The Phnom Penh Post Search

Search form




Logo of Phnom Penh Post newspaper Phnom Penh Post - កឹម សុខា បន្ថែម​អង្គរក្ស​ការពារ​សន្តិសុខ​ផ្ទាល់​ខ្លួន

កឹម សុខា បន្ថែម​អង្គរក្ស​ការពារ​សន្តិសុខ​ផ្ទាល់​ខ្លួន

កឹម សុខា បន្ថែម​អង្គរក្ស​ការពារ​សន្តិសុខ​ផ្ទាល់​ខ្លួន

130627_03
លោក កឹម សុខា (បាំងឆត្រ) និងក្រុមអង្គរក្សរបស់លោក នៅពេលចុះទៅខេត្តតាកែវកន្លងមក សហការី

ភ្នំពេញៈ បន្ទាប់​ពី​មក​ដល់​ព្រលាន​យន្តហោះ​អន្តរជាតិ​ភ្នំពេញ កាល​ពី​ព្រឹក​ថ្ងៃ​អង្គារ​មេ​ដឹក​នាំ​គណបក្ស​ប្រឆាំង លោក កឹម សុខា បាន​ស្វាគមន៍​ក្រុម​អ្នក​គាំទ្រ​របស់​លោក​រាប់​សិប​នាក់ នៅ​មុន​ពេល​ចាក​ចេញ​ទៅ​ជាមួយ​ក្រុម​អង្គរក្ស​ជាង ១០នាក់។

ខណៈ​ប្រធាន​ស្តី​ទី​របស់​គណបក្ស​សង្គ្រោះ​ជាតិ លោក កឹម សុខា ដែល​កំពុង​មាន​បណ្តឹង​ចោទ​ប្រកាន់​ដ៏​ចម្រូង​ចម្រាស​នៅ​តុលាការ​បាន​ចាក​ចេញ​ពី​ច្រក​ចេញ​ពី​ព្រលាន​យន្តហោះ បាន​ចូល​ទៅ​ក្នុង​រថយន្ត​ហើយ​បាន​ចាក​ចេញ​ពី​ព្រលាន​យន្តហោះ ហើយ​ក្រុម​អង្គរក្ស​បាន​រត់​ត្រឹកៗ​តាម​ក្បួន​ឡាន​របស់​លោក រហូត​ដល់​ចេញ​ផុត​ពី​ព្រលាន។ នៅ​មុខ​ក្បួន​ដង្ហែ​តូច​មួយ​នេះ​រថយន្ត​ទី៣​ដែល​មាន​ស្លាក​លេខ​ស្ថានទូត​បរទេស​មួយ​គ្រឿង​បាន​នាំ​ផ្លូវ។ ខណៈ​ជា​ធម្មតា​ធ្លាប់​តែ​មាន​អង្គរក្ស​ត្រឹម​តែ​ពីរ​ឬ​បី​នាក់។ ដំណើរ​របស់​លោក កឹម សុខា ក្នុង​ប៉ុន្មាន​សប្តាហ៍​ថ្មីៗ​នេះ​ឃើញ​ថា មាន​អ្នក​គាំទ្រ និង​អ្នក​ការពារ​ច្រើន​ជាង​សព្វ​ដង​នៅ​ពេល​មាន​ការ​ភ័យ​ខ្លាច​ចំពោះ​សុវត្ថិភាព​របស់​លោក​។ នេះ​បើ​តាម​មន្រ្តី​គណបក្ស​សង្គ្រោះ​ជាតិ។

លោក ហូ វ៉ាន់ ជា​តំណាង​រាស្រ្ត​ម្នាក់​ក្នុង​ចំណោម​តំណាង​រាស្រ្ត​គណបក្ស​ប្រឆាំង​ដែល​បាន​ជួប​លោក កឹម សុខា នៅ​ព្រលាន​យន្តហោះ​បាន​ពន្យល់​ថា​៖ «វា​គឺ​ដោយ​សារ​មូលហេតុ​បញ្ហា​សន្តិសុខ»។

កាល​ពី​ដើម​ខែ​នេះ​ក្រសួង​មហា​ផ្ទៃ​បាន​ជួប​ជាមួយ​លោក កឹម សុខា​និង​បាន​ផ្តល់​ការ​ការពារ ប្រសិន​បើ​គាត់​ត្រូវ​ការ​។ ប៉ុន្តែ លោក កឹម សុខា បាន​បដិសេធ​។ នេះ​បើ​តាម​លោក ខៀវ សុភ័គ អ្នក​នាំ​ពាក្យ​ក្រសួង​មហា​ផ្ទៃ​ដែល​បាន​ថ្លែង​កាល​ពី​ម្សិលមិញ។

លោក សុភ័គ បាន​ថ្លែង​បន្ត​ថា​៖ «យើង​យល់​ព្រម​ផ្តល់​ឲ្យ​គាត់​នូវ​ការ​ការពារ​ពិសេស​ប្រសិន​បើ​គាត់​ត្រូវ​ការ។ ប៉ុន្តែ​បន្ទាប់​ពី​នោះ​គាត់​មិន​បាន​សរសេរ​សំណើ​ពិសេស​ណា​មួយ​នោះ​ទេ»។ ផ្ទុយ​ទៅ​វិញ លោក កឹម សុខា ដែល​ប្រហែល​ជា​គ្មាន​អ្វី​ភ្ញាក់​ផ្អើល​ហើយ​ពេញ​ចិត្ត​ការ​ការពារ​ពី​អង្គរក្ស​ឯកជន។

មន្ត្រី​ជំនិត​លោក កឹម សុខា កញ្ញា កឹម ម៉ូណូវិទ្យា បាន​ប្រាប់​ភ្នំពេញ ប៉ុស្តិ៍ កាល​ពី​ម្សិលមិញ​ថា សន្តិសុខ ត្រូវ​បាន​បង្កើន​បន្ថែម​ទៀត​សម្រាប់​លោក កឹម សុខា បន្ទាប់​ពី​មាន​ការ​ប្រឆាំង​នឹង​គាត់​ពាក់​ព័ន្ធ​នឹង​ការ​អត្ថាធិប្បាយ​រឿង​គុក​ទួលស្លែង​និង​ការ​តវ៉ា​ផ្សេងៗ និង​ការ​រំខាន​ដល់​វេទិកា​របស់​គណបក្ស​បន្ទាប់​ពី​មាន​ក្រុម​តវ៉ា​ទាំង​នោះ។

កញ្ញា​បាន​ថ្លែង​បន្ត​ថា​៖ «ចាប់​តាំង​ពី​ល្ខោន​ទាំង​មូល​នោះ ត្រូវ​បាន​បង្កើត​ឡើង​ពីរ​បី​សប្តាហ៍​កន្លង​ទៅ​» ក្រុម​អង្គរក្ស​ត្រូវ​បាន​បន្ថែម​»។ «មាន​ការ​បំភិត​បំភ័យ​ដូច​ដែល​អ្នក​ដឹង​ហើយ ប៉ុន្តែ​មិន​ទាន់​មាន​ការ​គំរាម​កំហែង​ផ្ទាល់​ណា​មួយ​នៅ​ឡើយ​ទេ​លើក​លែង​តែ​នៅ​វេទិកា។ ក្រុម​មនុស្ស​បាន​មក​រំខាន​ដល់​វេទិកា​និង​ព្យាយាម​បង្កើត​ការ​រំខាន»។

ទាំង​កញ្ញា ម៉ូណូវិទ្យា និង​ទាំង​អ្នក​នាំ​ពាក្យ លោក យឹម សុវណ្ណ មិន​បាន​ដឹង​ថា ស្ថានទូត​ណា​មួយ បាន​បញ្ជូន​ក្រុម​អម​ការពារ​មក​ការពារ​លោក កឹម សុខា ទេ ប៉ុន្តែ​អ្នក​ទាំង​ពីរ​បាន​ថ្លែង​ថា លោក កឹម សុខា បាន​ទទួល​ចំនួន​គាំទ្រ​យ៉ាង​ច្រើន​លើស​លប់​ពី​មន្រ្តី​ទូត​បរទេស។ លោក យឹម សុវណ្ណ បាន​ថ្លែង​ថា៖ «មន្រ្តី​ទូត​មួយ​ចំនួន​បាន​ជួប​គាត់​ខ្ញុំ​មិន​អាច​ស្គាល់​ពួក​គេ​អស់​ទេ។ ប៉ុន្តែ​ខ្ញុំ​កោត​សរសើរ​ចំពោះ​ការ​ជួយ​របស់​ពួក​គេ។ ពួក​គេ​ព្រួយ​បារម្ភ​ចំពោះ​សុវត្ថិភាព​របស់​ថ្នាក់​ដឹក​នាំ​គណបក្ស​ប្រឆាំង​ទាំង​អស់​»៕ PS

រាយការណ៍​បន្ថែម​ដោយ Abby Seiff

អត្ថបទគួរចាប់អារម្មណ៍