The Phnom Penh Post Search

Search form

Logo of Phnom Penh Post newspaper Phnom Penh Post - ការ​សិក្សា​ ១ ​រក​ឃើញ​ថា​ យុវជន​របស់​គណបក្ស​ពុំ​មាន​ឥទ្ធិពល​ទេ




ការ​សិក្សា​ ១ ​រក​ឃើញ​ថា​ យុវជន​របស់​គណបក្ស​ពុំ​មាន​ឥទ្ធិពល​ទេ

Content image - Phnom Penh Post
យុវជនគណបក្សសង្រ្គោះជាតិ។ ហេង ជីវ័ន

ការ​សិក្សា​ ១ ​រក​ឃើញ​ថា​ យុវជន​របស់​គណបក្ស​ពុំ​មាន​ឥទ្ធិពល​ទេ

ភ្នំពេញៈ ការ​សិក្សា​ស្រាវជ្រាវ​មួយ​ទៅ​លើ​យុវជន​នៃ​គណបក្ស​​​នយោបាយ​សំខាន់​​ពីរ​បាន​​​រកឃើញ​ថា​យុវជន​នៃ​គណបក្ស​ទាំង​ពីរ​នេះ គឺ​គ្រាន់តែ​ជា​អ្នក​ផ្សព្វផ្សាយ​​​គោល​នយោបាយ​របស់​បក្ស​​ប៉ុណ្ណោះ និង​​ពុំមាន​ការ​ទទួល​ខុស​ត្រូវ​​​ធំ​ដុំ ឬ​អំណាច​​​ក្នុង​ការ​មាន​ឥទ្ធិពល​ទៅ​លើ​ការ​​តាក់តែង​គោល​នយោបាយ​​ទាំង​​នោះ​ឡើយ​។

ការ​សិក្សា​ខ្លី​មួយ​ដែល​ចេញ​ផ្សាយ​​កាលពី​សប្តាហ៍​មុន​ដោយ​អង្គការ​ Konrad Adenauer Stiftung ​បាន​​ប្រៀប​ធៀប​រចនា​សម្ព័ន្ធ​យុវជន​​របស់​គណបក្ស​ប្រជាជន​កម្ពុជា​ និង​គណបក្ស​​​សង្គ្រោះ​ជាតិ​​ទៅ​នឹង​អង្គការ​ស្រដៀង​គ្នា​ចំនួន​បួន​នៅក្នុង​ប្រទេស​អាល្លឺម៉ង់​ ​និង​បាន​​រកឃើញ​ថា​អង្គការ​យុវជន​ក្នុង​ប្រទេស​កម្ពុជា​គឺ​មាន​លក្ខណៈ​ពឹង​ផ្អែក​ខ្លាំង​ជាង​ទៅ​លើ​ «​គណបក្ស​របស់​ខ្លួន​»​។​

របាយការណ៍​នេះ​បន្ត​ថា​៖ «​​នៅ​​ក្នុង​កិច្ច​ខិតខំ​ប្រឹងប្រែង​​មួយ​ដើម្បី​ទទួល​បាន​ការ​​រួបរួម​គ្នា​ពួកគេ​​ការពារ​តែ​​គោល​នយោបាយ​​របស់​គណបក្ស​​របស់​ពួកគេ​ប៉ុណ្ណោះ​»​។

ជាង​នេះ​ទៀត​ការ​សិក្សា​នេះ​​បាន​រក​​​ឃើញ​ថា​យុវជន​ទាំង​ពីរ​​ក្រុម​ត្រូវ​បាន​បង្កើតឡើង​ជាមួយ​នឹង​វិធីសាស្រ្ត​គ្រប់គ្រង​ពី​ថ្នាក់​​កំពូល​ចុះ​ក្រោម​ខណៈ​​​អង្គការ​យុវជន​​នៅ​​អាល្លឺម៉ង់​ដូចជា​អង្គការ Young Union និង​ Green Youth ​បាន​ចាប់ផ្តើម​ជា​ក្រុម​​ថ្នាក់​មូលដ្ឋាន​ដែល​មាន​ឯករាជ្យ​​ និង​​ឆ្ពោះ​ឡើង​ទៅ​លើ​។

ខណៈ​អង្គការ​យុវជន​ទាំង​ពីរ​ផ្តោត​ទៅ​​លើ​បញ្ហា​​អប់រំ​​យុវជន​របស់​គណបក្ស​ប្រជាជន​កម្ពុជា​ផ្តោត​ទៅ​លើ​​​​បញ្ហា​​ការងារ​ និង​ការ​គាំពារ​សុខភាព​ខណៈ​​យុវជន​របស់​គណបក្ស​សង្គ្រោះ​ជាតិ​ផ្តោត​ទៅ​លើ​​សិទ្ធិ​មនុស្ស​ និង​យុត្តិធម៌​សង្គម​​។ ទោះបី​យ៉ាង​ណា​ក្តី​អង្គការ​ទាំង​ពីរ​មាន​ឥទ្ធិពល​មាន​កម្រិត​ទៅ​លើ​គោលនយោបាយ​ទាំង​នេះ​។

របាយការណ៍​​នេះ​ក៏​បាន​ទទួល​ស្គាល់​ផង​ដែរ​​ថា​សហភាព​សហព័ន្ធ​យុវជន​កម្ពុជា​​​ដែល​ដឹកនាំ​​ដោយ​លោក ហ៊ុន ម៉ានី ​​​កូន​ប្រុស​របស់​លោក​នាយក​រដ្ឋមន្រ្តី ហ៊ុន សែន កំពុង​​ដើរ​តួ​​មិន​ផ្លូវការ​ជា​ក្រុម​យុវជន​​ដឹកនាំ​កម្មវិធី​ផ្សព្វផ្សាយ​​​ក្នុង​សង្គម​ និង​ដល់​ថ្នាក់​មូលដ្ឋាន​របស់​គណបក្ស​ប្រជាជន​។

លោក ហ៊ីង សុខសាន ​ដែល​ជា​ប្រធាន​ក្រុម​យុវជន​របស់​គណបក្ស​សង្គ្រោះ​ជាតិ​បាន​យល់​ស្រប​​ជាមួយ​នឹង​​លទ្ធផល​​នៃ​របាយការណ៍​នេះ​ហើយ​​​ថ្លែង​ថា​​លោក​​សង្ឃឹម​ថា​នឹង​ធ្វើ​ឲ្យ​សមាជិក​របស់​លោក​មាន​ឯករាជ្យ​​​ជាង​មុន​ពី​គណបក្ស​ប៉ុន្តែ​នៅ​តែ​​ធ្វើ​ការងារ​​សម្រាប់​​គណបក្ស​សង្គ្រោះ​ជាតិ​ «​ដោយ​ប្រយោល​»។

លោក​បាន​ថ្លែង​បន្ត​ថា​​ នេះ​គឺ​ដោយសារ​វប្បធម៌​កម្ពុជា​ដែល​គំនិត​​ធំៗ​គឺ​ចេញ​ពី​មេដឹកនាំ​ជាន់​ខ្ពស់​​ហើយ​យុវជន​មាន​គំនិត​ផ្តួចផ្តើម​តិច​ជាង​​ក្នុង​ការ​ផ្តល់​​​ទស្សន​វិស័យ​ថ្មីៗ​ស្តីពី​បញ្ហា​​នយោបាយ​។

លោក​បន្ត​ថា​៖«​​ទោះ​យ៉ាង​ណា​ក្តី​ក្នុង​គណបក្ស​​សង្គ្រោះជាតិ​នៅ​ពេល​យើង​មាន​គំនិត​​ថ្មី​មួយ​ហើយ​ស្នើ​សុំ​​​​ការ​​អនុម័ត​​ពី​ថ្នាក់​ដឹកនាំ​ពួកគេ​​អាច​ស្តាប់​ប្រសិន​បើ​​យើង​អាច​ផ្តល់​​នូវ​ហេតុផល​ល្អ​»។

អ្នក​នាំ​ពាក្យ​គណបក្ស​ប្រជាជន​លោក សួស យ៉ារ៉ា​ និង​លោក សុខ ឥសាន ​និង​សមាជិក​ក្រុម​យុវជន​ លោក គឹម សន្តិភាព ​មិន​អាច​ទាក់ទង​សុំ​អត្ថាធិប្បាយ​បាន​​​ទេ​កាលពី​ម្សិលមិញ​ខណៈ​រដ្ឋមន្រ្តី​​ក្រសួង​បរិស្ថាន​ ​និង​​​​ជា​សមាជិក​សហភាព​សហព័ន្ធ​យុវជន​កម្ពុជា​លោក សាយ សំអាល់ ​បាន​​បដិសេធ​​ធ្វើ​អត្ថាធិប្បាយ​អំពី​របាយការណ៍​នេះ​។

លោក គល់ បញ្ញា ​ប្រធាន​អង្គការ​ឃ្លាំ​មើល​ការ​បោះឆ្នោត​ហៅ​ខុមហ្វ្រែល​បាន​ថ្លែង​ថា​គណបក្ស​ទាំង​ពីរ​មិន​បាន​ជំរុញ​ឲ្យ​មាន​ការ​គិត​ឯករាជ្យ​ពី​ក្រុម​យុវជន​របស់​ខ្លួន​ទេ​​។ «​គណបក្ស​ទាំង​ពីរ​ចង់​ប្រើ​ពួកគេ​ប៉ុន្តែ​​មិន​ស្តាប់​​ពួកគេ​សម្រាប់​​ការ​ជួយ​​ជាមួយ​គោល​នយោបាយ​នោះ​ទេ​​»។

ដោយសារ​តែ​ការ​បញ្ចេញ​មតិ​យោបល់​ពី​យុវជន​ទៅ​គណបក្ស​​មាន​កំហិត​លោក​ បញ្ញា ថ្លែង​ថា​វា​ជា​ការ​លើក​ទឹក​ចិត្ត​ដែល​ប្រព័ន្ធ​ផ្សព្វផ្សាយ​កំពុង​ផ្តល់​ជា​ផ្នែក​​​សម្រាប់​ពួកគេ​​ចូលរួម​នៅ​ក្នុង​ការ​ពិភាក្សា​អំពី​​គោល​នយោបាយ​ដូចជា​ការ​អប់រំ​ និង​ការ​កាប់​ព្រៃឈើ​ហើយ​ពេល​ខ្លះ​ថែម​ទាំង​​រិះគន់​មេដឹកនាំ​ជាន់​ខ្ពស់​​ទៀត​ផង​៕ PS

អត្ថបទគួរចាប់អារម្មណ៍