ភ្នំពេញៈ ប្រទេសកម្ពុជានឹងទទួលប្រាក់កម្ចីពីប្រទេសកូរ៉េខាងត្បូងប្រមាណ ២០០ លានដុល្លារសម្រាប់យកមកប្រើក្នុងការជួសជុលផ្លូវសំខាន់ៗមួយចំនួន។
គម្រោងកែលម្អផ្លូវទាំងនោះ នឹងអនុវត្តចន្លោះពីឆ្នាំ ២០១៣ ដល់ឆ្នាំ ២០១៦ហើយកិច្ចព្រមព្រៀងនឹងត្រូវចុះហត្ថលេខារវាងរដ្ឋមន្រ្តីការបរទេសកម្ពុជា លោក ហោ ណាំហុង និងឯកអគ្គរដ្ឋទូតកូរ៉េខាងត្បូងលោក Kim Han-Soo នៅថ្ងៃពុធ ក្រោមអធិបតីភាពលោកនាយករដ្ឋមន្រ្តី ហ៊ុន សែន។ ប្រាក់កម្ចីដែលបានមកពីមូលនិធិសហប្រតិបត្តិការអភិវឌ្ឍសេដ្ឋកិច្ច របស់ប្រទេសកូរ៉េខាងត្បូងនឹងប្រើសម្រាប់ធ្វើការជួសជុលផ្លូវជាតិលេខ ២ផ្លូវជាតិលេខ ២២ ការស្តារផ្លូវជាតិលេខ ៤៨។ ប្រាក់កម្ចីនេះក៏នឹងផ្តល់សម្រាប់ការកែលម្អផ្លូវតាមជនបទក្នុងខេត្ត ចំនួន ៩ ដូចជា ខេត្តកំពង់ចាម កំពង់ធំ សៀមរាប បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង កំពង់ស្ពឺ និងខេត្តតាកែវ៕ PS
