.jpg)
បន្ទាយមានជ័យៈ មន្ត្រីយោធា និងពលរដ្ឋជិត ២០ នាក់ តំណាងឲ្យជនរងគ្រោះជាង ១០០ នាក់ បាននាំគ្នាតវ៉ានិងដាក់ពាក្យបណ្តឹងទៅអធិការនគរបាលស្រុកព្រះនេត្រព្រះ ខេត្តបន្ទាយមានជ័យ ដើម្បីទាមទារឱ្យភរិយាលោកផ្កាយ ២ ដែលធ្វើជាមេតុងទីន ចេញមុខដោះស្រាយ បន្ទាប់ពីបានប្រមូលលុយជិត ៣០ ម៉ឺនដុល្លា រត់គេចខ្លួន។
លោក ប៉ែន ចន្ទី ភេទប្រុស អាយុ ៥៥ ឆ្នាំ ជាមន្ត្រីយោធាកងពលតូចថ្មើរជើងលេខ ៥១ នៅស្រុកព្រះនេត្រព្រះ ដែលជាជនរងគ្រោះបានប្រាប់សារព័ត៌មានក្នុងស្រុកពីថ្ងៃអាទិត្យថា សមាជិកតុងទីនដែលមកតវ៉ាក្នុងពេលនេះ គឺមានគ្នាជិត ២០ នាក់ តំណាងឲ្យសមាជិកជាង ១០០ នាក់ បានចាញ់បោកមេតុងទីនដែលវេចលុយជិត ៣០ ម៉ឺនដុល្លារ រត់គេចខ្លួន។
លោកបន្តថា មេតុងទិន រូបនោះ មានឈ្មោះ សុក ឃឿន ហៅ ពៅ អាយុ ៣៦ ឆ្នាំ ជាភរិយាមន្ត្រីយោធាថ្នាក់ឧត្តមសេនីយ៍ទោក្នុងយោធភូមិភាគ ៤ នៅខេត្តសៀមរាប។
លោកបញ្ជាក់ថា៖ «(ពួកយើង) ហ៊ានលេងតុងទីនជាមួយអ្នកស្រី សុក ឃឿន ហៅ ចែពៅ នេះព្រោះគិតថា ប្តីរបស់គាត់មានឋានន្តរស័ក្តិជាឧត្តមសេនីយ៍ទោ ១ រូប មានតួនាទីអាចជឿជាក់ និងទុកចិត្ត តែផ្ទុយទៅវិញត្រូវបានបោកប្រាស់រត់ចោលស្រុក»។
ចំណែកលោក សេង សារឿន ភេទប្រុសអាយុ ៤០ ឆ្នាំ ជាជាងទង ដែលចាញ់បោកប្រាក់ដែរនោះ បានប្រាប់អ្នកសារព័ត៌មានដែរថាមូលហេតុដែលសមាជិកតវ៉ានេះ ព្រោះពេលដឹងច្បាស់ភ្លាមក៏នាំគ្នាតវ៉ាសុំឱ្យមេតុងទីនឈ្មោះ ចែពៅ ចូលខ្លួនមកដោះស្រាយគ្នា ប៉ុន្តែគាត់មិនចេញមុខទេ ហើយចុងក្រោយពួកគាត់ទទួលបានព័ត៌មានថា មេតុងទីនរូបនេះ បានវេចលុយរត់ចេញពីផ្ទះបិទទ្វារចោល។
ភ្នំពេញ ប៉ុស្តិ៍ មិនអាចស្វែងរកប្រភព ដើម្បីទាក់ទងទៅកាន់ពលរដ្ឋដែលបានអះអាងថាបានចាញ់បោកខាងលើនេះនិង អ្នកស្រី សុក ឃឿន ហៅ ចែពៅ ដែលរងការចោទប្រកាន់នេះបានទេ កាលពីម្សិលមិញ។
ប៉ុន្តែបើតាម លោក ឡុង ធន ក្រុមប្រឹក្សាឃុំជប់វ៉ារី ដែលបានដឹងរឿងរ៉ាវនេះ បានប្រាប់ភ្នំពេញប៉ុស្តិ៍នៅថ្ងៃទី ៧ កញ្ញា នេះថា ពលរដ្ឋដែលចាញ់បោកភាគច្រើន គឺជាមន្ត្រីយោធាកងពលតូចថ្មើរជើងលេខ ៥១ នៅស្រុកព្រះនេត្រព្រះ ចំណែកឯកមេតុងទិន ក៏មានផ្ទះជាប់របងកងពលតូចថ្មើរជើងលេខ ៥១ នេះដែរ។
លោកបន្តថា ពលរដ្ឋរងគ្រោះទាំងនោះ គឺពិតជាបានចាញ់បោកមេតុងទិនរូបនេះពិតប្រាកដមែន ហើយក្រោយការចាញ់បោកនេះ ពលរដ្ឋទាំងនោះ បានប្រមូលផ្តុំគ្នាដាក់ពាក្យបណ្តឹងទៅអធិការនគរបាលស្រុកព្រះនេត្រព្រះ ដើម្បីសុំឲ្យជួយរកយុត្តិធម៌ និងស្នើឲ្យចាប់ខ្លួនមេតុងទិនរូបនេះ មកសងប្រាក់របស់ពួកគេវិញ។
លោកបញ្ជាកក់ថា៖ «ខ្ញុំដឹងខ្លះៗថា មេតុងទិននេះ រត់បាត់ទៅហើយក៏ជាប់លុយ ជាប់កាក់អ្នកនៅហ្នឹង។ ពួកគាត់ ដែលចាញ់បោក គឺជាគ្រួសារនាយទាហាន និងអាជីវកររកស៊ីយើងនៅក្នុងមូលដ្ឋាន។ តុងទិនហ្នឹង សម្បូរគេអ្នកធំ អ្នកអីលេងដែរ ហើយចាញ់បោកប្រពន្ធមេទាហានហ្នឹង មានអ្នកខ្លះ ចូលម៉ឺនដុល្លាដែរ ហើយអ្នកខ្លះ ក៏ចាញ់បោកតិចទេ ដោយគេលេងតាមក្បាលតូចក្បាលធំ»។
លោក មាស រិទ្ធី អធិការនគរបាលស្រុកព្រះនេត្រព្រះ បានប្រាប់ភ្នំពេញប៉ុស្តិ៍្កនៅថ្ងៃទី ៧ កញ្ញា នេះដែរថា សមត្ថកិច្ចពិតជាបានទទួលពាក្យបណ្តឹងពីជនរងគ្រោះ ទាំងនោះមែន។ លោកបន្តថា ដោយសារជនសង្ស័យរត់ចោលផ្ទះ សមត្ថកិច្ចកំពុងស្រាវជ្រាវលើសំណុំរឿងនេះ ដើម្បីស្វែងរកជនសង្ស័យ មកដោះស្រាយតាមនីតិវិធីច្បាប់។
លោកបញ្ជាក់ថា៖ «ចំពោះពាក្យបណ្តឹងនេះ គឺជនបង្ក មិននៅទេ រត់ចោលស្រុកបាត់ហើយ ពាក់ព័ន្ធនឹងរឿងលែងតុងទិនហ្នឹង។ ខ្ញុំបានទទួលពាក្យបណ្តឹង និងរាយការណ៍ដើម្បីសុំយោបល់ពីថ្នាក់បន្តទៀត ហើយយើងមិនទាន់ដឹងច្បាស់ទេ ព្រោះមានតែតាមការអះអាងរបស់ជនរងគ្រោះ ហើយជំនាញនឹងបន្តស្រាវជ្រាវ»៕
