.jpg)
លោក ជូង ជូងី មេធាវីការពារសិទ្ធិឱ្យលោក ហ៊ាង គឹមស្រឿន ថ្លែងទៅកាន់អ្នកសារព័ត៌មាននាពេលកន្លងមក។ ហ៊ាន រង្សី
ភ្នំពេញៈ តុលាការកំពូលពីម្សិលមិញប្រកាសតម្កល់សាលដីកាចាប់ខ្លួនរបស់សាលាឧទ្ធរណ៍ ដែលអនុវត្តលើលោក ហ៊ាង គឹមស្រឿន អនុប្រធានគណបក្សមហាសាមគ្គីជាតិខ្មែរ និងគូកនម្នាក់ទៀតដែលប្តឹងមោឃភាពនឹងដីកាចាប់ខ្លួននេះបន្ទាប់ពីជំនុំជម្រះកាលពីថ្ងៃទី ១៩ តុលា ពាក់ព័ន្ធនឹងការបង្ហោះសារប្រមាថ ពីរឿងឧត្តមក្រុមប្រឹក្សាពិគ្រោះ និងផ្តល់យោបល់។
លោក ជូង ជូងី មេធាវីការពារសិទ្ធិឱ្យលោក ហ៊ាង គឹមស្រឿន ប្រាប់តាមទូរស័ព្ទពីម្សិលមិញ ក្រោយពីបានស្តាប់ការប្រកាសសាលដីកាថា លោក ហ៊ាង គឹមស្រឿន និងលោក ថុល សុផាន់ណា ប្រធានក្រុមយុវជននៃគណបក្សមហាសាមគ្គីជាតិខ្មែរជាកូនក្តីរបស់លោកបានពឹងពាក់លោកក្នុងការប្តឹងសារទុក្ខទៅតុលាការកំពូលប្រឆាំងនឹងដីកាចាប់ខ្លួនគាត់។ តុលាការកំពូលបានបើកសវនាការកាលពីថ្ងៃទី ១៩ តុលាកន្លងមក។ ប៉ុន្តែតុលាការកំពូលបានប្រកាសសាលដីកានៅថ្ងៃទី ២៦ តុលា ដោយសម្រេចតម្កល់តាមសាលដីការបស់សាលាឧទ្ធរណ៍ដដែល។
បើតាមលោកមេធាវីការតម្កល់សាលដីកាចាប់ខ្លួនកូនក្តីរបស់លោកនេះគឺតុលាការកំពូលបានលើកហេតុផល និងសំអាងថាឈ្មោះ ហ៊ាង គឹមស្រឿន គ្មានឯកសារតាមផ្លូវច្បាប់ដូចជាអត្តសញ្ញាណប័ណ្ណ ឬក៏សៀវភៅគ្រួសារ សៀវភៅស្នាក់នៅដែលជាភ័ស្តុតាងបង្ហាញថា ឈ្មោះ ហ៊ាង គឹមស្រឿន មានលំនៅជាក់លាក់ឡើយ។
លោកមេធាវីថ្លែងថា៖ «មានន័យថា ដីកាតាមចាប់ខ្លួននោះគឺនៅដដែល មានន័យថា នៅតែតាមចាប់ខ្លួនអ៊ីចឹងហើយ»។
កាលពីថ្ងៃទី ១៩ តុលា ដែលជាថ្ងៃបើកសវនាការនោះលោកមេធាវី ជូង ជូងី បានប្រាប់ចៅក្រម ថាដើមហេតុនៃសំណុំរឿងនេះ គឺដំបូងឡើយលោក ពេជ្រ ស្រស់ ប្រធានបក្សយុវជនកម្ពុជា បានប្តឹងកូនក្តីរបស់លោក។ ដើមបណ្តឹង បានសរសេរក្នុងពាក្យបណ្តឹងដាក់ថា កូនក្តីរបស់លោកមានលំនៅស្ថិតក្នុងភូមិទួលសង្កែសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ បន្ទាប់មកសាលាដំបូងរាជធានីភ្នំពេញបានចេញដីកាកោះហៅកូនក្តីលោកតាមអាសយដ្ឋានដូចក្នុងពាក្យបណ្តឹង។ ប៉ុន្តែខាងនគរបាលសង្កាត់ទួលសង្កែបានបញ្ជាក់ថា ឈ្មោះ ហ៊ាង គឹមស្រឿន គ្មានឈ្មោះនៅក្នុងប៉ុស្តិ៍រដ្ឋបាលរបស់លោកទេ។ តាមពិតកូនក្តីរបស់លោករស់នៅសង្កាត់ទឹកថ្លា ខណ្ឌ សែនសុខ រាជធានីភ្នំពេញ។
លោកមេធាវី ជូង ជូងី ប្រាប់ចៅក្រមថា៖ «ដោយសារតែតុលាការចេញដីកាកោះហៅខុសអាសយដ្ឋានក៏ចេញដីកាតាមចាប់ខ្លួនកូនក្តីខ្ញុំទៅ»។
ប៉ុន្តែលោក ពេជ្រ ស្រស់ ដែលក៏ជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ដែលជាដើមបណ្តឹងប្រាប់ពីម្សិលមិញដែរថា ការសម្រេចសេចក្តីរបស់តុលាការកំពូលនេះ គឺជាការសម្រេចមួយត្រឹមត្រូវយុត្តិធម៌តាមនីតិវិធីច្បាប់ហើយ ដោយសារតែ លោក ហ៊ាង គឹមស្រឿន បំពានលើសិទ្ធិអ្នកដទៃ ដែលលើសពីច្បាប់កំណត់ទៅទៀត ព្រោះលោក ហ៊ាង គឹមស្រឿន និងគូកនបានបង្ហោះសារថា ឧត្តមក្រុមប្រឹក្សាពិគ្រោះ និងផ្តល់យោបល់ជាក្រុមមួយទ្រពង ទប់ជើងគ្រែមានតំណែងខ្យល់។ល។
លោកថ្លែងថា៖ «ខ្ញុំប្តឹងគាត់ដោយសារគាត់ប្រមាថសមាជិកឧត្តមក្រុមប្រឹក្សាពិគ្រោះ និងផ្តល់យោបល់ដែលប៉ះពាល់ដល់សេចក្តីថ្លៃថ្នូររបស់ក្រុមប្រឹក្សា។ គាត់មានចរិតញុះញង់ឱ្យពលរដ្ឋបាត់បង់ជំនឿលើឧត្តមក្រុមប្រឹក្សា»។
មេបក្សរូបនេះបញ្ជាក់ថា៖ «រឿងនេះយើងមិនអាចទទួលយកបានទេ យើងចាត់ទុកថាជាការប្រមាថដល់ព្រះមហាក្សត្រទៀត ព្រោះឧត្តមក្រុមប្រឹក្សាដំណើរការទៅបាន គឺអាស្រ័យលើព្រះរាជក្រឹត្យ ហើយព្រះរាជក្រឹត្យឡាយព្រះហស្តលេខាពីព្រះមហាក្សត្រ»។
តាមកំណត់ហេតុរបស់តុលាការកំពូល គឺសំណុំរឿងនេះ ត្រូវបានសាលាដំបូងរាជធានីភ្នំពេញចេញដីកានៅថ្ងៃទី ២០ ខែមេសា ឆ្នាំ ២០២០ បង្គាប់ឱ្យសមត្ថកិច្ចចាប់ខ្លួនលោក ហ៊ាង គឹមស្រឿន អនុប្រធានគណបក្សមហាសាមគ្គីជាតិខ្មែរ និងលោក ថុល សុផាន់ណា ប្រធានក្រុមយុវជននៃគណបក្សមហាសាមគ្គីជាតិខ្មែរ។
យោងតាមដីកាស្វែងរកចាប់ខ្លួននោះបានសម្រេចចោទប្រកាន់ ជនត្រូវចោទទាំង ២ នាក់នេះពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងអំពើប្រមាថ» ដែលប្រព្រឹត្តឡើងកាលពីថ្ងៃទី ១០ ខែតុលា ឆ្នាំ ២០១៩ បន្ទាប់ពីលោក ហ៊ាង គឹមស្រឿន បានបង្ហោះសារលើបណ្តាញសង្គមហ្វេសប៊ុកប្រមាថដល់ឧត្តមក្រុមប្រឹក្សាពិគ្រោះ និងផ្តល់យោបល់ពាក់ព័ន្ធករណីអញ្ជើញលោក វ៉ា គឹមហុង បំភ្លឺរឿងព្រំដែនកម្ពុជា-វៀតណាម៕
