The Phnom Penh Post Search

Search form

Logo of Phnom Penh Post newspaper Phnom Penh Post - កិច្ច​ប្រជុំ​ស្តីពី​ការ​ដំឡើង​ប្រាក់​ខែ​កម្មករ​មិន​ទាន់​សម្រេច

កិច្ច​ប្រជុំ​ស្តីពី​ការ​ដំឡើង​ប្រាក់​ខែ​កម្មករ​មិន​ទាន់​សម្រេច

កិច្ច​ប្រជុំ​ស្តីពី​ការ​ដំឡើង​ប្រាក់​ខែ​កម្មករ​មិន​ទាន់​សម្រេច

131217_04
កម្មកររោងចក្រកាត់ដេរ អេសអិល ក្នុងការហែក្បួនបាតុកម្មតវ៉ាកន្លងមក ផា លីណា

ភ្នំពេញៈ មន្ត្រី​ក្រសួង ការងារ សហជីព​តំណាង​កម្មករ និង​និយោជក​នឹង​ជួប​គ្នា​សា​ជា​ថ្មី​ម្តង​ទៀត​នៅ​ថ្ងៃ​អង្គារ ទី២៤ ខែ ធ្នូ សប្តាហ៍​ក្រោយ​ដើម្បី​ធ្វើ​ការ​អនុម័ត​លើ​តារាង​ប្រាក់​ឈ្នួល អប្បបរមា​ថ្មី​របស់​កម្មករ​កាត់ដេរ​និង​ស្បែក​ជើង​សម្រាប់​អនុវត្ត​នៅ​ដើម​ឆ្នាំ ២០១៤។

លោក អ៊ិត សំហេង រដ្ឋ​មន្រ្តី​ក្រសួង ការងារ ដែល​បាន​ដឹក​នាំ​អង្គ​ប្រជុំ​កាល​ពី​ព្រឹក​ថ្ងៃ​ចន្ទ ដោយ​មាន​ការ​ចូល​រួម​ពី​សហជីព​ដែល​ជា​តំណាង​កម្មករ និង​តំណាង​និយោជក បាន​ពិភាក្សា​គ្នា​អំពី​ការ​ដំឡើង​ប្រាក់​ឈ្នួល​អប្បបរមា​សម្រាប់​កម្មករ ក្នុង​ឧស្សាហកម្ម​កាត់​ដេរ​និង​ស្បែក​ជើង។

លោក​រដ្ឋ​មន្ត្រី អ៊ិត សំហេង បាន​លើក​ឡើង​ថា ការ​ប្រជុំ​ថ្ងៃ​នេះ (ថ្ងៃ​ចន្ទ) ជា​ការ​ប្រជុំ​ចុង​ក្រោយ​របស់​ក្រុម​ការងារ សិក្សា​ស្រាវជ្រាវ​ដែល​បាន​រៀបចំ​ធ្វើ​របាយ​ការណ៍​សំយោគ​លើ​ការ​ស្រាវជ្រាវ​របស់​ខ្លួន​ដោយ​បាន​លើក​យក​រូបមន្ត​បី​សម្រាប់​ធ្វើ​ការ​ដំឡើង​ប្រាក់​ឈ្នួល​ជូន​កម្មករ។

លោក​បាន​ថ្លែង​ថា៖ «នៅ​ក្នុង​នេះ​យើង​បាន​បង្កើត​នូវ​រូបមន្ត​បី​សម្រាប់​ធ្វើ​ការ​ដំឡើង​ប្រាក់​ឈ្នួល​ជូន​កម្មករ​ដែល​បាន​កំណត់​គោលដៅ​ក្នុង​រយៈ​ពេល ៥ឆ្នាំ ឲ្យ​ដល់ ១៦០ ដុល្លារ តែ​ក៏​មាន​រូបមន្ត​ពីរ​បន្ថែម​ទៀត ដែល​បាន​លើក​ដោយ​តំណាង​សហជីព និង​និយោជក»។

លោក​បញ្ជាក់​ថា រូបមន្ត​ទាំង​អស់​នឹង​ដាក់​ឲ្យ​ពិភាក្សា​ចំពោះ​មុខ​ភាគី​សហជីព និង​តំណាង​និយោជក រួច​នឹង​ធ្វើ​ការ​ពិភាក្សា​សម្រេច​ម្តង​ទៀត​នៅ​ថ្ងៃ ទី២៤ ខែ ធ្នូ ដោយ​ក្រុមប្រឹក្សា​ការងារ។

រូបមន្ត​បី​សម្រាប់​ការ​រៀបចំ​ដំឡើង​ប្រាក់​ឈ្នួល​អប្បបរមា​ជូន​កម្មករ​ផ្នែក​កាត់​ដេរ និង​ស្បែក​ជើង​ដែល​ត្រូវ​ធ្វើ​ការ​ពិនិត្យ​និង​ជ្រើសរើស​យក​មួយ​ក្នុង​ចំណោម​រូបមន្ត​បី​នេះ​ដើម្បី​អនុវត្ត ដូចជា ការ​កំណត់​ដំឡើង​ជា​អត្រា​រួម​រយៈ​ពេល ៥ឆ្នាំ (២០១៤-២០១៨) រួច​ហើយ​បែង​ចែក​ស្មើ​ភាព ជា​អត្រា​ដំឡើង​ប្រចាំ​ឆ្នាំ។ ការ​កំណត់​ដំឡើង​ប្រាក់​ឈ្នួល​ជា​សន្ទស្សន៍​រួម​ក្នុង​រយៈ​ពេល ៥ឆ្នាំ (២០១៤-២០១៨) ឲ្យ​បាន ១០០ ភាគរយ​នៃ​ប្រាក់​ឈ្នួល​អប្បបរមា ឆ្នាំ ២០១៣ គឺ​ពី ៨០ ដុល្លារ​រហូត​ដល់ ១៦០ ដុល្លារ នៅ​ឆ្នាំ ២០១៨។ មាន​ន័យ​ថា នៅ​ឆ្នាំ​ដំបូង (២០១៤) អត្រា​ដំឡើង​ប្រាក់​ឈ្នួល​ក្នុង​ចំនួន​មួយ​ជាក់​លាក់ ហើយ​ភាគ​ដែល​នៅ​សេស​សល់​យក​មក​ចែក​ជា ៤ ភាគ​ស្មើ​គ្នា​សម្រាប់​ដំឡើង​ពី ២០១៥ ដល់ ២០១៨ និង​រូបមន្ត ទី៣ គឺ​កំណត់​ដំឡើង​តែ​ម្តង​គត់​នៅ​ឆ្នាំ ២០១៤ គឺ​ដំឡើង ១០០ ភាគរយ​ដែល​ស្មើ​នឹង ១៦០ ដុល្លារ ហើយ​នៅ​ឆ្នាំ​បន្ទាប់​គឺ​ពិភាក្សា​ជា​រៀងរាល់​ឆ្នាំ។

លោក អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា​បាន​និយាយ​ថា ប្រាក់​ឈ្នួល​សព្វ​ថ្ងៃ​របស់​កម្មករ​មិន​ទាន់​ធានា​បាន​សម្រាប់​ការ​រស់​នៅ​សមរម្យ​ទេ។

លោក​ថ្លែង​ថា៖ «យើង​ចង់​ឲ្យ​មាន​ការ​ពិភាក្សា​ដំឡើង​ប្រាក់​ឈ្នួល​តែ​ការ​ដំឡើង​ប៉ុន្មាន​នោះ គឺ​នៅ​មាន​បញ្ហា​។ ខាង​រាជ​រដ្ឋាភិបាល​ចង់​ឲ្យ​មាន​ការ​ដំឡើង​ប្រាក់​ឈ្នួល​ដើម្បី​ទាក់​ទាញ ការ​គាំទ្រ​ពី​កម្មករ​ទៅ​ខាង​រាជ​រដ្ឋាភិបាល​ផង​ដែរ​ចំណែក​ឯ​និយោជក ចង់​ដំឡើង​ប្រាក់​ឈ្នួល ដើម្បី​ទាក់​ទាញ​កម្មករ​ជំនាញ​នៅ​ក្នុង​ក្រុមហ៊ុន​របស់​ខ្លួន។ ចំណែក​ឯ​ខាង​សហជីព​ចង់​ដំឡើង​ដើម្បី​ធានា​ឲ្យ​ការ​រស់​នៅ​ពិត​ប្រាកដ​ប្រចាំ ថ្ងៃ​រក្សា​កម្លាំង​កម្មករ​ជំនាញ និង​បញ្ឈប់​នូវ​ការ​ចំណាក​ស្រុក​ដោយ​ប្រថុយ​ប្រថាន»។

លោក អាត់ ធន់ នៅ​តែ​មិន​ទាន់​មាន​ការ​ពេញ​ចិត្ត​នឹង​ការ​ដំឡើង​ប្រាក់​ឈ្នួល​នេះ​នៅ​ឡើយ ហើយ​លោក​នៅ​តែ​មាន​មហិច្ឆតា​ដដែល​គឺ​ទាមទារ​ឲ្យ​មាន​ការ​ដំឡើង​រហូត​ដល់ ១៥៤ ដុល្លារ ក្នុង​ឆ្នាំ ២០១៤ នេះ។

លោក សោម អូន ប្រធាន​ក្រុម​ប្រឹក្សា​សហជីព​ជាតិ​កម្ពុជា បាន​និយាយ​ថា ប្រាក់​ឈ្នួល​កម្មករ​គួរ តែ​ដំឡើង​តាម​ជំហាន​ដោយ​គិត​ជា​ភាគរយ​តាម​ឆ្នាំ។

លោក​ថ្លែង​ថា៖ «ប្រសិន​បើ​យើង​ដំឡើង​ជា​គំហុក​តែ​ម្តង ១៦០ ដុល្លារ នោះ​អាច​ជា​បញ្ហា​សម្រាប់​កម្មករ​និង​ការ​ប្រកួត​ប្រជែង​របស់​និយោជក​ទៅ​នឹង​ប្រទេស​ផ្សេងៗ​ទៀត»។ លោក​ថា អ្នក​វិនិយោគ​មិន​មែន​ជា​អង្គការ​មនុស្សធម៌​ទេ តែ​ជា​អ្នក​រកស៊ី​រក​ផល​ចំណេញ​កាល​ណា​ប្រទេស​ណា ដែល​ធ្វើ​ឲ្យ​គេ​ចំណេញ​ច្រើន​គេ​នឹង​ទៅ​កាន់​ប្រទេស​នោះ។

លោក សោម អូន បាន​ថ្លែង​បន្ត​ថា៖ «យើង​ត្រូវ​តែ​ប្រុង​ប្រយ័ត្ន​ថ្លឹង​ថ្លែង​ក្នុង​ការ​ដំឡើង​ប្រាក់​ឈ្នួល​កម្មករ​នេះ»។

លោក ខេន លូ អគ្គ​លេខាធិកា​សមាគម​រោងចក្រ​កាត់ដេរ​នៅ​កម្ពុជា​បាន​ថ្លែង​នៅ​ក្នុង​កិច្ច​ប្រជុំ​កាល​ពី​ថ្ងៃ​ម្សិលមិញ​ថា លោក​បាន​ប្រជុំ​ជាមួយ​សមាជិក​អស់​រយៈ​ពេល​យ៉ាង​យូរ​ពី​ថ្ងៃ​អាទិត្យ ហើយ​ទាំង​អស់​គ្នា​បាន​សម្តែង​ពី​ការ​ព្រួយ​បារម្ភ​ពី​ការ​ចរចា​គ្នា​ដំឡើង​ប្រាក់​ឈ្នួល​អប្បបរមា​នេះ ប៉ុន្តែ ពួក​គេ​យល់​ស្រប​ថា ការ​ដំឡើង​ប្រាក់​ឈ្នួល​ត្រូវ​តែ​មាន​កំណើន។

លោក​ថ្លែង​ថា៖ «អ្វី​ដែល​យើង​មាន​ការ​បារម្ភ​គឺ​ចំនួន​នៃ​ការ​ដំឡើង​ហើយ​និង​ចំណុច​បារម្ភ​ដទៃ​ទៀត គឺ​ការ​ធ្វើ​កូដកម្ម និង​បាតុកម្ម​ខុស​ច្បាប់​របស់​សហជីព»។

លោក ខេន លូ បន្ត​ទៀត​ថា តាម​តួលេខ​ឬ​រូបមន្ត​ដែល​បាន​លើក​ឡើង​នេះ គឺ​ខាង​រោងចក្រ​ជាច្រើន​អាច​នឹង​បិទ​ទ្វារ ដោយ​សារ​ថា មាន​ការ​បិទ​ទ្វារ​ជាច្រើន​រួច​មក​ហើយ។

លោក ខេន លូ បាន​លើក​អំពី​រូបមន្ត​ផ្ទាល់​របស់​សមាជិក​សមាគម​ថា៖ «អ្វី​ដែល​សមាជិក​ភាគ​ច្រើន​របស់​យើង​បាន​លើក​ឡើង​គឺ​យើង​គួរ​តែ​ឯកភាព​លើ​ចំណុច​មួយ គឺ​កំណើន​ក្នុង​រយៈ​ពេល ២ឆ្នាំ ដំបូង ក្នុង​តម្លៃ​ទាប​បន្តិច​រួច បន្ទាប់​មក​ចាប់​ពី​ឆ្នាំ ទី៣ ទី៤ ទៅ​ត្រូវ​បង្កើន​កំណើន​បន្តិច​វិញ និង​ឆ្នាំ ទី៥ យើង​នឹង​សម្រេច​ឲ្យ​ដល់​គោលដៅ​យើង​តែ​ម្តង។ ទាំង​នេះ​ក៏​ដោយ​សារ​តែ​ដើម្បី​ធ្វើ​ការ​គ្រប់​គ្រង​កូដកម្ម បាតុកម្ម​ខុស​ច្បាប់ និង​ធ្វើ​ការ​ដោះស្រាយ​ជាមួយ​គ្នា​បន្ត​បន្ទាប់​ទៀត»៕

អត្ថបទគួរចាប់អារម្មណ៍