.jpg)
លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា និងសកម្មជនក្នុងថ្ងៃបញ្ចប់ការឃោសនា។ រូបថត ម៉េងស្រ៊ុន ហេង ជីវ័ន
ដោយសារឆ្នាំ ២០១៨ ជាឆ្នាំបោះឆ្នោតជ្រើសតាំងតំណាងរាស្ត្រផង ដូច្នេះព្រឹត្តិការណ៍ហាក់មិនមានអ្វីឃ្លាតឆ្ងាយពីដំណើរការវិវត្តនយោបាយឡើយ ថ្វីបើមានព្រឹត្តិការណ៍គួរឲ្យកត់សម្គាល់ផ្សេងៗខ្លះក្ដី។ ដូច្នេះដើម្បីជាការរំឭកឡើងវិញភ្នំពេញប៉ុស្ដិ៍សូមបង្ហាញនូវកំណត់ត្រាព្រឹត្តិការណ៍មួយចំនួនដូចខាងក្រោម ៖
- មហាសន្និបាត CPP បន្ថែមសមាជិក
គណបក្សប្រជាជនកម្ពុជាកាលពីថ្ងៃ ២១ មករាឆ្នាំ ២០១៨ បានបើកមហាសន្និបាតនៅកោះពេជ្ររាជធានីភ្នំពេញដើម្បីអនុម័តកម្មវិធីនយោបាយសម្រាប់កសាង និងការពារមាតុភូមិពីឆ្នាំ ២០១៨-២០២៣ និងបានបោះឆ្នោតបន្ថែមសមាជិកគណៈកម្មាធិការកណ្ដាលចំនួន ៣៤២ នាក់ឱ្យឡើងដល់ ៨៦៥ រូបជាអ្វីដែលអ្នកនាំពាក្យគណបក្សថាជាការចាក់បញ្ចូលឈាមថ្មីដើម្បីចូលរួមកសាង និងការពារមាតុភូមិ។
- ស្ថាប័ននានាប្រតិកម្មនឹងការបិទទិដ្ឋាការលោក ហ៊ីង ប៊ុនហៀង
ក្រសួងការពារជាតិកម្ពុជាមេបញ្ជាការ នាយទាហាន ពលទាហាន ក្រសួងការបរទេស និងខុទ្ទកាល័យលោកនាយករដ្ឋមន្ត្រីកាលពីថ្ងៃទី ១៣ មិថុនាបានថ្កោលទោសអាមេរិក បន្ទាប់ពីរតនាគារប្រទេសនេះបង្កកទ្រព្យសម្បត្តិលោកនាយឧត្តមសេនីយ៍ ហ៊ីង ប៊ុនហៀង និងបិទទិដ្ឋាការមិនឲ្យចូលអាមេរិកដោយចាត់ទុកថា បានរំលោភយ៉ាងគឃ្លើន និងល្ងង់ខ្លៅមកលើអធិបតេយ្យភាពកម្ពុជា។
ប៉ុន្តែលោក ហ៊ីង ប៊ុនហៀង បញ្ជាក់ថាលោកគ្មានទ្រព្យសម្បត្តិ និងជំនួញជាមួយអាមេរិកទេ ហើយលោកក៏បានប្រកាសត្រៀមខ្លួនវាយបកលើជនអាមេរិកណាដែលមិនគោរពនូវអធិបតេយ្យភាពកម្ពុជា និងពួកក្បត់ជាតិផងដែរ។
- គណបក្សនយោបាយចាប់ផ្ដើម ចេញឃោសនារកសំឡេងឆ្នោត
យុទ្ធនាការឃោសនារកសំឡេងឆ្នោតអាណត្តិទី ៦ បានចាប់ផ្តើមនៅថ្ងៃទី ៧ ខែកក្កដា ខណៈ (គ.ជ.ប) កំណត់ពេល ៣ សប្ដាហ៍ដោយមានគណបក្សចំនួន ២០ ចូលរួមការបោះឆ្នោត។
នៅថ្ងៃដំបូងគណបក្សប្រជាជនកម្ពុជា (CPP) បានរៀបចំពិធីជួបជុំធំនៅកោះពេជ្រដឹកនាំដោយលោក ហ៊ុន សែន ប្រធានគណបក្ស និងមានអ្នកចូលរួមក្នុងរង្វង់ ៦ ម៉ឺននាក់។
ខណៈគណបក្សផ្សេងៗក៏ធ្វើសកម្មភាពដែរនោះលោក ហ៊ុន សែន បានចាត់ទុកយុទ្ធនាការឃោសនានោះថាជា «ព្រឹត្តិការណ៍ប្រវត្តិសាស្ត្រ» និងលើកពី «នយោបាយឈ្នះ ឈ្នះ» ក៏ដូចការចាត់វិធានការបានទាន់ពេលលើក្រុមបដិវត្តន៍ពណ៌ ដឹកនាំដោយអតីតគណបក្សប្រឆាំងដោយមានបរទេសនៅពីក្រោយ។
ដោយឡែកលោក កឹម សុខា បានបញ្ចេញសារពីពន្ធនាគារត្រពាំងផ្លុងអំពាវនាវឲ្យពលរដ្ឋអត់ធ្មត់ ខណៈលោក សម រង្ស៊ី អំពាវនាវពីក្រៅប្រទេសកុំឱ្យពលរដ្ឋទៅបោះឆ្នោតដោយប្រើយុទ្ធនាការ «ម្រាមដៃស្អាត» ឬ «ដេកផ្ទះឈ្នះឯង»។
បើទោះជាមានគណបក្សខ្លះរិះគន់ក្តី ប៉ុន្តែ គ.ជ.ប បានវាយតម្លៃខ្ពស់ចំពោះដំណើរការឃោសនាថាបានប្រព្រឹត្តទៅដោយរលូនទូទាំងប្រទេស។
ក្បួនដង្ហែរបស់ LDP ក្នុងពេលឃោសនា។ ហេង ជីវ័ន
- គ.ជ.ប ហៅការបោះឆ្នោតថាជាជោគជ័យរបស់កម្ពុជា
បន្ទាប់ពីបិទបញ្ចប់ការឃោសនាដំណើរការបោះឆ្នោតបានប្រព្រឹត្តទៅថ្ងៃ ២៩ កក្កដាដោយ (គជប) ចាត់ទុកថា ជាជោគជ័យរបស់កម្ពុជា ខណៈអ្នកបោះឆ្នោតមាន ៨៣,០២%។
ក្រោយទុកពេលជាងកន្លះខែឲ្យគណបក្សដែលមិនសុខចិត្តដាក់បណ្ដឹង គ.ជ.ប បានប្រកាសលទ្ធផលផ្លូវការកាលពីថ្ងៃ ១៥ សីហាដោយបង្ហាញថា (CPP) ទទួលបានការគាំទ្រ ៤ ៨៨៩ ១១៣ សំឡេងគឺឈ្នះអាសនៈទាំង ១២៥ ក្នុងរដ្ឋសភា។
ប៉ុន្តែលោក សម រង្ស៊ី ប្រធានចលនាសង្គ្រោះជាតិបានបង្ហោះសារតាមហេ្វសប៊ុកថា ជាជ័យជម្នះក្លែងក្លាយ រីឯប្រទេសលោកខាងលិចខ្លះរិះគន់ការបោះឆ្នោតនេះ។
យ៉ាងណាក្ដី CPP បានចាត់ទុកការឈ្នះឆ្នោតនេះថាជា «សមិទ្ធផលយ៉ាងធំជាប្រវត្តិសាស្ត្រថ្មី» និងជាការធ្វើឲ្យឧបាយកលដ៏ពិសពុលរបស់ពួកប្រឆាំងខុសច្បាប់បរាជ័យ ហើយថាការរិះគន់របស់លោកខាងលិចជាការប្រមាថឆន្ទៈប្រជាជនកម្ពុជា ដែលទៅបោះឆ្នោត។
សកម្មភាពពលរដ្ឋចូលរួមបោះឆ្នោតជ្រើសរើសគណបក្សដែលខ្លួនពេញចិត្ត ។ រូបថត ម៉េងស្រ៊ុន ហេង ជីវ័ន
- ឧត្ដមក្រុមប្រឹក្សាពិគ្រោះ និងផ្ដល់យោបល់ត្រូវបានបង្កើត
ឧត្ដមក្រុមប្រឹក្សាពិគ្រោះ និងផ្ដល់យោបល់ត្រូវបានបង្កើតឡើងកាលពីថ្ងៃទី ២១ ខែសីហាតាមគំនិតផ្ដួចផ្ដើមពីលោកនាយករដ្ឋមន្ត្រី ហ៊ុន សែន ដើម្បីចូលរួមពិនិត្យភាពចន្លោះប្រហោងនៃការអនុវត្តរបស់រាជរដ្ឋាភិបាល។
ទោះយ៉ាងណាគណបក្សប្រជាធិបតេយ្យមូលដ្ឋាន GDP បានសម្រេចមិនចូលរួមទេ បន្ទាប់ពីពិចារណាអស់មួយរយៈខណៈគណសម្ព័ន្ធដើម្បីប្រជាធិបតេយ្យ LDP បានបង្ហាញជំហរមិនចូលរួមតាំងពីដំបូង។
- អ្នកជាប់ឃុំក្នុងពន្ធនាគារត្រូវបានដោះលែងជាបន្តបន្ទាប់
សកម្មជនដីធ្លីបឹងកក់ចំនួន ៤ នាក់,ក្រុមអតីតសកម្មជន CNRP ១៤ នាក់ត្រូវបានតុលាការដោះលែងពីពន្ធនាគារក្នុងថ្ងៃខុសៗគ្នាកាលពីខែសីហា ខណៈបុគ្គលិកវិទ្យុអាស៊ីសេរី ២ នាក់ត្រូវបង្គាប់ឲ្យនៅក្រៅឃុំបណ្ដោះអាសន្នទៅតាមព្រះរាជក្រឹត្យរបស់ព្រះមហាក្សត្រ។
ការចេញព្រះរាជក្រឹត្យនេះបានធ្វើឡើងក្រោយពីលោកនាយករដ្ឋមន្ត្រីស្នើសុំទៅព្រះមហាក្សត្រដោយសារចិត្តសប្បុរសធម៌ បន្ទាប់ពីអ្នកជាប់ឃុំធ្វើលិខិតសុំទោសលោក បើទោះជាលោក សម រង្ស៊ី បានហៅការដោះលែងនេះថាធ្វើឡើងដោយសារសម្ពាធពីអន្តរជាតិក្ដី។
- រដ្ឋសភាប្រជុំដំបូង បន្ទាប់ពីបោះឆ្នោត
បន្ទាប់ពី (គ.ជ.ប) ប្រកាសពីលទ្ធផលឆ្នោតផ្លូវការពីការឈ្នះអាសនៈទាំង ១២៥ របស់គណបក្សប្រជាជនកម្ពុជា រដ្ឋសភាបានបើកកិច្ចប្រជុំដំបូងកាលពីថ្ងៃទី ៥ ខែកញ្ញាក្រោមព្រះរាជាធិបតីរបស់ព្រះមហាក្សត្រព្រះបាទ ព្រះបរមនាថ នរោត្តម សីហមុនី ។
មានព្រះរាជបន្ទូលក្នុងពិធីនោះព្រះមហាក្សត្រព្រះបាទ នរោត្តម សីហមុនី បានអំពាវនាវឲ្យមាន «ឯកភាពជាតិ និងសាមគ្គីភាពជាតិខ្ពស់» ឈរលើស្មារតីបង្រួបបង្រួមជាតិដោយប្រកាន់ខ្ជាប់នូវព្រហ្មវិហារធម៌ ៤ គឺ មេត្តា ករុណា មុទិតា និងឧបេក្ខា» ។
យ៉ាងណាក្ដីកិច្ចប្រជុំនេះមានស្ថានទូតចំនួន ៩ ក្នុងចំណោម ៣១ ដែលត្រូវបានអញ្ជើញមិនបានចូលរួមទេពិសេសប្រទេសលោកខាងលិច។ ប៉ុន្តែមានប្រទេសចំនួន ២២ បានបញ្ជូនឯកអគ្គរដ្ឋទូតឯកអគ្គរាជទូត ឬអ្នកតំណាងឲ្យចូលរួម។
- រដ្ឋសភាបោះឆ្នោតរើសថ្នាក់ដឹកនាំ និងគាំទ្ររដ្ឋាភិបាលថ្មី
មួយថ្ងៃបន្ទាប់ពីបើកកិច្ចប្រជុំដំបូងសមាជិករដ្ឋសភាទាំង ១២៥ រូបបានអនុម័តជាឯកច្ឆន្ទកាលពីថ្ងៃទី ៦ ខែកញ្ញាជ្រើសតាំង ប្រធាន អនុប្រធានរដ្ឋសភា ប្រធាន អនុប្រធានគណៈកម្មការជំនាញនៃរដ្ឋសភា និងសមាសភាពរាជរដ្ឋាភិបាលថ្មីដោយបោះឆ្នោតជាកញ្ចប់។
ក្នុងការអនុម័តនេះបានគាំទ្រលោក ហេង សំរិន ប្រធានកិត្តិយសគណបក្សប្រជាជនកម្ពុជាធ្វើជាប្រធានរដ្ឋសភាជាថ្មី ខណៈលោក ងួន ញ៉ិល ជាអនុប្រធានទី ១ និងលោកស្រី ឃួន សុដារី ជាអនុប្រធានទី ២ ហើយក៏បានជ្រើសរើសជាថ្មីនូវប្រធាន និងអនុប្រធានគណៈកម្មការជំនាញទាំង ១០ នៃរដ្ឋសភាផងដែរ។
ទន្ទឹមនឹងនោះរដ្ឋសភាក៏បានបោះឆ្នោតគាំទ្រសមាសភាពរាជរដ្ឋាភិបាលថ្មីផងដែរ ដោយអនុម័តឱ្យប្រធាន CPP លោក ហ៊ុន សែន បន្តធ្វើជានាយករដ្ឋមន្ត្រីអាណត្តិទី ៦ រយៈពេល ៥ ឆ្នាំទៀតដោយមានឧបនាយករដ្ឋមន្ត្រីរហូត ១០ រូប,ទេសរដ្ឋមន្ត្រី ១៧ រូប និងរដ្ឋមន្ត្រីតាមក្រសួង ២៩ រូប។ តាមបញ្ជីគឺរដ្ឋមន្ត្រីក្នុងរាជរដ្ឋាភិបាលថ្មីគឺជាសមាសភាពចាស់ក្នុងអាណត្តិទី ៥ កន្លងមក។ ប៉ុន្តែមានការដំឡើងឧបនាយករដ្ឋមន្ត្រីថ្មី ៣ រូប តែពុំមានឈ្មោះ លោក គាត ឈន់ អតីតឧបនាយករដ្ឋមន្ត្រីប្រចាំការដូចអាណតិ្តមុនទេ។
- លោក កឹម សុខា ត្រូវបានដោះលែង តែស្ថិតនៅក្រោមការត្រួតពិនិត្យរបស់តុលាការ
លោក កឹម សុខា ត្រូវបានដោះលែងបណ្ដោះអាសន្នពីពន្ធនាគារត្រពាំងផ្លុងក្នុងខេត្តត្បូងឃ្មុំមកផ្ទះកាលពីថ្ងៃទី ១០ កញ្ញា។
តាមដីកាចេញដោយចៅក្រមស៊ើបសួរ គី ឫទ្ធី បញ្ជាក់ថាការសម្រេចនេះផ្អែកលើហេតុផលសុខភាព ប៉ុន្តែតម្រូវឱ្យគោរពកាតព្វកិច្ចដូចជា៖
ក្រៅពីលំនៅឋានមិនត្រូវចេញក្រៅព្រំប្រទល់ដែនដីខណ្ឌដោយផ្លូវលេខ ៣១៣ ផ្លូវ ៣១១ និងផ្លូវ ៦០៨ ក្នុងខណ្ឌទួលគោក និងមិនឱ្យទាក់ទងអតីតថា្នក់ដឹកនាំអតីតគណបក្សសង្គ្រោះជាតិ និងជនបរទេសដែលពាក់ព័ន្ធនឹងសំណុំរឿងចោទលោកឡើយ។
ប៉ុន្តែប្រទេសលោកខាងលិចរួមទាំងលោកស្រី Rhona Smith អ្នករាយការណ៍ពិសេសផ្នែកសិទ្ធិមនុស្ស UN បានអំពាវនាវឱ្យទម្លាក់បទចោទ ជាអ្វីដែលមន្ត្រីរដ្ឋាភិបាលថាជាឆន្ទានុសិទ្ធិរបស់តុលាការ ខណៈលោក ហ៊ុន សែន ថាចាំសេះដុះស្នែង ពេលលោក សម រង្ស៊ី ភ្នាល់ថានឹងលែងនៅថ្ងៃទី ២៩ ធ្នូ ឬនៅទី ៣ ខែមីនាឆ្នាំ ២០១៩។
- លោកនាយករដ្ឋមន្ត្រីដឹកនាំប្រតិភូទៅចូលរួមប្រជុំនៅ UN
បន្ទាប់ពីរដ្ឋសភាបោះឆ្នោតគាំទ្ររដ្ឋាភិបាលថ្មីលោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូទៅចូលរួមប្រជុំក្នុងមហាសន្និបាតលើកទី ៧៣ នៃ UN ក្នុងទីក្រុងញូវយ៉កសហរដ្ឋអាមេរិកជាដំណើរទស្សនកិច្ច ៤ ថ្ងៃគិតពីថ្ងៃទី ២៧ ខែកញ្ញាដោយមានទាំងក្រុមគាំទ្រ និងប្រឆាំងវត្តមានរបស់លោកនៅទីនោះផងដែរ។
ដោយថ្លែងការពារការបោះឆ្នោតក្នុងខែកក្កដាដែលមានអ្នកចូលរួម ៨៣,០២ ភាគរយលោក ហ៊ុន សែន បានចាត់ទុកការវាយតម្លៃអវិជ្ជមានពីខាងក្រៅថា «ជាការប្រមាថធ្ងន់ធ្ងរ» ចំពោះឆន្ទៈពលរដ្ឋកម្ពុជា និងជាមហិច្ឆតា «ជ្រៀតជ្រែក» កិច្ចការផ្ទៃក្នុងកម្ពុជា ហើយលោកបានទាញចំណាប់អារម្មណ៍សមាជិក UN ឱ្យចាប់អារម្មណ៍ពី «សារៈសំខាន់នៃធម្មនុញ្ញ UN» ដើម្បីចៀសវាងការជ្រៀតជ្រែក ការធ្វើឲ្យអន្តរាយ ឬការរំខានដល់កិច្ចការអធិបតេយ្យរបស់រដ្ឋឯករាជ្យ។
បើទោះជាមានទាំងក្រុមអ្នករង់ចាំស្វាគមន៍ និងក្រុមអ្នកតវ៉ាប្រឆាំងវត្តមានប្រតិភូកម្ពុជាក្ដី ប៉ុន្តែមន្ត្រីរដ្ឋាភិបាលបានចាត់ទុកថាជា «ជោគជ័យ» រីឯក្រុមមន្ត្រីអតីតគណបក្សសង្គ្រោះជាតិក៏ថាជោគជ័យដូចគ្នា ខណៈអ្នកវិភាគថាជា [បរាជ័យរបស់កម្ពុជា] ពេលអ្នកនយោបាយខ្មែរបានបង្ហាញភាពបែកបាក់ដល់អន្តរជាតិ។
- គណៈមេធាវីបោះឆ្នោតជ្រើសរើសប្រធាន
គណៈមេធាវីនៃព្រះរាជាណាចក្រកម្ពុជាបានបោះឆ្នោតជ្រើសរើសប្រធានថ្មីកាលពីថ្ងៃទី ១៦ ខែតុលានៅសណ្ឋាគារសុខា រាជធានីភ្នំពេញដោយលោកមេធាវី សួន វិសាល ជាប់ជាប្រធានដដែលសម្រាប់តំណែងរយៈពេល ២ ឆ្នាំទៀតដែលឈ្នះបេក្ខជនឈរឈ្មោះ ១ រូបទៀតគឺលោក មេធាវី សំ សុគង់។
តាមលទ្ធផលក្នុងចំណោមសហភាតាចូលរួមការបោះឆ្នោត ១៣៩៣ នាក់លោក សួន វិសាល ទទួលបានការគាំទ្រ ៩៣០ សំឡេង ខណៈលោក សំ សុគង់ ទទួលបានត្រឹមតែ ២៨៨ សំឡេង។
ក្រោយដឹងពីលទ្ធផលលោកមេធាវី សួន វិសាល បានប្ដេជ្ញាថានឹងធ្វើឱ្យស្ថាប័នច្បាប់មួយនេះកាន់តែរឹងមាំដើម្បីរួមចំណែកធ្វើឱ្យប្រព័ន្ធយុត្ដិធម៌កាន់តែប្រសើរ ហើយថាលោកនឹងព្យាយាមរកទីផ្សារសេវាការពារក្ដីជូនមេធាវីផងដែរ។
- លោកនាយករដ្ឋមន្ត្រីទស្សនកិច្ចនៅតួកគី
បន្ទាប់ពីទៅចូលរួមក្នុងមហាសន្និបាតនៅអង្គការសហប្រជាតិលោក ហ៊ុន សែន នាយករដ្ឋមន្ត្រីកម្ពុជាបានទៅទស្សនកិច្ចរយៈពេល ៣ ថ្ងៃនៅប្រទេសតួកគី (២០-២២ តុលា) ដើម្បីជំរុញទំនាក់ទំនង និងពង្រីកកិច្ចសហប្រតិបត្តិការរវាងប្រទេសទាំង ២។
ក្រោយជំនួបរវាងលោក ហ៊ុន សែន នាយករដ្ឋមន្ត្រីកម្ពុជា និងប្រធានាធិបតីតួកគីលោក Recep Tayyip Erdogan) ភាគីទាំង ២ បានចុះកិច្ចព្រមព្រៀងលើពិធីសារចំនួន ៨ ហើយឆ្លៀតក្នុងឱកាសនោះលោកនាយករដ្ឋមន្ត្រីកម្ពុជាក៏បានជួបសំណេះសំណាលជាមួយក្រុមនិស្សិតកម្ពុជារាប់រយនាក់នៅទីនោះផងដែរ។
- កម្ពុជាឲ្យការិយាល័យសិទ្ធិមនុស្ស UN បន្តអាណត្តិ ២ ឆ្នាំទៀត
រាជរដ្ឋាភិបាលកម្ពុជាបានសម្រេចបន្តអាណត្តិ ២ ឆ្នាំទៅមុខទៀតដល់ការិយាល័យសិទ្ធិមនុស្សអង្គការសហប្រជាជាតិប្រចាំកម្ពុជា (OHCHR) ប៉ុន្តែបានស្នើឲ្យសហការគ្នារវាង UN និងកម្ពុជាមុនពេលវាយតម្លៃពីករណីសិទ្ធិមនុស្សនៅកម្ពុជា។
ការសម្រេចនេះបានធ្វើឡើងក្នុងជំនួបរវាងលោក ហ៊ុន សែន និងលោកស្រី MichelleBa-chelet ប្រធានឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សកាលពីថ្ងៃ ២៣ តុលានៅទីក្រុងហ្សឺណែវ ប្រទេសស្វ៊ីស។
- EU ជូនដំណឹងពីដំណើរការសម្រាប់ការព្យួរ EBA
សហភាពអឺរ៉ុបកាលពីថ្ងៃ ៥ តុលាបានជូនដំណឹងមកកម្ពុជាអំពីដំណើរការព្យួរប្រព័ន្ធអនុគ្រោះពន្ធទំនិញ (EBA) ក្រោមហេតុផលថាការគោរពលក្ខខណ្ឌរបស់កម្ពុជាមិនទាន់ប្រសើរពិសេសការស្ដារប្រជាធិបតេយ្យ និងការគោរពសិទ្ធិមនុស្សជាអ្វីដែលលោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាថ្លែងថា សហភាពអឺរ៉ុបបានប្រើរបាយការណ៍មិនឆ្លុះបញ្ចាំងការពិតពីកម្ពុជាមកដាក់សម្ពាធ ខណៈលោកនាយករដ្ឋមន្ត្រីមិនបារម្ភពីបញ្ហានេះដោយលោកថា EBA នឹងត្រូវបាត់បង់ពេលសេដ្ឋកិច្ចកម្ពុជាកើនខ្ពស់ និងបានបញ្ជាក់ថាលោកបានធ្វើការមួយជំហានមុនរួចទៅហើយ។
- តំណាងសិទ្ធិមនុស្ស UN មកកម្ពុជា ១១ ថ្ងៃ
អ្នករាយការណ៍ពិសេសរបស់អង្គការសហប្រជាជាតិ (UN) ទទួលបន្ទុកសិទ្ធិមនុស្សប្រចាំកម្ពុជាលោកស្រី រ៉ូណាស្ម៊ីត បានធ្វើទស្សនកិច្ចនៅកម្ពុជារយៈពេល ១១ ថ្ងៃគិតពីថ្ងៃទី ២៩ តុលាដល់ថ្ងៃ ៨ ខែវិច្ឆិកាតាមការអញ្ជើញពីរាជរដ្ឋាភិបាលកម្ពុជា។
ដំណើរទស្សនកិច្ចនេះលោកស្រីបានជួបជាមួយមន្ត្រីជាន់ខ្ពស់របស់រដ្ឋាភិបាលតំណាងសង្គមស៊ីវិល និងសមាជិកសហគមន៍ការទូតនានា។
បន្ទាប់ពីបានទទួលរបាយការណ៍នានា លោកស្រី រ៉ូណា ស្ម៊ីត បានថ្លែងក្នុងសន្និសីទកាសែតដោយអំពាវនាវឲ្យទម្លាក់បទចោទលើលោក កឹម សុខា សកម្មជនដីធ្លី និងមន្ត្រីសិទ្ធិមនុស្សរួមទាំងអ្នកសារព័ត៌មាន ពិសេសសុំឲ្យក្រសួងយុត្តិធម៌ និងតុលាការធ្វើការឲ្យមានតម្លាភាពដើម្បីប្រឆាំងអំពើពុករលួយ និងពង្រឹងឯករាជ្យ និងភាពមិនលម្អៀងរបស់តុលាការ។
ប៉ុន្តែអ្នកនាំពាក្យរាជរដ្ឋាភិបាលកម្ពុជាបានថ្លែងថាអ្វីដែលលោកស្រី ស្ម៊ីត លើកឡើងគឺរាជរដ្ឋាភិបាលបាននិងកំពុងដោះស្រាយ ប៉ុន្តែករណីលោក កឹម សុខា គឺស្ថិតក្នុងអាណតិ្តតុលាការដែលគ្មាននរណាអាចលូកលាន់បានទេ។
យ៉ាងណារបាយការណ៍ទស្សនកិច្ចលើកនេះលោកស្រីនឹងដាក់ជូនទៅក្រុមប្រឹក្សាសិទ្ធិមនុស្ស UN នៅក្នុងខែកញ្ញា ឆ្នាំ ២០១៩។
- (អវតក) សម្រេចឲ្យលោក នួន ជា និង ខៀវ សំផន ជាប់ពន្ធនាគារ ១ ជីវិត
ក្រោយពីដំណើរការក្តីអស់ពេល ២៨៣ ថ្ងៃលើសំណុំរឿង ០០២ /០២ រួចមក អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក ) បានប្រកាសផ្ដន្ទាទោសលោក នួន ជា និងលោក ខៀវ សំផន ឲ្យជាប់ពន្ធនាគារអស់ ១ ជីវិតកាលពីថ្ងៃទី ១៦ វិច្ឆិកាក្រោមបទចោទ បទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិដោយមានសហគមន៍ជាតិ និងអន្តរជាតិរួមទាំងស្ថានទូតអាមេរិកផងសាទរ និងថាជាការផ្តល់យុត្តិធម៌ជូនជនរងគ្រោះ។
បើតាមអ្នកនាំពាក្យសាលាក្ដីខែ្មរក្រហមលោក នេត្រ ភក្ត្រា ក្នុងដំណើរការរឿងក្ដី ០០២/០២ នេះមានអ្នកផ្ដល់សក្ខីកម្ម ១១៤ រូប,ដើមបណ្ដឹងរដ្ឋប្បវេណី ៦៣ រូប, អ្នកជំនាញ ៨ រូប និងអ្នកចូលរួមស្ដាប់ ៨៣០០០ រូបដោយប្រើពេល ២៨៣ ថ្ងៃ។
- លោក សម រង្ស៊ី ក្លាយជាប្រធានស្ដីទី CNRP ដ៏ចម្រូងចម្រាស
លោក សម រង្ស៊ី កាលពីថ្ងៃទី ២ ធ្នូត្រូវបានជ្រើសរើសនៅអាមេរិកឲ្យធ្វើជាប្រធានស្តីទីបក្សសង្គ្រោះជាតិដែលត្រូវបានរំលាយរួចហើយក្នុងពេលដែលលោកធ្លាប់បានលាលែងពីប្រធាន និងជាសមាជិកគណបក្សនេះកាលពីថ្ងៃទី ១១ ខែកុម្ភៈឆ្នាំ ២០១៧ ជាអ្វីដែលក្រុមគាំទ្រលោក កឹម សុខា ថា ជាបក្សប្រហារ។
កាលពីថ្ងៃទី ១៣ ខែមករា ឆ្នាំ ២០១៨ លោក សម រង្ស៊ី ធ្លាប់បានបង្កើតចលនាសង្គ្រោះជាតិដែលពុំមានការឯកភាពពីក្រុមលោក កឹម សុខា រួចម្ដងហើយ ប៉ុន្តែមិនមានព័ត៌មានពីការចេញពីចលនានេះវិញទេ។
- ទំនប់វារីអគ្គិសនីវែងជាងគេនៅអាស៊ីបើកសម្ពោធ
ទំនប់វារីអគ្គិសនីសេសានក្រោម ២ ក្នុងខេត្តស្ទឹងត្រែងរបស់កម្ពុជាត្រូវបានសម្ពោធដាក់ឲ្យប្រើប្រាស់ជាផ្លូវការកាលពីថ្ងៃ ១៧ ធ្នូ ២០១៨ ក្រោមអធិបតីភាពលោក ហ៊ុន សែន នាយករដ្ឋមន្ត្រីកម្ពុជា បន្ទាប់ពីដំណើរការសាងសង់ ៥ ឆ្នាំ។
ទំនប់វារីអគ្គិសនីប្រវែង ៦,៥ គីឡូម៉ែត្រដែលវែងជាងគេនៅអាស៊ីមួយនេះ កើតឡើងពីការវិនិយោគរួមគ្នារវាងក្រុមហ៊ុន ៣ រួមមានៈ ក្រុមហ៊ុនHydrolancang International Energy របស់ចិន ៥១%, ក្រុមហ៊ុន Royal Group ៣៩% និងវៀតណាម ១០% ក្រោមរូបភាព BOT [សាងសង់ដំណើរផ្ទេរ] ក្នុងរយៈពេលសម្បទានពីរដ្ឋាភិបាល ៤៥ ឆ្នាំ។
ថ្លែងក្នុងពិធីសម្ពោធនោះលោកនាយករដ្ឋមន្ត្រីបានបង្ហាញពីមោទនភាពយ៉ាងខ្លាំងដែលការវិនិយោគមានការចូលរួមពី ៣ ប្រទេស និងថាគម្រោងនេះធ្វើឡើងដោយមានការគិតគូរហ្មត់ចត់។
- CPP បើកមហាសន្និបាតលើកទី ៤១
គណបក្សប្រជាជនកម្ពុជាបានបើកសន្និបាតលើកទី ៤១ នៅភ្នំពេញរយៈពេល ៣ ថ្ងៃគិតចាប់ពីថ្ងៃទី ១៨ ដល់ថ្ងៃទី ២០ ធ្នូដើម្បីតាមដាន និងសម្រេចចិត្តផែ្នកនយោបាយដើម្បីរក្សាសុខសន្តិភាព និងស្ថិរភាព ខណៈសភាពការណ៍ជាតិនិងអន្តរជាតិមានការប្រែប្រួលយ៉ាងឆាប់រហ័ស និងស្មុគស្មាញ។
បន្ទាប់ពីបញ្ចប់អង្គសន្និបាតបានកែសម្រួលរចនាសម្ព័ន្ធ និងបោះឆ្នោតជ្រើសតាំងបន្ថែមសមាជិកគណៈអចិន្រៃ្តយ៍នៃគណៈកម្មាធិការកណ្ដាលចំនួន ៧ រូបបន្ថែមពីលើរចនាសម្ព័ន្ធដែលមានស្រាប់ចំនួន ៣០ រូប។
ក្រៅពីនោះអង្គសន្និបាតបានតម្កល់ខ្ពស់ស្មារតីស្នេហាជាតិ ការពារដាច់ខាតនូវឯករាជ្យអធិបតេយ្យ និងបូរណភាពទឹកដីប្រឆាំងការជ្រៀតជ្រែកពីបរទេសដោយមិនឱនក្បាលចំពោះការដាក់សម្ពាធពីខាងក្រៅឡើយ។
ទន្ទឹមនឹងនោះក៏បន្តគាំទ្រការពន្លឿនការដោះស្រាយបញ្ចប់បញ្ហាព្រំដែនដែលនៅសេសសល់ផងដែរជាមួយនឹងមោទនភាពចំពោះកំណើនសេដ្ឋកិច្ចខ្ពស់ ៧,៣% និងបានកាត់បន្ថយអត្រាភាពក្រីក្រឲ្យមកនៅក្នុងរង្វង់ ៩% ក្នុងឆ្នាំ ២០១៨។
- វិមានឈ្នះឈ្នះត្រូវបានសម្ពោធ
ទិដ្ឋភាពនៅវិមានឈ្នះ ឈ្នះ រាត្រីថ្ងៃសម្ពោធ។ ហេង ជីវ័ន
វិមានឈ្នះ ឈ្នះ ត្រូវបានសម្ពោធកាលពីថ្ងៃទី ២៩ ធ្នូក្រោមអធិបតីភាពលោកនាយករដ្ឋមន្ត្រី ហ៊ុន សែន បន្ទាប់ពីចាប់ផ្ដើមសាងសង់ក្នុងឆ្នាំ ២០១៦ លើផ្ទៃដី ៨ ហិកតាក្នុងខណ្ឌជ្រោយចង្វាររាជធានីភ្នំពេញដើម្បីបង្ហាញពីប្រវត្តិនៃដំណាក់កាលនីមួយៗមុនពេលរកបានការឯកភាពទឹកដីទាំងស្រុងក្នុងរយៈពេល ២០ ឆ្នាំចុងក្រោយនេះ។
ពិធីជាប្រវត្តិសាស្ត្រនេះបានរៀបចំរយៈពេល ៣ ថ្ងៃ ៣ យប់ដោយមានមនុស្សរាប់ម៉ឺននាក់ចូលរួមព្រមទាំងមានការបាញ់កាំជ្រួចពេលយប់ និងពិធីកម្សាន្តផ្សេងៗជាច្រើនផងដែរ។
លោកនាយករដ្ឋមន្ត្រីបានចាត់ទុកសមិទ្ធផលថ្មីនេះថាជារបស់ទាំងអស់គ្នា មិនមែនរបស់លោកម្នាក់ឯងនោះទេ ថ្វីបើលោកត្រូវបានមជ្ឈដ្ឋានទូទៅទទួលស្គាល់ថា មានភាពសកម្ម និងលេចធ្លោក្នុងការបញ្ចប់សង្គ្រាមនៅកម្ពុជាក៏ដោយ៕
