភាព និងសុវត្ថិភាពនៅក្នុងសហគមន៍របស់ពួកគេ។ ដូច្នេះរដ្ឋាភិបាលថៃបានកំណត់សុខសុវត្ថិភាពរបស់ប្រជាជនគឺជាផ្នែកមួយផ្សេងទៀតនៃការចូលរួម និងយកចិត្តទុកដាក់ ដែលនឹងលើកកម្ពស់សុខសុវត្ថិភាពប្រជាជន និងរួមចំណែកដល់ការពង្រឹងទំនាក់ទំនងទ្វេភាគីជាមួយកម្ពុជា។
សម្រាប់រាជរដ្ឋាភិបាលថៃ ការការពារប្រជាជនពីភាពងាយរងគ្រោះផ្នែកសុខភាព និងសុវត្ថិភាពនៅប្រទេសជិតខាងនឹងជួយជំរុញដល់ការរីកចម្រើន និងការអភិវឌ្ឍជាបន្តបន្ទាប់នៃប្រទេសទាំងពីរ។ ដើម្បីសម្រេចនូវគោលដៅនេះមានគម្រោងជាច្រើនត្រូវបានបង្កើតឡើងនៅក្នុងប្រទេសកម្ពុជា ដើម្បីទទួលបានជំនួយបច្ចេកទេស ជំនួយសម្ភារ និងជំនួយហិរញ្ញវត្ថុជាដើម។
ទាក់ទងនឹងបញ្ហាសុខភាព ខេត្តជាប់ព្រំដែនកម្ពុជាចំនួន ២ គឺខេត្តបន្ទាយមានជ័យ និងខេត្តកោះកុងត្រូវបានជ្រើសរើសឱ្យចូលរួមក្នុងគម្រោងអភិវឌ្ឍន៍ « Sister Hospital Cooperation Development Project» ជាមួយខេត្តរបស់ថៃដែលនៅជាប់ព្រំដែនកម្ពុជា។
គម្រោងនេះត្រូវបានបង្កើតឡើងដើម្បីកែលម្អមណ្ឌលសុខភាព ហើយទន្ទឹមគ្នានេះដែរ ក៏ជួយលើកកម្ពស់សមត្ថភាពមន្ទីរពេទ្យបង្អែករវាងសេវាកម្មវេជ្ជសាស្ត្រផ្នែកសង្គ្រោះបន្ទាន់នៃមន្ទីរពេទ្យកម្ពុជា និងមន្ទីរពេទ្យថៃដែលនៅតាមព្រំដែន។
ជាលទ្ធផលនៃកិច្ចសហប្រតិបត្តិការរវាងស្ថាប័នសុខាភិបាលនៅតាមព្រំដែននៃប្រទេសទាំងពីរបានកែលម្អកាន់តែប្រសើរឡើងនូវប្រព័ន្ធបញ្ជូនបន្តអ្នកជំងឺឆ្លងដែនរវាងមន្ទីរពេទ្យថៃ និងមន្ទីរពេទ្យកម្ពុជា។
នៅក្រោមគម្រោងនេះ រដ្ឋាភិបាលថៃបានផ្តល់ជំនួយបច្ចេកទេស និងបានផ្តល់សម្ភារ និងបរិក្ខារវេជ្ជសាស្ត្រដល់មន្ទីរពេទ្យបង្អែកខេត្តបន្ទាយមានជ័យ និងមន្ទីរពេទ្យបង្អែកខេត្តកោះកុង។ ដោយទទួលបានភាពជោគជ័យនៃគំនិតផ្តួចផ្តើមដំបូងនេះ ទើបមានផែនការពង្រីកគម្រោងអភិវឌ្ឍន៍ «Sister Hospital Cooperation Development Project» បន្តទៅកាន់ខេត្តជាប់ព្រំដែនផ្សេងទៀតដូចជាខេត្តបាត់ដំបង និងខេត្តឧត្តរមានជ័យផងដែរ។
ដោយបានឆ្លងកាត់សង្គ្រាមរ៉ាំរ៉ៃអស់រយៈពេល ៣ ទសវត្សរ៍ដែលបានធ្វើឱ្យប្រជាជនកម្ពុជារងគ្រោះយ៉ាងធ្ងន់ធ្ងរពីសំណល់ជាតិផ្ទុះបន្សល់ពីសង្គ្រាម (ERW) វាបានជះឥទ្ធិពលយ៉ាងខ្លាំងដល់អាយុជីវិតរបស់ប្រជាជនដែលរស់នៅតាមតំបន់ដែលមានសំណល់ទាំងនោះ។ សំណល់ជាតិផ្ទុះពីសង្គ្រាមបានបង្កការគំរាមកំហែងដល់សុវត្ថិភាពរបស់ប្រជាជន និងរារាំងដល់ការអភិវឌ្ឍសេដ្ឋកិច្ចរបស់ប្រទេសជាតិ។
ដោយមានភាពទទួលខុសត្រូវក្នុងតួនាទីសំខាន់នៃមជ្ឈមណ្ឌលសកម្មភាពកម្ចាត់មីនតំបន់អាស៊ាន (ARMAC) ក្នុងការលើកកម្ពស់ការយល់ដឹងអំពីគ្រោះថ្នាក់នៃសំណល់ជាតិផ្ទុះពីសង្គ្រាម និងកិច្ចខិតខំប្រឹងប្រែងចូលរួមកាត់បន្ថយ ដូចជាការផ្តល់ជំនួយដល់ជនរងគ្រោះ ការស្រាវជ្រាវ និងការបោសសម្អាតគ្រាប់មីន យុទ្ធភណ្ឌមិនទាន់ផ្ទុះ ដោយរដ្ឋាភិបាលថៃបានបរិច្ចាគប្រចាំឆ្នាំចំនួន ១ ម៉ឺនដុល្លារដល់ ARMAC គិតចាប់តាំងពីឆ្នាំ ២០១៩។
ការពង្រឹងទំនាក់ទំនងទ្វេភាគីនាពេលអនាគត
ទោះបីវិធានការពាក់ព័ន្ធនឹងសមត្ថភាពធនធានមនុស្ស និងគំនិតផ្តួចផ្តើមសុខសុវត្ថិភាពរវាងប្រទេសថៃ និងកម្ពុជាមិនទាន់បានដោះស្រាយទាំងស្រុងក៏ដោយ ប៉ុន្តែផលវិជ្ជមានទៅលើការអភិវឌ្ឍសេដ្ឋកិច្ចសង្គមរបស់ប្រទេសទាំងពីរនឹងសម្រេចបាននៅក្នុងរយៈពេលប៉ុន្មានឆ្នាំខាងមុខនេះ។
ប្រជាជនកម្ពុជាដែលទទួលបានការអប់រំនៅក្នុងប្រទេសថៃរួមជាមួយមិត្តភក្តិរបស់ពួកគេ និងការរាប់អាននៃប្រជាជនទាំងពីរនឹងធ្វើឱ្យពួកគេមានការយល់ដឹងកាន់តែស៊ីជម្រៅអំពីភាពសម្បូរបែប និងភាពស្រដៀងគ្នារវាងប្រជាជាតិទាំងពីរ។ ទាំងនេះនឹងបង្កើតឱ្យមានភាពជឿទុកចិត្តគ្នា និងជាស្ពានដើម្បីតភ្ជាប់ដែលមិនមានអ្វីអាចបង្អាក់ដល់កិច្ចសហប្រតិបត្តិការរវាងប្រទេសជិតខាងទាំងពីរ ដើម្បីភាពរីកចម្រើនជាមួយគ្នាបាននោះទេ។
ការអនុវត្តវិធានការសុខសុវត្ថិភាពសម្រាប់ប្រជាជនដែលជាការចូលរួមចំណែករបស់ប្រទេសថៃដល់កម្ពុជាខាងផ្នែកសុខភាព និងសុវត្ថិភាព ជាពិសេសនៅតាមបណ្តាខេត្តជាប់ព្រំដែនត្រូវបានរំពឹងថានឹងផ្លាស់ប្តូរជីវិតរស់នៅរបស់ប្រជាជនជាមួយគ្នានេះដែរ ក៏បង្កើនភាពជឿទុកចិត្តគ្នាផ្តល់ផលប្រយោជន៍ទៅវិញទៅមក និងកិច្ចសហប្រតិបត្តិការដែលនាំឱ្យប្រជាជននៃប្រទេសទាំងពីរកាន់តែជិតស្និទ្ធ និងរស់នៅក្បែរគ្នាប្រកបដោយសេចក្តីសុខដុមរមនា៕