.jpg)
កម្លាំងជំនាញកំពុងរៀបចំដឹកជញ្ជូនគ្រាប់នាខែនេះដែលរកឃើញពីនាវាលិចក្នុងទន្លេមេគង្គ។ រូប សហការី
កំពង់ចាមៈ បើមិនមានអ្វីប្រែប្រួលនោះទេ ក្រុមប្រតិបត្តិការរុករកគ្រាប់មិនទាន់ផ្ទុះនៅក្នុងនាវា លិចក្នុងទន្លេមេគង្គដែលស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ដែលសល់ពីសម័យសង្គ្រាមស៊ីវិលនៅប្រទេសកម្ពុជានាទសវត្សរ៍ ៧០ នោះ នឹងត្រូវបញ្ចប់ទាំងស្រុងនូវការរុករកនេះនាចុងខែមីនា ហើយនឹងស្រង់នាវាចម្បាំងនេះចេញពីក្នុងទឹកនៅដើមខែមេសា។
លោក ម៉ី សុភា មេបញ្ជាការបោសសម្អាតគ្រាប់មិនទាន់ផ្ទុះនៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម (NPMEC) ប្រាប់ ភ្នំពេញ ប៉ុស្តិ៍ ពីម្សិលមិញថា ក្រុមជំនាញរបស់លោក កំពុងតែសិក្សាជាមួយក្រុងការងារជំនាញរបស់កំពង់ផែស្វយ័តភ្នំពេញក្នុងការស្វែងរកលទ្ធភាព និងនីតិវិធីណាមួយសមស្របក្នុងការស្រង់យកនាវាចម្បាំងចេញពីទន្លេនេះ។ ព្រោះនាវានេះមានសភាពចាស់ទ្រុឌទ្រោម និងធ្លុះធ្លាយជាច្រើនកន្លែង។
បើតាមលោក ម៉ី សុភា តាមការណែនាំរបស់លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃគឺចង់ឱ្យរក្សាទុកក្នុងទ្រង់ទ្រាយដើមដើម្បីយកទៅដាក់តាំងក្នុងសារមន្ទីរទុកជូនក្មេងៗជំនាន់ក្រោយបានសិក្សារៀនសូត្រ ខណៈបច្ចុប្បន្នកំពុងរៀបចំកសាងសារមន្ទីរថ្មីមួយសម្រាប់ផ្ទុក និងដាក់តាំងយុទ្ធភណ្ឌមិនទាន់ផ្ទុះផ្សេងៗទៀត។ លោកបន្ថែមថា ក្រុមការងារកំពុងរុករកនូវទីតាំងចំនួន ៤ ទៀតនៅក្នុងទន្លេមេគង្គនេះ។
លោកថ្លែងថា៖ «ឥឡូវនេះយើងធ្វើកិច្ចសហប្រតិបត្តិការជាមួយនឹងកំពង់ផែស្វយ័ត ភ្នំពេញ ព្រោះបច្ចេកទេសស្រង់នាវាដូចជាសម្ភារឧបករណ៍ទំនើបក្នុងការស្រង់ នាវាក្រោមទឹក គឺខាងកំពង់ផែស្វយ័តភ្នំពេញ គឺមានសម្ភារគ្រប់គ្រាន់។ ខាងយើង ខាងបច្ចេកទេសយកគ្រាប់ពីក្នុងទឹក»។
លោក នាង ផាត រដ្ឋលេខាធិការប្រចាំការ ក្រសួងការពារជាតិថ្លែងក្នុងកិច្ចប្រជុំស្តីអំពីនីតិវិធីស្រង់នាវាចម្បាំងដែលមានគ្រាប់យុទ្ធភណ្ឌមិនទាន់ផ្ទុះជាច្រើនតោន ក្នុងទន្លេខេត្តកំពង់ចាមកាលពីថ្ងៃទី ២២ ខែមីនា ថា នាវាចម្បាំងនេះ បានលិចកប់ក្នុងបាតទន្លេមានជម្រៅរហូតដល់ ២៧,៥ ម៉ែត្រព្រមទាំងគ្របដណ្តប់ដោយដីខ្សាច់នៅលើយ៉ាងច្រើនផងដែរ។
លោក នាង ផាត ថ្លែងថា៖ «នាវាចម្បាំង [នេះ] សល់ពីសម័យសង្គ្រាមស៊ីវិលនៅកម្ពុជាកាលពីទសវត្សរ៍ ឆ្នាំ ១៩៧២ ហើយមានសភាពចាស់ទ្រុឌទ្រោមខ្លាំង និងមានស្នាមធ្លុះធ្លាយជាច្រើនកន្លែងដោយការបាញ់ពន្លិចក្នុងពេលប្រយុទ្ធគ្នា»។
បើតាមរបាយការណ៍គឺចាប់ពីខែតុលា ឆ្នាំ ២០២០ ដល់ដើមខែមីនា ឆ្នាំ ២០២១ នេះក្រុមការងារស្រង់បានគ្រាប់យុទ្ធភណ្ឌមិនទាន់ផ្ទុះសរុបចំនួន ១៥ ២៨២ គីឡូក្រាម ព្រមទាំងបំណែកឆ្អឹងសពមនុស្សចំនួន ៦ និងសម្ភារសឹកមួយចំនួនទៀត។ នៅចុងខែមីនានេះ កម្លាំងជំនាញនឹងស្រង់គ្រាប់យុទ្ធភណ្ឌក្នុងនាវាចម្បាំងរួចរាល់ ហើយនៅសប្តាហ៍ទី ១ ខែមេសា ឆ្នាំ ២០២១ នឹងបញ្ចប់ទាំងស្រុងនូវការស្រង់នាវាយកមកលើគោក៕
