.jpg)
ជនជាប់ចោទពេលនាំមកតុលាការកំពូលពីម្សិលមិញ។ រូប សារុំ
ភ្នំពេញៈ តុលាការកំពូលកាលពីម្សិលមិញបានបើកសវនាការជំនុំជម្រះជនជាប់ចោទម្នាក់ពាក់ព័ន្ធរំលោភសម្លាប់ក្មេងស្រីអាយុ ១០ ឆ្នាំម្នាក់ ប្រព្រឹត្តកាលពីឆ្នាំ ២០១៦ នៅភូមិខ្យោកជើង ឃុំពពឹស ស្រុកស្វាយអន្ទរ ខេត្តព្រៃវែង ជាសំណុំរឿងដែលតុលាការថ្នាក់ក្រោមទាំង ២ ថ្នាក់ ផ្តន្ទាទោសដាក់ពន្ធនាគារ ២៣ ឆ្នាំ។
លោក ស្រី គិម សត្ថាវី ប្រធានក្រុមប្រឹក្សាជំនុំជម្រះនៃតុលាការកំពូលបានអានអង្គហេតុនៅចំពោះមុខជនជាប់ចោទនិងចំពោះមុខឪពុករបស់ក្មេងរងគ្រោះថា កាលពីថ្ងៃទី ៧ ខែ មិថុនា ឆ្នាំ ២០១៦ ឪពុករបស់ក្មេងស្រីរងគ្រោះបានទៅបូមទឹកដាក់ស្រែចម្ងាយពីភូមិប្រមាណ ៣ គីឡូម៉ែត្រ ហើយក៏មានវត្តមានជនជាប់ចោទឈ្មោះ ទ្រី គឹមឈាង អាយុ ៣០ ឆ្នាំ នៅទីនោះដែរ។
លោកស្រីបន្តថា លុះរហូតដល់ម៉ោង ១២ ថ្ងៃត្រង់ ក្រោយពីក្មេងស្រីរងគ្រោះឈ្មោះច.ស.ឃ អាយុ ១០ ឆ្នាំ ចេញពីសាលារៀន នាងបានទិញកាហ្វេយកទៅឲ្យឪពុកនៅកន្លែងវាលស្រែនោះ។ បន្ទាប់មកឪពុកនាងបានចេញទៅមើលស្រែ ១ ទៀតដោយទុកក្មេងស្រីរងគ្រោះនិងប្អូនស្រីតូចម្នាក់ទៀតឲ្យនៅជាមួយជនជាប់ចោទ ព្រោះសំអាងថាពួកគេជាពូជីទួតមួយនឹងគ្នា។ ប៉ុន្តែក្រោយមកឪពុករបស់ក្មេងស្រីរងគ្រោះត្រឡប់មកផ្ទះវិញឃើញតែកូនស្រីប្អូន តែបាត់ក្មេងរងគ្រោះ ក៏សួរកូនស្ត្រីប្អូនទើបនាងប្រាប់ថា បងស្រីរបស់នាងត្រូវបានពូឈាងនាំចូលក្នុងព្រៃហើយនាងឮពូឈាង ប្រាប់ថាទៅរកឃ្មុំ។ ដោយបាត់កូនយូរពេកឪពុកក្មេងស្រីរងគ្រោះបានជិះកង់ដើររក តែរកមិនឃើញហើយក៏ប្តឹងនគរបាលប៉ុស្តិ៍ឃុំពពឹស តែម្តង។
លោកស្រីបន្តទៀតថា ក្រោយពីនគរបាលប៉ុស្តិ៍ទទួលបានបណ្តឹង ក៏ចាត់កម្លាំងចូលរកក្នុងព្រៃក្បែរវាលស្រែដែលជនជាប់ចោទបូមទឹកដាក់ស្រែ។បន្ទាប់មកសមត្ថកិច្ចក៏បានរកឃើញសាកសពក្មេងស្រីនោះ
ហើយពេលធ្វើកោសល្យវិច័យរកឃើញថា សពនាង ត្រូវបានសម្រាតខោត្រឹមជង្គង់ ហើយបាក់ក ដោយសារជនជាប់ចោទកាច់បំបាក់។ ១ ម៉ោងបន្ទាប់ពី រកឃើញសព សមត្ថកិច្ចក៏ស្រាវជ្រាវចាប់បានជនជាប់ចោទនៅថ្ងៃ ៧ មិថុនា ឆ្នាំ ២០១៦។
សំណុំរឿងនេះ ត្រូវបានសាលាដំបូងខេត្តព្រៃវែងប្រកាសផ្ដន្ទាទោសជនជាប់ចោទកាលពីថ្ងៃទី ១៤ ខែ កក្កដា ឆ្នាំ ២០១៧ ដោយដាក់ពន្ធនាគារ ២៣ ឆ្នាំតាមមាត្រា ២០២ នៃក្រមព្រហ្មទណ្ឌ។ តែដោយជនជាប់ចោទមិនសុខចិត្តក៏បានប្តឹងឧទ្ធរណ៍តែត្រូវសាលាឧទ្ធរណ៍ប្រកាសសាលដីកាសម្រេចតម្កល់សាលក្រមសាលាដំបូងខេត្តព្រៃវែងនៅដដែលកាលពីថ្ងៃទី ១៤ ខែ កក្កដា ឆ្នាំ ២០១៧។
ឆ្លើយនៅក្នុងសវនាការនោះជនជាប់ចោទ ឈ្មោះ ទ្រី គឹមឈាង បានប្រាប់ចៅក្រមថា រូបគេ ពិតជាបានប្រព្រឹត្តលើក្មេងស្រីរងគ្រោះដូចការចោទប្រកាន់មែន តែត្រង់សំណងជំងឺចិត្តដែលឪពុកក្មេងស្រីទាមទារនោះខ្លួនមិនមានលទ្ធភាពសងទេដោយសារគ្រួសារក្រ។
នៅក្នុងបន្ទប់សវនាការកាលពីម្សិលមិញដែរ លោក ព្រឹម សុវណ្ណ ជាឪពុករបស់ក្មេងស្រីរងគ្រោះបានប្រាប់ចៅក្រមថា គាត់ប្តឹងមកតុលាការកំពូលព្រោះមិនសុខចិត្តនឹងការផ្តន្ទាទោសជនល្មើសតិចពេក។
លោកប្រាប់ចៅក្រមថា៖ «សាលាឧទ្ធរណ៍ដាក់ទោសជនជាប់ចោទតែ ២៣ ឆ្នាំ ហើយខ្ញុំសុំឲ្យតុលាការកំពូលដាក់ទោសជនជាប់ចោទ ១ ជីវិត និងទាមទារសំណង ១ ម៉ឺនដុល្លារ»។
លោក ជុំ សំបាន តំណាងមហាអយ្យការសន្និដ្ឋានថា ផ្អែកតាមអង្គហេតុ និងចម្លើយជនជាប់ចោទនោះគឺការសម្រេចក្តីរបស់សាលាឧទ្ធរណ៍ត្រឹមត្រូវតាមច្បាប់ ហើយលោកសូមតម្កល់សាលដីការបស់សាលាឧទ្ធរណ៍ទុកជាបានការដដែល។
លោកស្រី មេធាវីការពារសិទ្ធិឲ្យឪពុកក្មេងរងគ្រោះសុំមិនប្រាប់ឈ្មោះបានសន្និដ្ឋានថា តាំងពីនៅតុលាការខេត្តរហូតដល់សាលាឧទ្ធរណ៍គឺជនជាប់ចោទបានសារភាពរហូត ដូច្នេះបានន័យថា ជនជាប់បានប្រព្រឹត្តមែន។
លោកស្រីថា៖ «ប៉ុន្តែករណីនេះជនជាប់ចោទមិនត្រឹមតែរំលោភក្មេងរងគ្រោះទេ តែគាត់ធ្វើទារុណកម្មកាច់កច្របាច់មាត់និងយកឈើបញ្ចូលក្នុងប្រដាប់ភេទក្មេងរងគ្រោះទៀត។ ដោយហេតុនេះហើយ តុលាការថ្នាក់ក្រោមមិនគួរលើកយកមាត្រា ២០២ នៃក្រមព្រហ្មទណ្ឌមកផ្តន្ទាទោសជនជាប់ចោទទេ គួរយកមាត្រា ២០៥ មកផ្តន្ទាទោសជនជាប់ចោទវិញ»។
លោក ឡោ គីមហ្គិច មេធាវីការពារសិទ្ធិឲ្យជនជាប់ចោទសន្និដ្ឋានថា លោកយល់ឃើញថា សំណុំរឿងនេះតំណាងមហាអយ្យការនៃសាលាឧទ្ធរណ៍មិនបានប្តឹងសារទុក្ខជំទាស់នឹងទណ្ឌកម្មទោសរបស់ជនជាប់ចោទទេ។ «ហេតុដូច្នេះខ្ញុំជាមេធាវីការពារសិទ្ធិឲ្យកូនក្តីខ្ញុំស្នើសុំតុលាការកំពូលតម្កល់សាលដីការបស់សាលាឧទ្ធរណ៍ទុកជាបានការដដែល»។
ក្រោយជំនុំជម្រះ លោកស្រីចៅក្រម គិម សត្ថាវី ថ្លែងថាសាលដីកានៃសំណុំរឿងនេះនឹងប្រកាសនៅថ្ងៃទី ៨ ខែ ឧសភា ខាងមុខនេះ៕
