.jpg)
លោក ស៊ុន ធន់ ជាគ្រូបង្រៀននៅខេត្តកំពង់ធំ និងជាសមាជិកក្រុមប្រឹក្សាខេត្ត ដែលរងបទចោទរួមគំនិតក្បត់។ រូបថត ហ្វេសប៊ុក
ភ្នំពេញៈ តុលាការកំពូលជំនុំជម្រះករណីអតីតសកម្មជននៃអតីតគណបក្សសង្គ្រោះជាតិ ២ រូបពីម្សិលមិញលើបណ្តឹងប្រឆាំងនឹងដីកាឃុំខ្លួនបណ្តោះអាសន្នក្នុងបទចោទរួមគំនិតក្បត់ ញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់កុំឲ្យយោធិនស្តាប់បង្គាប់ដែលប្រព្រឹត្តក្នុងអំឡុងខែកក្កដា ឆ្នាំ ២០១៨ នៅរាជធានីភ្នំពេញ និងខេត្តផ្សេងទៀត។
តាមកំណត់ហេតុរបស់តុលាការកំពូលបង្ហាញថា ជនត្រូវចោទឈ្មោះ ស៊ុន ធន់ ជាគ្រូបង្រៀននៅខេត្តកំពង់ធំ និងជាសមាជិកក្រុមប្រឹក្សាខេត្ត រីឯ លោក ពៀត ម៉ាប់ ជាគ្រូបង្រៀននៅខេត្តសៀមរាប ហើយក៏ជាសមាជិកក្រុមប្រឹក្សាខេត្តដែរ។ អ្នកទាំង ២ ត្រូវបានសមត្ថកិច្ចចាប់ខ្លួនក្នុងអំឡុងខែឧសភា-មិថុនា ឆ្នាំ ២០២០ ហើយបញ្ជូនមកឃុំនៅពន្ធនាគារព្រៃសរាជធានីភ្នំពេញ។
បើតាមកំណត់ហេតុដដែលគឺលោក ស៊ុន ធន់ និងលោក ពៀត ម៉ាប់ ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញសម្រេចចេញដីកាឃុំខ្លួនបណ្តោះអាសន្ននៅថ្ងៃទី ១១ មិថុនា ឆ្នាំ ២០២០។ អ្នកទាំង ២ ត្រូវបានចោទពីបទរួមគំនិតក្បត់ ញុះញង់ឲ្យប្រព្រឹត្តអំពើដែលបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់កុំឲ្យយោធិនស្តាប់បង្គាប់តាមមាត្រា ៤៥៣,៤៩៤ ៤៩៦ និងមាត្រា ៤៧១ នៃក្រមព្រហ្មទណ្ឌ។
ដោយមិនសុខចិត្តនឹងដីកាឃុំខ្លួននេះមេធាវីការពារសិទ្ធិឲ្យជនត្រូវចោទទាំង ២ នាក់គឺលោក សំ សុគង់ និងលោក ឡោ ជុនធី ប្តឹងទាស់ទៅសាលាឧទ្ធរណ៍។ ប៉ុន្តែបណ្តឹងនេះត្រូវបានឧទ្ធរណ៍បដិសេធ និងរក្សាតាមអំណាចដីកាឃុំខ្លួនរបស់សាលាដំបូងរាជធានីភ្នំពេញដដែល។
លោក សំ សុគង់ បានធ្វើសេចក្តីសន្និដ្ឋានក្នុងបន្ទប់សវនាការតុលាការកំពូលពីម្សិលមិញ ខណៈអវត្តមានជនត្រូវចោទទាំង ២ នាក់ថា សាលាឧទ្ធរណ៍មិនឲ្យកូនក្តីលោកបាននៅក្រៅឃុំបណ្តោះអាសន្ន។ ចៅក្រមបានលើកហេតុផលថា ខ្លាចកូនក្តីលោកទៅបង្កបទល្មើសផ្សេង។ បទល្មើសរបស់ពួកគាត់ជាបទឧក្រិដ្ឋ ហើយបើរក្សាជនត្រូវចោទទាំង ២ នាក់ ក្នុងពន្ធនាគារគឺងាយស្រួលស្ថិតក្រោម ការត្រួតពិនិត្យរបស់តុលាការ។
លោកបន្តថា កូនក្តីរបស់លោកទាំង ២ នាក់មានជំងឺលើសឈាម ជំងឺទឹកនោមផ្អែម ឡើងជាតិអាស៊ីត និងលើសជាតិខ្លាញ់ដូច្នេះពួកគាត់ត្រូវការព្យាបាលតាមលក្ខណៈវិទ្យាសាស្ត្រ។ ម្យ៉ាងកូនក្តីរបស់លោកមិនអាចគេចទៅណាបានទេ ព្រោះពួកគាត់មានអាជីពជាគ្រូបង្រៀន និងមានលំនៅច្បាស់លាស់។ ការមិនដោះលែងពួកគាត់ឲ្យនៅក្រៅឃុំមិនមែនជាមធ្យោបាយល្អទេ ព្រោះត្រូវរងនូវសម្ពាធពីអន្តរជាតិ និងគ្រួសាររបស់គាត់បញ្ហាជីវភាពផង។
លោកមេធាវីថ្លែងថា៖ «ខ្ញុំគិតថា ផ្អែកតាមច្បាប់គឺកូនក្តីខ្ញុំមិនទាន់មានទោសទេ។ ពួកគាត់នៅដំណាក់កាលជនត្រូវចោទនៅឡើយ។ តែឧទ្ធរណ៍ហាក់សន្មតជាមុនថា កូនក្តីខ្ញុំមានទោស»។
ដោយឡែកលោកមេធាវី ឡោ ជុនធី ក៏បានធ្វើសេចក្តីសន្និដ្ឋានដែរថាចៅក្រមស៊ើបសួរនៃសាលាដំបូងរាជធានីភ្នំពេញបានលើកឡើងថា ប្រការមិនដោះលែងកូនក្តីលោកឲ្យនៅក្រៅឃុំ ព្រោះសំអាងថា កូនក្តីលោកជាប់ពាក់ព័ន្ធបទឧក្រិដ្ឋ។ ប៉ុន្តែតាមសំណុំរឿងពាក់ព័ន្ធអតីតសមាជិកបក្សសង្គ្រោះជាតិបានកើតឡើងតាំងពីឆ្នាំ ២០១៨ ហើយប្រមុខរាជរដ្ឋាភិបាលក៏បានបញ្ជាឲ្យតុលាការដោះលែងអ្នកដែលពាក់ព័ន្ធទាំងអស់ដែរ។ ប៉ុន្តែឆ្នាំ ២០២០ ទើបសមត្ថកិច្ចចាប់កូនក្តីលោកទៅវិញ។
មេធាវីរូបនេះប្រាប់ចៅក្រមថា៖ «កូនក្តីរបស់ខ្ញុំ មានផលលំបាកបញ្ហាជីវភាពគ្រួសារ និងមានជំងឺផង។ ដូច្នេះសូមតុលាការពិចារណាឲ្យពួកគាត់បាននៅក្រៅឃុំ»។
លោក ឌុច គឹមសន តំណាងមហាអយ្យការសន្និដ្ឋានថា តាមការសិក្សាលើសំណុំរឿង និងពិនិត្យលើអង្គហេតុបង្ហាញថា ទាំងសាលាដំបូងរាជធានីភ្នំពេញ ទាំងសាលាឧទ្ធរណ៍សម្រេចលើដីកាឃុំខ្លួនជនទាំង ២ នាក់បណ្តោះអាសន្ននេះត្រឹមត្រូវហើយ។
លោកបញ្ជាក់ថា៖ «ហេតុដូច្នេះខ្ញុំសូមតម្កល់ដីកាឃុំខ្លួននេះតាមសាលាឧទ្ធរណ៍ដដែល និងរក្សាឃុំខ្លួនជនត្រូវចោទទាំង ២ នាក់បន្តទៀត»។
បន្ទាប់ពីជំនុំជម្រះប្រមាណជាកន្លះម៉ោងរួចមក លោក ឃឹម ប៉ុណ្ណ ប្រធានក្រុមប្រឹក្សាជំនុំជម្រះបានបញ្ជាក់ថា សាលដីកានៃសំណុំរឿងនេះនឹងប្រកាសនៅថ្ងៃទី ៥ ខែតុលា ខាងមុខ៕
