ភ្នំពេញៈ មិនមានលទ្ធផលពីការប្រជុំកាលពីព្រឹកថ្ងៃពុធ ទី២៧ ខែ វិច្ឆិកា ដែលបានដឹកនាំការប្រជុំពិភាក្សាស្តីពីការដំឡើងប្រាក់ឈ្នួលអប្បបរមារបស់កម្មករនិយោជិតធ្វើការផ្នែកវាយនភ័ណ្ឌ កាត់ដេរសម្លៀកបំពាក់ និងស្បែកជើងទេ តែគេគ្រោងនឹងធ្វើការជួបប្រជុំគ្នាម្តងទៀតនៅថ្ងៃ ទី១៦ ធ្នូ ឆ្នាំ ២០១៣។
លោក សោម អូន ប្រធានក្រុមប្រឹក្សាសហជីពជាតិកម្ពុជាបានមានប្រសាសន៍ក្រោយការ ប្រជុំនៅក្រសួង ការងារ កាលពីថ្ងៃពុធម្សិលមិញថា លទ្ធផលនៃការប្រជុំថ្ងៃនេះមិនទាន់មានការសម្រេចអ្វីនោះទេ ប៉ុន្តែក្រុមការងារបានបង្កើតផែនការរួមមួយសម្រាប់ធ្វើការជួបគ្នាម្តងទៀតនៅខែក្រោយនេះ។
លោកបានមានប្រសាសន៍ថា៖ «យើងបានសម្រេចបង្កើតលេខាធិកាដ្ឋានមួយដែលមានសមាសភាពចម្រុះ ដើម្បីធ្វើផែនការរួមមួយ។ នៅថ្ងៃនេះផងដែរ អនុគណៈកម្មការទាំង ៤ បានរាយការណ៍ អំពីលទ្ធផលដែលបានធ្វើការស្រាវជ្រាវរកឃើញ។ ដូចនេះយើងនឹងបូកសរុបរបាយការណ៍មួយនៃលទ្ធផលរបស់អនុគណៈកម្មការទាំង ៤ នេះ»។
លោកបានបន្តទៀតថា ចំណុចមួយទៀតគឺការដាក់រូបមន្តបីដើម្បីធ្វើការជ្រើសរើសធ្វើការដំឡើង ៥ ឆ្នាំម្តងដោយគិតជាភាគរយថាតើមួយឆ្នាំត្រូវប៉ុន្មាន ភាគរយ ពីឆ្នាំ ២០១៤ ដល់ឆ្នាំ ២០១៨ ឬដំឡើងដោយកំណត់ឆ្នាំចុងក្រោយក្នុងការដំឡើង។
លោក សោម អូន បានថ្លែងថា៖ «នៅថ្ងៃ ទី១៦ ខែក្រោយនេះ យើងនឹងមានទិន្នន័យច្បាស់ថាតើយើងគួរសុំដំឡើងប៉ុន្មានហើយ បន្ទាប់ពីលេខាធិការដ្ឋានសរុបរបាយការណ៍របស់គណៈកម្មការទាំង ៤ ដែលបានស្រាវជ្រាវរកឃើញ»។
ការប្រជុំពិភាក្សាលើកដំបូងពីការដំឡើងប្រាក់ឈ្នួលនេះមានការចូលរួមពីអនុគណៈកម្មការទាំង ៤ ជាគណៈកម្មការចម្រុះដែលមានខាងនិយោជក សហជីព និងក្រសួង ការងារ។
លោក សោម អូន ប្រធានក្រុមប្រឹក្សាសហជីពជាតិកម្ពុជាបានគូសបញ្ជាក់បន្ថែមឲ្យដឹង ទៀតថា ជាផែនការរបស់គណៈកម្មការនេះគឺត្រូវតែបញ្ចប់ការងារនេះយ៉ាងយូរបំផុតនៅក្នុងខែ ធ្នូ ខាងមុខនេះ ហើយចាប់ផ្តើមអនុវត្តនៅដើមឆ្នាំ ២០១៤ តែម្តង។
សូមបញ្ជាក់ថា គណៈកម្មការទាំង ៤ មានក្រុមការងារស្រាវជ្រាវទៅលើតម្លៃពិតនៃការផលិតរបស់និយោជកក្រុមការងារស្រាវជ្រាវទៅលើការចំណាយក្នុងការទ្រទ្រង់ជីវភាព ប្រចាំថ្ងៃរបស់កម្មករក្រុមស្រាវជ្រាវទៅលើប្រាក់ចំណាយ និង ទី៤ ក្រុមស្រាវជ្រាវទៅលើលក្ខណសម្បត្តិ ព្រមទាំងគុណភាពការងាររបស់កម្មករ។
ទោះជាយ៉ាងណាក៏ដោយក៏ លោក វង្ស សុវណ្ណ អគ្គលេខាធិការរងគណៈកម្មាធិការដោះស្រាយបញ្ហាបាតុកម្ម កូដកម្មគ្រប់រូបភាពនៃក្រសួង ការងារ បាននិយាយប្រាប់អ្នកសារព័ត៌មានកាលពីថ្ងៃម្សិលមិញថា ការសម្រេចដំឡើងប្រាក់ឈ្នួលកម្មករមិនទាន់បានចេញជារូបរាងនៅឡើយទេ។
ទោះជាយ៉ាងណាក៏ដោយលោក វង្ស សុវណ្ណ ក៏បានថ្លែងបន្ថែមឲ្យដឹងទៀតថា៖ «លោករដ្ឋមន្រ្តីនឹងប្រមូលរបាយការណ៍ដែលអនុគណៈកម្មការទាំង ៤ បានធ្វើការស្រាវជ្រាវយកទៅ ធ្វើការពិនិត្យ ហើយខ្ញុំក៏មិនទាន់ហ៊ាននិយាយថានឹងដំឡើងប៉ុន្មាននោះដែរ»៕
