.jpg)
តំណាងជនជាតិដើមភាគតិចពីខេត្តកោះកុងមកភ្នំពេញដាក់ញត្តិសុំចុះបញ្ជីអត្តសញ្ញាតិរបស់ពួកគេនាពេលកន្លងមក។ ផឹង ស្រីស័រ
កោះកុង មន្ត្រីក្រសួងអភិវឌ្ឍន៍ជនបទ និងអង្គការសហប្រជាជាតិបានចុះទៅពិនិត្យភាពយឺតយ៉ាវនៅខេត្តកោះកុងក្នុងការចុះបញ្ជីអត្តសញ្ញាណជនជាតិដើមភាគតិចជងនៅតំបន់អារ៉ែង ក្រោយពីទទួលបានពាក្យបណ្តឹងសុំអន្តរាគមន៍ពីសហគមន៍ក្នុងស្រុកថ្មបាំង។ រីឯការចុះទៅពិនិត្យនោះបានចាប់ផ្តើមធ្វើឡើងកាលពីថ្ងៃអាទិត្យនៅសាលាឃុំជំនាប់ថ្មីជាមួយនឹងតំណាងសហគមន៍ និងនៅថ្ងៃចន្ទនេះនៅសាលាខេត្តកោះកុង។
លោក ចាន់ ដារ៉ុង អ្នកនាំពាក្យក្រសួងអភិវឌ្ឍន៍ជនបទ បានឲ្យដឹងថា ជនជាតិដើមភាគតិច បានដាក់ពាក្យស្នើសុំចុះបញ្ជីស្វ័យអត្តសញ្ញណជនជាតិដើមភាគតិចជងតាមលំដាប់លំដោយពីអាជ្ញាធរថា្នក់ឃុំស្រុក និងខេត្តកោះកុង មុននឹងបញ្ជូនទៅក្រសួងអភិវឌ្ឍន៍ជនបទ។ ប៉ុន្តែសំណើរនោះត្រូវបានជាប់គាំងនៅថ្នាក់មូលដ្ឋាន ដោយសារមានភាពយឺតយ៉ាវពាក់ព័ន្ធការពិនិត្យនិតិវិធី។ ហេតុនេះ រដ្ឋលេខាធិការ និងមន្ត្រីនៅនាយកដ្ឋានអភិវឌ្ឍន៍ជនជាតិដើមភាគិច បានជួបប្រជុំជាមួយនឹងអភិបាលខេត្តកោះកុង ដើម្បីពិនិត្យ និងសម្របសម្រួលនិតិវិធីក្នុងការរៀបចំចុះបញ្ជីនេះ។
ការចុះពិនិត្យនេះ ត្រូវបានធ្វើឡើងក្រោយពីពលរដ្ឋ ១០ នាក់តំណាងឲ្យជនជាតិដើមភាគតិចជង ២០០ គ្រួសារនៅភូមិ-ឃុំជំនាប់ ស្រុកថ្មបាំងបានដាក់លិខិតសុំអន្តរាគមន៍ទៅក្រសួងអភិវឌ្ឍន៍ជនបទ ខុទ្ទកាលល័យនាយករដ្ឋមន្ត្រី និងអង្គការសហប្រជាជាតិកាលពីថ្ងៃទី៤ដើមខែមេសាកន្លងមក។
លោកវ៉ែន វ៉ន ជាតំណាងម្នាក់បានឲ្យដឹងកាលពីម្សិលមិញថា ពលរដ្ឋនៅភូមិជំនាប់ ច្រកឬស្សី,ព្រែកស្វាយ និងភូមិកោះបានចាប់ផ្ដើមដាក់សំណើរសុំចុះបញ្ជីទទួលស្គាល់នេះតាំងពីថ្នាក់ភូមិទៅកាលពីឆ្នាំ ២០១៧ ហើយត្រូវបញ្ជូនទៅថ្នាក់ខេត្តកាលពីចុងឆ្នាំ ២០១៧ ដដែលនោះ។ ប៉ុន្តែសំណើរចុះបញ្ជីរបស់សហគមន៍ភូមិជំនាប់របស់លោកបានកំពុងតែនៅជាប់គាំងត្រឹមខេត្ត ខណៈដែលសំណើរ៣ភូមិទៀតត្រូវបានទទួលស្គាល់ពីក្រសួងរួចហើយកាលពីដើមឆ្នាំ ២០១៨ នេះ។
លោកស្រី មិថុនា ភូថង អភិបាលខេត្តកោះកុងបានមានប្រសាសន៍ យ៉ាងខ្លីថា «ក្រុមការងាររបស់ខេត្តកំពុងតែធ្វើការលើរឿងនេះ»។ លោកស្រីសុំឲ្យទាក់ទងទៅមន្ត្រីផ្នែករដ្ឋបាលសាលាខេត្ត សម្រាប់ព័ត៌មានបន្ថែម។ ប៉ុន្ដែ លោក អ៊ូច ទូច នាយករដ្ឋបាលសាលាខេត្តជាប់ប្រជុំមិនអាចធ្វើអត្ថាធិប្បាយបានទេនៅថ្ងៃនេះ៕
