The Phnom Penh Post Search

Search form




Logo of Phnom Penh Post newspaper Phnom Penh Post - ការ​រស់​នៅ​និង​សុខភាព​អតីត​មេ​ខ្មែរ​ក្រហម ល្អ

ការ​រស់​នៅ​និង​សុខភាព​អតីត​មេ​ខ្មែរ​ក្រហម ល្អ

ការ​រស់​នៅ​និង​សុខភាព​អតីត​មេ​ខ្មែរ​ក្រហម ល្អ

20140403_08
លោក ខៀវ សំផន នៅក្នុងសវនាការកន្លងមក អ.វ.ត.ក

ភ្នំពេញៈ នៅ​មន្ទីរ​ឃុំឃាំង​អង្គ​ជំនុំ​ជម្រះ​វិសាមញ្ញ​ក្នុង​តុលាការ កម្ពុជា លោក នួន ជា អតីត​មេ​ដឹក​នាំ​ខ្មែរ​ក្រហម បាន​ចូល​សម្រាក​ពេល​ព្រលប់​ដោយ​ពេល​ខ្លះ មុន​ម៉ោង ៩ យប់ ហើយ​ម្ហូប​អាហារ​របស់​គាត់​មាន​តៅហ៊ូ​ជា​ប្រចាំ។

លោក ខៀវ សំផន សហជន​ត្រូវ​ចោទ​និង​ជា​អតីត​ប្រមុខ​រដ្ឋ​ក្នុង​របប​ខ្មែរ​ក្រហម​ពី ឆ្នាំ​១៩៧៥ ដល់ ១៩៧៩ ដែល​មនុស្ស​ចំនួន​ជិត ២ លាន​នាក់​បាន​ស្លាប់​ក្រោម​របប​នេះ កំពុង​និពន្ធ​សៀវភៅ​អំពី​សម័យ​ក្រោយ​របប​ខ្មែរ​ក្រហម។ ពេល​ធ្វើ​ការ​ចប់ ម្តង​ម្កាល លោក​បាន​ធាក់​កង់​កីឡា​ដែល​នៅ​ស្ងៀម។

សេចក្តី​លម្អិត​អំពី​ជីវិត​រស់​នៅ​ប្រចាំ​ថ្ងៃ​របស់​បុរស​អាយុ ៨០ ឆ្នាំ​ប្លាយ​ទាំង​ពីរ​រូប​នេះ​ត្រូវ​បាន​សរសេរ​ក្នុង​របាយ​ការណ៍​វាយតម្លៃ ដែល​បាន​ធ្វើ​ឡើង​កាល​ពី​ចុង​ខែ​មុន ហើយ​ដែល ភ្នំពេញ ប៉ុស្តិ៍ ទទួល​បាន​នៅ​សប្តាហ៍​នេះ។ បុរស​ទាំង​ពីរ​នេះ​ត្រូវ​បាន​ចាត់​ទុក​ថា មាន​សម្បទា​គ្រប់​គ្រាន់​ដើម្បី​ទទួល​ការ​ជំនុំ​ជម្រះ ប៉ុន្តែ​នេះ​មិន​មែន​ជា​រឿង​គួរ​ឲ្យ​ភ្ញាក់​ផ្អើល​ខ្លាំង​ទេ។

សុខភាព​របស់​លោក នួន ជា ហាក់​ដូចជា​ល្អ​ប្រសើរ​ឡើង ចំណែង​ឯ​សុខភាព​ផ្លូវ​ចិត្ត​របស់​លោក ខៀវ សំផន គឺ​ល្អ​ណាស់ សម្រាប់​បុរស​អាយុ ៨៣​ឆ្នាំ ដូច​រូប​គាត់។ របាយ​ការណ៍​ចុង​ក្រោយ​នេះ ដែល​សរសេរ​ពាក្យ​ថា «ការ​សម្ងាត់​ដាច់​ខាត» បាន​បញ្ចប់​ការ​ធ្វើ​តេស្ត​រយៈ​ពេល ២​ថ្ងៃ កាល​ពី​សប្តាហ៍​មុន​លើ​លោក នួន ជា អាយុ ៨៧​ឆ្នាំ និង​លោក ខៀវ សំផន អាយុ ៨៣ ឆ្នាំ ដែល​ជា​ញឹកញាប់​អះអាង​ថា លោក​គ្រាន់​តែ​ជា​ប្រមុខ​រដ្ឋ ក្នុង​អំឡុង​របប​ខ្មែរ​ក្រហម​ប៉ុណ្ណោះ។ អ្នក​ទាំង​ពីរ​បាន​ច្រាន​ចោល​ការ​ចោទ​ប្រកាន់​មក​លើ​ពួក​គាត់ នៅ​សាលា​ក្តី​ខ្មែរ​ក្រហម​នេះ។

អង្គ​ជំនុំ​ជម្រះ​នៃ​សាលា​ដំបូង​បាន​បង្គាប់​ឲ្យ​ធ្វើ​ការ​វាយតម្លៃ​រូប​កាយ និង​ផ្លូវ​ចិត្ត ដើម្បី​កំណត់​ថា តើ​ជន​ជាប់​ចោទ​វ័យ​ចំណាស់​ទាំង​ពីរ​រូប​នេះ​មាន​សម្បទាន​គ្រប់​គ្រាន់​ដើម្បី​ទទួល​ការ​ជំនុំ​ជម្រះ​ដែរ​ទេ​ខណៈ​ដែល​សំណុំ​រឿង ០០២ របស់​តុលាការ​បាន​ឈាន​ចូល​ក្នុង​រឿង​ក្តី ០០២/០២។ រហូត​មក​ដល់​ពេល​នេះ​សេចក្តី​សម្រេច​របស់​តុលាការ ក្នុង​ការ​បំបែក​សំណុំ​រឿង ០០២ ជា​រឿង​ក្តី​តូចៗ​ដោយ​សារ​តែ​ភ័យ​ខ្លាច​ថា អាយុ និង​សុខភាព​របស់​ជន​ជាប់​ចោទ​មិន​អាច​ចូល​រួម​ក្នុង​ការ​ជំនុំ​ជម្រះ​រយៈ​ពេល​វែង​លើ​បទ​ចោទ​ទាំង​អស់​នោះ​បាន​ទេ មាន​តែ​រឿង​ក្តី ០០២/០១ ប៉ុណ្ណោះ​ត្រូវ​បាន​បញ្ចប់ ហើយ​សាល​ក្រម​គ្រោង​នឹង​ប្រកាស​នៅ ខែ​មិថុនា។

ដោយ​សារ​តែ​អាយុ​របស់​អតីត​មេ​ដឹក​នាំ​ខ្មែរ​ក្រហម​រូប​នេះ បញ្ហា​សុខភាព​ជា​ក្តី​កង្វល់​ជាក់​ស្តែង។ លោក​ស្រី អៀង ធីរិទ្ធ អតីត​រដ្ឋ​មន្រ្តី​ក្រសួង សង្គមកិច្ច ត្រូវ​បាន​ដោះលែង​ឲ្យ​មាន​សេរីភាព ដោយ​សារ​តែ​មូលហេតុ​សុខភាព​ផ្លូវ​ចិត្ត​កាល​ពី​ចុង ឆ្នាំ​២០១២។ ប្តី​របស់​លោក​ស្រី គឺ​លោក អៀង សារី អតីត​រដ្ឋ​មន្រ្តី​ក្រសួង ការ​បរទេស បាន​ស្លាប់​កាល​ពី​ឆ្នាំ​មុន​នៅ​សល់​តែ​លោក នួន ជា និង លោក ខៀវ សំផន ប៉ុណ្ណោះ។

វេជ្ជបណ្ឌិត​បាន​បញ្ចប់​ការ​វាយតម្លៃ​កាល​ពី​ថ្ងៃ ទី​២៤ និង ២៥ ខែ​មីនា ក្នុង​រយៈ​ពេល​ស្ងប់​ស្ងាត់​មួយ​ពេល​ជន​ជាប់​ចោទ​ទាំង​ពីរ​មាន​ពេលវេលា​ខ្លួន​ឯង​ក្នុង​ចន្លោះ​សាលក្រម​ក្នុង​រឿង​ក្តី​ទី ១ និង​ដំណាក់កាល​បន្ទាប់​នៃ​សំណុំ​រឿង ០០២ នេះ។

យោង​តាម​របាយ​ការណ៍​បាន​ឲ្យ​ដឹង​ថា លោក នួន ជា លែង​ត្អូញ​ត្អែរ​ពី​បញ្ហា​ពិបាក​ដក​ដង្ហើម​ទៀត​ហើយ បើ​ទោះ​បី​ជា​គាត់​ឈឺ​ខ្នង​និង​ក​ជើង​ស្តាំ​ក៏​ដោយ។ គាត់​អាច​ប្រើ​ឈើ​ច្រត់​ទប់​ដើរ។ បញ្ហា​ជាច្រើន​របស់​គាត់ ដូចជា ចលនា​សន្លាក់​រឹង និង​យឺត​យ៉ាវ គឺ​ស្រប​តាម​វ័យ​របស់​គាត់។ បន្ទាប់​ពី​ការ​វះកាត់​ភ្នែក​គាត់​អាច​អាន​កាសែត​បាន ដោយ​ពាក់​វ៉ែនតា។

វេជ្ជបណ្ឌិត​បាន​បញ្ជាក់​ថា គេ​ដឹក​ជញ្ជូន​លោក នួន ជា ទៅ​តុលាការ​តាម​កៅអី​រុញ ហើយ​ការ​ប្រើ​ប្រាស់​ប្រព័ន្ធ​សោតទស្សន៍​ពី​បន្ទប់​ឃុំ​ខ្លួន ពុំ​ត្រូវ​ការ​ទេ។ ពេល​វេជ្ជបណ្ឌិត​បាន​ជួប​លោក ខៀវ សំផន ដែល​ត្រូវ​បាន​រៀប​រាប់​ថា មាន​សុខភាព​ល្អ គាត់​កំពុង​តែ​ប្រើ​កុំព្យូទ័រ។ គាត់​ហាត់​ប្រាណ​ជិះ​កង់ នៅ​ក្នុង​បន្ទប់​ឃុំ​ខ្លួន។ ពី​ម៉ោង ៩ ព្រឹក ដល់​ថ្ងៃ​ត្រង់ គាត់​បរិភោគ​បាយ​ថ្ងៃ​ត្រង់​ចាប់ផ្តើម​ធ្វើការ​វិញ​នៅ​ម៉ោង ១។ បី​ម៉ោង​ក្រោយ​មក គាត់​សម្រាក ហើយ​នៅ​ម៉ោង ៦ យប់ គាត់​ហាត់​ប្រាណ។ គាត់​បាន​រាយការណ៍​ថា គាត់​អាច​ដេក​បាន​យ៉ាង​ស្រួល។

វេជ្ជបណ្ឌិត​សរសេរ​ថា៖ «គាត់​បាន​អាន​សៀវភៅ​ចំណង​ជើង​ថា Brother Enemy: The War after the War ហើយ​បាន​និយាយ​ថា គាត់​កំពុង​សរសេរ​បង្ហាញ​ពី​ព័ត៌មាន​ខុស​ក្នុង​សៀវភៅ​នេះ» ដែល​និពន្ធ​ដោយ Nayan Chanda។ ទោះ​បី​ជា​មាន​លក្ខណៈ​វិជ្ជមាន​ច្រើន​ក៏​ដោយ ក៏​របាយ​ការណ៍​នេះ​បាន​រៀបរាប់​ការ​ធ្លាក់​ចុះ​នៃ​សុខភាព​ជាច្រើន​ផង​ដែរ។ លោក នួន ជា រញីរញ័រ ហើយ​ងាយ​នឹង​បាត់​បង់​មុខ​ងារ​នៃ​រាង​កាយ។ ជំនួយការ​ម្នាក់​បាន​ជួយ​គាត់​ឲ្យ​អង្គុយ​លើ​គ្រែ។ វេជ្ជបណ្ឌិត​ណែនាំ​ឲ្យ​បន្ត​ការ​ព្យាបាល​រូប​កាយ។

លោក នួន ជា អាច​ចង​ចាំ​មុខ​របរ​ម្តាយ (អ្នក​កាត់ដេរ) ប៉ុន្តែ គាត់​ភ្លេច​យូរៗ​ម្តង អំពី​អ្វី​ដែល​លោក​បាន​បរិភោគ​ពេល​ព្រឹក។ ដូច​គ្នា​ដែរ លោក ខៀវ សំផន ចង​ចាំ​ប្រធាន​បទ​និក្ខេបបទ ពេល​គាត់​សិក្សា​នៅ បារាំង ប៉ុន្តែ​មិន​អាច​ចង​ចាំ​អ្វី​ដែល​គាត់​បាន​ធ្វើ​កាល​ពី​សប្តាហ៍​មុន ឬ​មួយ​ថ្ងៃ​មុន​ទេ។ វេជ្ជបណ្ឌិត​បាន​ថ្លែង​ថា គាត់​មាន​ហានិភ័យ​កើត​ជំងឺ​ដាច់​សរសៃ​ឈាម​ក្នុង​ខួរ​ក្បាល​ព្រោះ​គាត់​បាន​កើត​ជំងឺ​នេះ​ម្តង​កន្លង​មក៕ TK

អត្ថបទគួរចាប់អារម្មណ៍