The Phnom Penh Post Search

Search form




Logo of Phnom Penh Post newspaper Phnom Penh Post - កូរ៉េខាងត្បូង គ្រោង​បង្កើត​មជ្ឈមណ្ឌល​កោសល្យវិច័យ​ ១ ​នៅ​កម្ពុជា ដើម្បី​បណ្តុះបណ្តាល​ចៅក្រម​ព្រះរាជអាជ្ញា




កូរ៉េខាងត្បូង គ្រោង​បង្កើត​មជ្ឈមណ្ឌល​កោសល្យវិច័យ​ ១ ​នៅ​កម្ពុជា ដើម្បី​បណ្តុះបណ្តាល​ចៅក្រម​ព្រះរាជអាជ្ញា

Content image - Phnom Penh Post
ជំនួប​រវាង​ភាគី​កូរ៉េ និង​ឯកអគ្គរាជទូត​កម្ពុជា​ពីថ្ងៃ​ទី​ ២៩ កញ្ញា​។ រូបថត សហការី

កូរ៉េខាងត្បូង គ្រោង​បង្កើត​មជ្ឈមណ្ឌល​កោសល្យវិច័យ​ ១ ​នៅ​កម្ពុជា ដើម្បី​បណ្តុះបណ្តាល​ចៅក្រម​ព្រះរាជអាជ្ញា

ភ្នំពេញៈ មជ្ឈមណ្ឌល​កោសល្យវិច័យ​ ១ ​នឹង​មាន​វត្តមាន​នៅ​កម្ពុជា ក្រោម​កិច្ចសហប្រតិបត្តិការ​ជាមួយ​រដ្ឋាភិបាល​កូរ៉េ​ខាងត្បូង​ក្នុង​ទំហំ​ទឹកប្រាក់​ប្រមាណ​ជិត​ ៥០ ​លាន​ដុល្លារ ដើម្បី​បណ្ដុះបណ្ដាល​ចៅក្រម ព្រះរាជអាជ្ញា និង​សមត្ថកិច្ច​ពាក់ព័ន្ធ​នឹង​ការស្រាវជ្រាវ​វិភាគ​កោសល្យវិច័យ​ឧក្រិដ្ឋកម្ម​លើ​ស្ត្រី គ្រឿងញៀន និង​ភេរវកម្ម ក្រោយពី​មាន​សំណើ​ផ្លូវការ​ពី​រដ្ឋាភិបាល​។

លោក​ ឡុង ឌីម៉ង់ ឯកអគ្គរាជទូត​កម្ពុ​ជាប្រចាំ​កូរ៉េ​ខាង​ត្បូង​ប្រាប់ ភ្នំពេញ​ប៉ុស្ដិ៍​ពី​ម្សិលមិញ​ថា ភាគី​កូរ៉េខាងត្បូង​នឹង​ជួយ​សាងសង់​អគារ​មជ្ឈមណ្ឌល​កោសល្យវិច័យ​ ១ ​នៅ​កម្ពុជា​។ ជាមួយ​គ្នា​នេះ កូរ៉េ ក៏​នឹង​ជួយ​លើ​ការបណ្ដុះបណ្ដាល​ដល់​ចៅក្រម ព្រះរាជអាជ្ញា និង​សមត្ថកិច្ច​ទាំងឡាយ​ក្នុង​កិច្ចការងារ​ស្រាវជ្រាវ​វិភាគ​កោសល្យវិច័យ​សំដៅ​ប្រយុទ្ធ​ប្រឆាំង​បទឧក្រិដ្ឋ រួមមាន ឧក្រិដ្ឋកម្ម​លើ​នារី​ភេទ គ្រឿងញៀន ភេរវកម្ម និង​អ៊ីនធឺណិត​ជាដើម​។

បើ​តាម​មន្ត្រី​ជាន់ខ្ពស់​ការទូត​រូបនេះ​អគារ​មជ្ឈមណ្ឌល​កោសល្យវិច័យ​នឹង​មាន​បំពាក់​សម្ភារ​បរិក្ខារ​ទំនើបៗ​។ ប៉ុន្ដែ​មុន​ការចាប់ផ្ដើម​ដំណើរការ​សាងសង់​អគារ​នេះ ត្រូវ​តែ​មាន​សំណើ​ស្នើសុំ​ជា​ផ្លូវការ​ ១ ​ពី​រាជរដ្ឋាភិបាល​កម្ពុជា​សិន​។ ការងារ​សាងសង់​នេះ​នឹង​ត្រូវ​ប្រើប្រាស់​ប្រាក់កម្ចី​ពី​រដ្ឋាភិបាល​កូរ៉េ​ខាងត្បូង​ប្រមាណ​ចម្លោះ​ពី ៤៨ ទៅ​ ៥០ ​លាន​ដុល្លារ​អាមេរិក​។

លោក​ ឌីម៉ង់ ​បញ្ជាក់​ថា​៖ «​រាជរដ្ឋាភិបាល​យើង​មាន​ចំណាប់អារម្មណ៍​ក្នុង​ការសាងសង់ ឬ​ត្រូវការ​មជ្ឈមណ្ឌល​កោសល្យវិច័យ​ហ្នឹង​ជា​ចាំបាច់​។ ដោយយោង​ទៅលើ​កិច្ចសហប្រតិបត្តិការ​រវាង​កូរ៉េ​ជាមួយ​បណ្ដា​ប្រទេស​ក្នុង​តំបន់​ទន្លេមេគង្គ ក៏ដូចជា​ក្នុងជំនួប​កំពូល​មេគង្គ-កូរ៉េ​ កាលពី​ឆ្នាំ​ ២០១៩ ​នៅ​ទីក្រុង​ប៊ូសាន​ប្រទេស​កូរ៉េ គឺ​យើង​ក៏បាន​លើកឡើង​អំពី​ការប្រឆាំង​បទឧក្រិដ្ឋ​គ្រប់​ប្រភេទ​ក្នុង​តំបន់​ដែរ ប៉ុន្ដែ​គ្រាន់តែ​ភាគី​កម្ពុជា​មិន​ស្នើសុំ​ជា​ផ្លូវការ​ទៅ​ភាគី​កូរ៉េ​»​។

លោក​បន្ថែមថា រាជរដ្ឋាភិបាល​កម្ពុជា​តាមរយៈ​ក្រសួង​ការបរទេស និង​សហប្រតិបត្តិការ​អន្តរជាតិ ក្រសួងយុត្តិធម៌ ក្រសួងមហាផ្ទៃ និង​ក្រសួង​សេដ្ឋកិច្ច និង​ហិរញ្ញវត្ថុ ត្រូវ​ពិភាក្សាគ្នា ដើម្បី​សម្រេច​ស្នើសុំ​ជាគោលការណ៍​ទៅ​រដ្ឋាភិបាល​កូរ៉េខាងត្បូង​ជាមុន​សិន ទើប​អាច​អនុវត្ត​នីតិវិធី​ស្នើសុំ​ហិរញ្ញប្បទាន​ពី​រដ្ឋាភិបាល​កូរ៉េ ដើម្បី​ដំណើរការ​សាងសង់​។

នៅពេល​ទាក់ទង​ពី​ម្សិលមិញ អ្នកនាំពាក្យ​ក្រសួង​យុត្តិធម៌​លោក​ ជិន ម៉ាលីន មិន​ធ្វើ​អត្ថាធិប្បាយ​ជុំវិញ​គម្រោង​នេះ​ទេ ដោយ​លោក​ប្រាប់ថា​មិនទាន់​ទទួល​បាន​ដំណឹង​ពី​ការបង្កើត​ឱ្យ​មាន​មជ្ឈមណ្ឌល​កោសល្យវិច័យ​នេះ​នៅ​ប្រទេស​កម្ពុជា​។

ចំណែក​លោក​ ខៀវ សុភ័គ អ្នកនាំពាក្យ​ក្រសួង​មហាផ្ទៃ និង​លោក​ កុយ គួង អ្នកនាំពាក្យ​ក្រសួង​ការបរទេស និង​សហប្រតិបត្តិការ​អន្តរជាតិ​ពី​ម្សិលមិញ​មិនអាច​ទាក់ទង​សុំ​ការបញ្ជាក់​បន្ថែម​ជុំវិញ​គម្រោង​នេះ​ទេ​។

ប៉ុន្ដែ​បើ​តាម​លោក​ ឡុង ឌីម៉ង់ ឱ្យដឹង​ដែរ​ថា នៅក្នុង​អំឡុង​ពាក់កណ្ដាល​ខែតុលា ឆ្នាំ​ ២០២០ ​ខាងមុខ​នេះ លោក​នឹង​ដឹកនាំ​សហការី​ចុះ​ទៅ​ធ្វើ​ទស្សនកិច្ច​សិក្សា​នៅ​មជ្ឈមណ្ឌល​កោសល្យវិច័យ​របស់​កូរ៉េ​ផ្ទាល់ ដើម្បី​សិក្សា​លម្អិត​ពី​គម្រោង​នេះ និង​ដាក់​របាយការណ៍​ជូន​ថ្នាក់ដឹកនាំ​កម្ពុជា​។

លោក​ ឡុង ឌីម៉ង់ និង​សហការី​កាលពី​ថ្ងៃទី​ ២៩ ខែកញ្ញា បាន​ទទួល​ជួបពិភាក្សា​ការងារ​ជាមួយ​ថ្នាក់ដឹកនាំ​សម្ព័ន្ធ​ផ្នែក​ច្បាប់​ដែល​ដឹកនាំ​ដោយ​លោក ​Joong Seok SEO អតីត​ប្រធាន​មជ្ឈមណ្ឌល​ស្រាវជ្រាវ និង​កោសល្យវិច័យ​លើ​បទឧក្រិដ្ឋ​គ្រប់​ប្រភេទ​នៃ​ក្រសួងមហាផ្ទៃ និង​សុវត្ថិភាព​នៃ​ប្រទេស​កូរ៉េ​នៅ​ស្នាក់ការ​ស្ថានទូត​កម្ពុជា​ប្រចាំ​កូរ៉េខាងត្បូង​។

កិច្ចប្រជុំ​បាន​ពិភាក្សា​លើ​កិច្ចសហប្រតិបត្តិ​ការយោគយល់​គ្នា និង​ការចូលរួម​ជួយ​អភិវឌ្ឍ​មជ្ឈមណ្ឌល​ស្រាវជ្រាវ និង​កោសល្យវិច័យ​លើ​បទឧក្រិដ្ឋ​នៅ​កម្ពុជា​ដែល​ប្រទេស​កូរ៉េ​កំពុង​មាន​សមត្ថភាព​ខ្ពស់ និង​ជឿនលឿន​លើ​វិស័យ​នេះ ស្រប​ពេល​ដែល​កម្ពុជា​កំពុងមាន​តម្រូវការ​អភិវឌ្ឍន៍​កិច្ចការ​នេះ​ឱ្យបាន​ល្អប្រសើរ​។

លោក អំ សំអាត ប្រធាន​ផ្នែក​ឃ្លាំមើល និង​ការពារ​សិទ្ធិមនុស្ស​នៃ​អង្គការ​ (LICADHO) បាន​ថ្លែង​ពី​ម្សិលមិញ​ថា តាម​ការសង្កេត​របស់​លោក​គឺ​ព្រះរាជអាជ្ញា និង​ចៅក្រម​តែងតែ​ពឹង​ផ្អែកទៅលើ​កំណត់ហេតុ ឬ​របាយការណ៍​របស់​សមត្ថកិច្ច​នគរបាល​ជំនាញ​កោសល្យវិច័យ ដោយ​មិនបាន​ស្រាវជ្រាវ និង​ធ្វើ​កោសល្យវិច័យ​ឱ្យ​លម្អិត​បន្ថែម​លើ​នេះ​ទេ​។ នេះ​ជា​ផ្នែក​ ១ ​ក្នុង​ការធ្វើ​កំណែទម្រង់​ប្រព័ន្ធ​តុលាការ​ដែរ ព្រោះ​បច្ចុប្បន្ន​មិនទាន់​មាន​ចៅក្រម ឬ​ព្រះរាជអាជ្ញា​ចុះ​ធ្វើ​កោសល្យវិច័យ​លើ​សំណុំរឿង​បទឧក្រិដ្ឋ​នៅឡើយ​។

លោក​ សំអាត បាន​បញ្ជាក់ថា​៖ «​ខ្ញុំ​គាំទ្រ​ឱ្យមាន​មជ្ឈមណ្ឌល​នេះ ព្រោះ​វា​ជា​កំណែទម្រង់​ប្រព័ន្ធយុត្តិធម៌​ថ្មី​មួយ​។ អ្វីដែល​សំខាន់​ ១ ​ទៀត​គឺ​យើង​ចង់ឱ្យ​មាន​ប្រព័ន្ធ​តុលាការ​ឯករាជ្យ ដែល​ពលរដ្ឋ​មាន​ជំនឿ​ទុកចិត្ត​តាមរយៈ​ការធ្វើ​កោសល្យវិច័យ ភ័ស្ដុតាង និង​ការវិនិច្ឆ័យ​ផ្អែក​តាម​ច្បាប់​»៕

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។