The Phnom Penh Post Search

Search form




Logo of Phnom Penh Post newspaper Phnom Penh Post - ការ​ផាក​ពិន័យ​អ្នក​បើកបរ​គ្មាន​វិក្កយបត្រ​ជា​អំពើ​ពុករលួយ

ការ​ផាក​ពិន័យ​អ្នក​បើកបរ​គ្មាន​វិក្កយបត្រ​ជា​អំពើ​ពុករលួយ

ការ​ផាក​ពិន័យ​អ្នក​បើកបរ​គ្មាន​វិក្កយបត្រ​ជា​អំពើ​ពុករលួយ

ភ្នំពេញៈ អង្គភាព​ប្រឆាំង​អំពើ​ពុករលួយ​បាន​ចេញ​សេចក្តី​ប្រកាស​មួយ​ថា ការ​ផាក​ពិន័យ​ទៅ​លើ​អ្នក​បើកបរ​ល្មើស​ច្បាប់​ចរាចរណ៍ ដោយ​មិន​មាន​វិក្កយបត្រ​ដែល​ធ្វើ​ឡើង​ដោយ​ប៉ូលិស​ចរាចរណ៍ គឺជា​ការ​ប្រព្រឹត្ត​អំពើ​ពុករលួយ។

ភ្នំពេញ ប៉ុស្តិ៍ បាន​ទទួល​សេចក្តី​ប្រកាស ដែល​ចេញ​ផ្សាយ​ដោយ​អង្គភាព​ប្រឆាំង​អំពើ​ពុករលួយ ដែល​ថា អង្គភាព​នេះ​បាន​ទទួល​លិខិត​ពី​អ្នក​បើក​បរ ដែល​ភ្ញាក់​ផ្អើល បន្ទាប់​ពី​ត្រូវ​នគរបាល​ផាក​ពិន័យ​ដោយ​គ្មាន​វិក្កយបត្រ។

សេចក្តី​ប្រកាស​បាន​ឲ្យ​ដឹង​ថា៖ «វា​ជា​អំពើ​ពុករលួយ​។ ពាក់​ព័ន្ធ​នឹង​ករណី​នេះ អង្គភាព​ប្រឆាំង​អំពើ​ពុករលួយ​បាន​បញ្ជា​នគរបាល​ចរាចរ​ទាំង​អស់ ឲ្យ​ប្រគល់​បង្កាន់​ដៃ​ដល់​អ្នក​បើកបរ ដែល​រំលោភ​ច្បាប់​ចរាចរណ៍»។

លោក គឹម វីដេត អនុ​ប្រធាន​នៃ​នាយកដ្ឋាន​សណ្តាប់ធ្នាប់​សាធារណៈ នៅ​ក្រសួង​មហា​ផ្ទៃ បាន​ថ្លែង​ថា បើ​ទោះ​បី​ជា​មាន​ការ​ខិត​ខំ​ប្រឹង​ប្រែង​ដើម្បី​កុំ​ឲ្យ​នគរបាល​ចរាចរ​រំលោភ​ច្បាប់​ក៏​ដោយ ក៏​ប៉ុន្តែ​នគរបាល​មួយ​ចំនួន​នៅ​តែ​យក​ប្រាក់​ពី​អ្នក​បើក​បរ ដោយ​មិន​ផ្តល់​ឯកសារ​ត្រឹម​ត្រូវ​សម្រាប់​ការ​បង់​ប្រាក់​ពិន័យ​នោះ។​

លោក​បន្ថែម​ថា៖ «​យើង​មាន​ក្រុម​ដើម្បី​តាម​ដាន​នគរបាល​ចរាចរ​ហើយ​ប្រសិន​បើ​យើង​រក​ឃើញ​ថា ពួកគេ​រំលោភ​ច្បាប់​ចរាចរណ៍ យើង​នឹង​ផ្តន្ទាទោស ឬ​បញ្ឈប់​ពួក​គេ​។ នគរបាល​ចរាចរ​ពីរ​នាក់​ត្រូវ​បាន​បញ្ឈប់​រួច​ហើយ ដោយ​សារ​បាន​ប្រព្រឹត្ត​កំហុស​នោះ​»។

លោក វីដេត បាន​បន្ថែម​ថា សេចក្តី​ប្រកាស​របស់​អង្គភាព​ប្រឆាំង​អំពើ​ពុករលួយ​អាច​ជួយ​ដាក់​ពិន័យ​អ្នក​ទាំង​ឡាយ​ដែល​មិន​គោរព​ច្បាប់​ចរាចរណ៍ ហើយ​លើក​ទឹក​ចិត្ត​អ្នក​បើក​បរ ដែល​ត្រូវ​គេ​ពិន័យ​ដោយ​គ្មាន​ទទួល​បាន​បង្កាន់​ដៃ​នោះ​រាយការណ៍​ករណី​របស់​ពួកគេ ទៅ​ក្រសួង​ដើម្បី​ស៊ើប​អង្កេត​បន្ថែម​ទៀត៕ TK

អត្ថបទគួរចាប់អារម្មណ៍