The Phnom Penh Post Search

Search form




Logo of Phnom Penh Post newspaper Phnom Penh Post - កិច្ច​ចរចា​សម្ងាត់​មាន​ការ​ព្រម​ព្រៀង ៨០ ភាគរយ​រវាង CPP និង CNRP

កិច្ច​ចរចា​សម្ងាត់​មាន​ការ​ព្រម​ព្រៀង ៨០ ភាគរយ​រវាង CPP និង CNRP

កិច្ច​ចរចា​សម្ងាត់​មាន​ការ​ព្រម​ព្រៀង ៨០ ភាគរយ​រវាង CPP និង CNRP

140114_03
ជំនួបចរចាក្នុងខែកញ្ញារវាងមេដឹកនាំ គណបក្សជាប់ឆ្នោតទាំងពីរ ហេង ជីវ័ន

ភ្នំពេញៈ កិច្ច​ចរចា​សម្ងាត់​រវាង​គណបក្ស​ប្រជាជន​កម្ពុជា (CPP) និង​គណបក្ស​សង្គ្រោះ​ជាតិ (CNRP) ដែល​ជា​គណបក្ស​ប្រឆាំង​បាន​ខិត​ជិត​ដល់​ដំណោះស្រាយ​ចំពោះ​ភាព​ជាប់​គាំង​នយោបាយ​នៅ​កម្ពុជា ចាប់​តាំង​ពី​ការ​បោះឆ្នោត​កាល​ពី​ខែ កក្កដា។ នេះ​បើ តាម​ប្រភព​ដែល​ស្និទ្ធ​នឹង​អ្នក​សម្រប​សម្រួល​បាន​អះអាង​កាល​ពី​ម្សិលមិញ។

ប្រភព​នោះ​បាន​ប្រាប់ ភ្នំពេញ ប៉ុស្តិ៍ ថា មន្រ្តី​ជាន់​ខ្ពស់​របស់​រដ្ឋាភិបាល​បាន​ជួប​ប្រជុំ​ជាមួយ​នឹង​គណបក្ស ប្រឆាំង បន្ទាប់​ពី​មាន​ការ​បង្ក្រាប​មក​លើ​កូដកម្ម​របស់​កម្មករ​កាត់ដេរ និង​បោស​សម្អាត​ទីលាន​ប្រជាធិបតេយ្យ​នៅ​ថ្ងៃ ទី៣ និង ទី៤ ខែ មករា ខណៈ​ដែល​ខាង​លោក ហ៊ុន សែន បាន​ដាក់​ចេញ​នូវ​មូលដ្ឋាន​ចរចា​រវាង​គណបក្ស​ទាំង​ពីរ ដែល​ត្រូវ​ស្ថិត​ក្រោម​រាជាធិបតីភាព​របស់​ព្រះមហាក្សត្រ។

ក្នុង​ចំណោម​ការ​ទាមទារ ៤ ចំណុច ដែល​គណបក្ស​សង្គ្រោះ​ជាតិ​បាន​បញ្ជូន​ទៅ​លោក​នាយក​រដ្ឋ​មន្រ្តី ហ៊ុន សែន គឺ ៨០ ភាគរយ​ត្រូវ​បាន​ព្រម​ព្រៀង​ហើយ នេះ​បើ​យោង​តាម​ប្រភព​ដែល​បាន​ជួប​ជាមួយ​នឹង​អ្នក​សម្រប​សម្រួល​កាល​ពី​សប្តាហ៍​មុន ដើម្បី​ពិភាក្សា​លើ​ការ​ចរចា​ដែល​បាន​គ្រោង​ឡើង។

ប្រភព​បន្ត​ឲ្យ​ដឹង​ថា ការ​បោះឆ្នោត​ឡើង​វិញ និង​ការ​ចុះ​ចេញ​របស់​លោក ហ៊ុន សែន ដូច​ដែល​បាតុករ​ដឹក​នាំ​ដោយ​គណបក្ស​សង្គ្រោះ​ជាតិ​ស្រែក​តាម​ផ្លូវ នោះ​មិន​ស្ថិត​ក្នុង​របៀប​វារៈ​ចរចា​ទេ។

មន្រ្តី​ជាច្រើន​ពី​គណបក្ស​ទាំង​ពីរ​បាន​បដិសេធ​ថា ការ​ចរចា​រវាង​គណបក្ស​ទាំង​ពីរ​ពុំ​ទាន់​កើត​ឡើង​ទេ។

លោក កែម ឡី អ្នក​វិភាគ​នយោបាយ និង​លោក ហ៊ាង ឫទ្ធី ប្រធាន​អង្គការ​ស្រាវជ្រាវ​ជាតិ​កម្ពុជា ដែល​ជា​អង្គការ​លើក​កម្ពស់​សិទិ្ធ​មនុស្ស​និង​លទិ្ធ​ប្រជាធិបតេយ្យ បាន​ថ្លែង​ថា ពួកគេ​បាន​ពិភាក្សា​ជាមួយ​នឹង​អ្នក​សម្រប​សម្រួល​យ៉ាង​យូរ អំពី​ចំណុច​ទាមទារ​ដែល​ស្នើ​ឡើង។

ទាំង​នេះ​រាប់​បញ្ចូល​ការ​ធ្វើ​វិសោធនកម្ម​រដ្ឋ​ធម្មនុញ្ញ តាម​រយៈ​រដ្ឋសភា​បន្ទាប់​ពី​ការ​បោះឆ្នោត​លើក​ក្រោយ​ការ​បង្កើត​គណៈកម្មការ​រដ្ឋសភា​មួយ​ទៀត ដោយ​បែង​ចែក​តំណែង​ប្រធាន​គណៈកម្មការ​ស្មើ​គ្នា​រវាង​គណបក្ស​ទាំង​ពីរ និង​ផ្តល់​តំណែង​អនុ​ប្រធាន​រដ្ឋសភា​ឲ្យ​គណបក្ស​សង្គ្រោះ​ជាតិ អនុញ្ញាត​ឲ្យ​គណបក្សស​ង្គ្រោះ​ជាតិ​មាន​អាជ្ញាប័ណ្ណ​ទូរទស្សន៍ និង​បង្កើត​គណៈកម្មាធិការ​ចម្រុះ​ស្តីពី​កំណែ​ទម្រង់​ការ​បោះឆ្នោត។

លោក កែម ឡី បាន​បន្ថែម​ថា៖ «[អ្នក​សម្រប​សម្រួល] បាន​ប្រាប់​ថា នៅ​ពេល​គណបក្ស​ប្រជាជន​និង​គណបក្ស​សង្គ្រោះ​ជាតិ បាន​ព្រម​ព្រៀង​គ្នា​ទាំង​ស្រុង​លើ​ចំណុច​ទាំង​អស់ ដែល​ពួកគេ​នឹង​រៀបចំ​កិច្ច​ប្រជុំ​ថ្នាក់​ដឹក​នាំ​កំពូល​របស់​គណបក្ស ដើម្បី​ជួប​គ្នា​នៅ​មុខ​ព្រះភក្ត្រ​ព្រះ​មហាក្សត្រ​និង​ចុះ​ហត្ថលេខា​នៅ ចំពោះ​ព្រះភក្ត្រ​ព្រះអង្គ។

បើ​តាម​លោក ហ៊ាង ឫទ្ធី បាន​និយាយ​ប្រាប់ ភ្នំពេញ ប៉ុស្តិ៍ ថា មេ​ដឹក​នាំ​គណបក្ស​ប្រឆាំង​បាន​ជួប​ជាមួយ​នឹង​អ្នក​ចរចា​នៅ​ថ្ងៃ ទី៥ មករា មួយ​ថ្ងៃ​បន្ទាប់​ពី​មាន​ការ​ជម្លៀស​ប្រជាជន ដោយ​ប្រើ​អំពើ​ហិង្សា​សម្អាត​ពួក​គេ​ចេញ​ពី​ទីលាន​ប្រជាធិបតេយ្យ។

លោក​បន្ត​ថា៖ «គាត់​បង្ហាញ​ខ្ញុំ​លិខិត​មួយ​ដែល​លោក សម រង្ស៊ី និង​លោក កឹម សុខា ស្នើ​លោក​នាយក​រដ្ឋ​មន្រ្តី ហ៊ុន សែន ចរចា និង​សម្រុះ​សម្រួល ហើយ​គាត់​ចង់​បាន​តំណែង​ក្នុង​រដ្ឋសភា គឺ​ធ្វើ​ជា​អនុ​ប្រធាន»។

ការ​បញ្ចេញ​នេះ​បាន​ធ្វើ​ឡើង បន្ទាប់​ពី​លោក សម រង្ស៊ី បាន​លើក​ឡើង កាល​ពី​ថ្ងៃ ទី៥ ខែ មករា មួយ​ថ្ងៃ​បន្ទាប់​ពី​ទីលាន​ប្រជាធិបតេយ្យ​ត្រូវ​បាន​ជម្លៀស​ចេញ​យ៉ាង ហិង្សា ហើយ​នៅ​ថ្ងៃ​ដែល​មេ​ដឹក​នាំ​គណបក្ស​ប្រឆាំង​បាន​ជួប​ជាមួយ​ខាង​រដ្ឋាភិបាល លោក​ថា រដ្ឋាភិបាល​ទី​បំផុត​នឹង​ធ្វើការ​ជាមួយ​នឹង​គណបក្ស​ប្រឆាំង បើ​ទោះ​ជា​មាន​ការ​បង្ក្រាប​ក៏​ដោយ។

លោក​ប្រាប់​អ្នក​យក​ព័ត៌មាន​ពេល​នោះ​ថា៖ «គេ​ប្រើ​កម្លាំង​ខ្លាំង​មួយ​រយៈ បង្ក្រាប​ដំបូង»។ ប៉ុន្តែ គេ​ក៏​ជា​អ្នក​ទទួល​ខុស​ត្រូវ​ផង​ដែរ។ គេ​ត្រូវ​ធានា​ថា បន្ទាប់​ពី​ការ​បង្ក្រាប​លើ​ចលនា​កម្មករ គេ​ត្រូវ​តែ​ដោះស្រាយ​ជាមួយ​គណបក្ស​ប្រឆាំង។ គេ​មិន​អាច​ចាប់​ខ្លួន​យើង​ទេ ព្រោះ​គេ​ត្រូវ​ការ​ផ្លូវ និង​ត្រូវ​ការ​កម្លាំង​នយោបាយ​ម្ខាង​ទៀត»។

កាល​ពី​ម្សិលមិញ ទីភ្នាក់ងារ​ព័ត៌មាន AKP ក៏​បាន​បង្ហាញ​រូបភាព​លើ​គេហទំព័រ​ផ្លូវ​ការ​ខ្លួន ដែល​បង្ហាញ​អំពី​កិច្ច​ប្រជុំ​កន្លង​មក​និង​ការ​ចាប់​ដៃ​គ្នា​រវាងលោក ហ៊ុន សែន និង​លោក សម រង្ស៊ី តាម​អត្ថបទ «ចង​ចាំ​ជានិច្ច»។

លោក ឯក ថា អ្នក​នាំ​ពាក្យ​ទីស្តីការ​គណៈ​រដ្ឋ​មន្រ្តី​បាន​ហៅ​ការ​បង្ហាញ​រូបភាព​នេះ​ពី​ម្សិលមិញ​ថា ជា «សញ្ញា​ល្អ»។

លោក​ថ្លែង​ថា៖ «វា​មាន​ន័យ​ថា កម្ពុជា​គួរ​ដោះស្រាយ​ដោយ​សន្តិវិធី។ ខ្ញុំ​គាំទ្រ [អ្វី​ដែល AKP កំពុង​ធ្វើ] ប៉ុន្តែ ខ្ញុំ​ពិត​ជា​មិន​យល់​ទេ។ វា​ជា​ការ​ល្អ ក្នុង​ការ​ចែក​រំលែក​ការ​ចង​ចាំ​ចាស់ៗ បើ​ទោះ​ជា​វា​មិន​ជា​សញ្ញា​ល្អ​ក៏​ដោយ។ វា​ជា​សញ្ញា​ល្អ ហើយ​អាច​ជា​សញ្ញា ដែល​ពួក​គេ​អាច​ដោះស្រាយ​ភាព​ខុស​គ្នា»។

គណបក្ស​ប្រឆាំង​កាល​ពី​ម្សិលមិញ​បាន​បដិសេធ​ថា​ពួក​គេ​មិន​បាន​ជួប​នឹង​មន្រ្តី​រដ្ឋាភិបាល​ដើម្បី​កំណត់​របៀបវារៈ​សម្រាប់​ការ​ពិភាក្សា​គ្នា​ទេ។

លោក សម រង្ស៊ី បាន​ថ្លែង​ថា៖ «វា​មិន​សំខាន់​ទេ។ វា​គ្មាន​ខ្លឹមសារ​ទេ។ កិច្ច​ចរចា​គ្រាន់​តែ​ជា​ការ​មន្ទិល​ប៉ុណ្ណោះ»។

លោក យឹម សុវណ្ណ អ្នក​នាំ​ពាក្យ​គណបក្ស​សង្គ្រោះ​ជាតិ ក៏​បាន​ថ្លែង​ថា គណបក្ស​សង្គ្រោះ​ជាតិ​ចង់​ចរចា ប៉ុន្តែ​ការ​ចរចា​នោះ​គឺ «ផ្តោត​លើ​កំណែ​ទម្រង់​ការ​បោះឆ្នោត និង​ការ​បោះឆ្នោត​ឡើង​វិញ»។

លោក ខៀវ កាញារីទ្ធ រដ្ឋ​មន្រ្តី​ក្រសួង ព័ត៌មាន ក៏​បាន​បដិសេធ​ដូច​គ្នា​ដែរ​ថា គ្មាន​ការ​ចរចា​ក្រៅ​ផ្លូវ​ការ​នោះ​ទេ។

ការ​បញ្ចេញ​បែប​នេះ ខណៈ​ដែល​លោក សម រង្ស៊ី និង​លោក កឹម សុខា គ្រោង​ចូល​ទៅ​បំភ្លឺ​ការ​កោះ​របស់​តុលាការ​នៅ​ព្រឹក​នេះ ដើម្បី​សាកសួរ​លើ​បទ​ចោទ​ប្រកាន់​ថា ពី​បទ​បាន​ញុះញង់​កម្មករ​ឲ្យ​ប្រព្រឹត្ត​បទឧក្រិដ្ឋ និង​ចលាចល​សង្គម។

អ្នក​វិភាគ​នយោបាយ និង​ច្បាប់ បាន​ច្រាន​ចោល​គំនិត​ដែល​ថា តុលាការ​នឹង​ចាប់​ខ្លួន ឬ​ចោទ​ប្រកាន់​មេ​ដឹក​នាំ ដើម្បី​ចៀសវាង​ធ្វើ​ឲ្យ​បាតុកម្ម​ប្រឆាំង​រដ្ឋាភិបាល​ធ្លាក់​ចុះ​ដុន​ដាប។

លោក កែម ឡី បាន​ច្រាន​ច្រោល​ការ​សាក​សួរ​របស់​តុលាការ​ថា វា​គ្រាន់​តែ​ជា​ល្បែង​នយោបាយ​ប៉ុណ្ណោះ៕ TK

រាយការណ៍​បន្ថែមៈ ជាង សុខា

អត្ថបទគួរចាប់អារម្មណ៍