.jpg)
ជនសង្ស័យដែលកាប់ឪពុកបង្កើតស្លាប់។ រូបថត នគរបាល
កំពង់ចាមៈ យុវជនម្នាក់ត្រូវបាននគរបាល ស្រុកស្ទឹងត្រង់ចាប់បញ្ជូនទៅស្នងការដ្ឋាន នគរបាលខេត្តកំពង់ចាមកាលពីរសៀលថ្ងៃម្សិលមិញ បន្ទាប់ពីជននេះបានប្រើពូថៅ កាប់ឪពុកបង្កើតរបស់ខ្លួនស្លាប់ដោយសារតែខឹងឪពុកស្តីបន្ទោសរឿងដើរលេងយប់ ដែលត្រូវសមត្ថកិច្ចចាប់ខ្លួនភ្លាមៗកាលពីថ្ងៃទី ៥ ខែមីនានៅភូមិក្បាលអូរ ឃុំមេសរជ្រៃ ស្រុកស្ទឹងត្រង់។
លោក ប៉ាក ជាតិ អធិការស្រុកស្ទឹងត្រង់ថ្លែងពីម្សិលមិញថា ជនសង្ស័យឈ្មោះ លឹម ឡឹង អាយុ ២៣ ឆ្នាំ រីឯជនរងគ្រោះជាឪពុក ឈ្មោះ ឡៃ លឹម អាយុ ៦៣ ឆ្នាំ។ លោកប្រាប់ថា៖ «ជនម្នាក់នោះយើងបានបំពេញនីតិវិធីសាកសួរចប់ហើយព្រោះបទល្មើសនេះ ជនបង្កប្រព្រឹត្តជាក់ស្តែងសម្លាប់លើឪពុកខ្លួន»។
លោក ប៉ាក ជាតិ បានប្រាប់តាមសម្តីសាច់ញាតិថា ជនសង្ស័យបានទៅធ្វើការនៅប្រទេសថៃយូរឆ្នាំដែរហើយហើយបានត្រឡប់មករស់នៅជាមួយក្រុមគ្រួសារវិញ ប៉ុន្តែក្រោយពីគាត់ត្រឡប់មកពីប្រទេសថៃវិញ គេឃើញគាត់មានអារម្មណ៍ហាក់មិននឹងនរហើយក៏ជាមនុស្សគ្មានមុខរបរពិតប្រាកដដែរ។ មុនកើតហេតុជនសង្ស័យត្រូវបានជនរងគ្រោះជាឪពុកបានស្តីបន្ទោសបន្តិចបន្តួចពីរឿងដើរមិនចូលផ្ទះ និងមិនជួយធ្វើកិច្ចការផ្ទះ។ លុះដល់ម៉ោងជាង ១១ យប់ ថ្ងៃទី ៥ ខែមីនា ឆ្នាំ ២០២០ ខណៈជនរងគ្រោះកំពុងសម្រានលក់ក្នុងអង្រឹងក្រោមផ្ទះស្រាប់តែជនបង្កបានយកពូថៅកាប់ក្បាលពីក្រោយ ១ ពូថៅ បណ្តាលឲ្យផុងលលាដ៍ក្បាល និង ១ ពូថៅទៀតត្រូវផ្នែកលើមុខត្រង់ចិញ្ចើមខាងស្តាំ។
លោកប្រាប់បន្តថា ជនសង្ស័យក្រោយពីបង្កហេតុហើយមិនបានរត់គេចខ្លួនទៅណាទេ ហើយប្រជាពលរដ្ឋបានរាយការណ៍ប្រាប់សមត្ថកិច្ចទើបសមត្ថកិច្ចចុះទៅចាប់ខ្លួននៅកន្លែងកើតហេតុនៅយប់ថ្ងៃកើតហេតុនោះតែម្តង។
ក្រោយចាប់ខ្លួនជនសង្ស័យបានប្រាប់សមត្ថកិច្ចថាមូលហេតុដែលរូបគេសម្លាប់ឪពុករបស់ខ្លួនដូច្នេះ ដោយសារគេខឹងនឹងឪពុកស្តីបន្ទោសរឿងដើរលេងពេលយប់។ ក្រោយពីសមត្ថកិច្ចពិនិត្យមើលទឹកនោមឃើញលទ្ធផលបង្ហាញថាជនសង្ស័យមានសារធាតុញៀននៅក្នុងខ្លួនក្នុងកម្រិតច្រើន។
លោក ចាន់ ហោ អនុប្រធាន ការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពង់ចាមថ្លែងថា៖ «ជានីតិវិធី នៅពេលសមត្ថកិច្ចស្រុកបញ្ជូនជនសង្ស័យដល់ការិយាល័យខ្ញុំ បើរបាយការណ៍មិនទាន់ពេញលេញខាងខ្ញុំនឹងសាកសួរជនសង្ស័យបន្ថែមទើបបញ្ចូនជនសង្ស័យបន្តទៅតុលាការ»។
លោកស្រី ធីម ណារិន អ្នកសម្របសម្រួលសមាគមការពារសិទ្ធិមនុស្សអាដហុកខេត្តកំពង់ចាមបានថ្លែងកាលពីម្សិលមិញថា នៅចុងឆ្នាំ ២០១៩ និងដើមឆ្នាំ ២០២០ នេះ ករណីហិង្សាធ្ងន់ធ្ងរក្នុងគ្រួសារហាក់កើតមានច្រើន។ ចំពោះមូលហេតុដែលជនបង្កចេះតែប្រព្រឹត្តហិង្សាបែបនេះលោកស្រីសង្កេតឃើញថា មកពីពួកគេមិនបានចូលរួមប្រជុំនៅតាមសហគមន៍ដែលរៀបចំដោយមន្ត្រីអាជ្ញាធររដ្ឋាភិបាលដែលតែងចុះផ្សព្វផ្សាយអប់រំជាប្រចាំ រួមទាំងអង្គការរបស់លោកស្រីផងដែរ។
លោកស្រីថ្លែងបន្តថា៖ «យើងឃើញថា សមត្ថកិច្ចបានចាត់វិធានការតាមនីតិវិធី ដោយបានចាប់ឃាត់ខ្លួនជនបង្កបញ្ជូនទៅតុលាការដើម្បីផ្តន្ទាទោសតាមច្បាប់»។
លោកស្រីបន្តថា តាមដែលលោកស្រីសង្កេតមើលឃើញថា ពាក់ព័ន្ធករណីបែបនេះទាំងតុលាការទាំងនគរបាលយុត្តិធម៌ហាក់បីដូចជាមានចំណាត់ការល្អ ចំពោះជនល្មើស។ លោកស្រីកត់សម្គាល់ថា ជនប្រព្រឹត្តបែបនេះអាចកើតឡើងមកពីកត្តាជាច្រើន ដូចជាសេពគ្រឿងស្រវឹង និងប្រើប្រាស់គ្រឿងញៀន និងរួមផ្សំមកពីភាពអវិជ្ជារបស់ពួកគេ ដែលមិនបានរៀនសូត្រ៕
