.jpg)
ពលករខ្មែរនៅមណ្ឌលបណ្តុះបណ្តាលត្រៀមចេញទៅធ្វើការនៅកូរ៉េកាលពីខែមករា។ រូបថត HRD Korea in Cambodia page
តាមសេចក្តីប្រកាសរបស់មជ្ឈមណ្ឌលអភិវឌ្ឍន៍ធនធានមនុស្សនៃសាធារណរដ្ឋកូរ៉េកាលពីដើមខែមិថុនាបានជូនដំណឹងដល់ពលករ-ពលការិនី ដែលធ្លាប់បានទៅធ្វើការនៅប្រទេសកូរ៉េ ហើយមិនទាន់បានដាក់ពាក្យស្នើសុំដកប្រាក់ធានារ៉ាប់រងឲ្យមកបំពេញពាក្យនៅមជ្ឈមណ្ឌលរៀងរាល់ម៉ោងធ្វើការ។
សេចក្តីប្រកាសដដែលបន្តថា៖ «សូមបងប្អូនពលករ-ពលការិនីធ្វើការពិនិត្យ និងផ្ទៀងផ្ទាត់មើលឈ្មោះនៅក្នុងបញ្ជីដើម្បីដាក់ពាក្យស្នើសុំដកប្រាក់ធានារ៉ាប់រងរបស់បងប្អូនដោយភ្ជាប់មកជាមួយនូវលិខិតឆ្លងដែនរូបថតមួយសន្លឹក និងសៀវភៅធនាគាររបស់បងប្អូនផ្ទាល់ខ្លួន។ ប្រសិនបើគ្មានឈ្មោះនៅក្នុងបញ្ជីនេះទេ សូមបងប្អូនពលករ-ពលការិនីធ្វើការទំនាក់ទំនងមកកាន់មជ្ឈមណ្ឌលរបស់យើងខ្ញុំនោះយើងខ្ញុំនឹងធ្វើការពិនិត្យឈ្មោះជូនបងប្អូន»។
លោក ប៉ិច ស៊ីប៉ាវ បុគ្គលិកផ្នែកធានារ៉ាប់រងនៃមជ្ឈមណ្ឌលអភិវឌ្ឍន៍ធនធានមនុស្សនៃសាធារណរដ្ឋកូរ៉េបានប្រាប់ភ្នំពេញ-ប៉ុស្តិ៍ពីម្សិលមិញថា ប្រាក់ទាំងនេះគឺជាប្រាក់ដែលរដ្ឋាភិបាលកូរ៉េបានកាត់ទុកក្នុងអំឡុងពេលដែលពលករបានទៅធ្វើការនៅប្រទេសកូរ៉េហើយចំនួនទឹកប្រាក់ គឺអាស្រ័យទៅតាមពេលវេលាធ្វើការងាររបស់កម្មករនីមួយៗ។
លោកបន្ថែមថា៖ «ប្រាក់ទាំងនេះ គេកាត់ទុកនៅពេលគាត់មានបញ្ហាអ្វីទៅហើយអត់មានលុយទិញសំបុត្រយន្តហោះត្រឡប់មកវិញគឺយើងយកលុយនេះមកវិញមកប្រើប្រាស់ ហើយមួយទៀតគឺប្រាក់ដែលថៅកែបង់ឲ្យគាត់ប្រចាំខែ ឬប្រាក់បំណាច់ប្រចាំឆ្នាំដែលបានធ្វើការនៅទៅនោះ។ ប្រាក់នេះពលករអាចមកទទួលបានទាំងអស់គ្នា មិនថា គាត់រស់នៅខុសច្បាប់ មិនខុសច្បាប់អីទេ គឺគេទុកឲ្យគាត់រហូត»។
លោក ស៊ីប៉ាវ ឲ្យដឹងថា គិតត្រឹមដើមខែមិថុនា ឆ្នាំ ២០២០ នេះមានពលករចំនួន ១ ៦១៥ នាក់ មានឈ្មោះក្នុងបញ្ជី ដើម្បីដាក់ពាក្យស្នើសុំដកប្រាក់ធានារ៉ាប់រងក្នុងនោះមានពលករប្រមាណពី ១០ ទៅ ១៥ ភាគរយប៉ុណ្ណោះដែលបានមកបំពេញពាក្យដកប្រាក់រួចរាល់ ខណៈនៅមានពលករខ្មែរជាច្រើនទៀតដែលមិនទាន់បានមកទទួលប្រាក់ទាំងនេះ។
លោកបន្ថែមថាការប្រកាសឲ្យពលករដែលធ្លាប់ទៅធ្វើការនៅប្រទេសកូរ៉េមកដកប្រាក់ធានារ៉ាប់រងនេះ គឺតែងតែធ្វើឡើងជារៀងរាល់ឆ្នាំ ប៉ុន្តែនៅតែមានពលករមួយចំនួនមិនបានដឹងពីព័ត៌មាននេះ។ ដូច្នេះលោករំពឹងថា បងប្អូនពលករកម្ពុជាដែលបានដឹងព័ត៌មាននេះបន្តជួយផ្សព្វផ្សាយ និងរួសរាន់មកបំពេញពាក្យ ដើម្បីទទួលប្រាក់ទាំងនេះគ្រប់ៗគ្នា។
លោកបន្តថា៖ «ការមកដកប្រាក់នេះគឺមានភាពយឺតយ៉ាវបន្តិច ព្រោះអីមានពលករយើងខ្លះគាត់អត់ដឹងទេ។ យើងសំណូមពរឲ្យពួកគាត់ ដែលធ្លាប់ទៅធ្វើការនៅប្រទេសកូរ៉េ ឲ្យគាត់មកពិនិត្យនៅមជ្ឈមណ្ឌលអភិវឌ្ឍន៍ដោយគ្រាន់តែផ្ញើលិខិតឆ្លងដែនមកក្នុងផេចក៏បាន ហើយបើមានសល់លុយដែលមិនទាន់បានដកគឺយើងប្រាប់ត្រឡប់ទៅវិញ»។
លោក នាង តុងអ៊ីម អតីតពលករដែលធ្វើការនៅប្រទេសកូរ៉េកាលពីឆ្នាំ ២០១៧ ប្រាប់ភ្នំពេញប៉ុស្តិ៍ពីថ្ងៃពុធថាលោកបានខកខានដកប្រាក់រយៈពេល ២ ឆ្នាំមកហើយ បន្ទាប់ពីបានវិលត្រឡប់មកកាន់កម្ពុជាវិញ។ លោកបន្តថា ដំបូងឡើយលោកស្មានតែមិនអាចទទួលបានលុយនេះត្រឡប់មកវិញនោះទេ ព្រោះខកខានរយៈពេលយូរណាស់មកហើយ។
លោកបញ្ជាក់ថា៖ «ដំបូងខ្ញុំដឹងដែរ ថាគេមានកាត់លុយខ្ញុំ ប៉ុន្តែខ្ញុំមិននឹកស្មានថា កន្លងមកជាង ២ ឆ្នាំហើយខ្ញុំនៅតែអាចបើកលុយនេះបានមកវិញ។ ខ្ញុំមិនសង្ឃឹមថានឹងបានលុយនេះមកផង។ ក្នុងពេលនេះប្រាក់នេះពិតជាបានជួយខ្ញុំ និងគ្រួសារបានច្រើន ដោយបានជួយដោះស្រាយជីវភាពមួយរយៈពេលខ្លី និងអាចសល់លុយខ្លះយកទៅប្រកបមុខរបរតូចៗបាន»៕
