The Phnom Penh Post Search

Search form




Logo of Phnom Penh Post newspaper Phnom Penh Post - កុមារ​ពីរ​នាក់​ស្លាប់​ដោយ​ជំងឺ​ផ្តាសាយ​បក្សី H5N1

កុមារ​ពីរ​នាក់​ស្លាប់​ដោយ​ជំងឺ​ផ្តាសាយ​បក្សី H5N1

កុមារ​ពីរ​នាក់​ស្លាប់​ដោយ​ជំងឺ​ផ្តាសាយ​បក្សី H5N1

130129_07
ការចរាចរទិញ-លក់មាន់ ក្នុងទីផ្សារក្នុងរាជធានី របស់ក្រុមឈ្មួញមកពីតាមបណ្តាខេត្តនានា ម៉ៃ វីរៈ

ភ្នំពេញៈ ក្រសួង​សុខាភិបាល​និង​អង្គការ​សុខភាព​ពិភពលោក បាន​ឲ្យ​ដឹង​ថា កុមារ​ពីរ​នាក់​ទៀត​បាន​ស្លាប់​ដោយ​សារ​ជំងឺ​គ្រុន​ផ្តា​សាយ​បក្សី កាល​ពី​ថ្ងៃ​ចន្ទ​ម្សិលមិញ​ ធ្វើ​ឲ្យ​តួលេខ​អ្នក​​ស្លាប់​ឡើង​ដល់​៤ នាក់ ក្នុង​ករណី​ឆ្លង​ជំងឺ​គ្រុន​ផ្តាសាយ​៥​ករណី​កាល​ពី​ខែ​មុន។

លោក Sonny Krishnan មន្រ្តី​ទំនាក់​ទំនង​នៃ​អង្គការ​សុខភាព​ពិភពលោក​ប្រចាំ​នៅ​កម្ពុជា​បញ្ជាក់​ថា ក្មេង​ស្រី​អាយុ ២ ឆ្នាំ មក​ពី​ខេត្ត​កំពង់ស្ពឺ ត្រូវ​បាន​បញ្ជាក់​កាល​ពី​ម្សិលមិញ​ថា បាន​ឆ្លង​ជំងឺ​គ្រុន​ផ្តាសាយ​បក្សី ហើយ​ក្មេង​ស្រី​អាយុ​៨​ឆ្នាំ​កន្លះ ​មក​ពី​ខេត្ត​កំពត​ទាំង​ពីរ​នាក់​ បាន​ស្លាប់ ដោយ​សារ​មេរោគ H5N1 នៅ​មន្ទីរ​ពេទ្យ​គន្ធ​បុប្ផា ភ្នំពេញ​កាល​ពី​ម្សិលមិញ​។

លោក Krishnan ឲ្យ​ដឹង​ទៀត​ថា រដ្ឋាភិបាល​បាន​បញ្ជូន​ភ្នាក់​ងារ​ទប់​ស្កាត់​ទៅ​ធ្វើ​ការ​តាម​ដាន និង​ស៊ើប​អង្កេត​មេរោគ​នេះ​ភ្លាមៗ​ហើយ​។

លោក​ថ្លែង​ថា៖ « គណៈកម្មាធិការ​ជាតិ​ផ្នែក​ព័ត៌មាន ការ​អប់រំ​និង​ទំនាក់​ទំនង នឹង​បើក​កិច្ច​ប្រជុំ​បន្ទាន់​នៅ​ថ្ងៃ​ស្អែក ដើម្បី​បង្កើន​ការ​ផ្សព្វផ្សាយ​តាម​វិទ្យុ និង​ទូរទស្សន៍​ អំពី​សារ​បង្ការ​ការ​ឆ្លង​ជំងឺ​នេះ»។

លោក​បន្ថែម​ថា អង្គការ​សុខភាព​ពិភពលោក​កំពុង​ធ្វើ​ការ​ជាមួយ​នឹង​ក្រសួង​កសិកម្ម ដើម្បី​គ្រប់គ្រង​លើ​ការ​ចរាចរ​សត្វ​មាន់ទា​ចល័ត។ លោក​ថា៖ «កិច្ចការ​សំខាន់​បំផុត គឺថា សត្វ​មាន់​និង​ស៊ុត​ទាំង​អស់ ត្រូវ​ចម្អិន​ឲ្យ​ឆ្អិន ហើយ​ប្រជាជន ត្រូវ​លាង​ដៃ​ ហើយ​ហាម​កុំ​ឲ្យ​កុមារ​លេង​ជាមួយ​នឹង​សត្វ​មាន់ និង​ទា»។

ក្នុង​ចំណោម​ករណី ទាំង​២៦​ករណី ក្នុង​នោះ​មាន​កុមារ​១៧​នាក់​អាយុ​ក្រោម​១៤​ឆ្នាំ ដែល​លោក ម៉ម ប៊ុនហេង រដ្ឋ​មន្រ្តី​ក្រសួង​សុខាភិបាល បាន​ថ្លែង​ថា កុមារ​ហាក់​ដូច​ជា​នៅ​តែ​ជា​ជន​ងាយ​រងគ្រោះ​បំផុត​ដោយ​សារ​ជំងឺ​នេះ​។

លោក Krishnan បាន​កត់​សម្គាល់​ថា សត្វ​ទា​អាច​ឆ្លង​ជំងឺ​នេះ ដោយ​គ្មាន​បង្ហាញ​រោគ​សញ្ញា​ឡើយ​ក្នុង​ពេល​យ៉ាង​យូរ ដូច្នេះ ពេល​ទា​ងាប់ វា​ជា​សា្ថនការណ៍​ធ្ងន់ធ្ងរ ដូច​ករណី​នៅ​ខេត្ត​តាកែវ ដែល​ក្មេង​ស្រី​អាយុ​១៥​ឆ្នាំ ម្នាក់​ស្លាប់​កាល​ពី​សប្តាហ៍​មុន។

លោក សេង ថុង មេ​ឃុំ​ថ្មី ក្នុង​ស្រុក​ទឹក​ឈូ ខេត្ត​កំពត កន្លែង​ក្មេង​ស្រី​អាយុ​៨ឆ្នាំ​ស្លាប់ កាល​ពី​រសៀល​ម្សិលមិញ បាន​ឲ្យ​ដឹង​ថា ក្មេង​ស្រី​ម្នាក់​នេះ​មាន​ជំងឺ​ពី​១០​ថ្ងៃ​មុន ហើយ​បាន​បញ្ជូន​ទៅ​មន្ទីរ​ពេទ្យ​គន្ធបុប្ផា បន្ទាប់​ពី​គ្រូ​ពេទ្យ​ក្នុង​ស្រុក​និង​មន្ទីរ​ពេទ្យ​ខេត្ត​កំពត រក​មិន​ឃើញ​ថា មាន​ជំងឺ​អ្វី។

ឪពុក​ម្តាយ​ក្មេង​ស្រី​នោះ​ មាន​ចិញ្ចឹម​សត្វ​មាន់​ជា​ច្រើន និង​មាន​មាន់​ឈឺ ប៉ុន្តែ គាត់​ពុំ​បាន​បារម្ភ​ទេ នៅ​ពេល​ឃើញ​កូន​លេង​ជាមួយ​នឹង​សត្វ​បក្សី​ទាំង​នោះ។

លោក បន្ត​ថា៖ «នេះ​ជា​ជំងឺ​ថ្មី​ក្នុង​ឃុំ ដោយ​សារ​តែ​ពួក​គេ​មិន​សូវ​ខ្វល់​ពេល​ឃើញ​មាន់​ឈឺ»។

លោក​បន្ត​ថា ​មន្រ្តី​សុខាភិបាល​និង​កសិកម្ម បាន​សម្លាប់​និង​ដុត​សត្វ​មាន់ នៅ​ផ្ទះ​ក្មេង​ស្រី ​បាញ់​ថ្នាំ​ក្នុង​ភូមិ ដើម្បី​សម្លាប់​មេរោគ​និង​ប្រាប់​អ្នក​ភូមិ​កុំ​ឲ្យ​បរិភោគ​ឬ​ប៉ះពាល់​មាន់ ឈឺ​ឬ​ងាប់ ហើយ​ក៏​បាន​យក​សំណាក​បក្សី​ប្រទេស​ជិត​ខាង​ទៅ​ធ្វើ​តេស្ត​វីរុស​ផង។

ជាមួយ​គ្នា​ដែរ សព​ក្មេង​ស្រី​ក៏​បាន​បញ្ជូន​មក​ពី​រាជធានី​ភ្នំពេញ​ដើម្បី​ធ្វើ បុណ្យ​កាល​ពី​ល្ងាច​ម្សិលមិញ។ លោក​ថា​៖ «អ្នក​ភូមិ ដែល​មក​ចូល​រួម​បុណ្យ​សព​ក្មេង​ស្រី​នោះ​ ត្រូវ​បាន​ចែក​ម៉ាស់​បិទ​មុខ​ដើម្បី​ការ​ពារ​ខ្លួន​»។

សន្តិសុខ ម្នាក់​នៅ​មន្ទីរ​ពេទ្យ​គន្ធ​បុប្ផា១ ក្នុង​រាជធានី​ភ្នំពេញ អះអាង​ថា ក្មេង​ទាំង​ពីរ​នាក់​នោះ​ បាន​ស្លាប់​នៅ​ទីនោះ ​ដោយ​សារ​វីរុស​នេះ​កាលពី​ម្សិលមិញ ហើយ​សាកសព​ក៏​បាន​បញ្ជូន​ទៅ​ស្រុក​វិញ​ដែរ។

លោក​គ្រូ​ពេទ្យ Denis Laurent ធ្វើ​ការ​នៅ​មន្ទីរ​ទេព្យ​គន្ធ​បុប្ផា បាន​ប្រាប់​ភ្នំពេញ ប៉ុស្តិ៍​ពី​ថ្ងៃ​អាទិត្យ​ថា បុគ្គលិក​មន្ទីរ​ពេទ្យ​កំពុង​ពិនិត្យ​មើល​ករណី​សង្ស័យ​នៃ​វីរុស​នេះ រាល់​ថ្ងៃ ហើយ​បាន​បញ្ជូន​គំរូ​ទៅ​វិទ្យាស្ថាន​ប៉ាស្ទ័រ​ដើម្បី​ធ្វើ​តេស្ត​រក​ វីរុស H5N1 ​បន្ត​បន្ទាប់​ បើ​ទោះ​ជា​សំណាក​គំរូ​ភាគ​ច្រើន បង្ហាញ សញ្ញា​អវិជ្ជមាន​ក៏​ដោយ។

លោក Krishnan ​បាន​ថ្លែង​ថា មូលហេតុ​ដែល​នាំ​ឲ្យ​មាន​ករណី​នេះ​ខ្ពស់​នៅ​ក្នុង​ខែ​ចុង​ក្រោយ​នេះ រហូត​មក​ដល់​ពេល​នេះ មិន​ទាន់​ត្រូវ​បាន​ដឹង​ច្បាស់​នៅ​ឡើយ បើ​ទោះ​ជា​លោក​បាន​កត់​សម្គាល់​ថា ករណី​គ្រុន​ផ្តាសាយ​បក្សី​នេះ​មាន​និន្នាការ​កើន​ឡើង នៅ​ក្នុង​ខែ​ត្រជាក់​ឆ្នាំ​នេះ ​ហើយ​កម្ពុជា​បច្ចុប្បន្ន​កំពុង​មាន​អាកាស​ធាតុ​ត្រជាក់។

លោក​បន្ត​ថា មន្រ្តី​សុខាភិបាល​កំពុង​ធ្វើ​ការ​ជាមួយ​វិទ្យាស្ថាន​ប៉ាស្ទ័រ កម្ពុជា ដើម្បី​ស្វែង​យល់​អំពី​ករណី​នៃ​ការ​កើត​មាន​ថ្មី​នេះ។

លោក Krishnan ថ្លែងថា ការ​រាល​ដាល​នៃ​វីរុស​នេះ​នឹង​ជា​ក្តី​បារម្ភ​ជា​ពិសេស​ ខណៈ​ប្រជាជន​ចូល​មក​រាជធានី​ច្រើន​ឡើងៗ ក្នុង​ពិធី​ដង្ហែ​និង​ថ្វាយ​ព្រះ​ភ្លើង​ព្រះ​បរមសព​សម្តេច​ឪ។

តាម ការ​សិក្សា​ក្នុង​ទិន្នានុប្បវត្តិ​Emerging Infectious Diseases ​ក្នុង​ខែ​កុម្ភៈ អំឡុង​ដែល​វីរុស​នោះ​កើន​ដល់​កម្រិត​ខ្ពស់​បំផុត​នោះ គឺ​នៅ​មុន​ចូល​ឆ្នាំ​ខ្មែរ ជា​ពេល​ដែល​ការ​ដឹក​ជញ្ជូន​និង​ទិញ​លក់​មាន់​ពេញ​ក្នុង​ប្រទេស។​ការ​ដឹក ​សត្វ​ទាំង​រស់ នឹង​ឆ្លង​ពី​ផ្សារ​មួយ​ទៅ​ផ្សារ​មួយ អាច​​រួម​ចំណែក​ក្នុង​ការ​ឆ្លង​រាល​ដាល​នៃ​វីរុស​នេះ​៕ TK/PS

អត្ថបទគួរចាប់អារម្មណ៍