.jpg)
លោក សម រង្ស៊ី ក្រោយចរចានៅរដ្ឋសភាកាលពីឆ្នាំ ២០១៥។ ហេង ជីវ័ន
ភ្នំពេញៈ លោក សម រង្ស៊ី អតីតប្រធានគណបក្សសង្គ្រោះជាតិដែលកំពុងរស់នៅនិរទេសខ្លួនឯក្រៅប្រទេសត្រូវបានតុលាការកំពូលប្រកាសសាលដីកាតម្កល់ទោសដាក់ពន្ធនាគារ ៥ ឆ្នាំដដែលកាលពីម្សិលមិញពាក់ព័ន្ធបទចោទសមគំនិតក្លែងឯកសារព្រំដែនកម្ពុជា-វៀតណាម បន្ទាប់ពីជំនុំជម្រះពីសប្តាហ៍មុន។
លោកអគ្គព្រះរាជអាជ្ញារង អ៊ុក គឹមសិទ្ធ និងជាអ្នកនាំពាក្យតុលាការកំពូលមិនបានបញ្ជាក់លម្អិតពីមូលហេតុនៃការសម្រេចនេះទេ ដោយគ្រាន់តែប្រាប់ថា ករណីនេះត្រូវបានតម្កល់ទោស។
លោកថា៖ «តុលាការកំពូលសម្រេចតម្កល់សាលដីការបស់សាលាឧទ្ធរណ៍ទុកជាបានការដដែល ប៉ុន្តែចំពោះមូលហេតុនៃការសម្រេចតម្កល់សាលដីកានេះខ្ញុំមិនអាចបកស្រាយបញ្ជាក់ជូនបានទេ។ ខ្ញុំគ្រាន់តែជម្រាបថា តុលាការកំពូលតម្កល់សាលដីការបស់សាលាឧទ្ធរណ៍»។
ដោយឡែកលោក សំ សុគង់ មេធាវីការពារសិទ្ធិឲ្យលោក សម រង្ស៊ី ក៏មិនបានអត្ថាធិប្បាយពីករណីដែរ ខណៈដីកាសម្រេចចុងក្រោយ។
លោកបានបញ្ជាក់យ៉ាងខ្លីថា៖ «ការសម្រេចនេះគឺជាការសម្រេចចុងក្រោយដូច្នេះខ្ញុំគ្មានយោបល់អ្វីដែលត្រូវជម្រាបជូនបានទេ» ។
គួររំឭកថាសំណុំរឿងនេះកើតចេញពីការបង្ហោះវីដេអូឃ្លីបមួយកាលពីថ្ងៃទី ១២ និង ១៣ ខែសីហា ឆ្នាំ ២០១៥ នៅលើទំព័រហ្វេសប៊ុករបស់លោក សម រង្ស៊ី។
នៅក្នុងវីដេអូដែលមានរយៈពេលជាង ១០ នាទីនោះសមាជិកព្រឹទ្ធសភាគណបក្ស សម រង្ស៊ី គឺលោក ហុង សុខហួរ បានបរិយាយអំពីសន្ធិសញ្ញាព្រំដែន កម្ពុជា-វៀតណាម ដែលលោកបានរកឃើញនៅតាមអ៊ីនធឺណិតដោយសន្ធិសញ្ញាក្លែងក្លាយនោះសរសេរថាកម្ពុជា-វៀតណាម ព្រមព្រៀងរំលាយព្រំដែន។ ការថ្លែងដូច្នេះឈានដល់ការចាប់ខ្លួនលោក ហុង សុខហួរ ហើយតុលាការផ្តន្ទាទោសគាត់ដាក់ពន្ធនាគារ ៧ ឆ្នាំ ប៉ុន្តែ លោកត្រូវបានលើកលែងទោសក្រោយពេលសុំទោសលោកនាយករដ្ឋមន្ត្រី ហ៊ុន សែន កាលពីឆ្នាំមុន។
ដោយឡែកលោក សម រង្ស៊ី ក្រោយពីសមត្ថកិច្ចរកឃើញថាពាក់ព័ន្ធបទចោទសមគំនិតក្លែងឯកសារនេះ សាលាដំបូងរាជធានីភ្នំពេញបានសម្រេចផ្ដន្ទាទោសដាក់ពន្ធនាគារ ៥ ឆ្នាំដោយត្រូវអនុវត្តទោសពេញ។ រីឯជំនួយការរបស់លោក សម រង្ស៊ី ២ នាក់ម្នាក់ ឈ្មោះ អ៊ឹង ជុងលាង និង សត្យា សម្បត្តិ នោះពួកគេត្រូវបានសាលាដំបូងរាជធានីភ្នំពេញបានផ្តន្ទាទោសដាក់ពន្ធនាគារ ៥ ឆ្នាំដូចគ្នា តែអនុវត្តទោសតែ ៣ ឆ្នាំ សល់ ២ ឆ្នាំទៀតត្រូវព្យួរទោស។
លោក សម រង្ស៊ី ត្រូវបានចោទពីបទ «សមគំនិតក្នុងអំពើបន្លំឯកសារសាធារណៈប្រើប្រាស់ឯកសារសាធារណៈក្លែងក្លាយ និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។
កាលពីថ្ងៃទី ៥ កក្កដាជាថ្ងៃជំនុំជម្រះនៅតុលាការកំពូលលោក សំ សុគង់ មេធាវីរបស់លោក សម រង្ស៊ី បានថ្លែងថាអតីតមេបក្សប្រឆាំងរូបនេះមិនបានដឹងអំពីការបង្ហោះវីដេអូឃ្លីបរបស់លោក ហុង សុខហួរ ទៅក្នុងផេកគាត់ទេ ដោយសារនៅថ្ងៃកើតហេតុលោក សម រង្ស៊ី កំពុងបំពេញបេសកកម្មនៅក្រៅប្រទេស ហើយទំព័រហ្វេសប៊ុករបស់លោកគឺហាក់ដូចជាទូរទស្សន៍សម្រាប់ចែករំលែកព័ត៌មានដែលមានអ្នកបង្ហោះច្រើននាក់។
លោក សំ សុគង់ ថ្លែងបន្តថាការចោទប្រកាន់កូនក្តីលោកពីបទសមគំនិតនោះ មិនត្រឹមត្រូវដោយលោកបកស្រាយថា សមគំនិតលុះត្រាតែកូនក្តីលោកផ្តល់មធ្យោបាយ ឬឧបត្ថម្ភដល់បទល្មើសនោះ៕
