ភ្នំពេញៈ កាស៊ីណូមួយ នៅក្រុងប៉ោយប៉ែត ដែលបង់ប្រាក់ឈ្នួលជាប្រាក់បាតថៃ មិនទាន់បំពេញតាមពាក្យសន្យារបស់ខ្លួន ក្នុងការលើកកម្ពស់លក្ខខណ្ឌការងារឲ្យបានល្អប្រសើរសម្រាប់ បុគ្គលិក ៥០០ នាក់នៅឡើយទេ។
លោក ម៉ម រិទ្ធី អនុប្រធានសហព័ន្ធកម្មករផ្នែកសេវាកម្ម និងទេសចរណ៍កម្ពុជា បានអះអាងថា បុគ្គលិកនៅតែធ្វើការ ១២ ម៉ោង ក្នុងមួយថ្ងៃ ដែលជាញឹកញាប់ដោយគ្មានឈប់សម្រាក នៅកាស៊ីណូត្រូពីកាណា ជាកាស៊ីណូមួយនៅក្បែរព្រំដែនថៃ ខេត្តបន្ទាយមានជ័យ។ លោកថ្លែងថា៖ «អ្នកគ្រប់គ្រងកាស៊ីណូធ្វើសេចក្តីសម្រេចនៅក្រៅច្បាប់ការងារ ផ្អែកទាំងស្រុងលើអ្វីដែលពួកគេចង់បាន នេះជារបៀបដែលពួកគេគ្រប់គ្រងបុគ្គលិក»។
កិច្ចព្រមព្រៀងមួយ ដែលធ្វើឡើងនៅខែកញ្ញា បានឆ្លើយតបទៅនឹងការទាមទារ ១៨ នៃការទាមទារសរុប ២១ ចំណុចរបស់បុគ្គលិក ដែលរាប់បញ្ចូលបញ្ហាធ្វើការបន្ថែមម៉ោង ការសម្រាកមាតុភាព និងការឈប់សម្រាកប្រចាំឆ្នាំ ប៉ុន្តែប្រធានក្រុមហ៊ុនមិនទាន់អនុវត្តចំណុចណាមួយនៅឡើយទេ។ កិច្ចប្រជុំ ដែលគ្រោងធ្វើឡើងដើម្បីពិភាក្សាលើចំណុចបីទៀត ក្នុងនោះរួមមាន ការទទួលយកមេដឹកនាំសហជីព ៣ នាក់ឲ្យចូលធ្វើការវិញ ពុំទទួលបានលទ្ធផលអ្វីទេ កាលពីចុងសប្តាហ៍។
លោក Dave Welsh អ្នកគ្រប់គ្រងប្រចាំប្រទេសកម្ពុជានៃមជ្ឈមណ្ឌលអាមេរិក ដើម្បីសាមគ្គីភាពការងារអន្តរជាតិ ដែលថ្លែងថា បុគ្គលិកទទួលប្រាក់ខែជាប្រាក់បាតថៃនោះ បានឲ្យដឹងថា លោកនឹងជួបជាមួយនឹងអភិបាលក្រុងប៉ោយប៉ែតថ្ងៃនេះ ដើម្បីពិភាក្សាលើបញ្ហាអសកម្ម។ លោកលើកឡើងថា៖ «ការបង់ប្រាក់ជាប្រាក់បាតថៃជារឿងធម្មតា ប៉ុន្តែវាជាសញ្ញាបង្ហាញថា ក្រុមហ៊ុនថៃប្រតិបតិ្តការលើព្រំដែន ជឿជាក់ថា ពួកគេមិនស្ថិតក្រោមច្បាប់ការងារកម្ពុជានោះទេ»។ លោក Welsh បានឲ្យដឹងទៀតថា សិទិ្ធសម្រាកមាតុភាពពុំត្រូវបានយកចិត្តទុកដាក់ទេ ខណៈដែលកិច្ចព្រមព្រៀងការងារ ការពារសិទ្ធិជាច្រើនដទៃទៀត។ លោកលើកឡើងថា ការប្រណិប័តន៍មកលើមេដឹកនាំសហជីព ជាឥរិយាបថលេចធ្លោរបស់ក្រុមហ៊ុនមួយនេះ។
កាស៊ីណូត្រូពីកាណាមិនអាចទាក់ទងសុំការអត្ថាធិប្បាយបានទេ កាលពីម្សិលមិញ៕ TK
