.jpg)
លោក សាយ សំអាល់ រដ្ឋមន្ត្រីក្រសួងបរិស្ថានក្នុងកិច្ចប្រជុំនៅក្រសួងពីថ្ងៃទី ២៣ ខែ កញ្ញា។ រូបថត សហការី
ភ្នំពេញៈ កិច្ចប្រជុំថ្នាក់រដ្ឋមន្ត្រីបរិស្ថាននៃបណ្តាប្រទេសអាស៊ានលើកទី ១៥ និងកិច្ចប្រជុំផ្សេងទៀតនឹងត្រូវធ្វើឡើងចាប់ពីថ្ងៃទី ៧ ដល់ថ្ងៃ ១០ ខែតុលាខាងមុខ ហើយដែលកម្ពុជាធ្វើជាម្ចាស់ផ្ទះនោះនឹងផ្តោតលើកិច្ចសហប្រតិបត្តិការបរិស្ថានក្នុងតំបន់។ នេះបើតាមហ្វេសប៊ុកក្រសួងបរិស្ថានកាលពីថ្ងៃចន្ទ។
កាលពីថ្ងៃចន្ទនេះផងដែរលោក សាយ សំអាល់ រដ្ឋមន្ត្រីក្រសួងបរិស្ថានបានដឹកនាំកិច្ចប្រជុំអន្តរក្រសួងដើម្បីពិនិត្យមើលវឌ្ឍនភាពការងារ និងផែនការបន្ត ដើម្បីត្រៀមលក្ខណៈសម្រាប់រៀបចំកិច្ចប្រជុំនេះ។
កិច្ចប្រជុំរដ្ឋមន្ត្រីបរិស្ថានអាស៊ាន នឹងធ្វើឡើងក្នុងខេត្តសៀមរាបដែលនឹងមានការចូលរួមពីរដ្ឋមន្ត្រីបរិស្ថាននៃបណ្តាប្រទេសដែលជាសមាជិកអាស៊ាន និងរដ្ឋមន្ត្រីបរិស្ថានជប៉ុន ចិន និងកូរ៉េខាងត្បូងដែលជាសមាជិកអាស៊ានបូក ៣។ នេះបើយោងតាមហ្វេសប៊ុកដដែលនេះ ។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពបានថ្លែងថា មានបញ្ហាជាច្រើនក្នុងតំបន់ដែលត្រូវដោះស្រាយ ដូចជា ការសាងសង់ទំនប់វារីអគ្គិសនី ពីប្រទេស ឡាវ និងចិន នៅតាមដងទន្លេមេគង្គ ដែលធ្វើឱ្យប៉ះពាល់ដល់ជីវចម្រុះ បញ្ហាទឹកជំនន់ និងបញ្ហាការគ្រប់គ្រងកាកសំណល់។
លោកថាកន្លងមកកម្ពុជាមានបញ្ហាការដឹកកាកសំណល់ចូលមកក្នុងប្រទេស ហើយត្រូវបានបញ្ជូនទៅវិញ។ មានបញ្ហាជាច្រើនទៀតរួមមាន ការបំពុលបរិយាកាសពីឧស្សាហកម្មដើរដោយថាមពល និងការកាប់បំផ្លាញព្រៃឈើដែលជារឿងមួយធំធ្វើឱ្យប៉ះពាល់ដល់បរិស្ថានធ្វើឱ្យមានការព្រួយបារម្ភជារួម រួមទាំងបញ្ហាឡើងកម្ដៅភពផែនដីជាដើមពាក់ព័ន្ធការប្រែប្រួលអាកាសធាតុ។
លោក យង់ គិមអេង ថ្លែងថាកិច្ចប្រជុំថ្នាក់រដ្ឋមន្ត្រីបរិស្ថានដែលកម្ពុជាដឹកនាំនេះគឺជារឿងមួយដែលប្រសើរ ហើយក្នុងនោះដែរអ្នកចូលរួមគួររិះរកមធ្យោបាយធ្វើយ៉ាងម៉េចដោះស្រាយបញ្ហាការប្រែប្រួលអាកាសធាតុបញ្ហាដែលធ្វើឱ្យបាត់បង់ជីវចម្រុះតាមដងទន្លេមេគង្គជាដើម និងការពង្រឹងបន្ថែមដើម្បីកាត់បន្ថយការបំពុលបរិយាកាសដែលកន្លងមកឃើញមាននៅប្រទេសថៃ ដែលធ្វើឱ្យមានផ្សែងកខ្វក់នៅក្នុងបរិយាកាសដែលធ្វើឱ្យប៉ះពាល់សុខភាពប្រជាពលរដ្ឋ។
លោក យង់ គិមអេង បានថ្លែងថា៖ «អ៊ីចឹងថ្ងៃណាមួយវា (ផ្សែងកខ្វក់) អាចកើតឡើងនៅក្នុងប្រទេសកម្ពុជាអាចកើតឡើងនៅក្នុងតំបន់ផ្សេងៗ។ ផលប៉ះពាល់ហ្នឹងវាចេះតែរាលដាល។ អ៊ីចឹងរឿងទាំងអស់ហ្នឹងត្រូវតែមានការគិតទុកជាមុន និងរិះរកមធ្យោបាយដើម្បីដោះស្រាយសម្រាប់តំបន់អាស៊ាន» ។
បើតាមលោក គិមអេង បញ្ហាភាពកខ្វក់នៃទឹកសាបក៏ត្រូវតែដោះស្រាយផងដែរ។ បឹងបួអាចនឹងរីងប្រសិនបើមានការប្រែប្រួលអាកាសធាតុ។ លោក ថា៖ «ប្រសិនបើបញ្ហាទឹកសាបហ្នឹង ត្រូវកខ្វក់ទៀតដែលសំខាន់បំផុតប្រទេសទាំងប៉ុន្មានហ្នឹង ដែលអាស្រ័យលើទន្លេមេគង្គនោះ ប្រសិនបើទន្លេមេគង្គមានបញ្ហាទៀត អាហ្នឹងគឺធ្វើឱ្យយើងប្រឈមមុខកាន់តែធ្ងន់ធ្ងរ»។
លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមបានថ្លែងក្នុងកិច្ចសន្ទនាអាស៊ីអឺរ៉ុប លើកទី ៨ ស្ដីពីការអភិវឌ្ឍប្រកបដោយចីរភាពនៅខេត្តសៀមរាបកាលពីថ្ងៃសុក្រសប្តាហ៍មុនថា ក្នុងនាមរដ្ឋាភិបាលលោកបានបញ្ជាក់ពីការប្តេជ្ញាចិត្តខ្ពស់ក្នុងការគាំទ្រ និងលើកកម្ពស់កិច្ចសហប្រតិបត្តិការ និងភាពជាដៃគូក្នុងតំបន់ និងអន្តរជាតិសម្រាប់ការគ្រប់គ្រង និងអភិវឌ្ឍទឹកនៅតាមទន្លេមេគង្គប្រកបដោយចីរភាព។ នេះបើតាមសេចក្តីប្រកាសព័ត៌មានរបស់គណៈកម្មការទន្លេមេគង្គ (MRC) កាលពីថ្ងៃចន្ទ៕
