The Phnom Penh Post Search

Search form

Logo of Phnom Penh Post newspaper Phnom Penh Post - ការ​សន្យា​ពិនិត្យ​សុវត្ថិភាព​រោងចក្រ​មិន​បាន​អនុវត្ត




ការ​សន្យា​ពិនិត្យ​សុវត្ថិភាព​រោងចក្រ​មិន​បាន​អនុវត្ត

ការ​សន្យា​ពិនិត្យ​សុវត្ថិភាព​រោងចក្រ​មិន​បាន​អនុវត្ត

131115_05
កម្មការិនីរោងចក្រវីងស្តាររងរបួសពីការបាក់ឡៅតឿក្នុងបន្ទប់សង្គ្រោះ ហេង ជីវ័ន

កំពង់ស្ពឺៈ បន្ទាប់​ពី​កម្មករ​ពីរ​នាក់​ដែល​ធ្វើការ​ជាមួយ​នាង យុ ម៉ានិត ត្រូវ​គាប​សង្កត់​ស្លាប់​គម្រប់ ៦ខែ ក្នុង​ការ​បាក់​ជាន់​ឡៅតឿ​ផ្ទុក​អីវ៉ាន់​រោងចក្រ វីងស្តារ ក្នុង​ខេត្ត កំពង់ស្ពឺ ឥឡូវ​នេះ​នាង​សង្កេត​ឃើញ​ថា ស្នាម​ប្រេះ​ជញ្ជាំង​រោងចក្រ​បាន​រីក​កាន់​តែ​ធំ​ឡើងៗ។

អ្នក នាង យុ ម៉ានិត អាយុ ៣១ឆ្នាំ ជា​កម្មការិនី​ផលិត​ស្បែក​ជើង ម៉ាក Asics សម្រាប់​អ្នក​បញ្ជា​ទិញ​ជប៉ុន​និយាយ​ថា៖ «ពេល​ប្រាប់​ក្រុមហ៊ុន គេ​ឆ្លើយ​ថា គេ​នឹង​ជួស​ជុល​នៅ​ពេល​វា​ប្រេះ​ធំ​ជាង​នេះ»។

ថ្ងៃ​ស្អែក​ជា​ថ្ងៃ​គម្រប់ ៦ខែ ចាប់​ពី​ជាន់​ឡៅតឿ​ផ្ទុក​អីវ៉ាន់​នេះ​បាក់​សង្កត់​ស្លាប់​កម្មករ ឈ្មោះ គីម ដានី និង រីម រឿន អាយុ ២២ឆ្នាំ។ ភា្លមៗ​បន្ទាប់​ពី​នគរបាល​រើ​កកាយ​កម្ទេច​ប៉ាក់​បែក​រក​អ្នក​នៅ​រស់​អាជ្ញាធរ​សន្យា​ថា នឹង​ដាក់​កំហិត​ឲ្យ​មាន​កំណែ​ទម្រង់​ប្រព័ន្ធ​សុវត្ថិភាព ដើម្បី​សម្អាត​ឧស្សាហកម្ម​នាំ​ចេញ​ដ៏​ធំ​បំផុត​របស់​កម្ពុជា​នេះ​ឲ្យ​ប្រសើរ​ឡើង។

លោក អ៊ិត សំហេង រដ្ឋ​មន្រ្តី​ក្រសួង ការងារ​និង​បណ្តុះ​បណ្តាល​វិជ្ជាជីវៈ ពេល​នោះ​ថ្លែង​ថា៖ «យើង​នឹង​បង្កើត​គណៈកម្មាធិការ​អធិការកិច្ច ដើម្បី​ស៊ើប​អង្កេត​រោងចក្រ​ទាំង​អស់​ទូទាំង​ប្រទេស»។

លោក​ថា៖ «គណៈកម្មាធិការ​អធិការកិច្ច​នេះ នឹង​ធ្វើ​អធិការកិច្ច​រាល់​បី​ខែ​ម្តង និង​ក្នុង​ករណី​ពិសេស​ណា​មួយ»។

រយៈ​ពេល ៦ខែ មក​ហើយ ការ​សន្យា​ទាំង​នេះ​មិន​ទាន់​បាន​អនុវត្ត​នៅ​ឡើយ ហើយ​រោងចក្រ​ជាច្រើន​ក្នុង​ប្រទេស​កម្ពុជា​នៅ​តែ​មិន​ទាន់​ធានា​ពី​សុវត្ថិភាព​នៅ​ឡើយ។ នេះ​បើ​តាម​ការ​អះអាង​ពី​ក្រុម​សិទ្ធិ​ការងារ និង​សហជីព។

លោក គង់ អាទិត្យ អគ្គ​លេខាធិការ​នៃ​សហភាព​ការងារ​កម្ពុជា​បាន​ថ្លែង​ថា៖ «រដ្ឋាភិបាល​មិន​ទាន់​បង្កើត​ប្រព័ន្ធ​ថ្មី​ណា​មួយ​ទេ។ ក្រុមហ៊ុន​កំពុង​ប្រើ​ប្រាស់​អគារ​ចាស់​និង​គ្មាន​សុវត្ថិភាព។ រដ្ឋាភិបាល​មិន​បាន​គ្រប់​គ្រង ព្រោះ​តែ​ពុំ​មាន​កំណត់​ត្រា​អំពី​អគារ​ទាំង​នេះ»។

លោក Dave Welsh នាយក​ប្រចាំ​ប្រទេស​នៃ​មជ្ឈមណ្ឌល​អាមេរិក ដើម្បី​សាមគ្គីភាព​ការងារ (ACILS) បាន​ថ្លែង​ថា វា​គ្រាន់​តែ​ស្ថិត​ក្នុង​ភ័ព្វ​សំណាង ដែល​គ្រោះថ្នាក់​ដូច​នៅ​រោងចក្រ វីងស្តារ មិន​ទាន់​កើត​ឡើង។ លោក​បន្ត​ថា៖ «ប្រហែល​គណៈកម្មាធិការ​ទាំង​នេះ ជា​គណៈកម្មាធិការ​ឯកជន ប៉ុន្តែ​ខ្ញុំ​មិន​ទាន់​ឃើញ​ការ​ធ្វើ​អធិការកិច្ច​ថ្មី​ទេ»។

លោក Dave Welsh បន្ថែម​ថា ផ្នែក​ទី​ពីរ​នៃ​ការ​សន្យា​ពី​លោក អ៊ិត សំហេង ពី​ខែ ឧសភា ដែល​ថា នឹង​ដាក់​ទោសទណ្ឌ​អ្នក​ដែល​ទទួល​ខុស​ត្រូវ​លើ​ការ​បាក់​អគារ​មិន​មាន​លទ្ធផល​នៅ​ឡើយ​ទេ។ លោក​បន្ត​ទៀត​ថា ដូច​គ្នា​នេះ​ដែរ ក្រុមហ៊ុន​សំណង់​ដែល​បាន​សាង​សង់​ជាន់​ស្តុក​អីវ៉ាន់ មិន​ទាន់​បាន​បង្ហាញ​ឈ្មោះ​ជា​សាធារណៈ ទំនង​ជា​ដាក់​ទោស​ទណ្ឌ​តិច​បំផុត។ លោក​ថា៖ «ការ​ទទួល​ខុស​ត្រូវ​ព្រហ្មទណ្ឌ ធ្លាក់​ទៅ​ណា​បាត់​ហើយ? វា​មិន​ត្រូវ​ផ្តាច់​ទៅ​តែ​ភាគី​មួយ​ទេ»។

ស្នាម​ប្រេះ​នៅ​លើ​ជញ្ជាំង​អាច​នឹង​រីក​ធំ​ឡើងៗ ប៉ុន្តែ​កម្មការិនី ម៉ានិត នៅ​តែ​ថា រោងចក្រ វីងស្តារ មាន​សុវត្ថិភាព​ល្អ។

អ្នក​នាង​ថា៖ «វា ប្រសើរ​ជាង​មុន ថ្នាក់​ដឹក​នាំ​ឥឡូវ​នេះ​មាន​វិធានការ​យក​ចិត្ត​ទុក​ដាក់​ជាង​មុន ទៅ​លើ​ខ្សែ​ភ្លើង​និង​សុវត្ថិភាព​អគ្គិភ័យ»។

លោក ម៉ៅ ស៊ីសុង ប្រធាន​រដ្ឋបាល​នៅ​រោងចក្រ វីងស្តារ បាន​ថ្លែង​ថា ក្រុមហ៊ុន​បាន​ធ្វើ​ឲ្យ​ប្រសើរ​ច្រើន​លើ​ប្រព័ន្ធ​សុវត្ថិភាព​ចាប់​ពី​ឧប្បត្តិហេតុ​បាក់​ឡៅតឿ​នោះ ប៉ុន្តែ​លោក​បដិសេធ ភ្នំពេញ ប៉ុស្តិ៍ សុំ​ទៅ​មើល​រោងចក្រ​នៅ​សប្តាហ៍​នេះ។

លោក​បន្ត​ថា៖ «យើង​បាន​ធ្វើ​ការ​ផ្លាស់​ប្តូរ​ច្រើន​ក្នុង​កន្លែង​ការងារ​ហើយ​អង្គការ ILO បាន​ចុះ​មក​ពិនិត្យ​ដែរ»។ តែ​ថា មន្រ្តី​រដ្ឋាភិបាល​មិន​ទាន់​បាន​ចុះ​មើល​ទេ ក្នុង​រយៈ​កាល ៦ ខែ​នេះ។

លោក ខេន លូ អគ្គ​លេខាធិការ​នៃ​សមាគម​រោងចក្រ​កាត់ដេរ​នៅ​កម្ពុជា បាន​ថ្លែង​ថា លោក​មិន​បាន​ដឹង​ថា មាន​ការ​ចុះ​ធ្វើ​អធិការកិច្ច ឬ​អត់​នោះ​ទេ?។

លោក​បន្ត​ថា ចាប់​ពី​មាន​ឧប្បតិ្តហេតុ​នៅ​រោងចក្រ វីងស្តារ សមាគម​បាន​ណែនាំ​សមាជិក​ឲ្យ​ធ្វើការ​វាយតម្លៃ​ទៅ​លើ​រចនា​សម្ព័ន្ធ​នៃ​រោងចក្រ​ពួក​គេ។ លោក​ថា៖ «ការ​វាយតម្លៃ​បង្ហាញ​ថា ជា​ទូទៅ រចនា​សម្ព័ន្ធ​រោងចក្រ​គឺ​គ្មាន​បញ្ហា»។

លោក អ៊ិត សំហេង និង​មន្រ្តី​នៅ​ក្រសួង សង្គមកិច្ច​និង​ក្រសួង ការងារ​មិន​អាច​ទាក់​ទង​សុំ​អត្ថាធិប្បាយ​បាន​ទេ។

លោក Dave Welsh ថ្លែង​ថា ការ​ផ្លាស់​ប្តូរ​តួនាទី​លោក អ៊ិត សំហេង ពី​រដ្ឋ​មន្រ្តី​ក្រសួង សង្គមកិច្ច​ទៅ​ក្រសួង ការងារ​អាច​ឲ្យ​លោក ស្ថិត​ក្នុង​តំណែង​ប្រសើរ​ជាង​មុន​ដើម្បី​អនុវត្ត​ឲ្យ​មាន​ការ​ផ្លាស់​ប្តូរ​ទៅ​តាម​ការ​សន្យា​របស់​លោក៕ PS

អត្ថបទគួរចាប់អារម្មណ៍