.jpg)
ទិដ្ឋភាពផ្ទះជនរងគ្រោះក្រោយពេលភ្លើងឆេះ។ រូបថត ហ្វេសប៊ុក
ព្រៃវែងៈ ស្ត្រីជរាម្នាក់បានស្លាប់ដោយសារភ្លើងឆេះផ្ទះកាលពីយប់ថ្ងៃទី ១៧ ឧសភា នៅក្នុងភូមិស្នាយព្រឹម ឃុំ អង្គររាជ ស្រុកព្រះស្តេច ខេត្តព្រៃវែង ដែលឧប្បត្តិហេតុនេះបណ្ដាលមកពីកូនៗរបស់គាត់បង្កាត់ភ្លើងដាំបាយចោល ហើយបានដើរចេញទៅផឹកស្រានៅផ្ទះអ្នកជិតខាង។
លោក ជ័យ សេងហ៊ាង អធិការនគរបាលស្រុកព្រះស្តេចឲ្យដឹងពីម្សិលមិញថា លោកយាយរងគ្រោះនោះឈ្មោះ អ៊ាង សូត្រ អាយុ ៨៦ ឆ្នាំ រស់នៅក្នុងភូមិឃុំកើតហេតុខាងលើ។ គាត់ត្រូវបានភ្លើងឆេះផ្ទះ ហើយរត់មិនរួចក៏ស្លាប់ ដែលហេតុការណ៍នេះបានកើតឡើងនៅម៉ោងជាង ៩ យប់ថ្ងៃទី ១៧ ឧសភា ឆ្នាំ ២០២០។
លោកបានថ្លែងតាមសម្តីស្ត្រីម្នាក់ជាកូនស្ត្រីរងគ្រោះថា ផ្ទះរបស់គាត់គឺធ្វើពីឈើប្រក់ស័ង្កសីទំហំ ៤ គុណនឹង ៦ ម៉ែត្រ និង មានកម្ពស់ជាង ១ ម៉ែត្រ ដែលនៅក្នុងផ្ទះនោះ មានម្តាយចាស់ជរាស្នាក់នៅដោយគាត់មិនអាចក្រោកដើររួចទេ។ សព្វថ្ងៃគាត់រកស៊ីចិញ្ចឹមម្តាយចាស់ជរាជាមួយនឹងប្តីរបស់គាត់។ នៅយប់កើតហេតុ គាត់បានបង្កាត់ភ្លើងចង្ក្រានដាំបាយ ហើយនាំប្តីចេញទៅផឹកស្រានៅផ្ទះអ្នកជិតខាងដោយទុកម្តាយឲ្យដេកនៅផ្ទះម្នាក់ឯង។
លោកបន្តថា លុះមួយសន្ទុះក្រោយមកគេឃើញភ្លើងឆាបឆេះពេញផ្ទះ ហើយអ្នកភូមិបាននាំគ្នាជួយពន្លត់ដែរ ប៉ុន្តែដោយសារភ្លើងឆេះខ្លាំងពេកពលរដ្ឋមិនអាចជួយពន្លត់បាន ព្រោះនៅក្រោមផ្ទះនោះមានដាក់គំនរចំបើងដែលរឹតតែឆាបឆេះខ្លាំងឡើងមិនអាចជួយបាន។
លោកអធិការបន្តថា៖ «ផ្ទះនោះមានគំនរចំបើងនៅក្រោមផ្ទះអ៊ីចឹងហើយភ្លើងឆេះខ្លាំងណាស់បើទោះពន្លត់ក៏មិនឈ្នះដែរ។ ករណីនេះខ្ញុំតែងដើរប្រាប់កុំឲ្យមានគំនរចំបើងតែអ្នកខ្លះមិនស្តាប់ខ្ញុំទេ»។
លោកបានបន្តថា បើតាមអ្នកជិតខាងថា ស្ត្រីជាកូនជនរងគ្រោះ និងប្តីគឺជាមនុស្សស្រវឹងខួប ហើយនៅយប់ថ្ងៃកើតហេតុនោះ ដោយសារពួកគេបង្កាត់ភ្លើងចង្ក្រាន ហើយដើរចោលផ្ទះ ទុកស្ត្រីរងគ្រោះឲ្យដេកម្នាក់ឯង ហើយដោយសារគាត់ដើរមិនរួចផងក៏បណ្តាលឲ្យភ្លើងឆេះស្លាប់បែបនេះ។
លោកបានបន្ថែមថា ក្រោយកើតហេតុសមត្ថកិច្ចរបស់លោកបានចុះដល់ទីតាំងនោះ ហើយបានធ្វើកោសល្យវិច័យក្រែងមាននរណាលួចដុត។ ប៉ុន្តែក្រោយពីអង្កេតយ៉ាងយកចិត្តទុកដាក់ពីសមត្ថកិច្ចជំនាញបង្ហាញថា ផ្ទះនោះឆេះ ដោយសាររាលពីភ្លើងចង្ក្រានពិតមែន មិនមែនមកពីអ្វីផ្សេងទេ។ ក្រោយអង្កេតចប់សព្វគ្រប់ សមត្ថកិច្ចរបស់លោកបានប្រគល់សពស្ត្រីរងគ្រោះឲ្យទៅក្រុមគ្រួសារធ្វើបុណ្យតាមប្រពៃណី។
លោកបានបញ្ជាក់ថា ដោយសារតែស្ថានភាពគ្រួសារស្ត្រីរងគ្រោះទីទ័លក្រខ្លាំងពេក អាជ្ញាធរស្រុកព្រះស្តេចបានជួយឧបត្ថមអង្ករ និងសម្ភារប្រើប្រាស់មួយចំនួន ដើម្បីឲ្យក្រុមគ្រួសារស្ត្រីរងគ្រោះយកទៅចាត់ចែងធ្វើបុណ្យជូនសព និងមានទាំងព្រះសង្ឃជួយឧបត្ថម្ភទៀតផង៕
