ព្រះសីហនុៈ ក្រសួងសាធារណការ និងដឹកជញ្ជូនកំពុងពិនិត្យពីវឌ្ឍនភាពនៃការអនុវត្តគម្រោងសាងសង់ទីលានចាក់សំរាមនៅភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុលើផ្ទៃដី ១៧,៣៣ ហិកតាដោយគ្រោងចំណាយថវិកាជាតិជាង ៥ លានដុល្លារអាមេរិក ដើម្បីលើកកម្ពស់សមត្ថភាពគ្រប់គ្រងសំរាម និងអនាម័យជូនប្រជាពលរដ្ឋ។
លោក កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូនថ្លែងក្នុងកិច្ចប្រជុំពិភាក្សាអំពីវឌ្ឍនភាពគម្រោងសាងសង់ទីលានចាក់សំរាមក្នុងខេត្តព្រះសីហនុកាលពីថ្ងៃទី ២១ ខែកក្កដាថា គម្រោងសាងសង់ទីលានចាក់សំរាមក្នុងខេត្តព្រះសីហនុត្រូវបានអនុវត្តដោយក្រុមហ៊ុន ហេង សម្បត្តិ អាហរ័ណ នីហរ័ណ ក្នុងទំហំទឹកប្រាក់ចំនួនជាង ៥ លានដុល្លារជាថវិកាជាតិសម្រាប់ឆ្នាំ ២០២០។ គម្រោងនេះនឹងប្រើរយៈពេលសាងសង់ ១៧ ខែគិតចាប់ពីថ្ងៃទី ១ កក្កដា ឆ្នាំ ២០២០ លើផ្ទៃដីជាង ១៧ ហិកតាដែលមានចម្ងាយប្រមាណ ៣ គីឡូម៉ែត្រពីផ្លូវជាតិលេខ ៤។
លោកបន្តថា គម្រោងទីលានចាក់សំរាមថ្មីនេះសាងសង់ឡើង ដើម្បីបំពេញតម្រូវការរយៈពេល ៥ ឆ្នាំដំបូង ដែលមានសមត្ថភាពអាចផ្ទុកសំរាមបានជាង ៨៨ ម៉ឺនម៉ែត្រគុបមានរណ្ដៅចំនួន ៤។ រណ្ដៅនីមួយៗមានទទឹងគិតជាមធ្យម ១៣០ ម៉ែត្រ និងបណ្ដោយ ១៥០ ម៉ែត្រជម្រៅចាប់ពី ២-៤ ម៉ែត្រដោយមានប្រព័ន្ធរំដោះទឹកភ្លៀងចាប់ពីបាតរណ្ដៅ ប្រព័ន្ធប្រមូលទឹកកខ្វក់ពីរណ្ដៅចាក់សំរាម និងបំពង់បញ្ចេញឧស្ម័នពុលផងដែរ។
លោកជំរុញឲ្យមានការតាមដាន និងវាយតម្លៃផែនការសកម្មភាពឲ្យបានគ្រប់ជ្រុងជ្រោយ ដើម្បីសម្រេចគោលដៅតាមការគ្រោងទុក។ លោកក៏បានណែនាំឲ្យសមាជិក សមាជិកានៃគណៈកម្មការគ្រប់គ្រងការងារអនុគម្រោងសាងសង់ទីលានចាក់សំរាម បង្កើនកិច្ចសហការឲ្យបានជិតស្និទ្ធពីគ្រប់ភាគីពាក់ព័ន្ធទាំងអស់ ទាំងផ្នែកហិរញ្ញវត្ថុ និងបច្ចេកទេស ដើម្បីធានាឲ្យគម្រោងដំណើរការទៅប្រកបដោយភាពរលូន។
លោក កឹម បូរី ថ្លែងថា៖ «រាជរដ្ឋាភិបាលបានសម្រេចបញ្ចេញកញ្ចប់ថវិការបស់យើងផ្ទាល់នេះ ដើម្បីលើកកម្ពស់សមត្ថភាពគ្រប់គ្រងសំរាម និងអនាម័យជូនប្រជាពលរដ្ឋ និងធ្វើឲ្យសុខុមាលភាពសាធារណៈ និងបរិស្ថានកាន់តែមានភាពប្រសើរឡើងក៏ជាការឆ្លើយតបទៅនឹងការរីកចម្រើនយ៉ាងឆាប់រហ័សនៅក្នុងខេត្តព្រះសីហនុ»។
លោក សរ កក្កដា អភិបាលស្រុកព្រៃនប់បានថ្លែងពីម្សិលមិញថា លោកគាំទ្រគម្រោងនេះដើម្បីធ្វើឲ្យកាន់តែប្រសើរឡើងនូវទីតាំងចាក់សំរាមប្រចាំខេត្តព្រះសីហនុ។ លោកថា បច្ចុប្បន្នសំរាមនៅស្រុកព្រៃនប់មានការថយចុះ ដោយសារមានរោងចក្រ និងសហគ្រាសមួយចំនួនបានព្យួរការងារមួយរយៈដោយបញ្ហាជំងឺកូវីដ ១៩ នេះ។
លោកថា៖ «ជាពិសេស ប្រជាពលរដ្ឋយើងភាគច្រើន គាត់មានការយល់ដឹងពីការវេចខ្ចប់សំរាមបានត្រឹមត្រូវដោយគាត់មិនបានបោះចោលរាយប៉ាយដូចកាលពីមុនទេ។ អាជ្ញាធរយើងតែងតែចុះផ្សព្វផ្សាយ អប់រំ អំពីរបៀបទុកដាក់ សំរាម និងផលប៉ះពាល់បរិស្ថានដោយការបោះចោលសំរាមគ្មានសណ្ដាប់ធ្នាប់។ ព្រោះសំរាមធ្វើឲ្យប៉ះពាល់បរិស្ថានខ្លាំងណាស់ បើយើងទុកដាក់វាមិនសមរម្យ»។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) នៅខេត្តព្រះសីហនុសាទរចំពោះគម្រោងសាងសង់ទីលានចាក់សំរាមនេះ។ លោកថា នៅខេត្តព្រះសីហនុសព្វថ្ងៃមិនទាន់បានរៀបចំឲ្យមានទីតាំងចាក់សំរាមឲ្យបានសមរម្យនៅឡើយ។ ពេលខ្លះពលរដ្ឋចោលសំរាមតាមផ្លូវជាហូរហែ ព្រោះក្រុមហ៊ុនប្រមូលសំរាមមានភាពយឺតយ៉ាវក្នុងការប្រមូលសំរាម។
លោកបន្តថា កន្លងមកការទុកដាក់សំរាមមិនទាន់រៀបចំឲ្យមានស្ដង់ដាល្អទេ ដោយពលរដ្ឋមួយចំនួនបានដាក់សំរាមលាយឡំគ្នាគ្មានការវេចខ្ចប់ត្រឹមត្រូវទៀតផង។ ដូច្នេះអាជ្ញាធរគួរតែមានវិធានការអប់រំ ផ្សព្វផ្សាយឲ្យទូលំទូលាយថែមទៀត ហើយក៏ត្រូវតែមានការចូលរួមពីពលរដ្ឋដែលជាអ្នកចោលសំរាមដែរ ដើម្បីឲ្យបរិស្ថានក្បែរៗផ្ទះ ឬបរិស្ថាននៅតំបន់មូលដ្ឋានគ្មានសំរាម។
លោកនិយាយថា៖ «បច្ចុប្បន្ននេះ បញ្ហាបរិស្ថាននៅខេត្តព្រះសីហនុ គឺមិនទាន់ចាត់ទុកថាល្អប្រសើរទេ ព្រោះកន្លែងខ្លះកំពុងធ្វើការអភិវឌ្ឍ អ៊ីចឹងចៀសមិនផុតពីការចោលសំរាមរឹង ឬសំរាមរាវនៅក្បែរៗបរិវេណហ្នឹងទេ។ ប៉ុន្ដែអ្វីដែលសំខាន់គឺយើងត្រូវតែចូលរួមទាំងអស់គ្នា។ បើមិនចូលរួមសម្អាតអនាម័យទេ ទោះមានក្រុមហ៊ុនប្រមូលសំរាម ១០ ក្រុមហ៊ុនទៀតក៏នៅតែមិនអាចប្រមូលសំរាមបានស្អាតល្អដែរ»៕