ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាក់ថាការសាងសង់វិមានឈ្នះឈ្នះបានចំណាយប្រមាណជាង ១២ លានដុល្លារ និងបានចាត់ទុកថា ជាសមិទ្ធផលរួមរបស់ពលរដ្ឋខ្មែរគ្រប់រូប ខណៈលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិអះអាងថាការចំណាយនៅមិនទាន់បូកសរុប ក្នុងពេលការសាងសង់កំពុងបន្តនៅឡើយ។
នៅក្នុងឯកសណ្ឋានជាកងទ័ពលោកនាយករដ្ឋមន្ត្រី ហ៊ុន សែន បានថ្លែងក្នុងពិធីសម្ពោធវិមានឈ្នះ ឈ្នះ នៅខណ្ឌជ្រោយចង្វាររាជធានីភ្នំពេញកាលពីថ្ងៃទី ២៩ ខែធ្នូ ឆ្នាំនេះដែលជាថ្ងៃអបអរសាទរខួប ២០ ឆ្នាំនៃការបិទបញ្ចប់សង្គ្រាមទាំងស្រុងនៅកម្ពុជាថា វិមានឈ្នះឈ្នះបានចំណាយថវិកាអស់ជាង ១២ លានដុល្លារដែលភាគច្រើនជាថវិកាសាលារាជធានីភ្នំពេញ និងមួយផ្នែកពីលោកឧកញ៉ា លី យ៉ុងផាត់ ហើយរាជរដ្ឋាភិបាលបានត្រៀមថវិកាមួយចំនួនទៀតសម្រាប់បន្តការសាងសង់។
លោកបញ្ជាក់ថា៖ «ខ្ញុំសូមបញ្ជាក់ជូនជំនួសឲ្យសម្តេច ទៀ បាញ់ ថា ថវិកាដែលយើងប្រើនៅទីនេះភាគច្រើនបំផុតគឺប្រើប្រាស់ថវិការបស់សាលារាជធានីភ្នំពេញ ឥឡូវនេះថវិកាត្រៀមបម្រុងរួចស្រេចទៅហើយ បញ្ហាធំបំផុត តើត្រូវការប៉ុន្មាន? យើងបានចំណាយជាង ១២ លានដុល្លាររួចស្រេចទៅហើយមិនទាន់គិតបញ្ហាដីធ្លីនោះទេ ប៉ុន្តែយើងក៏មានទុនបម្រុងបន្ថែមទៀតតាមតម្រូវការនៃគណៈកម្មការសាងសង់ ហើយខ្ញុំសង្ឃឹមថាឧកញ៉ា លី យ៉ុងផាត់ ដែលបានរួមចំណែកមួយចំនួនហើយនឹងបន្តរួមចំណែកតាមសំណូមពរគណៈកម្មការតទៅទៀត»។
លោក ហ៊ុន សែន បានអះអាងថាវិមានឈ្នះ ឈ្នះ គឺជាសមិទ្ធផលរួមរបស់ពលរដ្ឋខ្មែរគ្រប់រូប មិនមែនជាផ្ទះរបស់លោកទេ ហើយថាការសម្រេចយកទីតាំងនៅខណ្ឌជ្រោយចង្វារ ព្រោះតែតំបន់នោះនឹងក្លាយជាទីក្រុងរណបរបស់រាជធានីភ្នំពេញដែលកម្ពុជានឹងធ្វើជាម្ចាស់ផ្ទះនៃការប្រកួតកីឡា Sea Game ឆ្នាំ ២០២៣។
លោកបានបញ្ជាក់ថា៖ «កន្លែងនេះ (វិមានឈ្នះ ឈ្នះ) គឺធ្វើមិនមែនជាផ្ទះរបស់ខ្ញុំនោះទេហើយក៏មិនមែនជារបស់អ្នកណាមួយដែរ តែជារបស់ជាតិហើយក៏បើកឱកាសឲ្យប្រជាជនកម្ពុជា យុវជន និស្សិតរបស់យើងមកចូលរួមស្រាវជ្រាវនៅទីនេះ ហើយមកលេងកម្សាន្ដនៅទីនេះ និងធ្វើការហាត់ប្រាណ ឬក៏ចង់ធ្វើអ្វីទៅតាមបំណង»។
ទាក់ទងចំណាយលើការកសាងវិមានឈ្នះ ឈ្នះ នេះលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិបានអះអាងថាការចំណាយមិនទាន់បូកសរុបទេ ដោយសារនៅសាងសង់បន្តដូចជាការចាក់ខ្សាច់បន្ថែម ការធ្វើសារមន្ទីរក្រោមដី ចាក់រូបភាព ព្រឹត្តិការណ៍ប្រវត្តិសាស្ត្រផ្សេងៗ។
លោកបានបញ្ជាក់ថា៖ «ដោយសារការសាងសង់វិមានឈ្នះ ឈ្នះ នេះបានធ្វើប្រញាប់ដើម្បីឲ្យលឿន សម្រាប់រៀបចំសម្ពោធផ្លូវការនាពេលថ្ងៃនេះ។ ដូចនេះការបូកសរុបថវិកា សាងសង់មិនទាន់រាយការណ៍ពិស្តារទេ ទាមទារពេលវេលាមួយសមស្រប។ គណៈកម្មការសាងសង់គោរពស្នើសុំសម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតមេត្តាជួយឧបត្ថម្ភថវិកាថែមទៀតដោយអនុគ្រោះ»។
យ៉ាងណាលោកបានឲ្យដឹងថា វិមានឈ្នះ ឈ្នះ នេះត្រូវបានសាងសង់លើផ្ទៃដី ៨ ហិកតាចាប់ពីថ្ងៃទី ២៥ ខែកុម្ភៈ ឆ្នាំ ២០១៦ ក្នុងសង្កាត់ព្រែកតាសេកខណ្ឌជ្រោយចង្វារតាមរចនាប័ទ្មខ្មែររួមជាមួយសម័យទំនើបមានរាងបួនជ្រុងស្មើ ដែលជ្រុងនីមួយៗមានប្រវែង ១១៧ ម៉ែត្រ និងកម្ពស់ ៥៤ ម៉ែត្រ។
លោកបានបន្តថាក្រៅពីនោះវិមានឈ្នះ ឈ្នះ មានអាងទឹកចំនួន ៨ រចនារូបយក្សទាញព្រ័ត្រ តោ នាគ ដំរីក្បាល ៣ មានស្លាបគ្រុឌ និងហង្សក្បាល ៣ ខ្លោងទ្វារចូលសារមន្ទីរ ផ្ទាំងសិលា និងរូបចម្លាក់ផ្សេងទៀតដែលបង្ហាញពីសច្ចភាព ព្រឹត្តិការណ៍ប្រវត្តិសាស្ត្រពិតនៅកម្ពុជា។
លោក ហេង សំណាង វ័យ ៦០ ឆ្នាំគ្រូបង្រៀន ១ រូបដែលបានចូលរួមក្នុងពិធីសម្ពោធបានថ្លែងថា វិមានឈ្នះឈ្នះនឹងជួយពលរដ្ឋកម្ពុជាចងចាំពីការតស៊ូរបស់រាជរដ្ឋាភិបាលក្នុងការរកសន្តិភាព និងការផ្សះផ្សាជាតិ និងទុកជាកន្លែងប្រវត្តិសាស្ត្រសម្រាប់យុវជនជំនាន់ក្រោយ។
លោកបញ្ជាក់ថា៖ «វិមានឈ្នះ ឈ្នះ នេះបានផ្ដល់មេរៀនយ៉ាងល្អសម្រាប់កូនចៅជំនាន់ក្រោយ។ វិមានឈ្នះឈ្នះគឺជាភ័ស្ដុតាងបង្ហាញដល់ពលរដ្ឋកម្ពុជាទាំងអស់ថា សម្តេចបានជួយស្រោចស្រង់ប្រទេសកម្ពុជាពីរបបខ្មែរក្រហម»។
យោងតាមរបាយការណ៍របស់គណៈកម្មការសាងសង់បានឲ្យដឹងថា កំពូលវិមានឈ្នះ ឈ្នះដែលមានជ្រុង ៣ តំណាងឲ្យនយោបាយសំខាន់ៗចំនួន ៣ ទី ១ ការធានារូបកាយ និងអាយុជីវិត ទី ២ ធានាអាជីព និងមុខរបរ និងទី ៣ ការធានាកម្មសិទ្ធិ និងទ្រព្យសម្បត្តិទាំងចលនទ្រព្យ និងអចលនទ្រព្យ។ រីឯតួវិមានដែលមានជ្រុង ៥ តំណាងឲ្យយុទ្ធសាស្ដ្រ DIFID បំបែក ឯកោ បញ្ចប់ ធ្វើសមាហរណកម្ម និងអភិវឌ្ឍដែលជាយុទ្ធសាស្ដ្ររំលាយអង្គការចាត់តាំងនយោបាយ និងយោធាខ្មែរក្រហម៕