ភ្នំពេញៈ លោក ព្រំ យ៉ន ប្រធានការិយាល័យបង្ការ និងពន្លត់អគ្គិភ័យរាជធានីភ្នំពេញកាលពីម្សិលមិញបានឲ្យដឹងថា កុមារា សុខ ចាន់សម្បត្តិ អាយុ ៦ ឆ្នាំ និងប្អូនស្រីរបស់គេឈ្មោះ សុខ ចាន់អារីយា អាយុ ៤ ឆ្នាំត្រូវបានកម្លាំងនគរបាលកងពន្លត់អគ្គិភ័យរាជធានីភ្នំពេញរួមសហការជាមួយកម្លាំងនគរបាលប៉ុស្តិ៍រដ្ឋបាលសង្កាត់ឫស្សីកែវជួយអន្តរាគមន៍រំដោះចេញបានដោយជោគជ័យពីក្នុងបន្ទប់ផ្ទះល្វែងមួយដែលកំពុងត្រូវបានភ្លើងឆាបឆេះយ៉ាងសន្ធោសន្ធៅដែលហេតុការណ៍នេះបានកើតឡើងនៅវេលាម៉ោង ២ រំលងអធ្រាត្រទី ១៥ ខែកុម្ភៈ ឆ្នាំ ២០២០។
លោក យ៉ន បានថ្លែងថា៖ «កុមារា-កុមារីទាំង ២ នាក់បងប្អូនដេកនៅក្នុងបន្ទប់មួយដាច់ដោយឡែកពីឪពុកម្ដាយរបស់ពួកគេ។ នៅពេលមានភ្លើងឆាបឆេះចូលទៅក្នុងផ្ទះ ឪពុកម្ដាយរបស់ពួកគេបានទៅគោះទ្វារដាស់ពួកគេ តែពួកគេភ័យខ្លាំងពេកមិនអាចបើកគន្លឹះទ្វារបានក៏ជាប់នៅក្នុងបន្ទប់នោះរហូតដល់សមត្ថកិច្ចនគរបាលកងពន្លត់អគ្គិភ័យយើងទៅដល់បានបាញ់ទឹកស្រោចទៅលើបន្ទប់នោះ ហើយកម្លាំងនគរបាលមូលដ្ឋានសង្កាត់ឫស្សីកែវចូលអន្តរាគមន៍គាស់ទម្លាយទ្វារ នាំពួកគេចេញមកក្រៅបានដោយជោគជ័យ និងដោយគ្មានរបួសអ្វីទាំងអស់»។
លោក យ៉ន បានបន្តថា ដោយឡែកនៅថ្ងៃដដែលនោះស្រាប់តែមានសេចក្ដីរាយការណ៍ពីអាជ្ញាធរមូលដ្ឋានក្នុងភូមិត្រពាំងថ្លឹង ២ សង្កាត់ចោមចៅ ១ ខណ្ឌពោធិ៍សែនជ័យថា មានករណីគ្រោះអគ្គិភ័យកើតឡើងទៀត។ នៅក្នុងប្រតិបត្តិការបាញ់ទឹកពន្លត់អគ្គិភ័យនៅក្នុងមូលដ្ឋានសង្កាត់ចោមចៅ ១ ខណ្ឌពោធិ៍សែនជ័យ មន្ត្រីនគរបាលកងពន្លត់អគ្គិភ័យរាជធានីភ្នំពេញម្នាក់ឈ្មោះ កៃ តុលា ត្រូវបានដែករនាំងបង្កាន់ដៃផ្ទះល្វែងបាក់ធ្លាក់លើបង្កឲ្យរងរបួសដៃស្ដាំ មុតរយះដេរ ៥ ថ្នេរផងដែរ។
លោក យ៉ន បានឲ្យដឹងថា ក្នុងនោះទីតាំងទី ១ ស្ថិតនៅភូមិសាមគ្គី សង្កាត់-ខណ្ឌឫស្សីកែវបានឆេះខូចខាតទាំងស្រុងនូវផ្ទះជួល ១ ខ្នងមាន ៨ បន្ទប់ និងប៉ះពាល់ដល់ផ្ទះអ្នកជិតខាងចំនួន ៤ ខ្នង និងសាលារៀនរបស់សហគមន៍ជនជាតិវៀតណាមចំនួន ២ បន្ទប់។ ចំណែកទីតាំងទី ២ ស្ថិតនៅភូមិត្រពាំងថ្លឹង ២ សង្កាត់ចោមចៅ ១ ខណ្ឌពោធិ៍សែនជ័យបានបង្កឲ្យផ្ទះប្រជាពលរដ្ឋចំនួន ៤ ល្វែងរងការឆេះខូចខាតទាំងស្រុង និង ១ ល្វែងទៀតរងការខូចខាតមធ្យម។
លោក យ៉ន ថ្លែងថា៖ «យោងតាមការសាកសួរ និងការពិនិត្យអង្កេតនៅកន្លែងកើតហេតុក្នុងជំហានបឋមនេះ យើងសន្និដ្ឋានថា គ្រោះអគ្គិភ័យទាំង ២ ទីតាំងខាងលើនេះបង្កឡើងដោយសារករណីផ្ទុះឆ្លងចរន្តអគ្គិសនី»៕