The Phnom Penh Post Search

Search form




Logo of Phnom Penh Post newspaper Phnom Penh Post - កឹម សុខុន​ឡើង​ផ្កាយ​ពីរ

កឹម សុខុន​ឡើង​ផ្កាយ​ពីរ

កឹម សុខុន​ឡើង​ផ្កាយ​ពីរ

ភ្នំពេញៈ លោក កឹម សុខុន ប្អូន​ប្រុស​លោក កឹម សុខា មេ​ដឹក​នាំ​គណបក្ស​ប្រឆាំង ដែល​បរិហារ​រិះ​គន់​គោល​នយោបាយ​គណបក្ស​របស់​បង​ប្រុស​ខ្លួន​ឯង​នោះ ត្រូវ​បាន​ដំឡើង​ឋានន្តរស័ក្តិ​ជា​ឧត្តមសេនីយ៍​ទោ​នៅ​ក្រសួង​មហា​ផ្ទៃ កាល​ពី​ពាក់​កណ្តាល​ខែ​មុន។

យោង​តាម​រាជកិច្ច​ដែល​ភ្នំពេញ ប៉ុស្តិ៍ បាន​ឃើញ​កាល​ពី​ម្សិលមិញ ព្រះ​មហាក្សត្រ នរោត្តម សីហមុនី បាន​តែង​តាំង​លោក កឹម សុខុន អនុ​ប្រធាន​នាយកដ្ឋាន​កណ្ដាល​សន្តិសុខ​នៅ​ក្រសួង​មហា​ផ្ទៃ​ឲ្យ​ក្លាយ​ជា​ឧត្តម​សេនីយ៍​ទោ​(ផ្កាយ​ពីរ)​កាល​ពី​ថ្ងៃ​ទី២៣ ខែ​ឧសភា ឆ្នាំ​២០១៣។

លោក កឹម សុខុន ប្អូន​ប្រុស​លោក កឹម សុខា ប្រធាន​ស្តីទី​នៃ​គណបក្ស​សង្គ្រោះ​ជាតិ ដែល​បាន​ផ្តាច់​ខ្លួន​ពី​គណបក្ស​សិទិ្ធ​មនុស្ស​ទៅ​ចូល​រួម​ក្នុង​គណបក្ស​ប្រជាជន​ដែល​កាន់​អំណាច បាន​ប្រើ​ប្រាស់​វេទិកា​សាធារណៈ​នា​ប៉ុន្មាន​ខែ​ចុង​ក្រោយ​នេះ ដើម្បី​វាយ​ប្រហារ​លើ​គោល​នយោបាយ​របស់​គណបក្ស​ប្រឆាំង​ដោយ​ថ្លែង​ថា ការ​ឃោសនា​របស់​ពួក​គេ​គឺ​បោក​ប្រាស់​ហើយ​បាន​អំពាវនាវ​ឲ្យ​ម្ចាស់​ឆ្នោត​បោះឆ្នោត​ឲ្យ​គណបក្ស​ប្រជាជន។

លោក សុខុន បាន​ប្រាប់​អ្នក​ចូល​រួម​រាប់​រយ​នាក់​នៅ​វេទិកា​មួយ​កន្លង​មក​ថា៖«សូម្បី​ខ្ញុំ​ជា​ប្អូន​ប្រុស​គាត់​ប៉ុន្តែ​ខ្ញុំ​មិន​អាច​នៅ​ជាមួយ​គាត់​ទេ។ ចុះ​អ្នក​ទាំង​អស់​គ្នា​វិញ ដែល​មិន​មែន​ជា​សាច់​ញាតិ​គាត់ តើ​អាច​នៅ​ជាមួយ​គាត់​បាន​យ៉ាង​ដូចម្តេច?»។

លោក​យឹម សុវណ្ណ អ្នក​នាំ​ពាក្យ​គណបក្ស​សង្គ្រោះ​ជាតិ​បាន​ថ្លែង​ថា លោក​គ្មាន​ចំណាប់​អារម្មណ៍​លើ​ការ​ដំឡើង​ឋានន្តរស័ក្តិ​លោក កឹម សុខុន​ឬ​ការ​ផ្តល់​អំណាច​ណា​មួយ​ដល់​គាត់ ក្នុង​ជួរ​រដ្ឋាភិបាល​ទេ និង​ថា គណបក្ស​សង្គ្រោះ​ជាតិ​កំពុង​រួម​ដៃ​គ្នា​សង្គ្រោះ​ជាតិ»។

លោក សុវណ្ណ បាន​បញ្ជាក់​ថា៖ «​វា​ជា​បញ្ហា​របស់​គាត់​»។

លោក សុខុន និង​លោក ថោង លីម ប្រធាន​នាយកដ្ឋាន​កណ្ដាល​សន្តិសុខ​នៅ​ក្រសួង​មហា​ផ្ទៃ​មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ​កាល​ពី​ម្សិលមិញ៕TK

អត្ថបទគួរចាប់អារម្មណ៍