ភ្នំពេញៈ កាស៊ីណូណាហ្គាវើលដ៍នឹងចាប់ផ្ដើមបើកអាជីវកម្មល្បែងឡើងវិញនៅថ្ងៃទី ៨ ខែកក្កដា ស្អែកនេះ ខណៈដែលក្រសួងអប់រំក៏បានប្រកាសដែរថា សាលារៀនទាំងអស់នឹងត្រូវបើកដំណើរការឡើងវិញក្នុងពេលឆាប់ៗ ប៉ុន្តែត្រូវបែងចែកជា ៣ ដំណាក់កាល ដោយសាលារៀនដែលមានស្ដង់ដាសុវត្ថិភាពខ្ពស់ត្រូវបើកមុន។
ក្រុមហ៊ុនណាហ្គាខប បានចេញសេចក្តីប្រកាសមួយកាលពីថ្ងៃអាទិត្យថា កាលពីថ្ងៃទី ៣០ ខែមិថុនា ក្រុមហ៊ុន និងក្រសួងសុខាភិបាលបានចុះអនុស្សរណៈយោគយល់គ្នា ដើម្បីផ្ដល់ការយល់ព្រមដល់ណាហ្គាវើលដ៍ ចាប់ផ្ដើមដំណើរការអាជីវកម្មឡើងវិញ ហើយនៅថ្ងៃទី ៤ ខែកក្កដា ក្រុមការងារបច្ចេកទេសនៃក្រសួងសុខាភិបាលបានចុះមកត្រួតពិនិត្យទីតាំងជាក់ស្តែងនៃទីតាំងកាស៊ីណូណាហ្គាវើលដ៍ និងបានសន្និដ្ឋានថា ក្រុមហ៊ុនបានអនុលោមតាមតម្រូវការនៃច្បាប់សុខភាព និងនីតិវិធីប្រតិបត្តិស្តង់ដា (SOP) ដែលបានកំណត់ដោយក្រសួងសុខាភិបាលក្នុងការការពារការរីករាលដាលជំងឺកូវីដ ១៩។
សេចក្ដីប្រកាសបន្តថា វិញ្ញាបនបត្រនៃការបោសសម្អាត និងការយល់ព្រមត្រូវបានផ្តល់ឱ្យក្រុមហ៊ុនដើម្បីបើកអាជីវកម្មល្បែងវីអាយភី និងស្លត់ម៉ាស៊ីនឡើងវិញនៅថ្ងៃទី ៨ ខែកក្កដា ឆ្នាំ ២០២០។ ពោលគឺ ១ សប្តាហ៍ បន្ទាប់ពីការអនុវត្តអនុស្សរណៈនេះដែលនឹងចូលជាធរមានចាប់ពីថ្ងៃទី ០៧ ខែកក្កដាឆ្នាំ ២០២០។
លោក ម៉ី វ៉ាន់ អគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុដែលជានិយតករអាជីវកម្មកាស៊ីណូប្រាប់ភ្នំពេញ-ប៉ុស្ដិ៍នៅថ្ងៃទី ៥ ខែកក្កដាថា នៅក្នុងចំណោមកាស៊ីណូជាង ១០០ គឺកាស៊ីណូណាហ្គាវើលដ៍ជាកាស៊ីណូតែ ១ គត់ នៅទីក្រុងភ្នំពេញបានដាក់លិខិតស្នើសុំបើកដំណើរការមុនគេ។
លោកថា៖ «ក្រៅពីហ្នឹងអត់ទាន់មានអ្នកណាមកដាក់ (លិខិតសុំបើកឡើងវិញ) នៅឡើយទេដោយសារគេ (ម្ចាស់កាស៊ីណូ) មិនទាន់រៀបចំកន្លែងស្រួលបួល ហើយនៅតាមព្រំដែនប្រទេសជិតខាងថៃ និងវៀតណាម អត់ទាន់បើកផង។ ទាល់តែបើកព្រំដែនវិញបានមានថៃ និងវៀតណាមមកលេង ព្រោះច្បាប់យើងមិនឱ្យជនជាតិខ្មែរចូលលេងទេ»។
លោក ផៃ ស៊ីផាន អ្នកនាំពាក្យរដ្ឋាភិបាលបានសរសេរបង្ហោះតាមហ្វេសប៊ុករបស់លោកថា នៅក្នុងកិច្ចប្រជុំពេញអង្គរបស់ទីស្ដីការគណៈរដ្ឋមន្ត្រីដែលដឹកនាំដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ៣ ខែកក្កដាគឺបានសម្រេចអនុញ្ញាតឱ្យកាស៊ីណូបើកប្រតិបត្តិការអាជីវកម្មឡើងវិញ ប៉ុន្តែអនុញ្ញាតឱ្យមានតែល្បែងភ្នាល់ និងស្លត់ម៉ាស៊ីនតែប៉ុណ្ណោះ។
លោកបន្តថា កាស៊ីណូទាំងអស់ដែលចង់បើកអាជីវកម្មឡើងវិញគឺត្រូវស្នើសុំឱ្យមានការអនុញ្ញាតពីក្រសួងសុខាភិបាលជាមុន ដើម្បីអនុវត្តតាមលក្ខខណ្ឌតម្រូវមួយចំនួននៃវិធានការការពារជំងឺកូវីដ១៩។
បើតាមលោក ម៉ី វ៉ាន់ កាស៊ីណូដែលបើកដំណើរការឡើងវិញស្របពេលកំពុងកើតមានជំងឺរាតត្បាតកូវីដ១៩នេះ គឺត្រូវអនុវត្តវិធានការរក្សាគម្លាតសុវត្ថិភាពសង្គម ដោយម៉ាស៊ីន និងតុសម្រាប់លេងល្បែងគឺត្រូវរៀបចំដាក់ឱ្យឆ្ងាយពីគ្នាលើសពី ១ ម៉ែត្រ ហើយអនុញ្ញាតឱ្យបើកដំណើរការ តែតុល្បែងភ្នាល់ និងស្លត់ម៉ាស៊ីន ដោយសារល្បែងទាំង ២ ប្រភេទនេះមានចំនួនមនុស្សលេងតិច។
ស្របពេលកម្ពុជារកឃើញជំងឺកូវីដ១៩រប៉េះរប៉ោះ ដែលនាំចូលពីក្រៅប្រទេសក្រសួងអប់រំក៏បានប្រកាសដែរថា សាលារៀនទាំងអស់នឹងត្រូវបើកដំណើរការឡើងវិញឆាប់ៗ ប៉ុន្តែត្រូវបានបែងចែកជា ៣ ដំណាក់កាល គឺដំណាក់កាលទី ១ សម្រាប់សាលារៀនដែលមានស្ដង់ដាសុវត្ថិភាពខ្ពស់តាមសេចក្ដីណែនាំរបស់អង្គការសុខភាពពិភពលោកក្រសួងសុខាភិបាល និងក្រសួងអប់រំហើយដំណាក់កាលទី ២ គឺសាលាមានស្ដង់ដាសុវត្ថិភាពមធ្យម និងដំណាក់កាលទី ៣ គឺសាលាមានស្ដង់ដាសុវត្ថិភាពអប្បបរមា។
នៅថ្ងៃទី ៥ ខែកក្កដា លោក រស់ សុវាចា អ្នកនាំពាក្យក្រសួងអប់រំ បដិសេធមិនបញ្ជាក់អំពីពេលវេលាជាក់លាក់ ដែលសាលាមានស្ដង់ដាសុវត្ថិខ្ពស់ត្រូវអនុញ្ញាតឱ្យបើកទ្វារដំណើរការឡើយ ដោយលោកសន្យានឹងផ្ដល់ព័ត៌មានលម្អិតអំពីការបើកសាលារៀននៅក្នុងសប្ដាហ៍នេះ។
លោក គួច ម៉េងលី ស្ថាបនិកមជ្ឈមណ្ឌលភាសា អេ អាយ អាយ (Aii) និងសាលារៀន អន្តរទ្វីប អាមេរិកាំង (AIS) ថ្លែងថាលោកមិនទាន់ទទួលបានដំណឹងពីក្រសួងសុខាភិបាល ឬក្រសួងអប់រំ ដើម្បីឱ្យបើកដំណើរការសាលារៀនឡើងវិញជាផ្លូវការនៅពេលណាឡើយ។
ចំណែកលោក ម៉ៅ ស្រេង អគ្គនាយកស្ថាប័ន IDP និងសាលារៀន ACE បានថ្លែងថា លោកកំពុងរង់ចាំការប្រកាសជាផ្លូវការពីក្រសួងអប់រំនៅក្នុងអាទិត្យនេះអំពីការបើកសាលារៀនជាដំណាក់កាល។
លោក ម៉ៅ ស្រេង បញ្ជាក់ថា៖ «ចាំមើលក្រសួងអប់រំចេញសេចក្ដីប្រកាសចេញគោលការណ៍ជាផ្លូវការសិន។ ចាំមើលព័ត៌មានគាត់ហ្នឹងថាតើតម្រូវឱ្យមានលក្ខខណ្ឌអីខ្លះ»៕
វីដេអូ៖