.jpg)
ផ្ទាំងក្រណាត់រូបភាពទូរទស្សន៍ដែលផ្សាយផ្ទាល់ពីទីតាំងគ្រាប់ធ្លាក់នៅចំពោះមុខមេបញ្ជាការកងទ័ព។ រូបថត ក្រសួងការពារជាតិ
កំពតៈ យោធាចារ្យ នាយទាហាន នាយទាហានរង និងពលទាហានប្រមាណជិត ២០០០ នាក់បានចូលរួមក្នុងការបាញ់គ្រាប់ពិតនៅក្នុងលំហាត់ហនុមានមាស ២០១៨ ក្នុងរយៈពេល ២ ថ្ងៃកន្លងមកនេះដោយបានប្រើសព្វាវុធប្រភេទធុនធ្ងន់ដូចជារថពាសដែក កាំភ្លើងប្រតិកម្ម BM-21, RM-70 កាំភ្លើងធំអូសសណ្ដោងប្រភេទ ១២២D៣០ មម និងកាំភ្លើង ១៥២D២០ មម ដែលបានអនុវត្តដោយជោគជ័យនៅក្នុងស្រុកជុំគិរី ព្រំប្រទល់ជាប់ខេត្ត កំពត តាកែវ និងកំពង់ស្ពឺ ក្នុងគោលបំណងពង្រីកសមត្ថភាពជំនាញយោធាដើម្បីការពារបូរណភាពទឹកដី។
លោក ឥត សារ៉ាត់ អគ្គមេបញ្ជាការរងប្រធានគណៈកម្មការដឹកនាំបាញ់គ្រាប់ពិត លំហាត់ហនុមានមាស ២០១៨ បានអះអាងនៅក្នុងសេចក្ដីថ្លែងការណ៍បិទវគ្គលំហាត់ហនុមានមាស ២០១៨ កាលពីម្សិលមិញថា សមាសភាពយោធាទាំងអស់មានចំនួន ១៩៤៨ នាក់ដែលបានចូលរួមលំហាត់ទីបញ្ជាការ និងលំហាត់ទីលានដែលបានចូលរួមហ្វឹកហាត់ចាប់តាំងពីថ្ងៃទី ២៤ ខែមេសាដល់ថ្ងៃទី ៣០ ខែឧសភា។
លោក សារ៉ាត់ បានថ្លែងថា៖ «ថ្ងៃនេះយើងបានអនុវត្តជាក់ស្ដែង ប្រកបដោយជោគជ័យ និងជាទីមោទនភាពយ៉ាងក្រៃលែងសម្រាប់កងយោធពលខេមរភូមិន្ទក្នុងបុព្វហេតុការពារជាតិ មាតុភូមិអង្គរនៃយើង។ ក្រោយពីឆ្លងកាត់លំហាត់ហនុមានមាស ២០១៨ នេះធ្វើឲ្យយោធិនរបស់យើង មានសមត្ថភាព និងបង្កើនបានការយល់ដឹងក្នុងយុទ្ធវិធីវាយបក ការប្រុងប្រៀបប្រយុទ្ធ និងការរៀបចំទីបញ្ជាការកងពលតូច ព្រមទាំងទីបញ្ជាការគ្រប់លំដាប់ថ្នាក់»។
លោកបានអះអាងផងដែរថាគោលបំណងនៃការចាត់តាំងបាញ់គ្រាប់ពិតលើកនេះមានអត្ថន័យ និងសារៈសំខាន់បំផុតក្នុងការពង្រីកសមត្ថភាពជំនាញកាំភ្លើងប្រតិកម្ម និងកាំភ្លើងធំអូសសណ្ដោងដែលជាគ្រឿងបំពាក់ធុនធ្ងន់ និងយុទ្ធសាស្ត្ររបស់កងយោធពលខេមរភូមិន្ទ ដើម្បីធ្វើការត្រួតពិនិត្យវាយតម្លៃ លក្ខណៈបច្ចេកទេស និងសមត្ថភាពយោធិនស្របតាមយុទ្ធវិធីក្នុងការអនុវត្តសហការប្រយុទ្ធ តាមនយោបាយយុទ្ធសាស្ត្រការពារជាតិ ការពារបូរណភាពទឹកដី។
លោក ទៀ បាញ់ រដ្ឋមន្ត្រីក្រសួងការពារជាតិបានថ្លែងទៅកាន់កម្លាំងយោធាទាំងអស់ដែលបានបញ្ចប់ការហ្វឹកហាត់កាលពីម្សិលមិញថា រដ្ឋមន្ត្រីក្រសួងការពារជាតិចិន លោក Wei Fenghe មានគម្រោងធ្វើទស្សនកិច្ចមកកម្ពុជាពីថ្ងៃទី ១៦-២០ ខែមិថុនាខាងមុខនេះបំណងបញ្ជាក់ពីចំណងមិត្តភាពរវាងកម្ពុជា និងចិនលើកិច្ចសហប្រតិបតិ្តការគ្រប់វិស័យជាពិសេសលើវិស័យយោធា។
សកម្មភាពនៃលំហាត់បាញ់គ្រាប់ពិតហនុមានមាស ២០១៨ ដែលបានប្រារព្ធធ្វើឡើងនៅភូមិត្រពាំងវែង ឃុំត្រពាំងរាំង ស្រុកជុំគិរី ខេត្តកំពត កាលពីថ្ងៃម្សិលមិញ។ រូប ក្រសួងការពារជាតិ
លោក ទៀ បាញ់ បានថ្លែងថា៖ «យើងបានឯកភាពជាមួយរដ្ឋមន្ត្រីការពារជាតិចិន លោកនឹងមកទស្សនកិច្ចពីថ្ងៃទី ១៦ ដល់ថ្ងៃទី ២០ មិថុនា យើងបានឯកភាពគ្នានឹងរៀបចំតាំងពិព័រណ៍មួយនៅកោះពេជ្រដើម្បីផ្ដល់រូបភាពជាសកម្មភាពកិច្ចសហប្រតិបតិ្តការរវាងកម្ពុជា និងចិន សំខាន់បំផុតគឺផ្នែកយោធារបស់យើង»។
លោក ឈុំ សុជាតិ អ្នកនាំពាក្យក្រសួងការពារជាតិបានច្រានចោលការចោទប្រកាន់របស់អង្គការសង្គមស៊ីវិលមួយចំនួនដែលបានយល់ថា ការធ្វើលំហាត់យោធាគឺជាការគំរាមកំហែងដល់អ្នកបោះឆ្នោត។
លោក សុជាតិ ថ្លែងថា៖ «សមយុទ្ធ ការបាញ់សាកល្បងគ្រាប់ពិតមិនបានគំរាមកំហែងអ្នកបោះឆ្នោត និងការបោះឆ្នោតជ្រើសតាំងតំណាងរាស្ដ្រដែលប្រព្រឹត្តទៅនៅថ្ងៃទី ២៩ ខែកក្កដាឆ្នាំ ២០១៨ ទេ»។
ខណៈលោក សំ គន្ធាមី នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា ឬហៅថានិកហ្វិក (NICFEC) ថ្លែងថាកងកម្លាំងយោធាមិនគួរធ្វើលំហាត់បាញ់គ្រាប់ពិត ទន្ទឹមគ្នានឹងការបោះឆ្នោតជិតមកដល់នោះទេ វានឹងធ្វើឲ្យបរិយាកាសបោះឆ្នោតមិនសូវល្អហើយវានឹងធ្វើឲ្យប្រជាពលរដ្ឋមានការព្រួយបារម្ភរួមទាំងគណបក្សនយោបាយមួយចំនួនផងដែរ។
លោកថ្លែងថា៖ «រដ្ឋាភិបាលគួរតែជ្រើសរើសពេលវេលាកុំឲ្យវាគាប់ជួនពេលជិតបោះឆ្នោត គួរតែធ្វើឲ្យឆ្ងាយពីព្រឹត្តិការណ៍បោះឆ្នោត»។
លោក ជាម ចន្នី អតីតតំណាងរាស្ត្រនៃអតីតគណបក្សសង្គ្រោះជាតិបានថ្លែងគាំទ្រការធ្វើលំហាត់យោធាដើម្បីធ្វើទំនើបកម្មយោធាដើម្បីដើរទាន់ប្រទេសជិតខាងទាំងសម្ភារ និងកងកម្លាំង ប៉ុន្តែរដ្ឋាភិបាលគួរតែពន្យារពេលនៃការហ្វឹកហាត់នេះឲ្យនៅឆ្ងាយពីការបោះឆ្នោតបន្តិច៕
