ភ្នំពេញៈ ការសិក្សាថ្មីមួយដែលធ្វើឡើងដោយអង្គការវេទិកាអនាគត សហការជាមួយក្រុមហ៊ុនអង្គរស្រាវជ្រាវ និងផ្ដល់ប្រឹក្សាដែលបានធ្វើការសម្ភាសមនុស្សចំនួន ១១៣៤ នាក់នៅរាជធានី-ខេត្តចំនួន ៥ បង្ហាញថា ជំនួយបន្ទាប់ដែលពលរដ្ឋត្រូវការបំផុតនៅពេលកំពុងរងផលប៉ះពាល់ពីជំងឺកូវីដ ១៩ គឺលុយ បន្ទាប់មកអាហារ និងការពន្យារពេលសងប្រាក់កម្ចី។
លោក អ៊ូ វីរៈ ប្រធានអង្គការវេទិកាអនាគតបានលើកឡើងថា ការសិក្សានេះបានធ្វើឡើងនៅចុងខែមេសា និងដើមខែឧសភា ហើយទិន្នន័យនៅក្នុងការសិក្សានេះគឺឆ្លុះបញ្ចាំងអំពីស្ថានភាពរបស់ពលរដ្ឋ នៅក្នុងអំឡុងរយៈពេលនៃការស្រាវជ្រាវនេះខណៈស្ថានភាពបន្ទាប់ចាប់ពីដើមខែឧសភានឹងត្រូវបង្ហាញនៅក្នុងការសិក្សាមួយទៀតដែលត្រូវធ្វើនៅក្នុងខែកក្កដានេះ។
លោកថា៖ «យើងចុះសម្ភាស (ក្នុងការសិក្សាថ្មី) ប៉ុន្តែសម្ភាសគ្រួសារដដែលហ្នឹង ដើម្បីចង់ដឹងអំពីការឆ្លើយតបរបស់រដ្ឋាភិបាល។ ពីព្រោះកាលយើងសួរកាលពីចុងខែ ៤ គឺអត់សូវមានការឆ្លើយតបពីរដ្ឋាភិបាលទេ ហើយពលរដ្ឋមិនសូវបានជំនួយច្រើនទេ ហើយគោលនយោបាយជំនួយគឺប្រកាសនៅខែ ៥ ហើយការចែកលុយដល់ពលរដ្ឋក្រីក្រទើបប្រកាសនៅពេលថ្មីៗនេះដែរ»។
នៅក្នុងសន្និសីទបង្ហាញលទ្ធផលសិក្សាកាលពីថ្ងៃទី ២២ ខែកក្កដា លោក អ៊ូ វីរៈ បញ្ជាក់ថា ការសិក្សានេះបានចុះសម្ភាសម្ដងទៀតនៅចុងខែនេះ គឺដើម្បីចង់ដឹងអំពីជីវភាពរបស់ពលរដ្ឋ ថាតើមានការផ្លាស់ប្ដូរត្រឡប់ទៅប្រសើរវិញ ឬកាន់តែដុនដាបជាងមុន បន្ទាប់ពីទទួលបានជំនួយជាបន្តបន្ទាប់ពីគោលនយោបាយរបស់រដ្ឋាភិបាល។
នៅក្នុងការសិក្សាលើកដំបូងស្ដីពីផលប៉ះពាល់សេដ្ឋកិច្ច ដោយសារជំងឺកូវីដ១៩ នេះគឺបានសម្ភាសពលរដ្ឋចំនួន ១០៨៧ គ្រួសារ និងមេភូមិចំនួន ៥៤ នាក់ ស្ថិតនៅក្នុងភូមិចំនួន ៥៤ នៃស្រុកចំនួន ១០ ក្នុងរាជធានី-ភ្នំពេញ ខេត្តកំពត សៀមរាប ស្វាយរៀង និងខេត្តកំពង់ស្ពឺ។
ការសិក្សាបង្ហាញថា មានមេភូមិប្រហែល ៩៤% បានឆ្លើយថា ជំងឺកូវីដ១៩ បានធ្វើឱ្យប៉ះពាល់ដល់ភូមិ និងអ្នកភូមិដូចជា មានការបិទអាជីវកម្មលក្ខណៈគ្រួសារចំនួន ១០៨៣ ឬស្មើនឹង ១០,៥% ស្របពេលក្នុងចំណោម ១០៨៧ គ្រួសារដែលបានផ្ដល់សម្ភាសគឺមាន ៩៣៣ គ្រួសារបានបើកអាជីវកម្មលក្ខណៈគ្រួសារ។
ចាប់ពីខែមករាដល់ខែមេសាគឺក្នុងចំណោមគ្រួសារដដែលនេះបានធ្លាក់ចុះប្រាក់ចំណូលដែលពួកគេរាយការណ៍ថា ដោយសារខ្វះអតិថិជនដែលជាបញ្ហាចម្បង។ ចំនួនគ្រួសារដែលរាយការណ៍ថា បានយឺតយ៉ាវសងប្រាក់ទៅធនាគារ គឺកើនឡើង ២៣០% ស្របពេលក៏មានចំនួនគ្រួសារបានខ្ចីប្រាក់ថ្មី ហើយ ១ ភាគ ៣ នៃការខ្ចីប្រាក់ថ្មីនោះគឺដើម្បីដោះដូរទៅសងម្ចាស់កម្ចីផ្សេងទៀត និងសម្រាប់ទ្រទ្រង់ការចំណាយប្រចាំថ្ងៃ។
របាយការណ៍សរសេរថា៖ «បន្ថែមពីនេះមាន ៨៣ គ្រួសារបានរាយការណ៍ថា បានទទួលជំនួយគាំទ្រពីរដ្ឋាភិបាល ឬអង្គការក្រៅរដ្ឋាភិបាលនៅរវាងខែមករា និងមេសាដូចជាអាហារ សាប៊ូ ឬម៉ាស់។ គ្រួសារចំនួន ១០០៤ បានរាយការណ៍ថា មិនបានទទួលជំនួយគាំទ្រ។ តម្រូវការបន្ទាន់បំផុត ដែលពលរដ្ឋបានរាយការណ៍ក្នុងខែមេសា គឺលុយមានចំនួន ៥៥,៧ ភាគរយ អាហារមានចំនួន ២៤,៥ ភាគរយការពន្យារពេលការសងប្រាក់កម្ចីមានចំនួន ៤,៥ ភាគរយ និងថាំ្នពេទ្យ ឬការថែទាំសុខភាពមាន ៤,៥ ភាគរយ»។
១ ភាគ ៥ នៃគ្រួសារស្ថិតក្នុងការសិក្សានេះគឺបានបង្កើតប្រាក់ចំណូលពីវិស័យកសិកម្ម ឬនេសាទដូចជាដាំស្រូវ ដំឡូងមី ការចិញ្ចឹមសត្វ និងផលិតកម្មបន្លែ។ ជាសរុបប្រហែល ២០,១% នៃគ្រួសារគឺបានរាយការណ៍ពីអសន្តិសុខស្បៀងពីកម្រិតមធ្យមទៅធ្ងន់ធ្ងរ។
លោកនាយករដ្ឋមន្ត្រី ហ៊ុន សែន បានប្រកាសថានៅក្នុងខែកក្កដានេះ ពលរដ្ឋក្រីក្រដែលទទួលបានប្រាក់ឧបត្ថម្ភពីរដ្ឋាភិបាល សម្រាប់សម្រួលដល់ការលំបាកគឺបានកើនដល់ ៦១ ម៉ឺនគ្រួសារ និងត្រូវចំណាយលុយអស់ប្រមាណ ២៨ លានដុល្លារ។ លោកបញ្ជាក់ថា ការផ្ដល់ប្រាក់ឧបត្ថម្ភនេះ មិនមែនជាការចិញ្ចឹមពលរដ្ឋទាំងស្រុងនោះទេ ប៉ុន្តែគ្រាន់តែជាការប៉ះប៉ូវប៉ុណ្ណោះ។
លោក អ៊ូ វីរៈ បានសម្តែងការព្រួយបារម្ភយ៉ាងខ្លាំងអំពីការធ្លាក់ចុះចំណូលគ្រួសារដែលការសិក្សានេះបានរកឃើញចំណូលទាំងនោះបានពីប្រាក់ខែ និងចំណូលពីមុខរបរខ្នាតតូចតាចបើកនៅតាមផ្ទះ ប៉ុន្តែលោកថាជាទូទៅគ្រួសារខ្មែរគឺមានចំណូលពីច្រើនវិស័យ ដែលជាសញ្ញាមួយល្អអាចជួយរំដោះការប្រឈមផលលំបាកបាន។
លោកបញ្ជាក់ថា ការព្រួយបារម្ភបន្ទាប់ គឺបញ្ហាសន្ដិសុខស្បៀងអាហារ ខណៈខេត្តសៀមរាបគឺបានប្រឈមនឹងបញ្ហាសន្ដិសុខស្បៀងអាហារខ្លាំងជាងគេ៕