ភ្នំពេញៈ វិទ្យាស្ថានវិស្វកម្មនៃសាកលវិទ្យាល័យក្រុងតូក្យូ បានបង្ហាញពីការសិក្សាស្រាវជ្រាវមួយក្នុងទស្សនាវដ្តីវិទ្យាសាស្រ្តអង់គ្លេសឈ្មោះថា ការប្រែប្រួលអាកាសធាតុ ដោយលទ្ធផលបង្ហាញពីការឡើងកម្ដៅភពផែនដីនិងការកើតមានគ្រោះទឹកជំនន់យ៉ាងខ្លាំងនៅអាស៊ីភាគអាគ្នេយ៍ ព្រមទាំងតំបន់ជាច្រើននៅអាហ្វ្រិក និងអាមេរិកខាងត្បូងនៅប៉ុន្មានឆ្នាំខាងមុខនេះ។
ក្រុមអ្នកស្រាវជ្រាវសាកលវិទ្យាល័យតូក្យូដែលដឹកនាំដោយលោក Yukiko Hirabayashi បានប្រើប្រាស់គំរូអាកាសធាតុផ្សេងគ្នាចំនួន១១ដែលវាស់ទឹកជំនន់នៅក្នុងដំណើរហេតុការណ៍នៃការផ្លាស់ប្តូរ អាកាសធាតុ ហើយបានរកឃើញថា នឹងមានការកើនឡើងកម្តៅ៣,៥ អង្សាសេនៅឆ្នាំ២១០០ ហើយមនុស្ស៨០លាននាក់ក្នុងពិភពលោក នឹងប៉ះពាល់ដោយសារតែទឹកជំនន់ខុសពីមនុស្ស៥,៦ លាននាក់ ដែលបច្ចុប្បន្នកំពុងតែរងគ្រោះ។
លទ្ធផលនៃការសិក្សានេះ បានបង្ហាញថា ដោយសារតែការឡើងកម្ដៅក្នុងពិភពលោកដែលគេមិនអាចគ្រប់គ្រងបាននៅពេលបច្ចុប្បន្ន ទឹកជំនន់អាចនឹងប៉ះពាល់ដល់ទន្លេធំៗចំនួន២៩នៅទូទាំងពិភពលោក។ ទន្លេដែលវែងជាងគេបំផុតទី១២ គឺទន្លេមេគង្គដែលមានប្រវែង ៤០២៣ គ.ម ហូរកាត់ប្រទេសភូមា ថៃ ឡាវ វៀតណាម និងកម្ពុជា មុននឹងហូរចូលទៅសមុទ្រចិនខាងត្បូង។
យោងតាមគណៈកម្មាធិការជាតិគ្រប់គ្រងគ្រោះមហន្តរាយ ផ្ទៃដីស្រុកខ្មែរ ៨៥ភាគរយស្ថិតនៅក្នុងអាងទន្លេមេគង្គក្រោម។ ទឹកជំនន់ទ្រង់ទ្រាយធំដែលគេរៀបរាប់លើកមុននេះ តាមធម្មតា ជួបប្រទះម្តងក្នុងមួយឆ្នាំប៉ុន្តែយោងតាមការសិក្សានេះ ជារឿយៗនឹងកើនឡើងរាល់១០ ឆ្នាំ ទៅ៥០ឆ្នាំ។
លោក កែវ វី នាយខុទ្ទកាល័យនៃគណៈកម្មាធិការជាតិ គ្រប់គ្រងគ្រោះមហន្តរាយ បានថ្លែង កាលពីថ្ងៃម្សិលមិញថា លោកមិនទាន់ហ៊ានឯកភាព ឬជំទាស់នឹងការសិក្សានេះទេ ប៉ុន្តែកាលពីមុន កម្ពុជាជួបគ្រោះទឹកជំនន់ធ្ងន់ធ្ងរតាមធម្មតារៀងរាល់ប្រហែល១០ឆ្នាំម្តងប៉ុន្តែនៅពេលថ្មីៗនេះ ទឹកជំនន់ធំៗ បានកើតឡើងស្ទើររាល់ឆ្នាំ។ លោកបានបញ្ជាក់ថា៖ «មានមនុស្សប្រមាណ១០ ឬ២០នាក់បានស្លាប់ដោយសារទឹកជំនន់តូចតាច ប៉ុន្តែដូចទឹកជំនន់កាលពីឆ្នាំ២០១១ មានមនុស្សជាង២០០នាក់បានស្លាប់»។
លោក ទិន ពន្លក អគ្គនាយករងនៃការិយាល័យការប្រែប្រួលអាកាសធាតុរបស់ក្រសួង បរិស្ថាន បានឲ្យដឹងកាលពីថ្ងៃម្សិលមិញថា ក្រុមរបស់លោក ក៏កំពុងសិក្សាជាមួយគំរូនៃការប្រែប្រួលអាកាសធាតុចំនួន ១៤ ដែរដែលបង្ហាញថា លទ្ធផលមួយចំនួន អាស្រ័យលើការប្រែប្រួលអាកាសធាតុរបស់គំរូនេះ៕ NR
