The Phnom Penh Post Search

Search form




Logo of Phnom Penh Post newspaper Phnom Penh Post - ការ​សង់​លូ​បង្ហូរ​ទឹក​តូច​ធ្វើ​ឲ្យ​មាន​ការ​ជន់​លិច​តំបន់​បឹង​កក់




ការ​សង់​លូ​បង្ហូរ​ទឹក​តូច​ធ្វើ​ឲ្យ​មាន​ការ​ជន់​លិច​តំបន់​បឹង​កក់

បុរស​អ្នក​ភូមិ​បឹងកក់​ម្នាក់ អង្គុយ​ដង​ទឹក​សម្អុយ​ដែល​ជន់​លិច​ផ្ទះ​របស់​គាត់​កាល​ពី​ថ្ងៃ​ចន្ទ។
បុរស​អ្នក​ភូមិ​បឹងកក់​ម្នាក់ អង្គុយ​ដង​ទឹក​សម្អុយ​ដែល​ជន់​លិច​ផ្ទះ​របស់​គាត់​កាល​ពី​ថ្ងៃ​ចន្ទ។ ហេង ជីវ័ន

ការ​សង់​លូ​បង្ហូរ​ទឹក​តូច​ធ្វើ​ឲ្យ​មាន​ការ​ជន់​លិច​តំបន់​បឹង​កក់

ភ្នំពេញៈ របាយ​ការណ៍​ដែល​លេច​ចេញ​មួយ​ពី​ក្រុម​ហ៊ុន Shukaku Inc បាន​ឲ្យ​ដឹង​ថា បំពង់​លូ​ដែល​សាលា​រាជធានី​បាន​ដំឡើង ដើម្បី​បង្ហូរ​ទឹក​ចេញ​ពី​តំបន់​បឹងកក់ គឺ​មាន​ទំហំ​តូច​ណាស់ មិន​អាច​បង្ការ​កុំ​ឲ្យ​មាន​ទឹក​ជំនន់​ធ្ងន់​ធ្ងរ​បាន​ទេ ហើយ​វា​អាច​បណ្តាល​ឲ្យ​អ្នក​ស្រុក​ស្លាប់​បាត់​បង់​ជីវិត​ទៀត​ផង។

របាយ​ការណ៍​នេះ ដែល​បាន​សរសេរ​កាល​ពី ខែ​សីហា ឆ្នាំ​២០១៣ បាន​ចោទ​ថា សាលា​រាជធានី​បាន​ដំឡើង​បំពង់​បង្ហូរ តាម​បណ្តោយ​គែម​ខាង​កើត​នៃ​បឹងកក់​ដោយ​មិន​បាន​វាយតម្លៃ​ថា តើ​ទឹក​ប៉ុន្មាន​នឹង​ហូរ​ចេញ​ពី​ដី​ជាប់​នោះ​ទេ ជា​ពិសេស ក្នុង​ករណី​ភ្លៀង​ខ្លាំង។

របាយ​ការណ៍​ដែល ភ្នំពេញ ប៉ុស្តិ៍ បាន​ទទួល​ក្នុង​សប្តាហ៍​នេះ បាន​ឲ្យ​ដឹង​ថា៖ «ការ​បាត់​បង់​ជីវិត និង​ទ្រព្យ​សម្បតិ្ត​អាច​កើត​ឡើង ប្រសិន​បើ​មាន​ព្យុះ​ធំ ក្នុង​រយៈ​ពេល​ប៉ុន្មាន​ឆ្នាំ​ទៀត»។

របាយ​ការណ៍ ដែល​សំដៅ​លើ​ផ្លូវ​លេខ ៩៣ លេខ ៨៦ និង ៧០ ហើយ​រួម​បញ្ចូល​នូវ​ផែនការ​ពី​មន្ទីរ​សាធារណការ​រាជធានី​ភ្នំពេញ បាន​ឲ្យ​ដឹង​ថា បំពង់​បង្ហូរ ដែល​បាន​ដំឡើង​រួច និង​បំពង់​បន្ថែម​ទៀត​ដែល​បាន​ស្នើ នៅ​ពេល​នោះ គឺ​មាន​ទំហំ​តូច​ណាស់។ តំបន់​លំនៅឋាន​នៅ​ខាង​កើត​ផ្លូវ ៩៣ គឺ​មាន​កម្ពស់ ៧,៧ ម៉ែត្រ​ពី​លើ​កម្រិត​សមុទ្រ ចំណែក​ឯ​ផ្នែក​នៃ​សម្បទាន​បឹងកក់​មាន​កម្ពស់​ដល់​ទៅ ១៣ ម៉ែត្រ។ «តំបន់​ទាប​នេះ​អាច​មាន​ហានិភ័យ​រងគ្រោះ​ទឹក​ជំនន់ បាត់បង់​ទ្រព្យ និង​អាច​បាត់​បង់​ជីវិត»។

យោង​តាម​របាយ​ការណ៍​បាន​ឲ្យ​ដឹង​ថា គេ​បាន​ប្រាប់​ក្រុម​ហ៊ុន Shukaku ក្នុង​អំឡុង​ជំនួប​តទល់​ថា អាជ្ញាធរ​មូលដ្ឋាន និង​សាលា​រាជធានី មិន​បាន​រៀបចំ​គណនា មុន​ពេល​ចាប់​ផ្តើម​រចនា​ប្លង់ និង​ការងារ​សាង​សង់​ទេ។ «ដោយ​គ្មាន​ការ​គណនា ពួក​គេ​ធ្វើ​ការ​ស្មាន​អំពី​ទំហំ​បំពង់​បង្ហូរ​ទឹក»។

ក្រុម​ហ៊ុន Shukaku ដែល​មាន​លោក ឡាវ ម៉េងឃីន ព្រឹទ្ធ​សមាជិក​មក​ពី​គណបក្ស​ប្រជាជន​បាន​បង់​ប្រាក់ ៧៩ លាន​ដុល្លារ សម្រាប់​កិច្ច​សន្យា​ជួល​រយៈ​ពេល ៩៩ ឆ្នាំ លើ​ផ្ទៃ​ដី​ជាង ១០០ ហិកតា​នៅ​បឹងកក់ កាល​ពី ឆ្នាំ​២០០៧។ មនុស្ស​ប្រហែល ២ ម៉ឺន​នាក់​ត្រូវ​បាន​បណ្តេញ​ចេញ​ដើម្បី​ត្រួស​ត្រាយ​ផ្លូវ​ដល់​គម្រោង​លំនៅឋាន និង​ពាណិជ្ជ​កម្ម ដែល​បាន​គ្រោង​ទុក។

ក្រុម​ហ៊ុន​បាន​ចាក់​បំពេញ​បឹង ក្នុង​រយៈ​ពេល​ជាង ៣ ឆ្នាំ ហើយ​គ្រួសារ​នៅ​សល់​បាន​បន្ត​រាយការណ៍​ពី​ទឹក​ជំនន់ នៅ​ពេល​មាន​ភ្លៀង​ធ្លាក់​ធំ​ម្ដង។

ប្រព័ន្ធ​លូ​តូច​មួយ​កំពុង​ត្រូវ​បាន​សាង​សង់​ខណៈ​ទឹក​ស្អុយ​នៅ​បន្ត​ជន់​លិច​ផ្ទះ​អ្នក​បឹងកក់។
ប្រព័ន្ធ​លូ​តូច​មួយ​កំពុង​ត្រូវ​បាន​សាង​សង់​ខណៈ​ទឹក​ស្អុយ​នៅ​បន្ត​ជន់​លិច​ផ្ទះ​អ្នក​បឹងកក់។ ហេង ជីវ័ន

ខណៈ​ដែល​សាលា​ក្រុង​បាន​អះអាង​ថា បឹងកក់ មិន​បាន​ដើរ​តួនាទី​ជា​អាង​ស្តុក​ទឹក​ភ្លៀង របាយ​ការណ៍​របស់​ក្រុម​ហ៊ុន Shukaku បាន​ឲ្យ​ដឹង​ថា ប្រព័ន្ធ​បង្ហូរ​ទឹក​នៅ​ក្រៅ​ដី​សម្បទាន​មាន​គោល​បំណង​ជួយ​ប្រមូល​ទឹក​ភ្លៀង ដែល​ដើម​ឡើយ​ហូរ​ចូល​ក្នុង​ប្រព័ន្ធ​បឹង។

របាយ​ការណ៍​បន្ត​ថា ក្រុមហ៊ុន Shukaku កំពុង​ផ្តល់​មូលនិធិ​ដល់​គម្រោង​ត​ភ្ជាប់​ប្រព័ន្ធ​បង្ហូរ​ទឹក​របស់​សាលា​រាជធានី​ដោយ​ចំណាយ​ប្រហែល ២៤៦ ០០០ ដុល្លារ។

លោក ឡុង ឌីម៉ង់ អ្នក​នាំ​ពាក្យ​សាលា​រាជធានី​បាន​បដិសេធ​ធ្វើ​អត្ថាធិប្បាយ​អំពី​របាយ​ការណ៍​នេះ និង​ថា តើ​មាន​ការ​កែប្រែ​ផែនការ​ដើម្បី​ឆ្លើយ​តប​ទៅ​នឹង​ក្តី​កង្វល់​របស់​ក្រុម​ហ៊ុន Shukaku ទាក់​ទង​នឹង​ទឹក​ជំនន់​ឬ​យ៉ាង​ណា​នោះ​ទេ? «អ្នក​ជំនាញ​បច្ចេកទេស​កំពុង​ធ្វើ​ការ​សិក្សា​ពី​គម្រោង​ជាមួយ​នឹង​ក្រុម​ហ៊ុន Shukaku។ បញ្ហា​នេះ​មិន​អាច​ដោះស្រាយ ក្នុង​រយៈ​ពេល ២ ឬ ៣ ថ្ងៃ​ទេ គេ​ត្រូវ​ការ​ពេល​វេលា​វែង»។

លោក សាំ ពិសិដ្ឋ ប្រធាន​មន្ទីរ​សាធារណការ និង​ដឹក​ជញ្ជូន មិន​អាច​ទាក់ទង​សុំ​ការ​អត្ថាធិប្បាយ​បាន​ទេ។

ក្រុម​ហ៊ុន Shukaku បាន​ប្រកាស​កាល​ពី​សប្តាហ៍​មុន​ថា ក្រុម​ហ៊ុន នឹង​ចាប់​ផ្តើម​សាង​សង់​ប្រព័ន្ធ​បង្ហូរ​ផ្ទាល់​ខ្លួន នៅ​កន្លែង​នេះ នៅ​ខែ​នេះ។ លោក​ស្រី Amu Pillay អ្នក​នាំ​ពាក្យ​ក្រុម​ហ៊ុន Shukaku បាន​ថ្លែង​ថា៖ «បើ​ទោះ​បី​ជា​ប្រព័ន្ធ​លូ​យើង​មាន​ប្រសិទ្ធភាព​ក៏​ដោយ ក៏​ប៉ុន្តែ​ទឹក​ភ្លៀង​មិន​អាច​ហូរ​ចេញ​ដោយ​ប្រសិទ្ធ​ភាព​ទេ ទាល់​តែ​សាលា​រាជធានី​កែលម្អ​ប្រព័ន្ធ​ត​ភ្ជាប់​ខាង​ក្រៅ»។ លោក​ស្រី Pillay មិន​នៅ​ក្នុង​ប្រទេស​ទេ កាល​ពី​ថ្ងៃ​អង្គារ ចំណែក​ឯ​អ្នក​តំណាង​ដទៃ​ទៀត​បាន​បដិសេធ​ធ្វើ​អត្ថាធិប្បាយ។

សកម្មជន​បឹងកក់ ៧ នាក់​ត្រូវ​បាន​ចាប់​ខ្លួន​កាល​ពី​ខែ​មុន​ហើយ​ជាប់​ពន្ធនាគារ ១ ឆ្នាំ គឺ​រយៈ​ពេល​តែ ២៤ ម៉ោង​ប៉ុណ្ណោះ បន្ទាប់​ពី​ពួក​គេ​ធ្វើ​បាតុកម្ម​នៅ​ក្រៅ​សាលា​រាជធានី​ដែល​ពួកគេ​បាន​ត្អូញត្អែរ​អំពី​បញ្ហា​មាន​ទឹក​ជន់​លិច​ជាប់​នៅ​ក្នុង​ភូមិ​របស់​ពួក​គេ។

ក្នុង​ផ្ទះ​មួយ​ចំនួន​នៅ​ចុង​ខាង​កើត​នៃ​តំបន់​បឹងកក់ កាល​ពី​ថ្ងៃ​អង្គារ​គ្រួសារ​មួយ​ចំនួន​កំពុង​តែ​ដើរ​ឆ្លង​ទឹក ដែល​នៅ​ជុំវិញ និង​ក្នុង​ផ្ទះ ដោយ​សារ​តែ​មាន​ភ្លៀង​កាល​ពី​សប្តាហ៍​មុន។ បុរស​ម្នាក់​កំពុង​ធ្វើ​ការ​លើ​បំពង់​បង្ហូរ ដែល​ហាក់​បី​ដូច​ជា​ទ្រព្យ​របស់​ក្រុម​ហ៊ុន ហើយ​កំពុង​បត់​បែន​ទៅ​ផ្លូវ​ដែល​ហាក់​បី​ដូច​ជា​ដើម្បី​ត​ភ្ជាប់​នឹង​ប្រព័ន្ធ​លូ​សាធារណៈ។

លោក​បាន​ប្រាប់ អ្នក​យក​ព័ត៌មាន​ថា លោក​មិន​ដឹង​ទេ​ថា តើ និយោជក​របស់​លោក​ជា​អ្នក​ណា? អ្នក​ភូមិ​ម្នាក់ ដែល​បី​កូន​តូច​ក្បែរ​នោះ​បាន​ថ្លែង​ថា លោក​ភ័យ​ខ្លាច​ថា ការ​កសាង​បណ្តាញ​លូ​ថ្មី​របស់​ក្រុម​ហ៊ុន​នឹង​បណ្តាល​ឲ្យ​ផ្ទះ​លោក​ជន់​លិច​ខុស​ពី​ធម្មតា។

លោក ពេជ្រ ពន់ អាយុ ៥៦ ឆ្នាំ បាន​ថ្លែង​ថា៖ «ផ្ទះ​ខ្ញុំ​ត្រូវ​ជន់​លិច​រាល់​ពេល​ភ្លៀង។ ពេល​ភ្លៀង ខ្ញុំ​ត្រូវ​រៀបចំ​លើក​ដាក់​កល់​របស់​មាន​តម្លៃ។ ពេល​មាន​ទឹក​ច្រើន​ខ្ញុំ​ទៅ​ដេក​នៅ​ផ្ទះ​សំណាក់»។

ប៉ុន្មាន​ផ្លូវ​ទៅ​ខាង​កើត នៅ​ខាង​ក្រោយ​ពេទ្យ​កាល់ម៉ែត​លោក ភួន ថុង អ្នក​ភូមិ​ម្នាក់​ទៀត បាន​និយាយ​រៀបរាប់​ពី​បញ្ហា​ប្រឈម​នៅ​ពេល​ភ្លៀង​ធ្លាក់ គឺ​ត្រូវ​ចាប់​សត្វ​មាន់​រាប់​សិប​ក្បាល​ដែល​លោក​ចិញ្ចឹម​ក្នុង​ផ្ទះ ដើម្បី​លក់។

លោក​បាន​បន្ត​ថា៖ «យើង​ត្រូវ​បិទ​ភ្លើង... ហើយ​បន្លាស់​ទី​ទៅ​រស់​នៅ​ជាមួយ​នឹង​គ្រួសារ​បង​ប្អូន»។

មាន​កូន​តូចៗ​ជុំវិញ លោក ថុង បាន​ចង្អុល​ទៅ​ខ្សែ​បន្ទាត់​កម្ពស់​មួយ​ម៉ែត្រ លើ​ជញ្ជាំង​ផ្ទះ ដើម្បី​បង្ហាញ​ពី​កម្រិត​ទឹក​ជន់​លិច​នា​ពេល​ថ្មីៗ​នេះ។ «សាលា​រាជធានី​មិន​បាន​ប្រាប់​យើង​អ្វី​ទេ អំពី​ការ​ដោះ​ស្រាយ​បញ្ហា​នេះ។ ពួក​យើង​មិន​ដែល​ជួប​ទឹក​ជំនន់ នៅ​មុន​ពេល​គេ​ចាក់​លុប​បឹង​ឡើយ»៕

អត្ថបទគួរចាប់អារម្មណ៍

  • ស្ដង់ដា​គណនេយ្យ ជា​ធាតុ​ផ្សំ​ដ៏សំខាន់​មួយ​ក្នុង​ក្របខ័ណ្ឌ​គណនេយ្យ និង​ការរាយការណ៍​ហិរញ្ញវត្ថុ ព្រមទាំង​ជួយ​សម្រួល​ដល់​ក្រុមហ៊ុន​/​សហគ្រាស និង​ថ្នាក់ដឹកនាំ​របស់​ក្រុមហ៊ុន ដើម្បី​កំណត់​ឱ្យ​បាន​ច្បាស់លាស់​ពី​ស្តង់ដា​ដែល​ក្រុមហ៊ុន​បាន​ប្រើប្រាស់​សម្រាប់​ការរៀបចំ​របាយការណ៍​ហិរញ្ញវត្ថុ​។

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។