ភ្នំពេញៈ កុមារចំនួន ៧១ នាក់ ទទួលបានការវះកាត់បេះដូង និងភ្ជិតប្រហោងបេះដូងតាមសរសៃឈាមនៅមន្ទីរពេទ្យគន្ធបុប្ផាសៀមរាប និងភ្នំពេញដោយជោគជ័យ។ រីឯកុមារចំនួន ១៦៥ នាក់ ដែលមានជំងឺគ្រុនឈាមបានសម្រាកព្យាបាលនៅមន្ទីរពេទ្យទាំង ២ ទីតាំង ខណៈកុមារចំនួន ១ ៨៨៩ នាក់ ត្រូវបានទទួលការវះកាត់ទូទៅពីមន្ទីរពេទ្យខាងលើនៅក្នុងខែមីនានេះ។ នេះបើតាមរបាយការណ៍ប្រចាំខែមីនា។
តាមរបាយការណ៍ប្រចាំខែមីនារបស់មន្ទីរពេទ្យគន្ធបុប្ផាឲ្យដឹងនៅថ្ងៃទី ២៥ មីនា ថា មន្ទីរពេទ្យគន្ធបុប្ផាបានទទួលកុមារកម្ពុជារួមទាំងស្ត្រីជាមាតាដែលមករកសេវាពិនិត្យព្យាបាល និងសេវាផ្នែកសម្ភពរបស់មន្ទីរពេទ្យគន្ធបុប្ផាទាំងអស់ចំនួន ៨២ ៧៧៦ នាក់ នៅទូទាំងប្រទេសក្នុងខែមីនា ឆ្នាំ ២០២០ នេះ។
របាយការណ៍បានឲ្យដឹងថា កុមារឈឺចំនួន ៥៧ ០៩៧ នាក់ ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅ។ កុមារមានជំងឺធ្ងន់ៗចំនួន ១០ ៥៨៩ នាក់ ត្រូវបានដាក់ឲ្យសម្រាកព្យាបាលនៅក្នុងមន្ទីរពេទ្យ។ រីឯកុមារចំនួន ១៦៥ នាក់ មានជំងឺគ្រុនឈាមធ្ងន់ធ្ងរត្រូវបានដាក់ឲ្យសម្រាកព្យាបាលក្នុងមន្ទីរពេទ្យ។ កុមារចំនួន ១ ៨៨៩ នាក់ ត្រូវបានទទួលការវះកាត់ ខណៈកុមារ ៧១ នាក់ ទទួលបានការវះកាត់បេះដូង និងភ្ជិតប្រហោងបេះដូងតាមសរសៃឈាម។
របាយការណ៍បន្តថា សម្រាប់នៅផ្នែកសម្ភពនៃមន្ទីរពេទ្យជ័យវរ្ម័នទី ៧ (គន្ធបុប្ផាទី ៣) ស្ត្រីមានផ្ទៃពោះចំនួន ១១ ១៨៣ នាក់ បានមកពិនិត្យតាមដានផ្ទៃពោះ និងព្យាបាលនៅក្នុងផ្នែកពិគ្រោះជំងឺក្រៅនៃមន្ទីរសម្ភព ហើយស្ត្រីដែលបានសម្រាលកូនមានចំនួន ១ ៧៨២ នាក់ផងដែរ។
មន្ត្រីនៃមន្ទីរពេទ្យគន្ធបុប្ផា បដិសេធធ្វើអត្ថាធិប្បាយបន្ថែមជុំវិញរបាយការណ៍ប៉ុន្ដែខ្លឹមសារក្នុងរបាយការណ៍នេះបានឲ្យដឹងថារាល់ការព្យាបាលទាំងអស់គឺឥតគិតថ្លៃសម្រាប់គ្រប់គ្នា។ របាយការណ៍ក៏បានបង្ហាញនូវអំណរគុណដល់បុគ្គលិកកម្ពុជាទាំង ២ ៥០០ នាក់ ដែលបានខិតខំបំពេញការងារយ៉ាងលំបាក ទាំងយប់ទាំងថ្ងៃប្រកបដោយវិជ្ជាជីវៈ។
របាយការណ៍បន្ថែមថា ស្របគ្នានៃការរីករាលដាលនៃជំងឺកូវីដ ១៩ នៅកម្ពុជាមន្ទីរពេទ្យគន្ធបុប្ជាបានអំពាវនាវឲ្យប្រជាពលរដ្ឋចូលរួមការពារកូនចៅពីការចម្លងជំងឺកូវីដ ១៩ ដោយអនុវត្តឲ្យបានខ្ជាប់ខ្ជួននូវវិធានការអនាម័យ និងគោរពតាមការណែនាំរបស់សមត្ថកិច្ចពាក់ព័ន្ធ។
អ្នកស្រី ប៉ាក សុខឃីម អាយុ ៣៧ ឆ្នាំ មកពីខេត្តតាកែវបានថ្លែងថាអ្នកស្រីបានយកកូនប្រុសអាយុ ៤ ឆ្នាំ ទៅព្យាបាលជំងឺគ្រុនឈាមនៅមន្ទីរពេទ្យគន្ធបុប្ជាកាលពីដើមខែមីនានេះដោយក្រុមគ្រូពេទ្យបានយកចិត្តទុកដាក់ក្នុងការព្យាបាល និងប្រើថ្នាំពេទ្យល្អៗផងដែរ។
អ្នកស្រីបន្តថា កូនប្រុសអ្នកស្រីបានជាសះស្បើយពីជំងឺគ្រុនឈាមហើយដោយសារការយកចិត្តទុកដាក់របស់គ្រូពេទ្យហើយអ្នកស្រីអនុវត្តតាមការណែនាំរបស់គ្រូពេទ្យ។ ដូច្នេះអ្នកស្រីអរគុណដល់ក្រុមគ្រូពេទ្យនៃមន្ទីរពេទ្យនេះដែលបានជួយសង្គ្រោះជីវិតកូនប្រុសអ្នកស្រីក៏ដូចជាកុមារជាច្រើននាក់ទៀត។
អ្នកស្រី សុខឃីម បញ្ជាក់ថា៖ «ពេលខ្ញុំយកកូនទៅដល់មន្ទីរពេទ្យគឺយើងត្រូវចាប់លេខរៀងតម្រង់ជួរឈរចាំតាមលេខរៀង។ ពេលដល់លេខរៀងខ្ញុំ គឺគ្រូពេទ្យបានសួរនាំ និងពិគ្រោះយោបល់ជួយមើលថែហើយយកចិត្តទុកដាក់។ ពេលហ្នឹងខ្ញុំបារម្ភពីកូនខ្លាំងណាស់ ព្រោះកូនខ្ញុំក្ដៅខ្លួនខ្លាំងហើយដង្ហក់។ តែគ្រូពេទ្យប្រាប់ថាកុំឲ្យខ្ញុំភ័យហើយឲ្យខ្ញុំចេញទៅខាងក្រៅបន្ទប់ក្រោយមកគ្រូពេទ្យចេញមកវិញប្រាប់ថាកូនខ្ញុំអត់អីទេខ្ញុំសប្បាយ ចិត្តខ្លាំងណាស់កុំតែបានមន្ទីរពេទ្យគន្ធបុប្ផា កូនខ្ញុំមិនដឹងយ៉ាងណាទេ»៕