The Phnom Penh Post Search

Search form




Logo of Phnom Penh Post newspaper Phnom Penh Post - ការ​វះកាត់​ឲ្យ​ជា​សះស្បើយ​បែរ​ជា​ធ្វើ​ឲ្យ​ប្តី​ប្រពន្ធ​មួយ​គូ​កើត​ទុក្ខ

ការ​វះកាត់​ឲ្យ​ជា​សះស្បើយ​បែរ​ជា​ធ្វើ​ឲ្យ​ប្តី​ប្រពន្ធ​មួយ​គូ​កើត​ទុក្ខ

ការ​វះកាត់​ឲ្យ​ជា​សះស្បើយ​បែរ​ជា​ធ្វើ​ឲ្យ​ប្តី​ប្រពន្ធ​មួយ​គូ​កើត​ទុក្ខ

140120_07
លោកទើម ហ៊ុន កំពុងដេកលើគ្រែមន្ទីរពេទ្យខណៈប្រពន្ធកំពុងអង្គុយកើតទុក្ខ គាំ ច័ន្ទរស្មី

ភ្នំពេញៈ បន្ទាប់​ពី​ស្វាមី​របស់​អ្នក​ស្រី បាន​ចាប់​ផ្តើម​ឈឺ​ពោះ​ខ្លាំង​កាល​ពី​រសៀល​ថ្ងៃ ទី១៧ ខែ ធ្នូ អ្នក​ស្រី ភុន ភី មាន​ការ​ភិតភ័យ នៅ​ពេល​ដែល​គាត់ បាន​ចាប់ផ្តើម​ក្អួត​ធ្លាក់​ឈាម​ប្រមាណ ១២ ម៉ោង​ក្រោយ​មក​ទៀត។ ប៉ុន្តែ​សុបិន​អាក្រក់​នេះ ទើប​តែ​ចាប់​ផ្តើម​ប៉ុណ្ណោះ។

បន្ទាប់​ពី​ទទួល​បាន​ការ​វះកាត់​បន្ទាន់ នៅ​គ្លីនិក Polyclinic Hong En នៅ​រាជធានី​ភ្នំពេញ។ លោក ទើម ហ៊ុន វ័យ ៤៩ឆ្នាំ ត្រូវ​បាន​គេ​ប្រាប់​ថា រោងចក្រ​ស្ករស​នៅ​ខេត្ត កំពង់ស្ពឺ ឈ្មោះ Great Field (Cambodia) International Ltd ដែល​លោក ហ៊ុន និង​ភរិយា បាន​រស់​នៅ និង​ធ្វើ​ការ​មិន​បាន​បង់​ថ្លៃ​ព្យាបាល​ទាំង​អស់ ហើយ​ថា គាត់​មិន​អាច​ចាក​ចេញ​ពី​គ្លីនិក​បាន​ទេ​ទាល់​តែ​គាត់​បង់​ប្រាក់​ដែល​នៅ សេសសល់​ចំនួន ២ ពាន់​ដុល្លារ​ជា​មុន​សិន។ គាត់​ត្រូវ​បាន​ឃុំ​ខ្លួន​ដោយ​បុគ្គលិក​គ្លីនិក​ជិត ១ ខែ។

អង្គុយ​នៅ​ក្បែរ​ស្វាមី ដែល​មាន​រំបង់​របួស ហើយ​យក​ដៃ​ជូត​ទឹក​ភ្នែក​ផង អ្នក​ស្រី ភី បាន​ថ្លែង​ថា៖ «ប្រសិន​បើ​ខ្ញុំ ចង់​យក​គាត់​ចេញ​ពី​មន្ទីរពេទ្យ ខ្ញុំ ត្រូវ​បង់​លុយ​ចំនួន ២ ពាន់​ដុល្លារ។ ខ្ញុំ​មិន​ដែល​មាន​លុយ​ច្រើន​បែប​នេះ​ទេ​ក្នុង​មួយ​ជីវិត​របស់​ខ្ញុំ»។

លោក ហ៊ុន បាន​បញ្ជាក់​ថា មុន​ពេល​គ្រូ​ពេទ្យ​នៅ​រោងចក្រ Great Field បាន​បញ្ជូន​លោក ទៅ​គ្លីនិក Hong En ដើម្បី​ព្យាបាល លោក ហ៊ុន បាន​ប្រាប់​គាត់ និង​អ្នក​គ្រប់​គ្រង​រោងចក្រ​ថា គាត់​មិន​មាន​លុយ​សម្រាប់​ការ​ព្យាបាល​ទេ។ លោក ហ៊ុន បាន​បន្ត​ថា នាយក​គ្រប់​គ្រង​រោងចក្រ Great Field បាន​ធានា​ថា ក្រុមហ៊ុន​នឹង​ចំណាយ​ការ​ព្យាបាល។ លោក​អះអាង​បន្ថែម​ថា៖ «ខ្ញុំ បាន​ប្រាប់​ពួក​គេ​ហើយ​ថា ខ្ញុំ មិន​មាន​លុយ​ទេ។ ពួក​គេ និយាយ​ថា ទៅ​ព្យាបាល​ទៅ។ អ្នក​មិន​ចាំ​បាច់​បារម្ភ​អំពី​រឿង​នោះ​ទេ។ យើង​នឹង​រ៉ាប់​រង​វា»។

ប្រធាន​មន្ទីរពេទ្យ​លោក Chen Xin Hua ថ្លែង​ថា នាយក​ក្រុមហ៊ុន​បាន​តម្កល់​ប្រាក់​កក់ ៨០០ ដុល្លារ មុន​គ្រូ​ពេទ្យ​វះកាត់។ មន្ទីរពេទ្យ​បាន​បញ្ចុះ​តម្លៃ​ពី ៥ ពាន់​ដុល្លារ ដោយ​យក​តែ ២ ពាន់​ដុល្លារ ប៉ុន្តែ​ពួក​គេ មិន​ទាន់​ទទួល​បាន​ប្រាក់​ដែល​ជំពាក់​នៅ​ឡើយ​ទេ។ លោក Xin Hua ថ្លែង​បន្ត​ថា៖ «ខ្ញុំ​ទុក​លោក ហ៊ុន ព្រោះ​ខ្ញុំ​ចង់​ដាក់​សម្ពាធ​លើ​រោងចក្រ​ដើម្បី​ឲ្យ​ពួក​គេ​បង់​ប្រាក់​ឲ្យ យើង»។

មន្រ្តី​ម្នាក់​នៅ​រោងចក្រ Great Field ដែល​សុំ​មិន​បញ្ចេញ​ឈ្មោះ បាន​និយាយ​ថា លោក​មិន​បាន​ដឹង​ថា តើ​មាន​តំណាង​រោងចក្រ Great Field ណា​ម្នាក់​យល់​ព្រម​បង់​ថ្លៃ​ព្យាបាល​ឲ្យ​លោក ហ៊ុន នោះ​ទេ ព្រោះ​ជំងឺ​របស់​គាត់ មិន​ពាក់​ព័ន្ធ​នឹង​ការងារ​ទេ ហើយ​ថា រោងចក្រ នឹង​មិន​ទទួល​ខុស​ត្រូវ​លើ​ការ​ព្យាបាល​របស់​គាត់​ទេ។ រោងចក្រ Great Field បច្ចុប្បន្ន កំពុង​ចរចា​ជាមួយ​បេឡា​សន្តិសុខ​សង្គម​ដើម្បី​ពិនិត្យ​មើល​ថា តើ​ពួក​គេ អាច​ផ្តល់​មូលនិធិ​បាន​ឬ​យ៉ាង​ណា?

នាយក​គ្រប់​គ្រង​កម្មវិធី​នៃ​មជ្ឈមណ្ឌល​អប់រំ​ច្បាប់​សម្រាប់​សហគមន៍ លោក ហួន ឈុនឌី បាន​ថ្លែង​ថា រោងចក្រ​មិន​ស្ថិត​នៅ​ក្រោម​កាតព្វកិច្ច​តាម​ផ្លូវ​ច្បាប់ ក្នុង​ការ​បង់​ថ្លៃ​ព្យាបាល​ទេ ក្រៅ​តែ​ពី​ការ​សន្យា​ផ្ទាល់​ដែល​គេ​មិន​អាច​បញ្ជាក់​បាន ប៉ុន្តែ​មន្ទីរពេទ្យ​ក៏​មិន​មាន​សិទ្ធិ​ឃុំ​ខ្លួន​លោក ហ៊ុន ដែរ។ លោក​បញ្ជាក់​ថា៖ «ប្រសិន​បើ​ពួក​គេ (មន្ទីរពេទ្យ) មាន​បញ្ហា​នឹង​ការ​បង់​ប្រាក់ ពួក​គេ​អាច​ប្តឹង​ទៅ​តុលាការ។ ពួក​គេ​មិន​អាច​ឃុំ​ខ្លួន​នរណា​ម្នាក់ ដោយ​សារ​តែ​មិន​បាន​បង់​ប្រាក់​ទេ»។ លោក ឈុនឌី បន្ត​ថា ប៉ុន្តែ​លោក Xin Hua មិន​ខ្វល់​ពី​ភាព​ស្រប​ច្បាប់​នៃ​ការ​ឃុំ​ខ្លួន​លោក ហ៊ុន ទេ។ លោក​អះអាង​ថា កាល​ពី​មុន​គ្លីនិក Polyclinic Hong En ធ្លាប់​ឃុំ​ខ្លួន​មនុស្ស ដែល​មិន​បង់​ប្រាក់​ថ្លៃ​ព្យាបាល ប៉ុន្តែ​មាន​អ្នក​ខ្លះ​បាន​រត់​គេច​ខ្លួន៕ NR

អត្ថបទគួរចាប់អារម្មណ៍