ភ្នំពេញៈ តុលាការកំពូលកាលពីម្សិលមិញបានប្រកាសសាលដីកាតម្កល់ទោសបុរសជាប់ចោទម្នាក់ឲ្យជាប់ពន្ធនាគារ ២៥ ឆ្នាំដដែល និងបង្គាប់ឲ្យសាលាឧទ្ធរណ៍ជំនុំជម្រះបុរសម្នាក់ឡើងវិញពាក់ព័ន្ធនឹងករណីជួញដូរគ្រឿងញៀនមេតំហ្វេតាមីន ១ គីឡូក្រាមកាលពីឆ្នាំ ២០១៨។
ការតម្កល់ទោស និងការបង្វិលសំណុំរឿងទៅឲ្យសាលាឧទ្ធរណ៍ជំនុំជម្រះឡើងវិញនេះត្រូវបានលោកចៅក្រម គង់ ស្រ៊ីម គូសបញ្ជាក់នៅចំពោះមុខជនជាប់ចោទដោយផ្អែកទៅលើការសួរដេញដោលជនជាប់ចោទឈ្មោះ នុត លីណា អាយុ ៣២ ឆ្នាំ និងឈ្មោះ យឹម ប៊ុនឆៃ អាយុ ២៨ ឆ្នាំ និងក្រោយពីបានស្តាប់សេចក្តីសន្និដ្ឋានពីមេធាវីការពារសិទ្ធិឲ្យជនជាប់ចោទ។
ក្រៅពីនេះក៏ផ្អែកទៅលើសេចក្តីសន្និដ្ឋានរបស់តំណាងមហាអយ្យការនៅក្នុងសវនាការជំនុំជម្រះកាលពីថ្ងៃជំនុំជម្រះទី ១៨ ខែឧសភា ឆ្នាំ ២០២០ ផងដែរដែលជនជាប់ចោទ យឹម ប៊ុនឆៃ បានទទួលស្គាល់ថា គ្រឿងញៀនមេតំហ្វេតាមីន ១ គីឡូក្រាមនេះខ្លួនបានទទួលពីបុរសម្នាក់នៅផ្លូវលេខ ៣៧១ ម្តុំផ្សារប៉េសេ បន្ទាប់មកខ្លួនយកគ្រឿងញៀននោះទៅប្រគល់ឲ្យមនុស្សម្នាក់ទៀតដែលរង់ចាំទទួលនៅតូបលក់កាហ្វេមួយកន្លែងឈ្មោះ (ដើម្បីអូន) នៅចំណុចផ្លូវបេតុង ភូមិម័ល សង្កាត់ដង្កោ ខណ្ឌដង្កោ។ នៅពេលទៅដល់ទីនោះ នគរបាលខណ្ឌដង្កោព័ទ្ធចាប់បាន។
លោក គង់ ស្រ៊ីម បញ្ជាក់ថាពេលសាកសួរនៅដំណាក់កាលនគរបាល យឹម ប៊ុនឆៃ ឆ្លើយថាខ្លួនស្គាល់ លីណា ប៉ុន្តែពេលសាកសួរនៅតុលាការរាជធានីភ្នំពេញគឺជនជាប់ចោទឆ្លើយថា ខ្លួនមិនបានស្គាល់លីណាទេ។
លោកបន្តថា ចំពោះ លីណា នៅគ្រប់ដំណាក់កាលបានឆ្លើយបដិសេធរហូត និងបានស្នើសុំឲ្យតុលាការឆែកមើលកាមេរ៉ាសុវត្ថិភាពនៅតូបលក់កាហ្វេឈ្មោះ (ដើម្បីអូន) នោះ។ ផ្អែកលើការពិនិត្យលើអង្គហេតុបញ្ជាក់ថា ឈ្មោះនុត លីណា មិនទាន់ឃើញមានការជាប់ពាក់ព័ន្ធនឹងគ្រឿងញៀនច្បាស់លាស់ទេ។ រីឯនៅឧទ្ធរណ៍ក៏មិនបានពិនិត្យឲ្យបានល្អិតល្អន់ទៅលើអង្គហេតុរបស់លីណាដែរ។
តាមអង្គហេតុដែលសាលាឧទ្ធរណ៍ប្រកាសសាលដីកាឲ្យឈ្មោះ យឹម ប៊ុនឆៃ ជាប់ពន្ធនាគារ ២៥ ឆ្នាំគឺជននេះ ពិតជាមានពិរុទ្ធភាព ហើយតុលាការកំពូល សម្រេចតម្កល់ទោសប៊ុនឆៃឲ្យជាប់ពន្ធនាគារ ២៥ ឆ្នាំដដែល។ «លើកលែងតែ នុត លីណា តុលាការកំពូលសម្រេចបង្វិលសំណុំរឿងទៅសាលាឧទ្ធរណ៍ជំនុំជម្រះជាថ្មីឡើងវិញ»។
តាមកំណត់ហេតុរបស់តុលាការបង្ហាញថា ជនទាំង ២ នាក់ត្រូវបានកម្លាំងនគរបាលខណ្ឌដង្កោ ឃាត់ខ្លួនបានកាលពីថ្ងៃទី ៨ ខែកុម្ភៈ ឆ្នាំ ២០១៨ នៅផ្លូវបេតុងក្នុងសង្កាត់ដង្កោ។ ក្នុងពេលប្រតិបត្តិការនោះ សមត្ថកិច្ចបានឆែកក្រោមកែបម៉ូតូជនជាប់ចោទប៊ុនឆៃ ឃើញថ្នាំញៀន ៥ កញ្ចប់ធំស្មើ ១ គីឡូក្រាម និងរឹបអូសម៉ូតូ ២ គ្រឿង គឺម៉ាក ឌ្រីមសង់ស៊េរី ២០១៧ ១ គ្រឿង និងម៉ូតូម៉ាកឌូក ១ គ្រឿង៕