.jpg)
ភ្នំពេញៈ កាសែតភ្នំពេញ ប៉ុស្ដិ៍ ត្រូវបានលក់ទៅឲ្យវិនិយោគិនម៉ាឡេស៊ី គឺលោក Sivakumar។ នេះបើយោងតាមសេចក្តីជូនដំណឹងពីលោក Bill Clough ម្ចាស់ក្រុមហ៊ុន និងជា ចាងហ្វាងកាសែតភ្នំពេញប៉ុស្តិ៍កាលពីថ្ងៃសៅរ៍ ទី ៥ ខែឧសភា។
នៅក្នុងសេចក្ដីជូនដំណឹងលោក Bill Clough បានថ្លែងថាលោក Siva គឺជាអ្នកសារព័ត៌មានមួយរូបដ៏គួរឲ្យគោរពដែលមានបទពិសោធជាអ្នកសារព័ត៌មានដ៏ឆ្នើមហើយលោកថែមទាំងជាតំណាងនៃក្រុមហ៊ុនវិនិយោគដ៏រឹងមាំមកពីប្រទេសម៉ាឡេស៊ីថែមទៀតផង។ សេចក្តីប្រកាសព័ត៌មានអំពីការលក់ និងទិញត្រូវបានធ្វើឡើងដំណាលគ្នា។
កាសែតភ្នំពេញប៉ុស្តិ៍បានដំណើរការអស់រយៈពេល ២៦ ឆ្នាំមកហើយ ដែលចាប់ផ្តើមពីដំបូងដោយលោក Michael Hayes នៅក្នុងឆ្នាំ ១៩៩២ ជាមួយនឹងការបោះពុម្ពផ្សាយព័ត៌មាន ២ សប្តាហ៍ម្តងប្រកបដោយសេចក្តីក្លាហាន។
នៅពេលក្រុមវិនិយោគរបស់យើងបានសម្រេចទិញក្រុមហ៊ុននេះពីលោក Michael នៅក្នុងឆ្នាំ ២០០៨ ភ្លាមៗយើងបានផ្លាស់ប្តូរចេញផ្សាយជាប្រចាំថ្ងៃវិញរហូតមកដល់ពេលបច្ចុប្បន្ននេះហើយយើងក៏បានទិញម៉ាស៊ីនបោះពុម្ពដោយខ្លួនឯង និងបានបង្កើតកាសែតភ្នំពេញ-ប៉ុស្តិ៍ជាខេមរភាសានៅ ១ ឆ្នាំបន្ទាប់។ ខ្ញុំបាទសូមថ្លែងអំណរគុណចំពោះដៃគូត្រួសត្រាយផ្លូវរបស់យើងទាំងអស់ក្នុងដំណាក់កាលកន្លងមកដែលរួមមានលោក Ross Dunkley លោក David Armstrong និងលោក Kevin Murphy។
តាមរយៈការខិតខំប្រឹងប្រែង និងផ្តោតលើការកសាងកំណត់ត្រាកាសែតមួយរបស់ប្រទេសកម្ពុជារហូតមកដល់ពេលនេះយើងបានកសាងនូវកេរដំណែលប្រព័ន្ធផ្សព្វផ្សាយដ៏ធំ និងរឹងមាំបំផុតមួយនៅក្នុងព្រះរាជាណាចក្រកម្ពុជា។
នៅក្នុងរយៈពេលប៉ុន្មានឆ្នាំចុងក្រោយនេះ ខណៈដែលក្រុមហ៊ុនកំពុងបន្តវិនិយោគដើម្បីរក្សាការធ្វើព័ត៌មានឲ្យកាន់តែរឹងមាំនោះក្រុមហ៊ុនក៏បានវិនិយោគដើម្បីធានាថា ក្រុមហ៊ុនយើងកំពុងស្ថិតនៅជួរមុខគេនៃដំណើរជាលក្ខណៈអន្តរជាតិនៅក្នុងប្រព័ន្ធឌីជីថល។
ជាឧទាហរណ៍គេហទំព័រកាសែតភ្នំពេញប៉ុស្តិ៍ជាខេមរភាសា បច្ចុប្បន្ននេះមានអ្នកតាមដានជាង ៥ លាននាក់នៅលើហ្វេសប៊ុក។ ចាប់តាំងពីយើងបានចូលរួមប្រកួតប្រជែងពានរង្វាន់ SOPA Awards ប្រចាំឆ្នាំក្នុងឆ្នាំ ២០០៩ មកដែលជាពានរង្វាន់មួយដែលផ្តល់កិត្តិយសជូនដល់សមិទ្ធផលព័ត៌មានដែលមានលក្ខណៈឆ្នើម ក្រុមហ៊ុនរបស់យើងបានទទួលពានរង្វាន់នេះសរុបចំនួន ២៣ ពានរង្វាន់ដាច់ដោយឡែកពីគ្នារួមទាំងពានរង្វាន់ WAN-IFRA ចំនួន ៣ ថែមទៀត ដូច្នេះហើយចំណុចទាំងនេះវាបានបង្ហាញអំពីភាពជាអ្នកដឹកនាំ និងការកំណត់ស្តង់ដារសម្រាប់សារព័ត៌មាននៅក្នុងព្រះរាជាណាចក្រកម្ពុជា។
រយៈពេលចុងក្រោយនេះមានបញ្ហាប្រឈមមួយ ដោយសារតែការធ្លាក់ចុះចំណែកទីផ្សារសម្រាប់ការផ្សព្វផ្សាយតាមរយៈកាសែតនៅទូទាំងពិភពលោកហើយក៏ត្រូវបានគេឃើញថាកើតមាននៅក្នុងប្រទេសកម្ពុជាផងដែរ។
ខ្ញុំបាទសូមថ្លែងអំណរគុណដល់ក្រុមគ្រួសារ Clough ជាពិសេសលោកឪពុករបស់ខ្ញុំឈ្មោះ Harold Clough សម្រាប់ការគាំទ្រផ្នែកហិរញ្ញវត្ថុដល់ក្រុមហ៊ុនមួយនេះជាមួយរូបខ្ញុំផ្ទាល់នៅក្នុងអំឡុងពេលជួបការលំបាកទាំងនោះ។
ការរក្សាពាក្យស្លោករបស់យើង «ព័ត៌មាន វៃឆ្លាត ស៊ីជម្រៅ ឯករាជ្យ» នៅក្នុងពិភពប្រព័ន្ធឌីជីថលដែលកំពុងកើនខ្លាំងឡើងៗនេះវាបានទាមទារឲ្យមានការវិនិយោគលើធនធានមនុស្ស និងបច្ចេកវិទ្យាបន្តថែមទៀតនៅពេលដែលបញ្ហាប្រឈមកំពុងកើតមានបែបនេះ។
ប៉ុន្តែការជឿជាក់របស់យើងក្នុងការផ្តល់កេរដំណែលយូរអង្វែងនេះត្រូវបានទទួលស្គាល់ដោយម្ចាស់ថ្មី ហើយខ្ញុំមានជំនឿមុតមាំថា ពួកគេនឹងកសាងពីកម្លាំងរបស់យើង និងបន្ថែមគុណតម្លៃបន្ថែមទៀត ខណៈពេលដែលយើងកំពុងចូលទៅក្នុងយុគដ៏គួរឱ្យរំភើបថ្មីមួយ។
តំបន់នេះពោរពេញទៅដោយភាពរង្គោះរង្គើ ហើយការផ្លាស់ប្តូរកាលពីពេលថ្មីៗនេះនៅក្នុងប្រទេសកម្ពុជានៅមុនការបោះឆ្នោតជាតិដែលនឹងចូលមកដល់នាពេលខាងមុខវានឹងធ្វើឲ្យគេផ្តោតលើកាសែតភ្នំពេញ-ប៉ុស្តិ៍កាន់តែខ្លាំងដែលជាកាសែតឯករាជ្យពិតប្រាកដតែមួយគត់ដែលនៅសល់ចុងក្រោយគេបង្អស់នៅក្នុងប្រទេសកម្ពុជា។
មានពាក្យចចាមអារ៉ាមជាច្រើនមកពីគ្រប់ទិសទីដែលបានចោទសួរអំពីដំណើរបន្តរបស់យើង ដូច្នេះហើយពេលនេះយើងសង្ឃឹមថា ពាក្យចចាមអារ៉ាមទាំងនោះនឹងត្រូវបានបកស្រាយ។
ខ្ញុំសូមបញ្ជាក់ថាកាលពីសប្តាហ៍មុនក្រុមហ៊ុនបានធ្វើការដោះស្រាយពេញលេញ និងចុងក្រោយប្រកបដោយអធ្យាស្រ័យល្អ ចំពោះអ្វីដែលគេដឹងថា ជាការកំណត់ឲ្យបង់ពន្ធទៅអគ្គនាយកដ្ឋានពន្ធដារ (GDT)។
យើងខ្ញុំសូមកោតសរសើរដល់អគ្គនាយកដ្ឋានពន្ធដារ (GDT) ចំពោះការអនុវត្តប្រកបដោយវិជ្ជាជីវៈរបស់ពួកគេនៅក្នុងការបញ្ចប់ការទាមទារពន្ធដ៏ស្មុគស្មាញនេះ។
«ខ្ញុំបាទសូមគោរពចំពោះឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារ និងឯកឧត្តម វ៉ាន់ ពុទ្ធិពល អគ្គនាយករងនៃអគ្គនាយកដ្ឋានពន្ធដារ ចំពោះចំណាត់ការរបស់ឯកឧត្តមក្នុងការដោះស្រាយការទាមទារពន្ធដារនេះបានឆាប់រហ័ស»។
ខណៈករណីប្តឹងផ្តល់ទៅតុលាការកំពុងបន្តដែលវាជារឿងដ៏គួរឲ្យខកចិត្តខ្លាំងបំផុត និងបានឆ្លុះបញ្ចាំងទៅលើប្រព័ន្ធតុលាការអន់ខ្សោយរបស់ព្រះរាជាណាចក្រកម្ពុជានោះ យើងខ្ញុំសូមបញ្ជាក់ថាការអនុវត្តវិធានការរបស់អាជ្ញាសាលាចំពោះទ្រព្យសម្បត្តិរបស់ក្រុមហ៊ុនយើងខ្ញុំត្រូវបានលុបចោលគឺរង់ចាំរហូតដល់តុលាការកំពូលជំនុំជម្រះបណ្តឹងសារទុក្ខ។ មិនថា លទ្ធផលចុងក្រោយទៅជាយ៉ាងណានោះទេ ក្រុមហ៊ុនមិនប្រឈមនឹងការគំរាមកំហែងណាមួយដល់សមត្ថភាពរបស់ខ្លួនក្នុងការបន្តការងាររបស់ខ្លួនឡើយ។
ខ្ញុំបាទសូមថ្លែងអំណរគុណជាពិសេសចំពោះ ឯកឧត្តម ខៀវ កាញារិទ្ធ រដ្ឋមន្ត្រីក្រសួងព័ត៌មានដែលជាបុគ្គលឈានមុខគេនៅក្នុងឧស្សាហកម្មសារព័ត៌មានក្នុងប្រទេសកម្ពុជា រយៈពេលជាង ៤ ទសវត្សរ៍មកនេះ។ ឯកឧត្តមជាបុរសដែលមានបេះដូងជាអ្នកកាសែត ឯកឧត្តមជាអ្នកគាំទ្រកាសែត ភ្នំពេញប៉ុស្តិ៍ដ៏ខ្លាំងក្លាចាប់តាំងពីការចាប់ផ្តើមដំបូងមកម្ល៉េះ។
ភាពជាអ្នកដឹកនាំរបស់ឯកឧត្តមបានរំឭកខ្ញុំថា នេះគឺជាប្រទេសមួយដែលអ្នកអាចធ្វើពាណិជ្ជកម្ម ទោះបីជាប្រភេទនៃឧស្សាហកម្មមួយដែលមានភាពចម្រូងចម្រាសខ្លាំងបំផុតដូចក្រុមហ៊ុនរបស់យើងក៏ដោយ។ ខ្ញុំបាទមិនដែលមានអារម្មណ៍ថា ក្រុមហ៊ុនរបស់យើងធ្លាប់ស្ថិតនៅក្រោមការគំរាមកំហែងនោះទេ ហើយឯកឧត្តម រដ្ឋមន្ត្រី តែងតែជាអ្នកការពារដំបូងគេ។ ឯកឧត្តមតែងតែទទួលស្គាល់ថាកាសែតភ្នំពេញប៉ុស្តិ៍គឺជាកាសែតឯករាជ្យ ហើយគ្មានអ្វីដែលត្រូវភ័យខ្លាចនោះទេប្រសិនបើខ្លួនគោរពតាមច្បាប់។
រយៈពេល ១០ ឆ្នាំកន្លងមកនេះគឺជាបទពិសោធដ៏អស្ចារ្យមួយសម្រាប់រូបខ្ញុំដែលបានធ្វើការជាមួយមនុស្សដែលមានទេពកោសល្យ និងក្លៀវក្លានៅក្នុងក្រុមហ៊ុនកាសែតឯករាជ្យពិតប្រាកដ និងឈានមុខគេនៅក្នុងប្រទេសកម្ពុជាមួយនេះ។
ខ្ញុំបាទ សូមថ្លែងអំណរគុណដល់បុគ្គលិករបស់កាសែតភ្នំពេញប៉ុស្តិ៍ទាំងអស់ ចំពោះការប្តេជ្ញាចិត្ត និងភាពស្មោះត្រង់របស់ពួកគេដែលនាំក្រុមហ៊ុនមកដល់ដំណាក់កាលនេះ។
មានបុគ្គលិកឆ្នើមៗជាច្រើនដែលខ្ញុំត្រូវលើកយកមកនិយាយ ប៉ុន្តែខ្ញុំមានអារម្មណ៍ថា ខ្ញុំត្រូវលើកឡើងអំពីបុគ្គលិកឆ្នើមៗមួយចំនួនដែលតែងតែឈរនៅជាមួយខ្ញុំ។ លោក កៃ គីមសុង ដែលជានិពន្ធនាយករបស់យើងបានធ្វើការជាមួយយើងចាប់តាំងពីឆ្នាំ ២០០៨ មកម្ល៉េះគឺនៅពេលដែលយើងទិញក្រុមហ៊ុននេះ ហើយលោកគឺជាអ្នកដឹកនាំដ៏ពិតប្រាកដម្នាក់នៅក្នុងក្រុមហ៊ុន និងបានជួយជំរុញការធ្វើព័ត៌មានឆ្ពោះទៅមុខជានិច្ចនៅក្នុងពេលដែលមិនមានភាពប្រាកដប្រជា ដូចគ្នាដែរលោក សំ រិទ្ធ ប្រធានគ្រប់គ្រងការីនិពន្ធបានធ្វើការជាមួយក្រុមហ៊ុនយើងអស់រយៈពេលជាង ១៥ ឆ្នាំមកហើយ។
នាយិកាហិរញ្ញវត្ថុរបស់យើងលោកស្រី ហ៊ាង តាំងម៉េង មានបេះដូង និងស្មារតីជាមួយនឹងអាជីវកម្មមួយនេះតាំងតែពីលោកស្រីចូលមកធ្វើការជាមួយយើងក្នុងឆ្នាំ ២០០៨ ម្ល៉េះ ហើយចុងក្រោយគឺលោក ចាប ណារិទ្ធ ជាបុរសម្នាក់ដែលបាននៅជាមួយយើងអស់រយៈពេល ២៦ ឆ្នាំមកហើយ។
ពេលនេះខ្ញុំសូមផ្ទេរក្រុមហ៊ុននេះទៅឲ្យលោក Siva ដោយធ្វើបែបនេះខ្ញុំក៏មានការសោកស្តាយបន្តិចបន្តួចដែរ ប៉ុន្តែខ្ញុំក៏រំភើប និងមានទំនុកចិត្តផងដែរថាក្រុមការងាររបស់គាត់នឹងធ្វើដូចអ្វីដែលពួកគេបាននិយាយថា ពួកគេមានផែនការកសាងពីមូលដ្ឋានគ្រឹះដ៏រឹងមាំពីកេរដំណែលរយៈពេល ២៦ ឆ្នាំរបស់យើង និងបន្ថែមជីវិតថ្មីនៅក្នុងអាជីវកម្មដែលកំពុងឆ្ពោះទៅមុខមួយនេះ។ ខ្ញុំសូមជូនពរឱ្យពួកគេល្អសម្រេចបានជោគជ័យ៕ NS
Bill Clough ម្ចាស់ និងចាងហ្វាងក្រុមហ៊ុនប៉ុស្តិ៍ម៉េឌីយ៉ា
សេចក្តីប្រកាសព័ត៌មាន
យើងខ្ញុំសូមជម្រាបជូនដល់សាធារណជនទូទៅជាពិសេសដល់អ្នកអាន និងអ្នកគាំទ្រកាសែតភ្នំពេញប៉ុស្តិ៍ទាំងអស់ឲ្យបានជ្រាបថា ក្រុមហ៊ុនប៉ុស្តិ៍ម៉េឌីយ៉ាដែលដំណើរការអស់រយៈពេល ២៦ ឆ្នាំ និងជាកេរដំណែលប្រវត្តិសាស្ត្រមួយនោះត្រូវបានលក់ទៅឲ្យវិនិយោគិនម៉ាឡេស៊ីឈ្មោះ SIVAKUMAR G ទាំងស្រុងដែលលោកជាអ្នកកាសែតជើងចាស់ ហើយក៏ជាការីនិពន្ធដ៏មានបទពិសោធខ្ពស់មួយរូបផងដែរ។
ការទិញក្រុមហ៊ុននេះត្រូវបានធ្វើឡើងបន្ទាប់ពីមានការពិភាក្សា និងចរចាគ្នាដ៏តានតឹងអស់រយៈពេលជាច្រើនខែ ហើយនៅទីបំផុតលទ្ធផលចុងក្រោយគឺថា ម្ចាស់ក្រុមហ៊ុនពីមុនបានយល់ព្រមលក់ក្រុមហ៊ុននេះ ដោយឈរលើមូលដ្ឋាន «ឆន្ទៈលក់ ឆន្ទៈទិញ»។
យើងខ្ញុំសូមធានាដល់អ្នកអាន និងអ្នកគាំទ្ររបស់កាសែតភ្នំពេញប៉ុស្ត៍ទាំងអស់ឲ្យបានជ្រាបថាក្នុងនាមជាម្ចាស់ក្រុមហ៊ុនថ្មី យើងខ្ញុំសូមប្តេជ្ញាចិត្តយ៉ាងពេញទំហឹងថានឹងលើកកម្ពស់គោលការណ៍ និងឯករាជភាពរបស់កាសែតដែលជាកេរដំណែលមានអាយុកាល ២៦ ឆ្នាំមួយនេះដោយមិនមានការរំលោភលើច្បាប់ និងបទប្បញ្ញត្តិពាក់ព័ន្ធណាមួយរបស់ព្រះរាជាណាចក្រកម្ពុជាឡើយ។
ប៉ុន្តែទោះជាយ៉ាងណាក៏ដោយនៅក្នុងការទិញក្រុមហ៊ុនណាមួយយើងនឹងធ្វើការសិក្សាឲ្យបានហ្មត់ចត់អំពីប្រតិបត្តិការរបស់ក្រុមហ៊ុននោះ និងពិនិត្យមើលមធ្យោបាយ និងបំណងដើម្បីលើកកម្ពស់គោលការណ៍បោះពុម្ពផ្សាយរបស់ខ្លួនជាមួយនឹង ៣ ចំណុចសំខាន់ៗគឺ៖
១) ឯករាជភាពផ្នែកហិរញ្ញវត្ថុ
២) ឯករាជភាពផ្នែកបោះពុម្ពផ្សាយ
៣) ជំរុញប្រតិបត្តិការអាជីវកម្ម ដើម្បីធានានូវភាពជោគជ័យបន្តរបស់ខ្លួនជា«អាជីវកម្មឆ្ពោះទៅមុខ»។
នៅទីបញ្ចប់យើងខ្ញុំសូមសម្តែងការកោតសរសើរយ៉ាងជ្រាលជ្រៅចំពោះទីប្រឹក្សាហិរញ្ញវត្ថុរបស់យើងគឺលោក Anthony Galliano ដែលជានាយកប្រតិបត្តិក្រុមហ៊ុន Cambodian International Management (CIM) និងទីប្រឹក្សាច្បាប់របស់យើងគឺក្រុមហ៊ុន HBS Law ចំពោះកិច្ចខិតខំប្រឹងប្រែងដោយមិនខ្លាចនឿយហត់របស់ពួកគេដើម្បីសម្រេចបាននូវការស្រុះស្រួលគ្នានេះ៕ NS
