The Phnom Penh Post Search

Search form

Logo of Phnom Penh Post newspaper Phnom Penh Post - កិច្ច​ចរចា​ដំឡើង​ប្រាក់​ខែ​កម្មករ​គាំង​ត្រឹម​$៧២




កិច្ច​ចរចា​ដំឡើង​ប្រាក់​ខែ​កម្មករ​គាំង​ត្រឹម​$៧២

កិច្ច​ចរចា​ដំឡើង​ប្រាក់​ខែ​កម្មករ​គាំង​ត្រឹម​$៧២

130227_09
កម្មកររោងចក្រកាត់ដេរធ្វើកូដកម្មទាមទារប្រាក់ឈ្នួល និងលក្ខខណ្ឌការងារកន្លងមក

ភ្នំពេញៈ កម្មករ​ក្នុង​ឧស្សហកម្ម​កាត់​ដេរ និង​ស្បែក​ជើង​កម្ពុជា​ហាក់​បាន​ខិត​ជិត​ដល់​ការ​ព្រម​ព្រៀង​លើ​ការ​ដំឡើង ប្រាក់​ឈ្នួល​អប្បបរមា​យ៉ាង​ហោច​៦ដុល្លារ​អាមេរិក បើ​ទោះ​ជា​កិច្ច​ពិភាក្សា​រវាង​សហជីព សមាគម​រោងចក្រ និង​រដ្ឋាភិបាល​បញ្ចប់​ក្នុង​ភាព​ជាប់​គាំង​ពី​ម្សិលមិញ​ក៏​ដោយ។

ភាគី​ទាំង៣ បាន​យល់ព្រម​មុន​ផ្អាក​កិច្ច​ពិភាក្សា​បិទ​ទ្វារ​នេះ ពី​រសៀល​ថ្ងៃ​ម្សិល រហូត​ថ្ងៃ​ត្រង់​ថ្ងៃ​នេះ បន្ទាប់​ពី​សហជីព​មាន​ជំហរ​រឹងមាំ​ទាមទារ​ឲ្យ​ដំឡើង​ប្រាក់​ឈ្នួល​អប្បបរមា​ទ្វេដង សម្រាប់​ឧស្សាហកម្ម​នាំ​ចេញ​ទឹក​ប្រាក់ ៤ ពាន់​លាន​ដុល្លារ​អាមេរិក។

លោក រ៉ុង ឈុន ប្រធាន​សហ​ព័ន្ធ​សហជីព​កម្ពុជា បាន​ថ្លែង​ថា សហជីព​បាន​ច្រាន​ចោល​តួលេខ​ស្នើ​ដោយ​សមាគម​រោង​ចក្រ​កាត់​ដេរ​នៅ​កម្ពុជា ហើយ​​នឹង​ទាមទារ​ថ្ងៃ​នេះឲ្យ​បង្កើន​ប្រាក់​ឈ្នួល​អប្បបរមា​ឲ្យ​ដល់​១២០​ដុល្លារ។

លោកប្រាប់​ថា៖ «គេ​ថា អាច​ផ្តល់​ឲ្យ​យើង​ចំនួន៧២ដុល្លារ​ក្នុង​មួយ​ខែ។ កិច្ច​ប្រជុំ​នេះ​មិន​ទៅ​ណា​ទេ ព្រោះ​គេ​ផ្តល់​ឲ្យ​តិច​តួច​ពេក​។ យើង​មិន​​ព្រម​ស្របទេ»។

លោក​បន្ថែមថា សមាគម​រោង​ចក្រ​កាត់​ដេរ​នៅ​កម្ពុជា​ បាន​ខក​ខាន​ក្នុងការ​ពន្យល់​មូល​ហេតុ​​​ពិត​ប្រាកដ​ដល់​សហជីព បើ​គិត​ពី​ប្រាក់​ចំណេញ​ដ៏​ច្រើន​ដែល​រោងចក្រ​ជាង៤០០ នៅ​កម្ពុជា​រក​បាន​ ដូច្នេះ​ការ​ដំឡើង​១០០ ភាគ​រយពុំ​ជា​បញ្ហា​ចោទ​ឡើយ។ លោក​បន្ត​ថា យើង​ទាម​ទារ១២០ ដុល្លារ​អាមេរិក គឺ​ស្មើ​នឹង​កម្ម​ករ​នៅ​ថៃនិង​វៀត​ណាម។

លោក ខេន លូ ​អគ្គ​លេខាធិការ​សមាគម​រោង​ចក្រ​កាត់​ដេរ​នៅ​កម្ពុជា​ថ្លែង​ថា ចំនួន​​ដែល​អង្គការ​លោក​ស្នើ​ឡើង ពិត​ជា​ច្រើន​ជាង​សហជីព​ដែល​កំពុង​ទាម​ទារ​គឺ​៧២​ដុល្លារ​អាមេរិក បូក​ប្រាក់​សុខភាព​ ៥ ដុល្លារ​អាមេរិក ដែល​មិន​រាប់​បញ្ចូល​ក្នុង​ប្រាក់​ឈ្នួល​អប្ប​បរមា​៦១​ដុល្លារ​ឡើយ។ លោក​ថ្លែង​ថា៖ «​ប្រាក់​ឈ្នួល​អប្បបរមា​បច្ចុប្បន្ន​នឹង​ដំឡើង​ចំនួន​៦ដុល្លារ ហើយ​យើង​នឹង​ផ្តល់​ប្រាក់​សុខ​ភាព​៥ដុល្លារ ទៀត​ធ្វើ​ឲ្យ​កើន​ដល់​៧២​ដុល្លារ»។

លោក លូ ​ថ្លែង​ថា វា​ពិបាកនឹង​ថាការ​ចរចា​នៅ​ថ្ងៃ​នេះ ​នឹង​បង្កើន​តួលេខ​នេះ​ទៀត​ឬ​ទេ?​«វា​ផ្អែក​លើ​អ្វី​ដែល​សហជីព​លើក​ ឡើង.. ប្រសិន​បើ​ពួកគេ​​ប្រកាន់​ជំហរ​លើ​ចំនួន​១២០ ដុល្លារ​ នោះ​នឹង​ពុំ​មាន​ការ​ចរចា​ទៀត​ទេ»​។

សហជីព​ព្រម​ព្រៀងគ្នា​លើ​ចំនួន​១២០ ដុល្លារ​ពី​សប្តាហ៍​មុន ដែល​ស្នើ​ពីដំបូង​ដោយ​សហជីព​សេរី​កម្មករ បន្ទាប់​ពី​មាន​សំណើ​ពី​លោក អ៊ិត សំហេង រដ្ឋ​មន្រ្តី​សង្គម​កិច្ច​ឲ្យ​មាន​ការ​ព្រម​ព្រៀង​ក្នុង​កិច្ច​ប្រជុំ ម្សិលមិញ។

លោក សាត សាមុត ​​រដ្ឋលេខា​ធិការ​ក្រសួង​ការ​ងារ បាន​ថ្លែង​ថា លោក​ជឿ​ថា ​មាន​សហជីព​៥ទៅ​៦ ប៉ុណ្ណោះ ដែល​នៅ​ប្រកាន់​ខ្ជាប់​នូវ​ជំហរ​១២០​ដុល្លារ​នេះ។

លោក​​ថ្លែង​ថា៖ «និយោ​ជក​ថា ពួកគេ​មាន​លទ្ធ​ភាព​បង្កើន​ប្រាក់​ឈ្នួល​អប្ប​បរមា​ត្រឹម​៦ ដុល្លារ ដូច្នេះ យើង​​នឹង​រង់​ចាំ​ថា ​តើ​អ្វី​កើត​ឡើង​នៅ​ថ្ងៃ​ពុធ»។ តែ​ក៏​រំពឹង​ថា​ ​ពួកគេនឹង​ឈាន​ដល់​ការ​ព្រម​ព្រៀង​លើ​ចំនួន​សម​ស្រប​មួយ»។

លោក Dave Welsh ​អ្នក​គ្រប់​គ្រងប្រចាំ​ប្រទេស​នៃ​មជ្ឈមណ្ឌល​អាមេរិក​ដើម្បី​សាមគ្គី​ភាព ​ការ​ងារ​អន្តរ​ជាតិ បាន​ថ្លែង​ថា សហជីព​កំពុង​ព្យាយាម​លោត​ទៅ​មុខ​ជា​មួយ​នឹង​ប្រាក់​ឈ្នួល​ ដូច្នេះកិច្ច​ដំណើរ​ការ​ពិនិត្យ​ឡើង​វិញ​លើ​ការ​ដំឡើង​ប្រាក់​ឈ្នួល​អាច​ដាក់​ឲ្យ​អនុវត្ត​។

ក្នុង​កិច្ច​ចរចា​នេះ​ដែរ តំណាងរបស់​រដ្ឋាភិបាល​បាន​គាំទ្រ​តួលេខ​របស់​សមាគម​​រោងចក្រ​កាត់​ ដេរ​នៅកម្ពុជា ​ដោយ​បាន​​លើក​ឡើង​ថា ប្រសិន​បើ​ប្រាក់​ឈ្នួល​ដំឡើង​ច្រើន ​តម្លៃ​ក៏​នឹង​កើន​ផង​ដែរ វា​នឹង​ធ្វើ​ឲ្យ​អ្នក​ទិញ​បែរ​ទៅ​រក​ប្រទេស​ដទៃ​ទៀត៕​ TK

អត្ថបទគួរចាប់អារម្មណ៍