The Phnom Penh Post Search

Search form




Logo of Phnom Penh Post newspaper Phnom Penh Post - កិច្ច​ចរចា​ពី​ការ​ដំឡើង​ប្រាក់​ឈ្នួល​កម្មករ​នៅ ឆ្នាំ​២០១៥ បាន​ជាប់​គាំង​ជា​ថ្មី

កិច្ច​ចរចា​ពី​ការ​ដំឡើង​ប្រាក់​ឈ្នួល​កម្មករ​នៅ ឆ្នាំ​២០១៥ បាន​ជាប់​គាំង​ជា​ថ្មី

យុទ្ធនាការ​ទាមទារ​ដំឡើង​ប្រាក់​ឈ្នួល​កម្មករ $១៧៧។
យុទ្ធនាការ​ទាមទារ​ដំឡើង​ប្រាក់​ឈ្នួល​កម្មករ $១៧៧។ ហុង មិនា

កិច្ច​ចរចា​ពី​ការ​ដំឡើង​ប្រាក់​ឈ្នួល​កម្មករ​នៅ ឆ្នាំ​២០១៥ បាន​ជាប់​គាំង​ជា​ថ្មី

ភ្នំពេញៈ ក្រុម​ការងារ​ត្រីភាគី​ដែល​ត្រូវ​បាន​បង្កើត​ឡើង​ដើម្បី​ចរចា​និង​ផ្តល់​អនុសាសន៍​ទៅ​គណៈកម្មការ​ប្រឹក្សា​ការងារ​នៃ​ក្រសួង​ការងារ​សម្រាប់​ប្រាក់​ឈ្នួល​អប្បបរមា​ឆ្នាំ​ក្រោយ​ក្នុង​វិស័យ​កាត់​ដេរ​កម្ពុជា​បាន​ឈប់​ប្រជុំ​បន្ទាប់​ពី​ឈាន​ដល់​ភាព​ជាប់​គាំង។

ក្រុម​ការងារ​នេះ​ដែល​មាន​តំណាង ៩ រូប​ពី​ភាគី​រដ្ឋាភិបាល ៩​រូប ពី​ភាគី​និយោជក និង ៩ រូប​ពី​ភាគី​សហជីព​បាន​បញ្ចប់​ការ​ចរចា​បន្ទាប់​ពី​កិច្ច​ប្រជុំ​កាល​ពី​ម្សិល​មិញ ដោយ​សារ​ក្រុម​តំណាង​និយោជក​បដិសេធ​មិន​ដំឡើង​លើស ១១០ ដុល្លារ​ក្នុង​មួយ​ខែ។ នេះ​បើ​តាម​លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​បាន​អះអាង​ឲ្យ​ដឹង​កាល​ពី​ម្សិល​មិញ។

លោក ប៉ាវ ស៊ីណា បាន​ថ្លែង​ឲ្យ​ដឹង​បន្ត​ថា៖ «និយោជក​មិន​មាន​បំណង​ដំឡើង​ប្រាក់​ឈ្នួល​លើស ១១០ ដុល្លារ​ទេ។ ក្រសួង​ការងារ​បាន​និយាយ​ថា វា​មិន​អាច​ទាប​ជាង ១២០ ដុល្លារ​នោះ​ទេ ដែល​ជា​តួលេខ​នៃ​បន្ទាត់​ក្រីក្រ​របស់​កម្ពុជា»។

អគ្គ​លេខាធិការ​សមាគម​រោងចក្រ​កាត់​ដេរ​នៅ​កម្ពុជា លោក ខេន លូ បាន​បដិសេធ​មិន​ធ្វើ​អត្ថាធិប្បាយ​ពី​បញ្ហា​នេះ​ទេ។

ការ​បង្កើត​ក្រុម​ការងារ​នេះ​ត្រូវ​បាន​ប្រកាស​ឡើង​ដោយ​រដ្ឋ​មន្រ្តី​ក្រសួង​ការងារ លោក អ៊ិត សំហេង បន្ទាប់​ពី​បាន​ជួប​ជាមួយ​តំណាង​រាស្រ្ត​នៅ​រដ្ឋសភា​កាល​ពី​ថ្ងៃ ទី១៤ ខែ​តុលា។

អ្នក​នាំ​ពាក្យ​ក្រសួង​ការងារ លោក ហេង សួរ កាល​ពី​កន្លង​មក​បាន​ថ្លែង​ថា ក្រុម​ការងារ​នេះ​នឹង​មិន​មាន​ពេល​វេលា​កំណត់​ជាក់​លាក់​ទេ ហើយ​អាច​នឹង​ត្រូវ​បន្ត​ចរចា​រហូត​ដល់​សម្រេច​បាន​ការ​ព្រម​ព្រៀង​គ្នា។

ប៉ុន្តែ​កាល​ពី​ម្សិល​មិញ​លោក ហេង សួរ មិន​អាច​ទាក់​ទង​សុំ​អត្ថាធិប្បាយ​បាន​ឡើយ។

លោក Joel Preston អ្នក​ប្រឹក្សា​យោបល់​នៅ​មជ្ឈ​មណ្ឌល​អប់រំ​ច្បាប់​សម្រាប់​សហគមន៍ បាន​ថ្លែង​ថា ភាព​ជាប់​គាំង​នេះ​គ្មាន​អ្វី​គួរ​ឲ្យ​ភ្ញាក់​ផ្អើល​ទេ។ លោក​បន្ថែម​ថា រដ្ឋាភិបាល​បាន​បង្កើត​គណៈកម្មការ​គ្រប់​គ្រាន់​រួច​ហើយ ហើយ​មាន​ព័ត៌មាន​គ្រប់​គ្រាន់​ដើម្បី​សម្រេច​ប្រាក់​ឈ្នួល​អប្បបរមា ឆ្នាំ​២០១៥។

លោក Preston បាន​ថ្លែង​បន្ត​ថា៖ «វា​គ្រាន់​តែ​ជា​ឧទាហរណ៍​មួយ​ប៉ុណ្ណោះ។ យើង​ឮ​រដ្ឋាភិបាល​និយាយ​អ៊ីចឹង ប៉ុន្តែ​បន្ទាប់​មក​លទ្ធផល​គឺ​ផ្សេង។ យើង​ចង់​ឃើញ​ការ​ពិភាក្សា​យើង​ចង់​ឃើញ​លទ្ធផល»។

លោក គង់ អាទិត្យ អនុ​ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា​ហៅ ស៊ីខៅឌូ បាន​ថ្លែង​ថា ស៊ីខៅឌូ នឹង​ដាក់​ចេញ​នូវ​របាយ​ការណ៍​អនុសាសន៍​អំពី​ប្រាក់​ឈ្នួល​អប្បបរមា​របស់​ខ្លួន​ខាង​មុខ​នេះ។

សហជីព​ទាំង​អស់ លើក​លែង​តែ​សហជីព​មួយ​ចេញ​បាន​យល់​ព្រម​ទទួល​យក​ប្រាក់​ឈ្នួល​អប្បបរមា ១៤០ ដុល្លារ។

លោក​ស្រី យ៉ាង សោភ័ណ្ឌ ប្រធាន​សម្ព័ន្ធ​សហជីព​កម្ពុជា បាន​រិះគន់​ចំពោះ​ការ​ទទួល​យក​ប្រាក់​ឈ្នួល​អប្បបរមា​តិច​ជាង ១៧៧ ដុល្លារ។

លោក​ស្រី​បាន​ថ្លែង​ថា៖ «ខ្ញុំ​ចង់​ឲ្យ​សហជីព​ទាំង​អស់​រក្សា​ជំហរ​ដដែល ពីព្រោះ​វា​អាច​បង្ហាញ​និយោជក​ថា យើង​នៅ​មាន​សាមគ្គី​រឹងមាំ»៕

អត្ថបទគួរចាប់អារម្មណ៍