ភ្នំពេញៈ តុលាការកំពូលកាលពីព្រឹកថ្ងៃពុធម្សិលមិញ បានបើកអង្គសវនាការជំនុំជម្រះសំណុំរឿងលោក សម រង្ស៊ី ពាក់ព័ន្ធបទចោទសមគំនិតក្លែងឯកសារព្រំដែនកម្ពុជា វៀតណាម ដែលសាលាដំបូងបានសម្រេចផ្ដន្ទាទោសដាក់ពន្ធនាគារ ៥ ឆ្នាំ។
សវនាការនេះធ្វើឡើងតាមការប្តឹងសារទុក្ខលើការសម្រេចរបស់តុលាការជាន់ទាប ដែលបានសម្រេចផ្តន្ទាទោសលោក សម រង្ស៊ី ដាក់ពន្ធនាគារកំណត់ ៥ ឆ្នាំដោយត្រូវអនុវត្តទោសពេញ និងជំនួយការរបស់លោក ២ នាក់មានឈ្មោះ អ៊ឹង ជុងលាង និង សត្យា សម្បត្តិ ដែលពួកគេត្រូវបានផ្តន្ទាទោសដាក់ពន្ធនាគារ ៥ ឆ្នាំដូចគ្នា តែអនុវត្តទោសតែ ៣ ឆ្នាំ សល់ ២ ឆ្នាំទៀត ត្រូវព្យួរទោស។
លោកត្រូវបានចោទពីបទ «សមគំនិតក្នុងអំពើបន្លំឯកសារសាធារណៈ ប្រើប្រាស់ឯកសារសាធារណៈក្លែងក្លាយ និង ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។
សំណុំរឿងនេះកើតចេញពីការបង្ហោះវីដេអូឃ្លីបមួយ កាលពីថ្ងៃទី ១២ និង ១៣ ខែសីហា ឆ្នាំ ២០១៥ នៅលើទំព័រហ្វេសប៊ុករបស់លោក សម រង្ស៊ី។
នៅក្នុងវីដេអូ ដែលមានរយៈពេលជាង ១០ នាទីនោះសមាជិកព្រឹទ្ធសភាគណបក្ស សម រង្ស៊ី គឺលោក ហុង សុខហួរ បានបរិយាយ អំពីសន្ធិសញ្ញាព្រំដែន កម្ពុជា វៀតណាម ដែលលោកបានរកឃើញ នៅតាមអ៊ីនធឺណិត ដោយសន្ធិសញ្ញាក្លែងក្លាយនោះ សរសេរថា កម្ពុជា-វៀតណាម ព្រមព្រៀងរំលាយព្រំដែន។ ការថ្លែងដូច្នេះឈានដល់ការចាប់ខ្លួនលោក ហុង សុខហួរ ហើយតុលាការ ផ្តន្ទាទោសគាត់ដាក់ពន្ធនាគារ ៧ ឆ្នាំ ប៉ុន្តែលោកត្រូវបានលើកលែងទោសក្រោយពេល សុំទោសលោកនាយករដ្ឋមន្ត្រី ហ៊ុន សែន កាលពីឆ្នាំមុន។
នៅក្នុងសវនាការ កាលពីថ្ងៃម្សិលមិញ លោក សំ សុគង់ មេធាវីរបស់ លោក សម រង្ស៊ី បានថ្លែងថា អតីតមេបក្សប្រឆាំងរូបនេះ មិនបានដឹងអំពីការបង្ហោះវីដេអូឃ្លីបរបស់ លោក ហុង សុខហួរ ទៅក្នុងផេករបស់គាត់ទេ ដោយសារតែនៅថ្ងៃកើតហេតុ លោក សម រង្ស៊ី កំពុងបំពេញបេសកកម្មនៅក្រៅប្រទេស ហើយទំព័រហ្វេសប៊ុករបស់លោក គឺហាក់ដូចជាទូរទស្សន៍សម្រាប់ចែករំលែកព័ត៌មាន ដែលមានអ្នកបង្ហោះព័ត៌មានច្រើននាក់។
លោកថ្លែងថា៖ «ការសម្រេចរបស់សាលាឧទ្ធរណ៍ មានការភាន់ច្រឡំ។ ឯកឧត្តម ហុង សុខហួរ បញ្ជាក់ហើយថា អ្នកថតវីដេអូ គឺ អ៊ឹង ជុងលាង និងឈ្មោះសត្យា សម្បត្តិជាអ្នកបង្ហោះក្នុងផេក ហើយឯកឧត្តម សម រង្ស៊ី ប្រហែលជាមិនដឹងទេ ដោយសារគាត់នៅក្រៅប្រទេស។ ក្រោយពេលបង្ហោះ មានការចាប់ខ្លួន ហុង សុខហួរ។ ដូច្នេះ អ៊ឹង ជុងលាង និង សត្យា សម្បត្តិ ទេជាអ្នកបង្ហោះ តាមការបញ្ជារបស់ឯកឧត្តម ហុង សុខហួរ»។
លោក សំ សុគង់ ថ្លែងបន្តថា ការចោទប្រកាន់កូនក្តីលោក ពីបទសមគំនិតនោះ មិនត្រឹមត្រូវ ដោយលោកបកស្រាយថា សមគំនិត លុះត្រាតែកូនក្តីលោកផ្តល់មធ្យោបាយ ឬ ឧបត្ថម្ភដល់បទល្មើសនោះ។
លោក សុគង់ ស្នើឲ្យតុលាការកំពូលបដិសេធចោលការសម្រេចរបស់តុលាការជាន់ទាប ហើយឲ្យកូនក្តីលោករួចផុតពីបទចោទ។
ប៉ុន្តែតំណាងអយ្យការ ថ្លែងថា ការលើកឡើងថា លោក សម រង្ស៊ី មិនបានដឹងនោះ គឺជាការដោះសាប៉ុណ្ណោះ។
លោក គង់ ស្រ៊ីម ប្រធានចៅក្រមជំនុំជម្រះនឹងប្រកាសសាលដីកានៅថ្ងៃទី ៩ ខែកក្កដា៕