ភ្នំពេញៈ ក្រុមអ្នកជំនាញផ្នែកចិត្តសាស្ត្របានរកឃើញថា ក្នុងចំណោមអ្នកធ្វើអត្តឃាតនៅកម្ពុជា ភាគច្រើនគឺជាយុវជនដែលជួបប្រទះនូវបញ្ហាផ្លូវចិត្ត ដោយសារកត្តាជីវភាពក្រីក្រ ការសេពគ្រឿងញៀន ស្នេហា និងបញ្ហាសុខភាព។
ការរកឃើញនេះ ត្រូវបានបង្ហាញកាលពីម្សិលមិញ ក្នុងសិក្ខាសាលា ស្តីពីសុខភាពផ្លូវចិត្តនិងការស្តែងចេញពីការធ្វើអត្តឃាត ក្នុងចំណោមយុវវ័យនៅកម្ពុជា នៅក្នុងទិវាបង្ការការធ្វើអត្តឃាតពិភពលោក។
លោក អ៊ុក គង់ សមាជិកគណៈកម្មការសិទ្ធិមនុស្ស និងទទួលពាក្យបណ្តឹងនៃព្រឹទ្ធសភា ថ្លែងក្នុងសិក្ខាសាលានេះថា ការធ្វើអត្តឃាតនៅក្នុងចំណោមយុវជន ជាបញ្ហាប្រឈមមួយសម្រាប់កម្ពុជា និងជាបញ្ហាសុខភាពសាធារណៈនៃសកលលោកមួយ ដែលក្រុមអ្នកជំនាញបាននិងកំពុងស្វែងរកវិធីសាស្រ្ត ដើម្បីបង្ការ និងផ្តល់ការយល់ដឹងបន្ថែមលើបញ្ហានេះ។ លោកបន្តថា ការធ្វើអត្តឃាតនៅកម្ពុជា បានកើតឡើងចំពោះយុវជនមានអាយុក្រោម ២៥ ឆ្នាំ។
លោកវេជ្ជបណ្ឌិត កៅ សម្បត្តិ នាយកប្រតិបត្តិនៃមជ្ឈមណ្ឌលសម្រាប់សុខភាពផ្លូវចិត្តកុមារនិងយុវជន នៃអង្គការ ការីតាស បានឲ្យដឹងតាមរយៈការសិក្សារបស់អង្គការនេះថា ការបាក់ទឹកចិត្ត គឺជាកត្តាគន្លឹះមួយដែលនាំចិត្តមនុស្សឈានទៅដល់ការសម្រេចចិត្តធ្វើអត្តឃាត។
លោកបន្តថា ការបាក់ទឹកចិត្តនេះ កើតឡើងដោយកត្តាពីរសំខាន់គឺ ទី១. អារម្មណ៍ក្នុងខ្លួនមនុស្ស ដែលមិនទទួលបានការលើកទឹកចិត្ត ទី២.មជ្ឈដ្ឋានសង្គមទាក់ទងនឹងបញ្ហាសេដ្ឋកិច្ច ភាពក្រីក្រនិងការផ្លាស់ប្តូរលឿនពេក។
លោក កៅ សម្បត្តិ លើកឡើងថា តាមរយៈការសិក្សាក្នុងសហគមន៍បានរកឃើញថា ក្នុងចំណោម ២ ពាន់គ្រួសារ អាចមានអ្នកធ្វើអត្តឃាតចំនួន ៦ នាក់ ហើយ ២ ភាគ ៣ នៃការសម្លាប់ខ្លួននេះគឺកើតឡើងមកពីបញ្ហាផ្លូវចិត្ត។ តែទោះជាយ៉ាងណាលោកថា អត្រានៃអត្តឃាតជាក់លាក់កើតឡើងលើយុវជននិងប្រជាពលរដ្ឋទូទៅ នៅកម្ពុជា មិនទាន់ត្រូវបានកំណត់ជាក់លាក់នៅឡើយទេ។
តាមរយៈរបាយការណ៍របស់អង្គការសុខភាពពិភពលោកថ្មីៗនេះ បានបង្ហាញថា ជារៀងរាល់ឆ្នាំ មានមនុស្សចំនួន ៨ សែននាក់ បានទទួលមរណភាពនៅក្រោមមូលហេតុនៃការធ្វើអត្តឃាត ដែលពួកគេទាំងនោះមានអាយុចន្លោះពី ១៥ ទៅដល់ ២៩ ឆ្នាំ៕
