ព្រះសីហនុៈ មន្ត្រីលើកឡើងថា អាជ្ញាធរខេត្តព្រះសីហនុនឹងស្នើសុំគោលការណ៍ពីក្រសួងបរិស្ថាននិងគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរកម្ពុជា ដើម្បីចេញសេចក្ដីសម្រេចមួយឱ្យរុះរើសំណង់កាស៊ីណូចិនឈ្មោះ ជីន ទីង ដែលសាងសង់ឡើងខុសច្បាប់នៅលើកោះរ៉ុងសន្លឹម ក្រោយពីកាស៊ីណូនេះ ទើបត្រូវបានក្រុមមន្ត្រីចុះទៅបិទអាជីវកម្មជាលើកទី៣កាលពីចុងសប្ដាហ៍មុន។
លោក ឃាង ភារម្យ មន្ត្រីនាំពាក្យសាលាខេត្តព្រះសីហនុប្រាប់ភ្នំពេញប៉ុស្ដិ៍ម្សិលមិញថា តំបន់កោះរ៉ុងសន្លឹមគឺជាដែនឧទ្យានគ្រប់គ្រងដោយក្រសួងបរិស្ថាន និងគណៈកម្មាធិការជាតិគ្រប់គ្រងនិងអភិវឌ្ឍន៍កម្ពុជា។ មុនមានការសម្រេចដើម្បីឱ្យរុះរើសំណង់ណាមួយលើឆ្នេរកោះរ៉ុងសន្លឹម គឺទាល់តែមានគោលការណ៍ឯកភាពពីស្ថាប័នទាំងនេះជាមុនសិន។
លោកបញ្ជាក់ថា៖ «ជំហានដំបូងគឺយើងស្នើសុំជូនដំណឹងឱ្យគាត់បិទ (អាជីវកម្មបើកកាស៊ីណូ) ។ ដោយឡែកពាក់ព័ន្ធការរុះរើសំណង់ រដ្ឋបាលខេត្តនឹងបន្តនីតិវិធីបន្ទាប់ទៀត។ អាហ្នឹងស្នើសុំចុះផ្សាយត្រឹមប៉ុណ្ណឹង ដោយសារវាមានស្ថាប័នពាក់ព័ន្ធដែលយើងត្រូវធ្វើការរួមគ្នា ដើម្បីសម្រេចរុះរើសំណង់ហ្នឹង»។
ប៉ុន្តែ លោកឃាង ភារម្យ មិនបានបញ្ជាក់អំពីការស្នើសុំគោលការណ៍រុះរើសំណង់របស់មជ្ឈមណ្ឌលកម្សាន្ត ឬហៅថាកាស៊ីណូ ជីន ទីង នោះនៅពេលណាឡើយ។
ទីតាំងកាស៊ីណូ ជីន ទីង ស្ថិតក្នុងភូមិកោះរ៉ុងសន្លឹម សង្កាត់កោះរ៉ុងសន្លឹម ត្រូវបានអាជ្ញាធរខេត្តព្រះសីហនុរកឃើញថា បានបង្ហូរទឹកស្អុយចូលសមុទ្រប៉ះពាល់ធ្ងន់ធ្ងរដល់បរិស្ថាន ចាក់ធុងបាស់រំខាន អនុញ្ញាតឱ្យមានករណីបាញ់បោះសេរី ផុតអាជ្ញា ប័ណ្ណប្រកបអាជីវកម្ម និងបានសាងសង់សំណង់លើឆ្នេរសមុទ្រគ្មានការអនុញ្ញាត។ ដោយមូលហេតុនេះហើយ អាជ្ញាធរ បានសម្រេចបិទអាជីវកម្ម តាំងពីថ្ងៃទី ២២ ខែមីនា។
ទោះជាយ៉ាងណា កាលពីពេលថ្មីៗនេះ មន្ត្រីបានទទួលស្គាល់ថា ម្ចាស់កាស៊ីណូ បានផ្គើនជាមួយអាជ្ញាធរ ដោយមិនបានផ្ដល់កិច្ចសហការក្នុងការបិទអាជីវកម្មរបស់ខ្លួនឡើយ ហើយនៅតែបន្តលួចលាក់បើកឱ្យមានការលេងល្បែងដដែល។
កាលពីថ្ងៃទី ២៤ ឧសភា លោក ម៉ាង ស៊ីណេត អភិបាលរងខេត្តព្រះសីហនុបានដឹកនាំមន្ត្រីជំនាញនិងសមត្ថកិច្ចចុះផ្ទាល់ទៅបិទអាជីវកម្មរបស់កាស៊ីណូ ជីន ទីង ជាលើកទី៣។
បើតាមលោក ឃាង ភារម្យ បន្ទាប់ពីមានការចុះបិទរបស់អាជា្ញធរខេត្តជាលើកទី ៣ គឺកាស៊ីណូត្រូវបានបិទជាស្ថាពរហើយ។ ចំពោះចំណាត់ការខាងមុខ នៅពេលមានគោលការណ៍ អាជ្ញាធរឱ្យម្ចាស់កាស៊ីណូរុះរើសំណង់ចេញពីកោះរ៉ុងសន្លឹម ប៉ុន្តែប្រសិនបើមិនរុះរើដោយខ្លួនឯងទេ អាជ្ញាធរនឹងចុះទៅរុះរើជំនួស ហើយថ្លៃរុះរើនោះ គឺភាគីម្ចាស់កាស៊ីណូជាអ្នកចំណាយ។
ចំណែកលោក សាមុត សុធារិទ្ធ ប្រធានមន្ទីរបរិស្ថានខេត្តព្រះសីហនុបានបញ្ជាក់ថា ការចុះទៅរុះរើសំណង់ខុសច្បាប់របស់កាស៊ីណូលើកោះរ៉ុងសន្លឹមនេះ គឺអាជ្ញាធរកំពុងធ្វើការងារជាជំហាន។
លោកបានថ្លែងថា៖ «ធម្មតាយើងកំពុងតែធ្វើហើយ ដូចបង[អ្នកកាសែត]ទទួលបានព័ត៌មានថា នៅដំណើការ [បន្តបើកអាជីវកម្ម] នៅពេលពួកខ្ញុំទៅមើលវាអត់មានឃើញអ៊ីចឹង នៅពេលក្រុមការងារចម្រុះទៅ។ ចំពោះនីតិវិធីរឿងសំណង់ លោកអនុគណៈកម្មការ លោកនឹងសម្រេចរបៀបម៉េចនៅក្នុងប្រជុំថ្នាក់ដឹកនាំ យើងមានអនុគណៈកម្មការ អនុគណៈកម្មការហើយ បានទៅគណៈកម្មការ»។
លោក ឈឺន ចន្ថា ចៅសង្កាត់កោះរ៉ុងសន្លឹមបានបញ្ជាក់ថា ជនជាតិចិនបានជួលភោជនីយដ្ឋានដើម្បីធ្វើជាកន្លែងកាស៊ីណូឈ្មោះ ជីន ទីង កាលពីដើមឆ្នាំ ២០១៨ ហើយលោកថា សំណង់នោះ គឺមានជាច្រើនឆ្នាំមកហើយ។
ចៅសង្កាត់រូបនេះបានបន្ថែមថា៖ «ការពិតទៅ ដីពីមុន កាស៊ីណូហ្នឹងគឺចិន បានជួលពីម្ចាស់ដី ដែលពីដើមជាភោជនីយដ្ឋានមួយទេស្ថិតនៅលើឆ្នេរខ្សាច់ហ្នឹង ជាហាងភោជនីយដ្ឋានធម្មតា បន្ទាប់មកចិនបានកែច្នៃទៅជាកាស៊ីណូ»។
ប៉ុន្តែអ្នកស្រី ជៀប សុធារី អ្នកសម្របសម្រួលរបស់សមាគមការពារសិទ្ធិមនុស្ស (អាដហុក) ប្រចាំខេត្តព្រះសីហនុ ជំរុញឲ្យ អាជ្ញាធរខេត្តអនុវត្តច្បាប់តែម្តងមិនចាំបាច់រង់ចាំការអនុញ្ញាត ដោយអ្នកស្រីថ្លែងថា អាជ្ញាធរអាចចុះអនុវត្តច្បាប់ដើម្បីឱ្យរុះរើសំណង់កាស៊ីណូនោះ ដោយមិនចាំបាច់រង់ចាំសុំគោលការណ៍ពីថ្នាក់ជាតិឡើយ ព្រោះកាស៊ីណូនេះ ត្រូវបានរកឃើញថាសាងសង់ខុសច្បាប់លើដីឆ្នេរ។
អ្នកស្រីបន្តថា ការមិនអនុវត្តទៅតាមច្បាប់ដែលមានស្រាប់បែបនេះ ជាមូលហេតុធ្វើឱ្យជនជាតិចិនមួយចំនួន ពុំសូវខ្លាចញញើតអាជ្ញាធរមូលដ្ឋាននិងច្បាប់របស់កម្ពុជា។
អ្នកស្រីបញ្ជាក់ថា៖ «កន្លងមកខ្ញុំឃើញថា អាជ្ញាធរបស់យើងទាំងថ្នាក់ជាតិផង ហាក់ការពារផលប្រយោជន៍សម្រាប់ពួកអ្នកវិនិយោគទុនហ្នឹងខ្លាំងមែនទែន ហាក់ដូចជាយកចិត្តអ៊ីចឹងពេលខ្លះយើងយកចិត្តពួកគាត់ខ្លាំងពេក ធ្វើឱ្យពួកគាត់បានចិត្ត»៕