.jpg)
ពលរដ្ឋតវ៉ាករណីជម្លោះដីធ្លីកន្លងមកនៅខណ្ឌពោធិ៍សែន ជ័យ។ Swift News
ភ្នំពេញៈ អភិបាលខណ្ឌពោធិ៍សែនជ័យ អះអាងថា ការចុះបញ្ចី និងវាស់វែងលើដីមានជម្លោះស្ថិតក្នុងភូមិព្រៃដូនអុក សង្កាត់ត្រពាំងក្រសាំង ខណ្ឌពោធិ៍សែនជ័យ ទំហំ ១៨ ហិកតា ត្រូវបានពន្យារពេល កាលពីម្សិលមិញ បន្ទាប់ពីមានការតវ៉ាពីពលរដ្ឋមួយចំនួនថា ដីនោះ គឺជាកម្មសិទ្ធិរបស់ពួកគេ។
លិខិតចុះថ្ងៃទី ២២ មីនា ឆ្នាំ ២០១៩ របស់អាជ្ញាធរខណ្ឌពោធិ៍សែនជ័យ តម្រូវឲ្យឈ្មោះសេង ស៊ីហេង ដែលមានអាសយដ្ឋានស្ថិតក្នុងទីតាំងខាងលើចូលខ្លួនមកបំពេញបែបបទតាមនីតិវិធី នៃការចុះបញ្ជីដីធ្លីជាធរមាន ពីម្សិលមិញ បន្ទាប់ពីមានការស្នើសុំពីភាគីរូបនេះ។
លោកហែម ដារិទ្ធិ អភិបាលខណ្ឌពោធិ៍សែនជ័យ ប្រាប់ភ្នំពេញប៉ុស្តិ៍ម្សិលមិញថា ការចុះវាស់វែង និងចុះបញ្ជីដីធ្លីនេះ មិនបានជោគជ័យនោះទេ ព្រោះមានការតវ៉ាពីពលរដ្ឋជាច្រើន ដោយអះអាង ថា ដីនេះ ជាដីរបស់ពួកគេ។
លោកបញ្ជាក់ថា៖ «ការអនុវត្តគឺទៅតាម សជណ ដោយយើងមិនចេះតែអត្តនោម័តទេ ហើយការចុះទៅវាស់វែងនេះ គឺបានបិទផ្សាយសេចក្តីជូនដំណឹងជូនបងប្អូនប្រជាពលរដ្ឋហើយ។ ក្នុងករណី ដីហ្នឹង មានបងប្អូនប្រជាពលរដ្ឋតវ៉ា យើងដាក់នៅក្នុងកំណត់ហេតុថា ដីហ្នឹង មិនទាន់បានដោះស្រាយ»។
លោកបន្ថែមថា៖ «បើប្រជាពលរដ្ឋតវ៉ាដូចព្រឹកមិញអ៊ីចឹង យើងមិនអាចធ្វើបានទេ គឺយើងត្រូវរាយការណ៍ជូនទៅ សាលារាជ ធានីភ្នំពេញវិញ ដើម្បីសុំឲ្យគាត់ដឹងព័ត៌មាន និងបន្តនីតិវិធីបន្តទៀត»។
ទោះយ៉ាងណា លោក ហែម ដារិទ្ធិ អះអាងថា ដីទំហំជិត ២០ ហិកតានេះ គឺមិនទាន់សម្រេចប្រគល់ឲ្យទៅអ្នកណានោះទេ ដោយគ្រាន់តែអះអាងថា ភាគីឈ្មោះ សេង ស៊ីហេង មានលិខិតស្នាមត្រឹមត្រូវ ដូចជា សជណ និង ដីកាពីតុលាការ ដូច្នេះ ក្នុងនាមអាជ្ញាធរខណ្ឌអនុវត្តតាមការស្នើសុំនេះតែប៉ុណ្ណោះ។
ចំណែកលោកហ៊ត រដ្ឋា ចៅសង្កាត់ត្រពាំងក្រសាំង បដិសេធបកស្រាយលម្អិតជុំវិញជម្លោះនេះ ដោយគ្រាន់តែអះអាងថា វាមានភាពស្មុគស្មាញ ព្រោះតែមានពលរដ្ឋខ្លះ បានទិញលក់ដីនេះតៗគ្នាដែលបណ្តាលឲ្យមានជម្លោះរ៉ាំរ៉ៃ។
បើតាមព័ត៌មានចុះផ្សាយកន្លងទៅឲ្យដឹងថាប្រជាពលរដ្ឋចំនួន ៥៦ គ្រួសារ រស់នៅភូមិព្រៃដូនអុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ បាននាំគ្នាតវ៉ា និងដាក់ញត្តិទៅស្ថាប័នពាក់ព័ន្ធជាបន្តបន្ទាប់ តាំងពីឆ្នាំ ២០១១ មក ដើម្បីសុំស្ថាប័នទាំងនោះ ជួយដោះស្រាយជូនពួកគេ។
តាមពលរដ្ឋតវ៉ាទាំងនោះ បានអះអាងថា ដីដែលមានទំហំជិត ២០ ហិកតានោះ គឺពួកខ្លួនទាំងអស់គ្នា មករស់នៅតាំងពីឆ្នាំ ១៩៧៩ ដោយប្រកបរបរធ្វើស្រែ និងដាំដំណាំផ្សេងៗ។ លុះក្រោយមកនៅឆ្នាំ ១៩៨៧ សមាគមចិន ហុក គៀន បានដាក់ពាក្យស្នើសុំខ្ចីដីទាំងនេះពីប្រជាពលរដ្ឋទាំង ៥៦ គ្រួសារ ដោយមានអាជ្ញាធរដែនដីទទួលស្គាល់ដឹងឮពិតប្រាកដ សម្រាប់យកទៅធ្វើកន្លែងគោរពសក្ការៈបុណ្យប្រពៃណីចិនម្តងៗ ដោយប្រជាពលរដ្ឋយល់ឃើញថា មានមូលហេតុសមរម្យ ក៏បានអនុញ្ញាតឲ្យសមាគមចិនហុក គៀនខ្ចីប្រើប្រាស់បណ្តោះអាសន្ន។
ពលរដ្ឋទាំងនោះអះអាងបន្តថា រហូតមកដល់ឆ្នាំ ២០១១ សមាគមចិន ហុក គៀន ក៏បានរុះរើម៉ុងចេញ និងប្រគល់ដីទាំងនោះមកឲ្យប្រជាពលរដ្ឋកាន់កាប់វិញ ប៉ុន្តែក៏មានឈ្មោះសេង ស៊ីហេង បានចេញមុខអះអាងថា ដីទាំងនេះ ជាដីរបស់ខ្លួន ជាតំណាងឲ្យសមាគមចិន ហុក គៀន ពុំមានឈ្មោះក្នុងបញ្ជីស្នើសុំខ្ចីរបស់សមាគមចិន ហុកគៀន នេះ ក៏បង្កើតជាជម្លោះ រហូតមានការដាក់ពាក្យប្តឹងផ្តល់ទៅដល់តុលាការ។
ភ្នំពេញប៉ុស្តិ៍មិនអាចទាក់ទង ពលរដ្ឋមានជម្លោះដីធ្លីទាំងនោះបានទេ ឯខាងភាគី ឈ្មោះសេង ស៊ីហេង ក៏មិនអាចទាក់ទងបានដែរ។
លោកម៉េត មាសភក្តី អ្នកនាំពាក្យសាលារាជធានីភ្នំពេញ ប្រាប់ភ្នំពេញប៉ុស្តិ៍ម្សិលមិញថា លោកមិនទាន់ទទួលរបាយការណ៍ពីអាជ្ញាធរខណ្ឌពោធិ៍សែនជ័យជុំវិញបញ្ហានេះនៅឡើយទេ។ តែលោកអះអាងថា ក្នុងនាមអាជ្ញាធរ នឹងពិនិត្យទៅលើឯកសារពាក់ព័ន្ធផ្លូវច្បាប់ និងព្យាយាមសម្របសម្រួលបន្តទៀត។
លោកបានបន្តថា៖ «បើខណ្ឌធ្វើរបាយការណ៍មករដ្ឋបាលយើង អ៊ីចឹងយើងនឹងពិនិត្យលើបញ្ហានេះ ហើយនីតិវិធី ឬចំណាត់-ការបន្តយ៉ាងម៉េចទៀត យើងនឹងជូនដំណឹងនៅពេលក្រោយ»៕
