The Phnom Penh Post Search

Search form

Logo of Phnom Penh Post newspaper Phnom Penh Post - ការ​ឃោសនា​នៅ​ក្រុង​ប៉ោយប៉ែត​ផ្តល់​ប្រាក់​ដល់​ម៉ូតូ​ឌុប

ការ​ឃោសនា​នៅ​ក្រុង​ប៉ោយប៉ែត​ផ្តល់​ប្រាក់​ដល់​ម៉ូតូ​ឌុប

ការ​ឃោសនា​នៅ​ក្រុង​ប៉ោយប៉ែត​ផ្តល់​ប្រាក់​ដល់​ម៉ូតូ​ឌុប

130628_04
ក្បួនឃោសនាបោះឆ្នោត របស់គណបក្សប្រជាជន នៅក្រុងប៉ោយប៉ែត កាលពីម្សិលមិញ ហេង ជីវ័ន

បន្ទាយ​មាន​ជ័យៈ យុទ្ធនាការ​ឃោសនា​បោះឆ្នោត របស់​គណបក្ស​ប្រជាជន បាន​ប្រព្រឹត្ត​ឡើង​នៅ​ក្រុង​ប៉ោយប៉ែត ជាប់​ព្រំដែន​ខ្មែរ-ថៃ កាល​ពី​ម្សិលមិញ ព្រម​ជាមួយ​នឹង​ការ​ផ្តល់​ប្រាក់​ដល់​ក្បួន​ម៉ូតូ​រាប់​ពាន់ និង​ចម្ងល់​អំពី​អវត្តមាន​របស់​គណបក្ស​ប្រឆាំង​ដែល​ជា​គូ​ប្រជែង។

ជា​ការ​ចាប់​ផ្តើម​នៃ​យុទ្ធនាការ​ឃោសនា​ឆ្នាំ ២០១៣ សមាជិក និង​អ្នក​គាំទ្រ​គណបក្ស​ប្រជាជន​កម្ពុជា​ប្រហែល ៥០០០ នាក់ បាន​ដង្ហែ​ក្បួន​តាម​ផ្លូវ​មាន​រថយន្ត ដឹក​ទំនិញ ម៉ូតូ និង​ម៉ូតូ​កង់​បី ដោយ​គ្រវី​ទង់​ស្រែក​ឃោសនា​អំពី​គោល​នយោបាយ ព្រម​ទាំង​ចាក់​ចម្រៀង​ឃោសនា។

ការ​ស្រែក​និង​ការ​អបអរ​របស់​អ្នក​គាំទ្រ​គឺ​មាន​លក្ខណៈ​ខ្លាំង​ក្លា ប៉ុន្តែ​មិន​មែន​អ្នក​រាល់​គ្នា​ដែល​ចូល​រួម​ក្បួន​ដង្ហែ​កាល​ពី​ម្សិលមិញ​សុទ្ធ​តែ​ជា​អ្នក​ស្មោះ​ស្ម័គ្រ​ជាមួយ​គណបក្ស​ប្រជាជន​កម្ពុជា​ឡើយ។ នេះ​បើ​យោង​តាម​លោក អូសាលឧត្តម អ្នក​រត់​ម៉ូតូ​ឌុប។

ដោយ​មិន​បញ្ចេញ​ប្រាប់​ថា​តើ​គណបក្ស​មួយ​ណា​ដែល​លោក​នឹង​បោះឆ្នោត​ឲ្យ​នៅ​ថ្ងៃ​ទី២៨ ខែ​កក្កដា លោក​ឧត្តម បាន​ថ្លែង​ថា៖ «​គណបក្ស​ឲ្យ​អាហារ​ពេល​ព្រឹក និង​សាំង​ពីរ​លីត្រ​ដល់​ខ្ញុំ​ដើម្បី​ឲ្យ​ខ្ញុំ​មក​ទី​នេះ និង​ធ្វើ​ដំណើរ​ជាមួយ​នឹង​ពួកគេ។ ខ្ញុំ​ធ្លាប់​ជា​សកម្មជន​គណបក្ស​សម រង្ស៊ី​»។ «មនុស្ស​ជា​ច្រើន​នាក់​បាន​បង្ហាញ​ខ្លួន​នៅ​ថ្ងៃ​នេះ ប៉ុន្តែ​ការ​គាំទ្រ​ដែល​អ្នក​បាន​មើល​ឃើញ​នៅ​ទី​នេះ​សម្រាប់​គណបក្ស​ប្រជាជន​មិន​មែន​ជា​ការ​គាំទ្រ​ពិត​ប្រាកដ​ទេ។ ដល់​ថ្ងៃ​បោះឆ្នោត​ប្រជាជន​នឹង​ផ្លាស់​ប្តូរ»។

ទោះ​ជា​យ៉ាង​ណា លោក វ៉ា ជុំណារ៉េត សមាជិក​ក្រុម​ប្រឹក្សា​សង្កាត់​ប៉ោយប៉ែត និង​ជា​សមាជិក​គណបក្ស​កាន់​អំណាច បាន​បដិសេធ​ថា គ្មាន​អ្នក​ណា​ម្នាក់​ទទួល​បាន​ប្រាក់​ឬ​អំណោយ ដើម្បី​ចូល​រួម​ការ​ដង្ហែ​ឡើយ។

លោក​បាន​បន្ថែម​ថា៖ «ប្រជាជន​ដែល​បាន​ចូល​រួម​ការ​ដង្ហែ​គឺជា​អ្នក​ស្ម័គ្រ​ចិត្ត​។ ពី​សង្កាត់​ខ្ញុំ​តែ​មួយ​គត់ មាន​មនុស្ស ១៥០០ នាក់ បាន​និយាយ​មុន​ការ​ដង្ហែ​ថា ពួក​គេ​ចង់​មក​ហើយ​មនុស្ស​ច្រើន​ថែម​ទៀត​បាន​ចូល​រួម។ យើង​មិន​បាន​ផ្តល់​អ្វី​ដល់​ពួក​គេ​ទេ​។ ពួកគេ​រីករាយ​នឹង​ចូល​រួម​ដោយ​គ្មាន​ទាមទារ​អ្វី​ទេ»។

លោក ហី គីមសាំង ប្រធាន​គណៈ​កម្មាធិការ​រៀបចំ​ការ​បោះឆ្នោត​ខេត្ត បាន​ថ្លែង​ថា មនុស្ស​ជា​ច្រើន​នាក់​បាន​ដើរ​ដង្ហែ​ឲ្យ​គណបក្ស​កាន់​អំណាច ច្រើន​ជាង​គណបក្ស​ប្រឆាំង​។ «មាន​តែ​គណបក្ស​ប្រជាជន​ទេ​ដង្ហែ​កាត់​ផ្លូវ​ថ្ងៃ​នេះ។ គណបក្ស​សង្គ្រោះ​ជាតិ​និង​គណបក្ស​ហ៊្វុនស៊ិនប៉ិច​បាន​ប្រមូល​ផ្តុំ​នៅ​ការិយាល័យ​គណបក្ស​ដើម្បី​ចែក​រំលែក​គំនិត​គោល​នយោបាយ​និង​ផ្សព្វ​ផ្សាយ​សំឡេង​ជូន​សមាជិក​និង​អ្នក​គាំទ្រ​ស្តាប់»។

លោក វេង ចាន់ ដែល​អូស​រទេះ​អីវ៉ាន់​សម្រាប់​អ្នក​ដំណើរ​ឆ្លង​កាត់​ព្រំដែន បាន​ថ្លែង​ថា៖ «​ខ្ញុំ​មិន​ខ្វល់​អំពី​យុទ្ធនាការ​ឃោសនា​ទេ។ ខ្ញុំ​ត្រូវ​ផ្តោត​លើ​មុខ​របរ​របស់​ខ្ញុំ​ដើម្បី​រក​ចំណូល​ផ្គត់​ផ្គង់​គ្រួសារ​»។ លោក​បាន​ថ្លែង​បន្ត​ថា៖​«​ខ្ញុំ​ត្រូវ​ការ​ម្ហូប​អាហារ​ដើម្បី​រស់​ជា​មុន​សិន​។ បន្ទាប់​មក ខ្ញុំ​នឹង​គិត​ពី​ការ​បោះឆ្នោត»។

ក្បួន​ដង្ហែ​បាន​ធ្វើ​ដំណើរ​ជុំវិញ​ទីក្រុង​ប៉ោយប៉ែត អស់​រយៈ​ពេល​ប្រហែល ៤ ម៉ោង ដោយ​ចំណាយ​ពេល​ប្រហែល ៤៥ នាទី បើក​ជុំវិញ​រង្វង់​មូល​ក្បែរ​ផ្តុំ​កាស៊ីណូ​នៅ​ព្រំដែន​កម្ពុជា-ថៃ។ ១៥ នាទី​ក្នុង​ក្រុង​ហើយ​ក្បួន​ដង្ហែ​បាន​ចាក​ចេញ​ពី​ទី​នោះ នៅ​សល់​តែ​រូប​សញ្ញា​របស់​គណបក្ស​ប្រជាជន ដែល​ជា​ការ​រំឭក​ប្រាប់​អ្នក​ក្រុង​ប៉ោយប៉ែត​ថា ការ​បោះឆ្នោត​បាន​កំពុង​មក​ដល់​ហើយ៕

អត្ថបទគួរចាប់អារម្មណ៍