The Phnom Penh Post Search

Search form

Logo of Phnom Penh Post newspaper Phnom Penh Post - ការ​ដាច់​ភ្លើង​ញឹក​ញាប់​បង្ក​ការ​លំបាក​

ការ​ដាច់​ភ្លើង​ញឹក​ញាប់​បង្ក​ការ​លំបាក​

ការ​ដាច់​ភ្លើង​ញឹក​ញាប់​បង្ក​ការ​លំបាក​

130325_08
បុរសម្នាក់កំពុងរុញរទេះ នៅមុខអនុស្ថានីយទួលសង្កែ ហុង មិនា

ភ្នំពេញៈ ប្រជាពលរដ្ឋ​ជា​ច្រើន នៅ​តាម​តំបន់​មួយ​ចំនួន ក្នុង​រាជធានី បាន​រអ៊ូ​រទាំ ចំពោះ​ការ​ដាច់​ចរន្ត​អគ្គិសនី​ជា​ញឹក​ញាប់ ខណៈ​ដែល​អាកាស​ធាតុ មាន​សភាព​ក្តៅ​ហួត​ហែង និង​ស្អុះ​ស្អាប់​យ៉ាង​ខ្លាំង នៅ​ក្នុង​រដូវ​ប្រាំង​នេះ។

ប្រជាពលរដ្ឋ​នៅ​ភូមិ​បឹង​ឈូក សង្កាត់​គីឡូ​ម៉ែត្រ​លេខ ៦ ខណ្ឌ​ឫស្សី កែវ អ្នក​ស្រី គង់ សារិម អាយុ ៣២ ឆ្នាំ បាន​ឲ្យ​ដឹង​ថា ក្នុង​រយៈ​ពីរ​សប្តាហ៍​កន្លង​មក​នេះ អគ្គិសនី​បាន​ដាច់​ជា​ប្រចាំ​ នៅ​ចន្លោះ​ម៉ោង ៨:៣០ ​នាទី​ព្រឹក ដល់​ម៉ោង ១០:០០ ​ព្រឹក និង​ពេល​ល្ងាច បាន ដាច់​ចន្លោះ​ពី​ម៉ោង ៦:៣០​ ដល់​ម៉ោង ៩:៣0 យប់។ អ្នកស្រី​បន្ត​ថា៖​«ការ​ដាច់​ភ្លើង​អគ្គិសនី​យូរ​ម៉ោង​បែប​នេះ ​បាន​ធ្វើ​ឲ្យ​មាន​ផល​ប៉ះ​ពាល់​ដល់​សុខុមាល​ភាព​របស់​ក្មេងៗ​ពី​ព្រោះតែ​ បរិយា​កាស​ក្តៅ​ស្អុះ​ស្អាប់​ខ្លាំង​ណាស់»។

កញ្ញា​តាន់ លក្ខិណា អាយុ​ ២២ ឆ្នាំ អាជីវករ​លក់​បង្អែម​ និ​ងទឹក​ក្រឡុក នៅ​សង្កាត់ ច្រាំង​ចំរេះ ២ ខណ្ឌ​ឫស្សី​កែវ បាន​បន្ទរថា ការ​ដាច់​ភ្លើង​អគ្គិសនី ក្នុង​រយៈ​ពេល​ប៉ុន្មាន​សប្ដាហ៍​មក​នេះ បាន​ធ្វើ​ឲ្យ​ប៉ះ​ពាល់​ដល់ ប្រាក់​ចំណូល​ប្រចាំ​ថ្ងៃ​របស់​នាង​យ៉ាង​ខ្លាំង។ លក្ខិណា ​ថ្លែង​ថា៖​«កាល​ពី​មុន​ខ្ញុំ​លក់​មួយ​ថ្ងៃ​បាន​ជាង​ ១០ ​ម៉ឺន​រៀល ចំណេញ​បាន​១៥០០០ រៀល ប៉ុន្តែ​ចាប់​តាំង​​ពី​ដាច់​ភ្លើង​មួយ​រយៈ​ពេល​មក​នេះ ខ្ញុំ​លក់​បាន​ត្រឹម​តែ ៧-៨ ម៉ឺន​រៀល​ប៉ុណ្ណោះ»។

ការ​ដាច់​ចរន្ត​អគ្គិសនី មិន​គ្រាន់​តែ​ប៉ះពាល់​ដល់​មុខ​របរ​ទទួល​ទាន​ និង​ការ​រស់​នៅ​ប៉ុណ្ណោះ​ទេ វា​ក៏​ធ្វើ​ឲ្យ​​ប៉ះ​ពាល់​ដល់​ការងារ​ផ្សេង​ៗ​ផង​ដែរ។

លោក ទៀង ចន្ទខន្ថិ​សារ អធិការ​ខណ្ឌ​ឫស្សី​កែវ បាន​ថ្លែង​ថា​៖ «ការ​ដាច់​ចរន្ត​អគ្គិសនី​យូរម៉ោង​ញឹក​ញាប់​ បាន​ធ្វើ​ឲ្យ​ប្រព័ន្ធ​ការងារ មាន​ភាព​យឺត​យ៉ាវ និង​បង្ក​ឲ្យ​មាន​ក្ដី​បារម្ភ​ ពី​ប្រជា​ពលរដ្ឋ​ អំពី​សន្តិ​សុខ សុវត្ថិភាព​ ក្នុង​មូល​ដ្ឋាន»។

លោក​បន្ត​ថា ទោះ​ជា​បែបណា​ក្ដី ដើម្បី​ធានា​បាន​នូវ​សន្តិ​សុខ សុវត្ថិ​ភាព ជូន​ប្រជា​ពលរដ្ឋ​នៅ​តាម​មូល​ដ្ឋាន កម្លាំង​នគរបាល​របស់​លោក បាន​បង្កើន​ការ​ចុះ​ល្បាត​បន្ថែម នៅ​គ្រប់​តំបន់​ទី​ប្រជុំ​ជន និង​តំបន់​ជាយ​ក្រុង។

ប្រជាពលរដ្ឋ​នៅ​សង្កាត់ ភ្នំពេញ​ថ្មី ខណ្ឌ​សែន​សុខ លោក​ ប៉ែន សុខារី អាយុ ៤៥​ ឆ្នាំ បាន​ថ្លែង​ថា ថ្វី​បើ​មាន​ការ​បង្ក្រាប​អំពើ​ចោរ​កម្ម​ជា​បន្ត​បន្ទាប់​ក្ដី ប៉ុន្តែ​វា​នៅ​តែ​ជា​ក្ដី​ព្រួយ​កង្វល់ ខណៈ​ការដាច់​ចរន្ត​អគ្គិសនី​យូរ​ម៉ោង​នៅ​តែ​កើត​ឡើង​ជា​ញឹក​ញាប់។ លោក​ថ្លែង​ថា៖«​បើ​ការ​ដាច់​ភ្លើង​បែប​នេះ នៅ​តែ​បន្ត​អូស​បន្លាយ​ខ្ញុំ​បារម្ភ​ខ្លាច​ការ​កើត​មាន​នូវ​អំពើ​ចោរកម្ម ឆក់ ប្លន់ នៅ​តាម​ផ្លូវ​កាន់​តែ​ច្រើន​ឡើង»។

មិន​មែន​មាន​តែ​នៅ ខណ្ឌ​ឫស្សី​កែវ ឬ​ខណ្ឌ​សែន​សុខ​ប៉ុណ្ណោះ​ទេ ដែល​មាន​ការ​ដាច់​ចរន្ត​អគ្គិសនី​ញឹក​ញាប់ នៅ​ក្នុង​ខណ្ឌ​មាន​ជ័យ និង​ខណ្ឌ​ពោធិ៍​សែន​ជ័យ ក៏​មាន​ការ​ដាច់​ចរន្ត​អគ្គិសនី​ផង​ដែរ។

មន្ត្រី ​ជាន់​ខ្ពស់​អគ្គិសនី​កម្ពុជា​ម្នាក់​ ដែល​ស្នើ​សុំ​មិន​បញ្ចេញ​ឈ្មោះបាន​ឲ្យ​ដឹង​ថា ការ​ដាច់​ចរន្ត​អគ្គិសនី​ក្នុង​តំបន់​មួយ​ចំនួន​កន្លង​មកនេះ​ បណ្ដាល​មក​ពី​ការ​ជួស​ជុល​ និង​ផ្លាស់​ប្ដូរ​ត្រង់​ស្វូ (Transformer Motor) ឧបករណ៍​ដំឡើង​តង់​ស្យុង​អគ្គិសនី នៅ​អនុ​ស្ថានីយទួល​សង្កែ។

លោក​ថ្លែង​ថា ដោយ​ត្រង់​ស្វូទាំង​ពីរ នៅ​ក្នុង​អនុ​ស្ថានីយ៍​នេះ​ មាន​កម្លាំង​ត្រឹម​តែ ១០០ មេហ្គា​វ៉ាត់ ជាហេតុ ធ្វើ​ឲ្យ​ការ​ផ្គត់​ផ្គង់​អគ្គិសនី មិន​បាន​ឆ្លើយ​តប​តាម​តម្រូវ​ការ​របស់​អតិថិជន ដែល​បាន​កើន​ឡើង​ប្រមាណ​ ១៥ ភាគ​រយ​ក្នុង​មួយ​ឆ្នាំ​។ដើម្បី​ផ្ដល់​ការ​ផ្គត់​ផ្គង់​អគ្គិសនី​ តាម​តម្រូវ​ការ​របស់​អតិថិជន អគ្គិសនី​កម្ពុជា ​បាន​សម្រេច​ធ្វើ​ការ​ជួស​ជុល និង​ផ្លាស់​ប្ដូរ​ត្រង់​ស្វូ​ទាំង​ពីរ​នៅ​ក្នុង​អនុស្ថានីយ​នេះ ដែល​ត្រង់​ស្វូ​ថ្មី ត្រូវ​យក​មក​ដំឡើង​ជំនួស​ត្រង់​ស្វូ​ចាស់ មាន​កម្លាំង​រហូត​ដល់ ១៥០ ​មេហ្គា​វ៉ាត់។

លោក​បន្តថា​៖​«ការ​ផ្ដាច់​ ចរន្ត​អគ្គិសនី ក្នុង​តំបន់​មួយ គឺសម្រាប់​យក​ទៅ​ផ្គត់​ផ្គង់​ ដល់​អតិថិជន​ក្នុង​តំបន់​មួយ​ទៀត ហើយ​ការ​ផ្ដាច់​បែប​នេះ អាច​នឹង​អូស​បន្លាយដល់​ពាក់​កណ្ដាល​ខែ​ក្រោយ»៕​

អត្ថបទគួរចាប់អារម្មណ៍