ភ្នំពេញ: មន្ត្រីនគរបាលនៃស្នងការដ្ឋាននគរបាលរាជធានីភ្នំពេញបានឃាត់រថយន្ត និងម៉ូតូជាង ២ ពាន់គ្រឿងក្នុងរយៈពេល ១ សប្ដាហ៍ (ពីថ្ងៃ ៩-១៥ មីនា) ក្នុងនោះឃាត់អ្នកប្រើគ្រឿងញៀន ២៦ នាក់ និងអ្នកបើកបរក្នុងស្ថានភាពស្រវឹង ២៥០ នាក់ បន្ទាប់ពីសមត្ថកិច្ចចាប់ផ្ដើមរឹតបន្តឹងការអនុវត្តច្បាប់ចរាចរណ៍ពីម៉ោង ១១ យប់ដល់ម៉ោង ២ កន្លះរំលងអធ្រាត្រ។
តាមរបាយការណ៍ស្នងការដ្ឋាននគរបាលរាជធានីភ្នំពេញបានបង្ហាញថា លទ្ធផលត្រួតពិនិត្យរឹតបន្តឹងច្បាប់ចរាចរណ៍ផ្លូវគោករយៈពេល ៧ ថ្ងៃចាប់ពីថ្ងៃទី ៩ ដល់ថ្ងៃទី ១៥ ខែមីនា សមត្ថកិច្ចជំនាញបានឃាត់រថយន្ត និងម៉ូតូសរុបចំនួន ២០៤៤ គ្រឿង។ ក្នុងនោះបានរកឃើញ និងឃាត់ខ្លួនអ្នកប្រើគ្រឿងញៀន ២៦ នាក់ និងអ្នកបើកបរក្នុងស្ថានភាពស្រវឹង ២៥០ នាក់។
របាយការណ៍បន្តថា ការអនុវត្តរឹតបន្តឹងច្បាប់នេះលោក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញនៅតែបន្តចុះត្រួតពិនិត្យដោយផ្ទាល់តាមគោលដៅដើម្បីត្រួតពិនិត្យមើលការអនុវត្តច្បាប់ និងស្វែងយល់បន្ថែមពីបញ្ហាប្រឈម និងចំណុចខ្វះខាតចាប់ពីម៉ោង ២៣:០០ រហូតដល់ម៉ោង ២: ៣០ នាទីរំលងអធ្រាត្រ។
របាយការណ៍បញ្ជាក់ថា៖ «បទល្មើសចរាចរណ៍ភាគច្រើនកើតឡើងដោយសារអ្នកបើកបររថយន្ត និងម៉ូតូក្នុងស្ថានភាពស្រវឹង ហើយថែមពីលើនេះក៏មានអ្នកបើកបរអត់ពាក់មួកសុវត្ថិភាព និងបើកបរលើសល្បឿនកំណត់។ ជនល្មើស និងវត្ថុតាងនានាត្រូវបានយកមករក្សាទុកនៅការិយាល័យចរាចរណ៍ផ្លូវគោកដើម្បីអប់រំណែនាំ និងផាកពិន័យតាមច្បាប់ចរាចរណ៍»។
លោក ស ថេត ស្នងការនគរបាលរាជធានីភ្នំពេញ និងលោក ចេវ ហាក់ ស្នងការរងនគរបាលរាជធានីភ្នំពេញមិនអាចទាក់ទងសុំការបញ្ជាក់បន្ថែមពីករណីនេះបានទេកាលពីម្សិលមិញ។
ប៉ុន្ដែលោក ស ថេត ធ្លាប់ប្រាប់ភ្នំពេញប៉ុស្ដិ៍កាលពីថ្ងៃទី ១០ ខែមីនាថា ការរឹតបន្តឹងច្បាប់ចរាចរណ៍ពេលយប់នេះគឺមានការត្រួតពិនិត្យសារជាតិស្រវឹង ការបើកបរដោយមិនពាក់មួកសុវត្ថិភាព ករណីគ្រឿងញៀន និងការប្រើប្រាស់អាវុធខុសច្បាប់នៅតាមបណ្តាគោលដៅក្នុងខណ្ឌទាំង ១៤ ដើម្បីកាត់បន្ថយករណីគ្រោះថ្នាក់ចរាចរណ៍ និងកាត់បន្ថយករណីបទល្មើសផ្សេងៗ។
លោកបញ្ជាក់ថា៖ «យើងរឹតបន្ដឹងទាំងការបើកបរដោយមិនពាក់មួកទាំងបើកបរក្នុងស្ថានភាពស្រវឹង ក្រុមក្មេងទំនើង ការប្រើប្រាស់អាវុធខុសច្បាប់គឺរួមទាំងអស់មិនមែនតែធ្វើតែលើរឿងចរាចរណ៍តែមួយមុខទេ គឺធ្វើទាំងអស់សំដៅឲ្យបទល្មើសផ្សេងៗមានការថយចុះកាន់តែខ្លាំង»។
លោកបន្តថា ការរឹតបន្តឹងច្បាប់នេះមិនមានពេលកំណត់នោះទេ ប៉ុន្ដែចាប់ធ្វើពីថ្ងៃទី ៩ ខែមីនា រហូតដល់ពេលមានការកែសម្រួលអនុក្រឹត្យថ្មីលើការបង្កើនការផាកពិន័យ។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជា (AIP) បានថ្លែងពីម្សិលមិញថា តាមរបាយការណ៍ដែលសមត្ថកិច្ចបានបង្ក្រាបបាននេះពិតជាមានចំនួនច្រើនគួរឲ្យកត់សម្គាល់។ លោកចង់ឲ្យបន្ថែមម៉ោងចុះបង្ក្រាប និងពង្រីកគោលដៅឲ្យបានច្រើនកន្លែងទៀតនៅតាមមុខសញ្ញាសេពគ្រឿងស្រវឹងដែលមានច្រើនជាងគេ។
លោកបញ្ជាក់ថា៖ «សមត្ថកិច្ចយើង គួរដាក់ប៉ុស្ដិ៍តាមគោលដៅសំខាន់ៗដូចជា នៅខាងមុខមជ្ឈមណ្ឌលរៀបអាពាហ៍ពិពាហ៍ ឬតាមផ្លូវសំខាន់ៗជាច្រើនទៀតដើម្បីពញ្ញាក់អារម្មណ៍ពួកគាត់កុំឲ្យពិសាគ្រឿងស្រវឹងលើសកំណត់ក្នុងច្បាប់ធ្វើឲ្យគាត់មានការប្រុងប្រយ័ត្នខ្ពស់ក្នុងការបើកបរ។ អ៊ីចឹងវិធីសាស្ត្រនេះធ្វើការកាត់បន្ថយបានច្រើនពីការគ្រោះថ្នាក់ចរាចរណ៍»។
លោកបានស្នើឲ្យសមត្ថកិច្ចពង្រឹងការអនុវត្តច្បាប់បន្ថែមទៀត និងផ្សព្វផ្សាយឲ្យបានទូលំទូលាយពាក់ព័ន្ធការអនុវត្តច្បាប់នេះ ជាពិសេសលោកចង់ឲ្យគោលនយោបាយ ឬច្បាប់ស្ដីពីគ្រឿងស្រវឹងឆាប់បានចេញជាធរមាន។ លោកថាក្នុងច្បាប់ថ្មីនេះអាចនឹងមានកំណត់ពីអាយុអ្នកបើកបរ កំណត់ពេលសម្រាប់បើកបរ និងកំណត់ទីតាំងលក់គ្រឿងស្រវឹង។ ប្រសិនច្បាប់នេះអនុម័តរួចរាល់នឹងរួមចំណែកទប់ស្កាត់គ្រោះថ្នាក់ចរាចរណ៍ក្នុងរយៈពេលយូរអង្វែង៕