.jpg)
ការព្យាករបង្ហាញថា ពីពេលនេះដល់ដើមសប្ដាហ៍ក្រោយមានភ្លៀងច្រើន ដោយសាររងឥទ្ធិពលពីជ្រលងសម្ពាធទាប។ ហុង មិនា
ភ្នំពេញៈ ក្រសួងធនធានទឹក និងឧតុនិយមបានព្យាករថា ចាប់ពីថ្ងៃពុធសប្ដាហ៍នេះដល់ថ្ងៃអង្គារសប្ដាហ៍ក្រោយនឹងមានភ្លៀងធ្លាក់ច្រើននៅតាមតំបន់ទំនាបកណ្ដាល និងពាយព្យនៃប្រទេសកម្ពុជាដោយសារឥទ្ធិពលពីជ្រលងសម្ពាធទាបដែលឆ្លងកាត់ភាគខាងជើងប្រទេសថៃ និងភាគកណ្ដាលប្រទេសឡាវ និងវៀតណាម ដែលអំណោយផលដល់ការដាំដុះជាថ្មីរបស់កសិករ។
តាមរយៈការព្យាករកាលពីថ្ងៃទី ១ កញ្ញា ប្រជាកសិករក្នុងខេត្តភាគពាយព្យនៃប្រទេសកម្ពុជា ពិសេសនៅខេត្តបាត់ដំបង និងខេត្តបន្ទាយមានជ័យដែលកន្លងមកស្រូវដើមរដូវវស្សារបស់ពួកគាត់ បានរងការខូចខាតដោយគ្រោះរាំងស្ងួតនោះអាចនឹងចាប់ផ្ដើមភ្ជួររាស់ដីស្រែដើម្បីត្រៀមសាបព្រោះ និងដាំដុះស្រូវសាជាថ្មីឡើងវិញ។
លោក រ័ត្ន ដាស៊ីណង់ អភិបាលស្រុកមង្គលបុរីបានប្រាប់ភ្នំពេញប៉ុស្តិ៍ថា ពេលនេះ ប្រជាកសិករមួយចំនួនកំពុងរង់ចាំពិនិត្យពីរបាយទឹកភ្លៀង និងកម្ពស់ទឹកនៅតាមប្រព័ន្ធប្រឡាយ និងដៃស្ទឹងមួយចំនួនដើម្បីត្រៀមដាំដុះស្រូវរដូវវស្សាជំហានទី ២ នៅក្រោយរដូវបុណ្យភ្ជុំបិណ្ឌខាងមុខនេះ។
លោកថ្លែងថា៖ «ប្រជាកសិកររបស់យើងត្រេកអរខ្លាំងណាស់នៅពេលទទួលបានសេចក្ដីជូនដំណឹងស្ដីពីការព្យាករអាកាសធាតុរបស់ក្រសួងធនធានទឹក និងឧតុនិយម។ ពួកគេបាននាំគ្នាត្រៀមលក្ខណៈជាស្រេច ដើម្បីបង្កបង្កើនផលស្រូវរដូវវស្សាជំហានទី ២ ក្រោយរដូវបុណ្យភ្ជុំបិណ្ឌនេះ»។
បើតាមលោក ដាស៊ីណង់ នៅពេលនេះស្រូវដើមរដូវវស្សាមួយចំនួនត្រូវបានប្រជាកសិករប្រមូលផលបណ្ដើរៗហើយ ក្រោយពីមានភ្លៀងធ្លាក់ប៉ុន្មានមេធំៗកន្លងមកនេះ។
ចំណែកលោក ស សារី មេឃុំបវេលនៃស្រុកបវេល ខេត្តបាត់ដំបងបានប្រាប់ភ្នំពេញប៉ុស្តិ៍ថា រហូតមកទល់ពេលនេះ ដីស្រែស្ទើរតែទាំងអស់ក្នុងឃុំបវេល មិនមានទឹកភ្លៀងដក់ក្នុងដីស្រែបន្តិចឡើយ។ លោកថ្លែងថា ភ្លៀងធ្លាក់ច្រើនតែនៅក្នុងតំបន់ទីប្រជុំជនផ្ទះរបស់ពលរដ្ឋក្នុងភូមិ និងទីផ្សារប៉ុណ្ណោះ ចំណែកនៅតាមវាលស្រែមានភ្លៀងធ្លាក់តិចតួចមិនសើមដីផង។
លោកថ្លែងថា៖ «នៅពេលនេះ យើងកំពុងរង់ចាំទឹកភ្លៀងធ្លាក់ជោកជាំនៅលើដីស្រែរបស់យើងដើម្បីយើងអាចបង្កបង្កើនផលស្រូវជាថ្មីឡើងវិញ សម្រាប់ផ្គត់ផ្គង់ជីវភាពគ្រួសារ»។
បើតាមលោក សារី ការបង្កបង្កើនផលស្រូវរបស់ប្រជាកសិករក្នុងឃុំបវេលគឺពឹងអាស្រ័យទាំងស្រុងលើទឹកភ្លៀង ព្រោះវាលស្រែនៅក្នុងឃុំនេះស្ថិតនៅលើតំបន់ទីទួលខ្ពស់ និងខ្វះខាតនូវប្រព័ន្ធស្រោចស្រព។
ទោះជាបែបណាក្ដី លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានបញ្ជាក់កាលពីថ្ងៃទី ១ កញ្ញាថា ចាប់ពីដើមខែកញ្ញានេះ រហូតដល់ចុងខែតុលាខាងមុខនឹងមានភ្លៀងធ្លាក់រាយប៉ាយគ្របដណ្ដប់លើផ្ទៃប្រទេសកម្ពុជាក្នុងកម្រិតពីតិចទៅច្រើន។
ដោយឡែកនៅបណ្ដាខេត្តមួយចំនួនក្នុងតំបន់វាលទំនាបភាគកណ្ដាល និងពាយព្យនឹងមានភ្លៀងធ្លាក់ច្រើន។ ជាមួយគ្នានេះ បាតុភូតខ្យល់កន្ត្រាក់ និងផ្គររន្ទះក៏នឹងកើតមានច្រើនផងដែរក្នុងអំឡុងពេលមេឃរកកល់ភ្លៀង និងកំពុងមានភ្លៀងធ្លាក់ ដែលទាមទារឲ្យបង្កើនការប្រុងប្រយ័ត្ន ដើម្បីចៀសវាងគ្រោះថ្នាក់កើតឡើងជាយថាហេតុ៕
