.jpg)
លោក គួច ចំរើន អភិបាលខេត្តព្រះសីហនុ ចុះត្រូវពិនិត្យការស្ថាបនាផ្លូវនាពេលកន្លងមក។ រូបថត សហការី
ព្រះសីហនុៈ មន្ត្រីសាលាខេត្ដព្រះសីហនុបានឱ្យដឹងថា ការស្ថាបនាហេដ្ឋារចនាសម័ន្ធផ្លូវថ្នល់ ៣៤ ខ្សែ និងប្រព័ន្ធលូប្រឡាយក្នុងខេត្តព្រះសីហនុសម្រេចបានប្រមាណ ៥៥ ភាគរយ ហើយចាប់តាំងពីផ្ដើមដំណើរការកាលពីពាក់កណ្ដាលខែវិច្ឆិកាឆ្នាំមុនរហូតមកទល់បច្ចុប្បន្ន ហើយក៏កំពុងបន្តធ្វើទាំងយប់ ទាំងថ្ងៃដដែល បើទោះបីជាកម្ពុជាកំពុងមានបញ្ហាជំងឺកូវីដ ១៩ ក៏ដោយ។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុបានថ្លែងកាលពីថ្ងៃពុធថាកាលពីទី ៣០ ខែមីនា ថ្មីៗនេះលោក គួច ចំរើន អភិបាលខេត្តព្រះសីហនុ និងលោក អ៊ី សុខឡេង អភិបាលក្រុងព្រះសីហនុបានបន្តដឹកនាំមន្ត្រីជំនាញចុះពិនិត្យការស្ថាបនាផ្លូវលេខ ៤០០ (ក្បែរឆ្នេរអូរឈើទាល) ជាផ្លូវមួយក្នុងគម្រោងផ្លូវទាំង ៣៤ ខ្សែ ដែលត្រូវស្ថាបនាក្នុងខេត្ដ/ក្រុងព្រះសីហនុ។
លោកបានថ្លែងថា៖ «បើគិតចាប់ពីថ្ងៃបើកការដ្ឋានស្ថាបនាផ្លូវទាំង ៣៤ ខ្សែ ក្នុងខេត្តព្រះសីហនុកាលពីថ្ងៃទី ១៦ ខែ វិច្ឆិកា ឆ្នាំ ២០១៩ កន្លងទៅក្រោមអធិបតីភាព លោកនាយករដ្ឋមន្ដ្រី ហ៊ុន សែន គឺមានរយៈពេលជាង ៤ ខែហើយ។ ក្រុមកងវិស្វកម្មរួមទាំងក្រុមហ៊ុនឯកជនដែលទទួលគម្រោងការសា្ថបនាផ្លូវទាំង ៣៤ ខ្សែទាំង ៧ ក្រុមហ៊ុនបាន និងកំពុងតែពន្លឿនការងារស្ថាបនារៀងៗខ្លួនទាំងយប់ទាំងថ្ងៃដើម្បីសម្រេចឱ្យបានទៅតាមផែនការដែលបានកំណត់»។
លោកបានបន្តថា៖ «រហូតមកទល់ពេលនេះ (ថ្ងៃពុធ) បើគិតជារួមគឺការស្ថាបនាផ្លូវ និងប្រព័ន្ធលូ សម្រេចបានប្រមាណ ៥៥ ភាគរយហើយ។ ទោះបីមានបញ្ហាកូវីដ១៩យ៉ាងណាក៏ដោយគឺយើងមិនបានបញ្ឈប់សកម្មភាពស្ថាបនាហេដ្ឋារចនាសម្ព័ន្ធទាំងនេះទេ គឺយើងបន្តធ្វើយ៉ាងសកម្មដើម្បីខិតខំធ្វើម៉េចឱ្យទាន់ទៅតាមផែនការ»។
លោកបន្ថែមថា ចំណែកការស្ដារប្រព័ន្ធ អូរ ប្រឡាយ ក៏ក្រុមជំនាញបន្តធ្វើយ៉ាងសកម្មដែរលើសំណង់មិនរៀបរយដែលបានសាងសង់លើដីនៃប្លង់ប្រព័ន្ធអូរ ប្រឡាយ ដោយកំណត់ឱ្យឈូសឆាយ និងរុះរើចេញជាបន្តបន្ទាប់។
លោក ជាវ វិជ្ជាក់ អភិបាលរងខេត្ដព្រះសីហនុទទួលបន្ទុកការងារស្ដាអូរ ប្រឡាយក្នុងក្រុងព្រះសីហនុបានបញ្ជាក់បន្ថែមកាលពីម្សិលមិញថា ការងារស្ដារអូរ ប្រឡាយក្នុងខេត្ដ/ក្រុងព្រះសីហនុក្រុមការងារនៅតែបន្តធ្វើយ៉ាងយកចិត្ដទុកដាក់ បើទោះជាមានជំងឺកូវីដ១៩ ក្ដី។
ជាមួយគ្នានេះលោក វិជ្ជាក់ បានបង្ហាញរបាយការណ៍របស់អគ្គនាយកដ្ឋានប្រព័ន្ធចម្រោះទឹក កខ្វក់នៃក្រសួងសាធារណការ និងដឹកជញ្ជូនស្ដីពីការស្ដារអូរប្រឡាយដល់ភ្នំពេញប៉ុស្ដិ៍ផងដែរ។
បើតាមរបាយការណ៍នេះបង្ហាញថាចាប់ពីថ្ងៃទី ៩ ខែធ្នូ ឆ្នាំមុនរហូតមកទល់បច្ចុប្បន្ន វឌ្ឍនភាពការងារស្ដារប្រឡាយអូរឈើទាលរបស់នាយកដ្ឋានសាងសង់ និងថែទាំប្រព័ន្ធចម្រោះទឹកកខ្វក់ចាប់ពីអូរ ១ រហូតដល់អូរ ៥ ដែលមានប្រវែង ១៦ ៥៦០ ម៉ែត្រ គឺស្ដារបាន ៨ ៦៧៩ ម៉ែត្រស្មើនឹង ៥៦,៧២ ភាគរយ។ ជាមួយគ្នានេះក្រុមការងារបានដោះស្រាយផលប៉ះពាល់ជាមួយពលរដ្ឋដែលបានសង់សំណង់ផ្សេងៗលើអូរ ប្រឡាយអូរឈើទាលបាន ៧៥ ភាគរយផងដែរ។
ដោយឡែកការងារស្ដារអូរប្រឡាយនៅតំបន់អូរអណ្ដូងអ៊ុនតាក់ អូរស្ពានឆេះ អូរសំអាត អូរអេម៉ារីអូរ ដែលមានប្រវែងសរុប ២៦ ៥២៧ ម៉ែត្រ គឺស្ដារបានប្រវែង ១៥ ៥២៧ ម៉ែត្រស្នើ ៥៨,៥៧ ភាគរយ។ ការងារស្ដារអូរទាំងនេះ ក្រុមការងារក៏បានដោះស្រាយផលប៉ះពាល់បានចំនួន ៤២ ទីតាំង ហើយនៅសល់ ៤៣ ទីតាំងទៀតកំពុងបន្តស្វែងរកដំណោះស្រាយ ។ នេះបើតាមរបាយការណ៍ដដែល។
លោក ជាវ វិជ្ជាក់ បានបញ្ជាក់ថា៖ «នៅសល់ចំណុចដែលយើងស្មុគស្មាញពិបាកធ្វើនោះគឺមានសំណង់ជាផ្ទះថ្មប្រភេទសំណង់រឹងដែលពលរដ្ឋបានសាងសង់នៅលើអូរនោះមានកម្ពស់ ២ ជាន់រហូតដល់ ៥ ជាន់ដែលជាបញ្ហាធ្វើឱ្យយើងមានការពិបាកមែនទែនក្នុងការងារស្ដារអូរប្រឡាយនេះដែលការងារនេះ តម្រូវឱ្យយើងត្រូវតែរុះរើសំណង់របស់ពួកគាត់។ ពលរដ្ឋខ្លះគាត់មិនសហការជាមួយក្រុមការងារទេ មានអ្នកខ្លះគាត់បានសាងសង់សំណង់ខុសលើដីអូរប្រឡាយរបស់រដ្ឋ ហើយបែរជាចង់រករឿងក្រុមការងារទៅទៀត ដោយមានការគំរាមក្រុមការងារថានឹងប្ដឹងជាដើម»។
គួរបញ្ជាក់ថា ក្រុមហ៊ុនក្នុងស្រុកចំនួន ៧ ក្រុមហ៊ុន កំពុងស្ថាបនាផ្លូវចំនួន ៣៤ ខ្សែ ក្នុងខេត្ដព្រះសីហនុទាំងយប់ទាំងថ្ងៃ ដើម្បីឱ្យសម្រេចរួចរាល់ក្នុងរយៈពេល ៨ ខែ តាមការគ្រោងទុកជាគម្រោងដែលរាជរដ្ឋាភិបាលកម្ពុជាបានប្រើប្រាស់ថវិការដ្ឋជាង ២០០ លានដុល្លារ។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) បានស្នើឱ្យការស្ថាបនាហេដ្ឋារចនាសម្ព័ន្ធនេះរក្សាឱ្យបាននូវប្រសិទ្ធភាព និងគុណភាព ហើយប្រសិនបើការស្ថាបនាមានល្បឿនលឿន តែមិនមានគុណភាពក៏មិនជាល្អដែរ។
លោកថា៖ «យើងដឹងហើយថាការអភិវឌ្ឍផ្លូវឡើងវិញទាំង ៣៤ ខ្សែនេះ គឺជាថវិការបស់រាជរដ្ឋាភិបាលដែលបានឧបត្ថម្ភមក។ ដូច្នេះការប្រើប្រាស់ថវិកា ការសាងសង់ផ្លូវនេះត្រូវធ្វើឡើងដោយតម្លាភាព និងមានគុណភាពបំផុត ដែលអាចទទួលយកបានទាំងប្រជាពលរដ្ឋ និងរាជរដ្ឋាភិបាល»៕
