ព្រះសីហនុៈ គិតត្រឹមថ្ងៃទី ១៦ ម្សិលមិញខែឧសភានេះជាខួប ៦ ខែនៃការស្ថាបនាហេដ្ឋារចនាសម្ពព័ន្ធផ្លូវក្នុងខេត្ដ/ក្រុងព្រះសីហនុដែលមកដល់ពេលនេះសម្រេចសមិទ្ធផលបានប្រមាណ ៩០,៦០ ភាគរយដោយលឿនជាងផែនការ ៤,៥ ភាគរយ។ នេះបើតាមលោក ឃាង ភារម្យ អ្នកនាំពាក្យរដ្ឋបាលសាលាខេត្តព្រះសីហនុប្រាប់ភ្នំពេញប៉ុស្ដិ៍ពីម្សិលមិញ។
លោក ឃាង ភារម្យ បានថ្លែងថាការអភិវឌ្ឍហេដ្ឋារចនាសម្ព័ន្ធផ្លូវក្នុងខេត្ត/ក្រុងព្រះសីហនុរយៈពេល ៦ ខែគិតចាប់ពីថ្ងៃទី ១៦ វិច្ឆិកាឆ្នាំមុនដល់ថ្ងៃទី ១៦ ឧសភាឆ្នាំនេះ គម្រោងទាំងមូលសម្រេចបានប្រមាណ ៩០,៦០ ភាគរយ លឿនជាងផែនការប្រមាណ ៤,៥ ភាគរយដោយមិនគិតបញ្ចូលការងារអ៊ុតកៅស៊ូ គំនូសសញ្ញាចរាចរណ៍ ដាំដើមឈើ បង្គោលភ្លើង ការរៀបកម្រាលថ្មក្រានីតជាដើម។
មន្ត្រីនាំពាក្យរូបនេះថ្លែងថា៖ «គិតត្រឹមថៃ្ងទី ១៦ ខែវិច្ឆិកា ឆ្នាំ ២០១៩ ដល់ថែ្ងទី ១៦ ខែឧសភា ឆ្នាំ ២០២០ បាន ៦ ខែគត់គិតជាថៃ្ងបាន ១៨៣ ថៃ្ងហើយ។ ចំពោះការងារដាក់លូបាន ៩១,៥៦ ភាគរយ និងការងារបេតុង ៨៦,៤៤ ភាគរយ»។
កាលពីម្សិលមិញនេះដែរលោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ហើយក៏ជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា អមដំណើរដោយលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនលោក សាយ សំអាល់ រដ្ឋមន្ដ្រីក្រសួងបរិស្ថាន និងលោក គួច ចំរើន អភិបាលខេត្ដព្រះសីហនុបានធ្វើទស្សនកិច្ចពិនិត្យវឌ្ឍនភាពនៃការស្ថាបនាផ្លូវចំនួន ៣៤ ខ្សែនៅខេត្ត/ក្រុងព្រះសីហនុផងដែរ។
តាមរយៈការពិនិត្យវឌ្ឍនភាពនៃការស្ថាបនាផ្លូវនេះលោក ជា សុផារ៉ា បានសរសេរសាទរចំពោះសមិទ្ធផលនៃការស្ថាបនាផ្លូវនេះនៅលើហ្វេសប៊ុកផ្លូវការរបស់លោកផងដែរ។ លោកបានសរសេរថា៖ «គណៈកមា្មធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាសូមជម្រាបជូនអំពីវឌ្ឍនភាពនៃការសាងសង់ហេដា្ឋរចនាសម្ព័ន្ធក្នុងខេត្តព្រះសីហនុគិតចាប់ពីថៃ្ងទី ១៦ វិច្ឆិកា ២០១៩ ដល់ថែ្ង ១៦ ឧសភា ២០២០ ការសាងសង់ហេដ្ឋារចនាសម្ព័ន្ធនៅខេត្តព្រះសីហនុបានដំណើរការរយៈពេល ៦ ខែគត់ ស្នើនឹង ១៨៣ ថៃ្ង។ ការងារដាក់លូបានសម្រេច ៩១,៥៦ ភាគរយសល់ ១១ ថៃ្ងទៀតនឹងស៊ីផុយ។ ការងារបេតុងបានសម្រេច ៨៦,៤៤ ភាគរយសល់ ១៥ ថៃ្ងទៀតក៏សាទរដែរ»។
លោក ឃាង ភារម្យ បានឲ្យដឹងថា គម្រោងអភិវឌ្ឍន៍ហេដ្ឋារចនាសម្ព័ន្ធផ្លូវចំនួន ៣៤ ខ្សែនៅក្នុងខេត្ត/ក្រុងព្រះសីហនុមានប្រវែងសរុប ៨២,១៤៥ គីឡូម៉ែត្រដែលបានចាប់ផ្ដើមបើកការដ្ឋានសាងសង់ក្រោមអធិបតីភាព លោកនាយករដ្ឋមន្ដ្រី ហ៊ុន សែន កាលពីថ្ងៃទី ១៦ ខែវិច្ឆិកា ឆ្នាំ ២០១៩ កន្លងទៅ។
លោកបញ្ជាក់ថា សម្រាប់ការដាក់លូដែលអនុវត្តចាប់ផ្ដើមនៅថ្ងៃទី ៣ ខែ មករា ឆ្នាំ ២០២០ គិតមកដល់ថ្ងៃទី ១៦ ខែ ឧសភា ឆ្នាំ ២០២០ ដែលមានរយៈពេល ១៣៤ ថ្ងៃ ដោយបានសម្រេចកិច្ចការងារជាក់ស្ដែង ៩១,៥៦ ភាគរយ លឿនជាងផែនការ ០,៥៤ ភាគរយ ហើយអាចនឹងបញ្ចប់ក្នុងរយៈពេល ១១ ថ្ងៃខាងមុខគឺថ្ងៃទី ២៧ ខែឧសភា ឆ្នាំ ២០២០។
ដោយឡែកសម្រាប់ការចាក់បេតុងដែលបានចាប់ផ្ដើមកាលពីថ្ងៃទី ២១ ខែ មករា ឆ្នាំ ២០២០ គិតមកដល់ថ្ងៃទី ១៦ ខែ ឧសភា ឆ្នាំ ២០២០ ដែលមានរយៈពេល ១១៦ ថ្ងៃ ដោយបានសម្រេចកិច្ចការងារជាក់ស្ដែង ៨៦,៤៤ ភាគរយ លឿនជាងផែនការ ៨,១៣ ភាគរយ ហើយអាចនឹងបញ្ចប់ក្នុងរយៈពេល ១៥ ថ្ងៃខាងមុខពោលគឺថ្ងៃទី ៣១ ខែ ឧសភា ឆ្នាំ ២០២០។
តាមអ្នកនាំពាក្យរូបនេះការស្ថាបនាហេដ្ឋារចនាសម្ព័ន្ធផ្លូវក្នុងខេត្ដ/ក្រុងព្រះសីហនុនេះ ក្រុមហ៊ុនក្នុងស្រុកចំនួន ៧ ក្រុមហ៊ុនបានរួមគ្នាធ្វើការស្ថាបនាផ្លូវចំនួន ៣៤ ខ្សែនេះទាំងយប់ទាំងថ្ងៃឲ្យចប់រួចរាល់ក្នុងរយៈពេល ៨ ខែ (ចាប់ផ្ដើមកាលពីថ្ងៃទី ១៦ ខែវិច្ឆិកា ឆ្នាំ ២០១៩) ដែលគ្រោងនឹងចំណាយទឹកប្រាក់អស់ជាង ២០០ លានដុល្លារអាមេរិក៕